Wukwo Calo Dano Me Ker-ri!
Wukwo Calo Dano Me Ker-ri!
“Wukwo calo dano me Ker-ri.”—PIL. 1:27, NW.
IN IROMO GAMONE NINGO?
Anga ma twero bedo dano me Ker-ri?
Gin ango ma myero watim madok i kom leb, tekwaro, ki dong cik me Ker-ri?
Dano me Ker-ri ginyuto nining ni gimaro cik pa Lubanga?
1, 2. Pingo tira ma Paulo omiyo bot kacokke me Pilipi-ni pire tek adada?
LAKWENA Paulo ocuko cwiny kacokke me Pilipi ni: “Kit kwo me bedowu myero orwatte ki gin ma lok me kwena maber i kom Kricito mito.” (Kwan Jo Pilipi 1:27.) Nyig lok me leb Grik ma Paulo otiyo kwede kany ni “kit me bedowu” twero bene gonye ni “wukwo calo dano me Ker-ri.” Man obedo lok ma pire tek adada bot jo me kacokke me Pilipi. Pingo? Pien Pilipi nen calo onongo tye i kin boma mogo ma kiyerogi wek jone gubed i te Ker me Roma. Anywali me Roma ma gikwo i Pilipi ki dong itwok lobo ducu me Roma onongo giwakke pi bedo Luroma pienni onongo kiminigi gwok muromo makato jo mukene.
2 Jo me kacokke me Pilipi onongo gitye ki tyen lok matir me wakke. Ento, Paulo opoyo wi Lukricitayo magi ma kiwirogi-ni ni “wan gang kalwa madit tye i polo.” (Pil. 3:20) Gin pe gitye i te ker pa dano mamwa-ni, ento gitye dano me Ker pa Lubanga. Pi meno, gin ginongo gwok muromo kacel ki mot mapol.—Ep. 2:19-22.
3. (a) Angagi ma gitye ki mot me bedo dano me Ker-ri? (b) Gin ango ma wabineno ipwony man?
3 Tira ma Paulo omiyo ni “wukwo calo dano me Ker-ri” tye bene pi jo ma gibiloc kacel ki Kricito i polo. (Pil. 3:20) Ento pwony ma iye konyo bene romi mukene-ni, ma gibibedo i te loc me Ker-ri i lobo kany. Pingo? Pien Lukricitayo ducu ma gudyere gitiyo pi Jehovah, Kabaka acel keken-ni, ticgi myero orwatte ki rwom me kwo ma en oketo. (Ep. 4:4-6) I kare-ni, dano giyelle matek me doko anywali me lobo moni ka ce lobone olony. Man te lokke ni doko dano me Ker-ri pire tek adada botwa! Wek wabed ki pwoc madit atika pi mot man, kong dong wanenu kit ma jami ma gimitte me doko anywali me lobo moni girwatte kwede ki me doko dano me Ker pa Lubanga. I ngeye wabineno jami adek ma myero watimgi wek wamedde ki bedo dano me Ker-ri.
JAMI MA MITTE ME DOKO DANO ME KER-RI
4. Leb matir-ri obedo gin ango, dok “waloko” leb man nining?
4 Pwony lebbe. Gamente mogo gimito ni ka ngat mo mito doko anywali me lobone, en myero kong opwony leb me lobo meno. Kadi bed kiye, jo mukene gitute pi mwaki mapol me pwonyo leb me lobo meno. Gitwero pwonyo kit ma myero kilwong kwede jami mogo ento giromo tero kare me lwongone maber. I yo acel-lu bene, Ker pa Lubanga mito ni danone gupwony gin ma Baibul lwongo ni “leb matir.” (Jep. 3:9, NW) Leb matir-ri obedo gin ango? Obedo lok ada i kom Lubanga kacel ki yubbe kit ma kicoyo kwede i Baibul. Wan “waloko” leb matir-ri ka ce kit me kwowa rwatte ki cik ki pwony pa Lubanga. Dano me Ker pa Lubanga giromo pwonyo pen pwony mogo me Baibul oyotoyot adada ci ginongo batija. Ento kadi bed dong gunongo batija, gin pud myero gumedde ki “loko” leb matir-ri i yo maber dok ma niange. I yo ango? Wan ducu ki acel acel omyero watute matek me keto i tic jami ma wapwonyogi ki i Baibul.
