Tika Tye Ngat Mo ma Gamo Lega?

“Abedo ki gung cwiny ka ada Lubanga tye. Ento kadi bed kumeno, onongo gire alego i kine mogo. Pe onongo ageno atir atir ka ngat mo tye ma gamo lega, ento omyero awac ni abedo ki gen ni ngat mo olo to tye. Iya onongo cwer dok abedo ka neno kwo calo gin ma konye pe. Anongo tek tutwal me ye ni Lubanga tye, pien onongo atamo ni jo ma peko odiyogi keken aye giye ni en tye.”​—PATRICIA, * bedo i lobo IRELAND.

TIKA nino mo iwinyo i kwoni kit ma Patricia owinyo kwede-ni? Tika ilego kadi bed ni cwinyi gung ka ce ada Lubanga tye? Ka tye kumeno, ci pe itye keni. Tam kong i kom lok magi.

◼ I kwed mo ma kitimo i lobo Biritic, kinongo ni i kom dano 2,200 ma kipenyo tamgi, dano 22 i kom 100 keken aye giye ni Lubanga ma ocweyo lobo-ni tye dok bene gamo lega. I kin jo ma kipenyogi-ni, kinongo bene ni 55 i kom 100 gilego kicel kicel adada.

◼ I kom dano 10,000 ma kipenyo tamgi itwok lobbe mapat pat, kinongo ni dano 30 i kom 100 ma giwacci Lubanga pe matwal-li pud gilego gire.

Pingo Gibedo ki Akalakala?

Laco mo ma nyinge Allan dok tye anywali me lobo England owaco ni: “Pol kare onongo amaro wacci pe aye i kom Lubanga pien abedo ki tam ni dini kicako me loyo dano ki dong tiyo cente. Dok bene, abedo ki tam ni ka ada Lubanga tye, ci onongo kono peko pe onya kit man. Ento, i cawa mukene abedo laling ci anongo ni atye ka lok ki ‘gin mo olo.’ Apenye bene kekena ni, ‘Pingo atye i lobo kany?’”

Meno dong lubo kit ma ngat acel acel tamo kwede ka ce ada ngat mo tye ma gamo lega. Man polle timme ka pe wanongo lagam pi lapenywa mogo calo:

◼ Lacwec tika ada tye?

◼ Pingo dini tye ka kelo pekki mapol?

◼ Pingo Lubanga weko dano deno can?

Tika onongo ibibedo ki gen i kom lega, ka onongo itwero nongo lagam pi lapeny magi?

[Lok ma tye piny]