Gwokke Ki I Owic Pa Catan!

‘A woko . . . ki i owic pa Catan ma onongo yam omaki kwede.’​—2 TEM. 2:26.

IN IROMO GAMONE NINGO?

Ngo ma myero watim ka wanongo ni odoko kitwa me lok marac i kom jo mukene?

Gin ango ma wapwonyo ki i lanen pa Pilato gin ki Petero ma lubbe ki ye lyeto ma a ki bot luwotwa nyo lworo?

In itwero gwokke nining wek pe ibed ki poto cwiny mukato kare woko?

1, 2. Owic mene ma Larac-ci tiyo kwede ma wabinyamo ipwony man?

 LARAC-CI pud tye ka libo lutic pa Jehovah. Mitine pe tye me nekogi kit ma ladwar neko kwede lee-ni. Ento miti pa Larac-ci tye me makogi makwo wek eti kwedgi kit ma iye mito.​—Kwan 2 Temceo 2:24-26.

² Me mako lee makwo, ladwar twero tic ki owic mo keken me mako lee. En twero ryemo lee dwoko tung ka ma eciko iye tol wek tol-li ode lee meno adeya. Nyo twero tic ki akuma ma ka lee otugo litap, ci tugi poto atura ryebbe i wiye cut. Larac-ci bene tiyo ki kodi owic ma kit meno me mako lutic pa Lubanga. Ka wamito ni pe kimak wa, ci omyero wagwokke dok wabed ma wangwa twolo me neno lanyut ma cimo ni owic pa Catan tye cok. Pwony man binyamo kit ma watwero gwokke kwede ki i owic adek mapat pat ma Larac-ci obedo ka tic kwede me mako dano. Gin aye (1) lok labongo juko leb, (2) lworo ki lyeto ma a ki bot luwotwa, ki dong (3) poto cwiny mukato kare pi bal ma watimo con. Pwony ma lubo man binyamo owic aryo mukene ma Catan tiyo kwede.

JUK LEBI WEK PE I CWINY MAC I KACOKKE

3, 4. Gin ango ma romo timme ka pe wajuko lebwa? Mi labol.

³ Ludwar mogo gicwinyo lum wek lee gungwec ki ka ma gukane iye ka dong gicako nekogi. I yo ma kit meno Larac-ci tye ki miti me cwinyo mac i kacokke. Ka dong en ocwinyo, man miyo omege ki lumege gingweco woko ki i kacokke ka ma gukane iye. Wan waromo konyo kor Larac-ci labongo ngeyone nining ma nyuto ni wan dong watyeko moko i owicce?

 ⁴ Lapwonnyene Yakobo oporo leb ki mac. (Kwan Yakobo 3:6-8.) Ka pe watwero juko lebwa, ci wan aye waromo cako mac i kacokke. Waromo timo man nining? Tam kong gin man mutimme ni: I kacokke, kimiyo i lok angeya ni laminwa mo acel kityeko cimone me doko painia marii. I nge cokke, lumego aryo ma gitye lutit kwena gucako lok i kom lok angeya man ma kimiyo-ni. Ngat acel cwinye obedo yom me winyo lok angeya man dok owacci Jehovah ogo laa i kom painia man manyenni. Lamego acel tye ki akalakala i kom painia-ni dok owacci en mito ni wang dano ducu ma i kacokke obed i kome. I kin lutit kwena aryo-ni, mene ma iromo yerone me bedo laremi? Pe tek me ngeyo i kin lutit kwena aryo-ni anga ma romo cwinyo mac i kacokke.

5. Gin ango ma myero watim me juko lebwa wek pe wacwiny mac i kacokke?

⁵ Wan waromo juko lebwa nining wek pe wacwiny mac i kacokke? Yecu owaco ni: “Pien lok ma ogurre i cwiny dano, en aye dog bene loko.” (Mat. 12:34) Yo me acel aye me ngiyo cwinywa. Tika wakwero cwiny marac ma weko waloko lok ma wango i dano? Me laporre, ka wawinyo ni omego mo tye ka tute me bedo mupore me tic i kacokke, tika wabibedo ki akalakala nyo watamo ni mitine tye ka mukene? Ka watamo tam marac kit man, ci wiwa myero opo ni Larac-ci oketo akalakala i kom Yubu, latic pa Lubanga. (Yubu 1:9-11) Ma ka bedo ki gung cwiny i kom omegiwa, omyero kong watam pingo waloko marac i komgi. Tika tye tyen lok mo matir ma weko waloko marac i komgi? Nyo kece yamo marac ma tye ka kodo i kare man me agikki piny-nyi owolo cwinywa woko?​—2 Tem. 3:1-4.