5. Pingo omyero wanong ngec mapol madok i kom dul pa Jehovah?
5 Nge tekwarone. Ngat ma mito doko anywali me lobo moni myero kong obed ki ngec mo manok i kom tekwaro pa lobo meno. I yo acel-lu, jo ma gimito doko dano me Ker-ri myero gupwony ki cwinygi ducu lok i kom Ker pa Lubanga. Tam kong i kom lanen pa lutino pa Kora, ma onongo gitiyo i kare pa Luicrael macon ca. Gin onongo gimaro Jerucalem kacel ki kabedone me woro dok bene onongo gimaro lok i kom tekwarone. Pe jami calo got nyo daba ma kicweyo ki Jerucalem-mi aye onongo yomo cwinygi, ento gin ma kabedo me woro meno onongo cung pire. Jerucalem onongo tye “gang pa Kabaka madit,” Jehovah, pien onongo tye centa madit me woro. Kunnu aye ka ma onongo kipwonyo iye Cik pa Jehovah. Jo ma Jehovah cwako dok marogi aye jo ma onongo gitye i te loc pa Kabaka me Jerucalem. (Kwan Jabuli 48:1, 2, 9, 12, 13.) Calo lutino pa Kora, tika itye ki miti me ngeyo ki dong tito tekwaro pa dul pa Jehovah? Ka imedde ki nongo ngec mapol i kom dul pa Jehovah kacel ki kit ma en konyo kwede jone, ci ibingeyo ni Lubanga kara ada tye. Miti ni me tito kwena maber i kom Ker-ri bimedde doko matek adada.—Jer. 9:24; Luka 4:43.
6. Pingo pore ni Jehovah mito ni wapwony dok walub cik ma doro dano me Ker-ri?
6 Nge cikke. Gamente pa dano adana-ni gimito ni jo ma tye i te locgi gunge dok gulub cik me lobogi. I yo ma kit meno bene, Jehovah mito ni wapwony dok walub cik ma doro dano ducu me Ker-ri. (Ic. 2:3; Jon 15:10; 1 Jon 5:3) Cik ma dano oketo pol kare pe tye atir dok diyo dano. Ento “cik pa Rwot [Jehovah] ber, dok tye atir.” (Jab. 19:7) Tika wamaro kwano cik pa Lubanga kun wakwano Lokke nino ducu? (Jab. 1:1, 2) Yo acel keken ma waromo pwonyo kwede ki cik pa Lubanga aye ka wakwano lokke wan kikomwa. Ngat mukene pe romo kwan piwa.
DANO ME KER-RI GIMARO CIK PA LUBANGA
7. Pingo dano me Ker-ri gilubo cik pa Lubanga?
7 Wek wabed dano me Ker-ri, pe mitte ni myero wange keken cik pa Lubanga, ento omyero bene wamar cikke. Dano mapol ma gitye i te gamente pa dano giwacci gilubo cik kacel ki rwom me kwo matir me lobo ma gibedo iye. Ento ka gunongo ni cikke diyogi dok ngat mo pe ka nenogi, ci gituro cut. Pol kare jo magi ‘gimito yomo cwiny dano’ aye. (Kol. 3:22) Dano me Ker-ri gilubo cik pa Lubanga. Wan walubo Cik pa Lubanga kadi bed jo mukene pe ginenowa. Pingo? Pien wamaro Ngat ma Ominiwa Cik.—Ic. 33:22; kwan Luka 10:27.
8, 9. In mono ingeyo nining ka ada imaro cik pa Lubanga?
8 In mono ingeyo nining ka ada imaro cik pa Lubanga? Me laporre, tam kong kit ma idok kwede ka kimini tira i kom gin mo ma itamo ni ber piri, calo rukki ki kit ma inen kwede. Ma peya idoko dano me Ker-ri, oromo bedo ni onongo imaro rukke ruk muyai muyai nyo i yo ma tugo miti. Ka mar-ri pi Lubanga woto ki dongo, ipwonyo kit me rukke i yo ma keto deyo kome. (1 Tem. 2:9, 10; 1 Pet. 3:3, 4) Iromo tamo ni kit ma irukke kwede pe rac. Ento ka laelda mo owacci ni bongi ma i rukogi pe tye ka yomo cwiny jo me kacokke kono? Gin ango ma ibitimo? Tika ibikeco, ibigengo ngeyi, nyo ibimedde ki kodi rukki-ni? Cik ma pire tek ma dano me Ker-ri myero olub aye obedo lubo lanen pa Kricito. (1 Pet. 2:21) Ma lubbe ki lanen pa Yecu, lakwena Paulo ocoyo ni: “Ngat acel acel i kinwa myero oyom cwiny dano lawote, me konye, wek odong i niyene. Pien Kricito yam pe oyomo cwinye kekene.” (Rom. 15:2, 3) Wek kuc obed tye i kacokke, Lakricitayo muteggi i yo me cwiny myero pe otim gin mo ma gudo cwiny ma ngolo kop bot jo mukene.—Rom. 14:19-21.
9 Tam bene kong i kom jami aryo mukene ma pigi tego: kit ma waneno kwede lok me buto ki dong nyom. Jo ma pe gitye dano me Ker pa Lubanga giye buto i kin co ki co nyo mon ki mon, gitero neno cal ki coc ma tugo miti me buto calo gin me yomcwiny, dok gitamo ni tim me abor ki keto keny obedo gin maber ki tung botgi. Dano me Ker-ri pe gitye ki kodi cwiny meno marac-ci. Kadi bed Lukricitayo mapol i kare mukato angec gubedo ka kwo i yo marac, ento kombeddi-ni dong gineno buto ki nyom calo mic mua ki bot Lubanga. Gimaro cik pa Jehovah dok giye ki cwinygi ducu ni jo ma gituro cik pa Lubanga i kom buto ki nyom pe gupore me bedo dano me Ker-ri. (1 Kor. 6:9-11) Kitungcel bene, giye ni cwiny obedo gin ma bwolo dano. (Jer. 17:9) Pi meno, gipwoyo tutwal ni gitye ka nongo pwony ma konyogi me medde ki lubo cik pa Lubanga.
