Anga Mono ma Gamo Lega?
Anga Mono ma Gamo Lega?
KA NGAT mo tye ma gamo Lega, ci myero obed Lacwec. Anga ma twero ngeyo tam ma itye kwede ka pe Ngat ma ocweyo adam wi dano? Anga ma twero gamo lega ci miyo kony ma dano gimito? Ento itwero penye kekeni ni, ‘tika nyuto ryeko me bedo ki niye i kom Lacwec?’
Pol pa dano gitamo ni me bedo ki niye i kom Lacwec, omyero ikwer gin ma cayan waco. Kodi tam moni ni bedo ki niye i kom Lubanga pe rwatte ki gin ma cayan waco-ni pe tye ada. Tam kong i kom lok man.
◼ Kwed mo ma pud kitimo cokcok-ki i kom lupwonye ma welgi romo 1,646 dok ma giryek adada i lok me cayan i univaciti 21 ma guywek i lobo Amerika, kinongo ni acel me adek pa lupwonye magi keken aye guwaco ni “pe giye i kom Lubanga.”
Lok ada tye ni lucayan mapol giye ni Lubanga tye.
Gin ma Nyuto ni Lacwec Tye
Tika omyero waye ni tye ngat mo ma Gamo lega labongo gin mo ma nyuto? Pe. Tam man ni niye kare ducu te lokke ni ye gin moni labongo neno kome-ni pe tye lok ada. Baibul gonyo te lok me niye ni obedo “jami a mom oneno komgi kara tye gigi.” (Jo Eburania 11:1, Baibul me leb Lango) Baibul mukene wacci niye “weko wangeyo gin ma pe watwero nenone.” (The New English Bible) Me laporre, pe itwero neno yamo ento itwero neno jami ma yamo timogi ka tye ka kodo calo yengo pot yatgi-gu. Man weko iye labongo akalakala ni yamo kara tye. Kit meno bene, kadi bed ni pe watwero neno ngat ma Gamo lega-ni, ento ka watamo i kom jami ma ginyuto ni en tye, ci bimiyo wabedo labongo akalakala mo keken.
Watwero ngeyone kikwene ni Lubanga tye? Watwero neno kabedo murumowa. Baibul waco ni: “Pien ot mo keken dano aye ma gero, ento ngat ma gero [cweyo] jami ducu en aye Lubanga.” (Jo Ibru 3:4) Tika iye lok man? Oromo bedo ni ka ilwodo lok i kom kit ma kicweyo kwede polo ki lobo, kit ma kwo ocakke kwede, nyo diro ma kicweyo kwede ki jami mapol ata i lobo-ni i yo ma niang iye tek, medo ki adam wi dano, weko itamo ni olo tye ngat mo ma ngecce kato ngec pa dano. *
Ento pe itwero nongo pwony ducu ma dok i kom Lubanga ki i ginacweya. Neno jami ma ginyuto ni ada Lubanga tye ki i ginacweya rom ki ngat ma oloro wiye i ot ci tye ka winyo kor tyen dano mo ma tye ka wot ki woko. Ibingeyo ni ngat moni tye woko, ento tika ingeyo ngat meno? Wek inge ngat meno, omyero iyab doggola. Myero bene watim gin macalo meno wek wange Ngat ma ocweyo jami ducu-ni.
Baibul obedo doggola me ngec i kom Lubanga. Ka iyabo Baibul wek inen lok pa lunebi kacel ki cobbe-gi, ci ibinongo jami ma ginyuto ada ni Lubanga tye. * Ento makato meno, ibineno rekod i kom kit ma Lubanga ogwoko kwede jone ma nyuto ni en obedo ngat ma Gamo lega.
Ngat ma Gamo Lega-ni Mono Tye Nining?
Baibul tito ni watwero ngeyo ngat ma Gamo lega-ni macalo dano adana. Ki lok ada, dano keken aye twero winyo lok dok niang iye maber adada. Pud dong jingo cwiny ka wakwano ni: “Pien in aye ma igamo lega-gu ducu. Dano ducu gibibino boti.” (Jabuli 65:2) En gamo lega pa jo ma gilego bote ki niye. Dok en tye ki nyinge. * Baibul tito ni: ‘Rwot [Jehovah] tye cen ka mabor ki bot jo maraco, ento winyo lega pa dano ma kite atir.’—Carolok 15:29.