6, 7. (a) Pi tyen lok mene mumiyo watwero loko lok marac i kom jo mukene? (b) Ngo ma myero watim ka ce kiyetowa?

⁶ Nen kong tyen lok mukene mumiyo waromo loko lok marac i kom luwotwa. Mukwongo, oromo bedo ni wamito ni dano gunge ni gin moni-ni wan aye watimo. Ma weko dong nen calo iwacci jo mukene-ni konygi pe. Onyo wacako gengo ngewa ka ce pe watimo gin moni ma myero watim-mi. Kono cwiny me awaka nyo nyeko aye tye ka yelowa, rac tutwal.

⁷ Twero bedo ni watamo ni pe rac ka watye ka lok marac i kom ngat mo. Oromo bedo ni en bene obedo ka lok marac i komwa. Ka tye kumeno, culo kwor pol kare pe obedo gin maber. Meno medo mac keken dok nongo itye ka timo miti pa Catan ento pe pa Lubanga. (2 Tem. 2:26) Omyero walub lanen pa Yecu. I  kare ma guyete, “en pe oyetogi.” Ma ka meno, en “omine kene bot ngat ma ngolo kop atir.” (1 Pet. 2:21-23) Yecu onongo geno ni Jehovah bicobo jami ducu kit ma En mito kwede ki bene i karene. Wan bene myero waket genwa ducu i kom Lubanga. Ka watiyo ki lebwa me kweyo cwiny dano, wakonyo me gwoko “twec me kuc” i kacokkewa.​—Kwan Jo Epeco 4:1-3.

PE IWEK LWORO KI LYETO MA A KI BOT LUWOTI ODEYI

8, 9. Pingo Pilato ongolo to i wi Yecu?

⁸ Lee ma omoko i kwak pe tye agonya me wot ka mo keken. I yo acel-lu, ka ngat mo weko lworo ki lyeto ma a ki bot luwote bwoyo tamme, en nongo dong pe twero loyo kwone. (Kwan Carolok 29:25.) Kong dong wanyamu lanen pa co aryo ma guye lyeto ma a ki bot luwotgi kacel ki lworo odiyogi ki dong gin ma wapwonyo.

⁹ Pilato, Gabuna me Roma, onongo ngeyo ni Yecu pe labal dok bene onongo pe mito ni kinek Yecu. I ada, Pilato owaco ni Yecu “pe otimo gin mo ma myero gineke pire.” Kadi bed en oloko kit meno, Pilato ongolo to i wi Yecu. Pingo? Pien Pilato oweko lyeto ma a ki bot dano odiye woko. (Luka 23:15, 21-25) Lujudaya magi guketo lyeto i kome wek otim mitigi kun giwo ni: “Ka igonyo dano man, ci in pe larem Cecar.” (Jon 19:12) Pilato nen calo obedo ki lworo ni ebirwenyo dog ticce​—nyo bene kwone​—ka ecwako Kricito. Pi man, en oye me tiyo miti pa Larac-ci.

10. Gin ango ma oweko Petero okwero Kricito?

¹⁰ Lakwena Petero onongo obedo ngat acel i kin lurem ma gicok adada ki Yecu. En kikome otito ni Yecu aye Kricito. (Mat. 16:16) Petero obedo lagen i kare ma lupwonnye mukene pa Yecu pe guniang lokke ci Guweke woko. (Jon 6:66-69) I kare ma lumone pa Yecu gubino ka mako Yecu, Petero otiyo ki pala lucwan me lweny pi Laditte. (Jon 18:10, 11) Lacen, lworo omako Petero ci okwero woko ni pe engeyo Yecu Kricito. Pi cawa manok keken, owic me lworo dano omako Petero kun gengo en pe me bedo ki tekcwiny me timo gin matir.​—Mat. 26:74, 75.

11. Jami maraco mene ma myero wanen-ni walwenyo kwedgi?

¹¹ Wan macalo Lukricitayo, omyero pe waye lyeto ma a ki bot luwotwa ogengwa me timo jami ma yomo cwiny Lubanga. Lutic luwotwa nyo jo mukene giromo bitowa me kwanyo jami ki i opic nyo donyo itim me tarwang. Lutino kwan myero gulweny ki lyeto ma luwotgi diyogi kwede me kwalo peny, neno cal ki coc ma tugo miti me buto, mato taa, tic ki yadi calo jayigi-gu, mato kongo, nyo donyo itim me tarwang. Ci dong, ngo ma romo konyowa me bwot ki i owic me lworo ki lyeto ma a ki bot luwotwa ma weko pe wayomo cwiny Jehovah?

