Pingo Ngat ma Gamo Lega-ni Weko Dano Deno Can?

KADI bed gilego, jo mukene pud gitye ki akalakala ka ada Lubanga tye. Pingo gitye ki akalakala? Twero bedo ni pien gineno can mapol ma dano tye ka denone i lobo. Tika dong i penye kekeni pingo Lubanga weko dano deno can?

Tika tye lok ada ni Lubanga ocweyo dano me kwo kit ma gitye ka kwo kwede i kare-ni​—me bedo luroc ki deno can? Pe watwero woro lubanga ma mito ni dano guden can. Ento kong itam i kom lok man: Ket kong ni itye ka kato ki ka nget mutoka mo maleng adada ento ineno ni bal tye i kome, tika ibiwaco ni mutoka-ni kiyubo kumeno? Pe wacel! Ibiwacci layub mutoka-ni oyubo “maber” ento ngat mo aye obalo.

I yo acel-lu, ngo ma ibiwaco ka itamo i kom kit ma kicweyo kwede ginacweya ducu i yo mamwonya ki dong kit ma dano gunywene kwede ki dong tim me camucana ma obalo dano ducu-ni? Baibul pwonyo ni Lubanga ocweyo dano mukwongo labongo roc mo keken ento lacen gin aye guballe pigi kengi. (Nwoyo Cik 32:4, 5) Kwena maber-ri tye ni Lubanga ocikke me kwanyo roc woko ki i kom jo ma gin lugen. Pingo kono dong Jehovah otero kare malac?

Pingo Jehovah Otero Kare Malac?

Lagamme jenge i kom anga ma tye ki twero me loyo lobo. Jehovah onongo pe mito ni dano gulone kengi. En aye onongo myero obed Lalocgi. Baibul waco ni: “Pe tye ngat mo ma tye ki twero me loyo kwone.” (Jeremia 10:23) Tye me cwercwiny ni Adam gin ki Kawa gujemo i kom loc pa Lubanga. Timgi-ni oweko gudoko  lubalo. (1 Jon 3:4) Macalo adwogine, gudoko luroc wa likwayogi bene.

Pi mwaki alip mapol, Jehovah oye ki dano me lone kengi, dok locgi onyuto ka maleng ni pe gitye ki kero me lone kengi. Ada, man nyuto ni gamente ducu pa dano aye ma okelo deno can. Pe tye mo keken i kingi ma twero giko lweny, tim bwami, ngolo kop alenga nyo two.

Lubanga Bikwanyo Adwogi pa Bal Nining?

Baibul wacci Lubanga ocikke ni cokcok ebikelo lobo manyen ma jo ma kitgi atir bibedo iye. (2 Petero 3:13) Jo ma giyero me maro jo mukene ki dok me kwo i yo ma lubbe ki mitti pa Lubanga keken aye kibiye ni gubed iye.​—Nwoyo Cik 30:15, 16, 19, 20.

Baibul bene wacci “nino me ngolo kop” dong tye cok, nino ma Lubanga bikwanyo peko ducu ki jo ma tye ka kelone. (2 Petero 3:7) I ngeye, Kabaka ma Lubanga ocimo, Yecu Kricito, biloyo jo ma gimwol. (Daniel 7:13, 14) Loc pa Yecu bikelo adwogi ango? Baibul wacci: ‘Ento jo mamwol aye gibicamo lobo; gibibedo ki yomcwiny pi kuc madwong ma gibilimo.’​—Jabuli 37:11.

Macalo Kabaka me polo, Yecu bikwanyo adwogi me bal ducu​—man kwako two, tiyo, ki dong to​—ma obino pi jemo pa dano i kom Jehovah, ma en “wang it me kwo ducu.” (Jabuli 36:9) Yecu bicango jo ducu ma giye locce. I te locce, cikke magi ma tye i Baibulli bicobbe:

◼ “Pe tye dano mo ma bedo i lobowa ma biwaco ni, ‘An koma lit.’ Jo ma bedo iye ducu gibitimo botgi kica pi balgi.”​—Icaya 33:24.

◼ “En [Lubanga] bijwayo pig wanggi woko ducu. To bene dong bibedo pe, kadi  kumo nyo koko, nyo arem, pien gin macon dong ducu gurwenyo woko matwal.”​—Niyabo 21:4.

Pud dong kweyo cwiny me ngeyone ni Lubanga dong cok ki cobo cikkene me jwayo peko ducu! Kitungcel, omyero pe wabed ki akalakala ni en pe gamo legawa pien pud oweko deno can tye ka medde wa i kare-ni.

Lubanga tye. En winyo lega ni, kadi arem kacel ki turcwiny ma itye kwede. Dok bene Lubanga tye ki mitti me nenoni i kwo ki yomcwiny ka nongo peko ducu dong pe.