Jehovah bene winyo ki i cwinye calo wan. En “Lubanga ma won mar” dok obedo ‘Lubanga ma layomcwiny.’ (2 Jo Korint 13:11; 1 Temceo 1:11. NW) Ma lubbe ki kit ma en owinyo kwede i kare ma bal opongo lobo, Baibul wacci man “ocwero cwinye matek.” (Acakki 6:5, 6) Lok man ni Lubanga temo dano kun weko gideno can-ni pe tye atir. Baibul waco ni: “Lubanga pe twero timo gin marac kadi ki acel.” (Yubu 34:10) Kadi bed kumeno, pud itwero penye kekeni ni, ‘Ka ada Lubanga aye Ocweyo jami ducu, ci pingo en pud weko dano medde ki deno can?’
Jehovah omiyo dano tye agonya me moko tamgi pigi kengi, meno nyutiwa kit pa Lubanga. Tika watero bedo agonya ma kiminiwa me yero kit ma myero wakwo kwede-ni calo gin ma pire tek? Ento tye me cwercwiny ni dano mapol gitye ka tic ki bedo agonya-ni i yo marac dok man kelo peko i komgi ki bot jo mukene. Man aye lapeny ma myero itam iye matek adada: Lubanga mono twero jwayo deno can nining labongo kwanyo bedo agonya ma dano gitye kwede-ni? Wabinyamo lapeny-nyi i pwony ma lubo man.
[Lok ma tye piny]
^ Pi ngec mukene me nyuto ni ada Lubanga tye, nen brocuwa me The Origin of Life—Five Questions Worth Asking ki buk me Is There a Creator Who Cares About You? gin ducu Lucaden pa Jehovah aye gucoyo.
^ Brocuwa me A Book for All People ki buk me The Bible—God’s Word or Man’s? ma Lucaden pa Jehovah aye gucoyo-ni, kicoyogi me konyi wek iniang gin ma nyuto ni Baibul obedo buk pa Lubanga.
^ I Baibul me leb Acholi, i Nia 3:15, inongo kiketo itere piny ngec ma wacci ‘Leb Ibru: YHWH (Yawe).’
[Bok i pot karatac 5]
Tika Dini Weko Ibedo ki Akalakala?
Tye me cwercwiny ni dini oweko dano mapol gitye ki akalakala ka ada ngat ma Gamo lega-ni paro pi dano. Pien ludini gidonyo i lweny, tyer ki bom i kin dano, ki dong nywaro lutino, man oweko kadi wa jo ma gitye ki cwiny me lego giwacci “pe giye i kom Lubanga.”
Pingo jami maraco timme i nying dini? Pienni jo ma kitgi raco gitimo jami maraco i nying dini. Baibul otito ka maleng ni jo maraco gibidonyo i dini ci gibitic kwede i yo ma pe cobo miti pa Lubanga. Lakwena Paulo owaco ki luneno me kacokke ni: “Dok i kin wun kikomwu bene bia iye jo ma gibiloko lok ma ngako dano ci gibwolo lupwonnye miyo gilubo korgi.”—Tic pa Lukwena 20:29, 30.
Lubanga dag dini goba. Lok pa Lubanga waco ni, dini goba bigamo pi “remo pa jo ducu ma yam ginekogi i lobo.” (Niyabo 18:24) Pien dini goba pe gupwonyo dano ki lok i kom Lubanga me ada, ma kite ma pire tek loyo aye Mar-ri, man oweko dini goba cinggi ki remo i wang Lubanga.—1 Jon 4:8.
Ngat ma gamo lega-ni paro pi jo ma dini goba tye ka unogi. Cokcok-ki, pi mar ma Lubanga tye kwede pi dano, en bingolo kop i kom dini goba kun tiyo ki Yecu. Yecu owaco ni: “jo mapol biwaco bota ni, ‘Rwot, Rwot, yam pe watito lok pa Lubanga . . . i nyingi?’ Ci abituco botgi ka maleng ni, ‘Onongo pe angeyowu; wua woko ki bota, wun lutim gin maraco.’”—Matayo 7:22, 23.