12. Pwony ango ma wanongo ki bot Pilato gin ki Petero?

¹² Kong wanenu pwony ma waromo nongone ki i lanen pa Pilato gin ki Petero. Pilato onongo ngecce nok i kom Kricito. Ento kadi bed kumeno, en onongo ngeyo ni Yecu pe labal dok pe latedero mo ata. Ento Pilato onongo pe ki cwiny me mwolo ki mar pi Lubanga me ada. Larac-ci otugi make makwo cut. Petero onongo tye ki ngec matir kacel ki mar pi Lubanga. Ento i kine mukene en pe obedo mwol, lworo omake, ci oye lworo ma a ki bot luwote odiye. Ma peya kimako Yecu, Petero owakke ni: “Kadi ka jo mukene ducu gibitenyi woko, ento an pe abitenyi ata.” (Mar. 14:29) Ka Petero  onongo oketo genne i kom Lubanga kit ma laco jabuli otimo kwede-ni, en onongo kono oyubbe pi atematema ma ebirwatte kwede. Laco Jabuli owero ni: “Rwot [Jehovah] tye kweda, pe abilworo gin mo. Dano kono twero timo gin ango bota?” (Jab. 118:6) I dyewor me agikki ma Yecu okwo kwede i lobo, en otero Petero ki lukwena aryo mukene i poto me Gececemane. Ma ka bedo ma wanggi twolo, Petero gin ki luwote guywayo nino matek. Yecu ocoyogi ci owaccigi ni: “Wuki, wuleg Lubanga, wek pe wudony i abita mo.” (Mar. 14:38) Petero dok aye onino woko ci lacen oye lworo ki lyeto ma a ki bot luwote odiye.

13. Wan watwero lweny ki lyeto ma weko watimo gin marac nining?

¹³ Lanen pa Pilato gin ki Petero-ni pwonyowa ni loyo lyeto ma a ki bot luwotwa kwako bedo ki ngec matir, mwolo, mar pi Lubanga, ki dong lworo Jehovah ento pe dano. Ka niyewa cung i kom ngec matir, ci wabitito ki tekcwiny pi gen ma watye kwede bot jo mukene. Man bikonyowa me lweny ki lworo nyo lyeto ma a ki bot luwotwa. Kono tye ni pe myero waca kero ma watye kwede. Ma ka meno omyero waye ni wamito kero pa Lubanga wek walweny ki lyeto ma a ki bot luwotwa. Mitte ni myero waleg pi cwiny pa Jehovah kun marwa pire miyo watimo jami ma pe balo nyinge ki dong wagwoko cikke. Medo i kom meno, omyero bene wayubbe con ma peya warwatte ki lyeto mo keken. Me lapore, yubbe con medo ki lega romo konyo lutinowa me miyo lagam mucwiny ka luwotgi bitogi me timo gin mo marac.​—2 Kor. 13:7. *

GWOKKE KI OWIC MA POTO, POTO CWINY MUKATO KARE

14. Ma lubbe ki bal ma watimo con, cwiny ango ma Larac-ci mito ni wabed kwede?

¹⁴ I cawa mukene kiciko kidi nyo dul yen mapek i yo ma lee gimaro wot iye. Lee ma nongo woto ata twero tugo owic man ci dul yen nyo kidi-ni tugi poto i i wiya atura neke woko. Bedo ma nongo cawa ducu cwinyi poto kitwero porone ki owic ma poto i wi lee. Ka cawa ducu watamo pi bal mo ma watimo con, ci waromo bedo ma nongo komwa “onyongnge woko adada.” (Kwan Jabuli 38:3-5, 8.) Catan mito ni wabed ki cwiny ni Jehovah pe dong twero timiwa kica pi bal ma watimo con dok bene pe waromo kwo ma lubbe ki Cikke.

15, 16. Itwero gwokke nining ki i owic me poto cwiny pi bal mutimme con?

¹⁵ I yo ango ma itwero gwokke kwede ki i owic man ma poto apota-ni? Ka ce itimo bal mo marac, tute dong kombeddi me yubo watti wun ki Jehovah. Lok ki luelda, dok ipeny pi konygi. (Yak. 5:14-16) Yelle me yubo bal ma itimo. (2 Kor. 7:11) Ka kimini tira pe cwinyi otur. Tira nyuto ni Jehovah tye ki mar madit i komi. (Ibru 12:6) Mok tammi pe me nwoyo bal ma itimo-ni, dok tute matek me timo gin matir. Lacen, ka dong ingut kun iweko balli, bed ki niye i kom ginkok pa Yecu Kricito ni twero kwanyo bal-li.​—1 Jon 4:9, 14.

¹⁶ Jo mukene cwinygi obedo ka poto pi bal ma gutimo con kadi bed ni dong kitimigi iye kica. Ka in bene iwinyo kumeno, wi myero opo ni Jehovah otimo kica bot Petero kacel ki lukwena mukene-ni pienni guweko Wode me amara i kare ma onongo Yecu mito kony adada. Jehovah bene otimo kica bot laco mo ma onongo kiryemo woko ki i kacokke me Korint pi timo abor ento lacen  laco-ni ongut. (1 Kor. 5:1-5; 2 Kor. 2:6-8) Lok pa Lubanga loko i kom jo mogo ma gutimo bal madongo adada ma Lubanga otimigi kica i kare ma gungut pi balgi.​—2 Tekwaro 33:2, 10-13; 1 Kor. 6:9-11.

17. Gin ango ma ginkok-ki twero timo piwa?

¹⁷ Jehovah bitimmi kica dok bene wiye biwil woko i kom bal ma itimo con ka ingut ki cwinyi ducu kun ijolo kicane. Pe myero itam ni ginkok pa Yecu ni pe romo kwanyo balli. Ka itimo meno nongo itye ka poto i owic pa Catan. Larac-ci mito ni ibed ki akalakala i kom ginkok-ki, ento nge ni ginkok-ki twero kwanyo bal pa dano ducu ka gungut. (Car. 24:16) Keto niye i kom ginkok-ki twero konyi me lweny ki poto cwiny dok twero mini tekcwiny me medde ki tic pi Jehovah ki cwinyi, tammi, ki dong kwoni ducu.​—Mat. 22:37.

WAN PE WAKWIYA DIRO PA CATAN

18. Wan waromo gwokke ki i owic pa Larac-ci nining?

¹⁸ Catan pe yero owic mene ma myero eti kwede, ento gin ma pire tek bote aye tekke etwero makowa. Kit macalo pe wakwiya diro pa Catan-ni, wan watwero gwokke wek en pe olowa. (2 Kor. 2:10, 11) Pe wabipoto i owic-ce ka ce walego pi ryeko wek walweny ki atematema. Lakwena Yakobo ocoyo ni: “Ka ce tye ngat mo i kinwu ma ryekone nok, myero en oleg Lubanga ma miyo bot jo ducu ki yomcwiny, kun pe twono ngat mo; ci bimiye.” (Yak. 1:5) Omyero watim jami ma rwatte ki legawa kun wakwano kwan matut piwa kekenwa ki dong waketo i tic jami ma wakwanogi ki i Lok pa Lubanga. Jami ma konyowa me kwan ma lagwok ot ma lagen dok maryek miniwa miyo waniang owic ma Larac-ci ciko dok konyowa me gwokke ki i komgi.

19, 20. Pingo omyero wadag gin marac?

¹⁹ Lega kacel ki kwano Baibul konyowa me dongo mar ma weko watimo jami mabeco. Pire bene tek ni myero wadag jami maraco. (Jab. 97:10) Wagwokke kun pe watimo jami maraco ka watamo pi adwogi marac ma bino ingeye. (Yak. 1:14, 15) Ka wapwonye me dago gin marac kun wamaro gin maber, ci jami ma Catan tiyo kwedgi me makowa-ni pe bibitowa pienni nongo wadaggi.

²⁰ Pud dong watye ki pwoc madit atika ni Lubanga konyowa wek Catan pe olowa! Kun tiyo ki cwiny mere maleng, Lokke, kacel ki dul mamege, Jehovah larowa “i bang Arac.” (Mat. 6:13, Baibul me leb Lango) I pwony ma lubo man, wabipwonyo kit ma waromo gwokke kwede ki i owic aryo mukene ma Larac-ci onongo ni tiyo maber adada me mako makwo lutic pa Lubanga.

[Lok ma tye piny]

[Peny me Kwan]

[Cal ma tye i pot karatac 24]

Ka pe wajuko lebwa, ci watwero cwinyo mac i kacokke

[Cal ma tye i pot karatac 27]

Itwero bolo yec me poto cwiny mukato kare woko