DANO ME KER-RI GIBEDO KI PWOC KA KICIKOGI
10, 11. Lok me cik mene ma pire tek ma Ker pa Lubanga miniwa, dok in ineno lok me cik meno nining?
10 Gamente romo poyo wi dano i kom two mo ma opoto i kabedo moni nyo cam ki yat ma nongo tye kikwangala. Pe ni cam nyo yat ducu girac. Ento ka cam nyo yat moni balo yotkom pa dano, gamente romo ciko dano me gwokke ki iye. Ka gamente pe otimo meno, ci nongo pe tye ka tiyo ticce. I yo acel-lu bene, Ker pa Lubanga cikowa i karene kikome i kom jami ma weko waturo cik pa Lubanga dok balo wat i kinwa ki en. Me laporre, Intanet tye yo acel maber me kubbe, pwonye, ki dong galowang. Dul pa Lubanga tiyo ki Intanet dok man konyogi me tiyo ticgi. Ento, kabedo mapol i Intanet giweko waturo cik pa Lubanga dok balo wat i kinwa ki Jehovah. Kabedo mogo me Intanet ma nyuto coc ki cal ma tugo miti me buto romo balo wat pa jo ma gimito bedo dano me Ker-ri ki Jehovah. Pi mwaki mapol, lagwok ot ma lagen obedo ka cikowa i kom kabedo magi me Intanet-ti. Cwinywa pud dong yom pi lok man me cikwa-ni!
11 I mwaki mukato cokcok-ki, kabedo mogo me Intanet ocakke dok dano gimaro adada—ma ka kitiyo kwedgi maber ci gikonyo tutwal. Kabedo magi ma kinywako lok iye ki lurem-mi twero miyo wapoto i peko. Gitwero weko ngat moni mako lurem ki jo maraco. (1 Kor. 15:33) Man aye gin mumiyo dul pa Jehovah cikowa me bedo ki tam mupore ma lubbe ki kabedo magi me Intanet-ti. Tika dong i kwano pwony ducu ma lagwok ot ma lagen ocoyo i kom kabedo magi me nywako lok ki lurem i Intanet-ti? Pud dong bedo me mingo me tic ki kabedo magi me Intanet-ti labongo kwano pwony magi! * Meno rom aroma ki mwonyo yat mo matek adada labongo kwano coc ma nyuto kit ma myero i mwony kwede.
12. Pingo obedo tim me mingo me kwero winyo lok me cikowa?
12 Jo ma gikwero winyo lok me cikowa ma a ki bot lagwok ot ma lagen gikelo peko i komgi ki jo ma gimarogi bene. Jo mukene gudoko opii me neno coc ki cal ma tugo miti me buto nyo gudonyo i tim me tarwang kun gibwolle kekengi ni Jehovah pe nenogi. Pud dong obedo tim me mingo ya me bwolle ni waromo kanne ki i wang Jehovah! (Car. 15:3; kwan Jo Ibru 4:13.) Lubanga mito konyo kodi jo-ni dok bene cuko cwiny luticce ma i lobo me konyogi. (Gal. 6:1) Ento, kit macalo gamente me lobo moni pe yeni ngat ma ocone me bedo anywaline obed ka timo bal-li, Jehovah bene pe ye jo ma gituro cikke teretere labongo ngut. * (1 Kor. 5:11-13) Ma ka meno, Jehovah lakica. Ka ngat moni ongut ci oweko timo bal, en twero yubo watte ki Jehovah ci pud doko dano me Ker-ri. (2 Kor. 2:5-8) Pud dong obedo twon mot madit ya me tic pi Kabaka ma lamar kit man!
DANO ME KER-RI GIMARO PWONNYE
13. Dano me Ker-ri ginyuto nining ni gitero pwonnye calo gin ma pire tek?
13 Gamente pa dano pol kare gitute matek me pwonyo danogi. Giyubo cukul ma weko dano gipwonyo kwan ki coc ki dong pwonyo tic cing. Dano me Ker-ri gitye ki pwoc pi cukul magi pien konyogi me pwonyo kwan, coc, dok kelo lim i cinggi. Gitero pwony ma ginongo calo dano me Ker pa Lubanga-ni ni obedo gin ma pire tek adada. Jehovah miyo pwonnye kun tiyo ki kacokke. Kicuko cwiny lunyodo me kwano bukke bot lutinogi matino. Dwe ki dwe, lagwok ot ma lagen coyo bukke ma jenge i Baibul. Ka ikwano pot karatac acel nyo aryo nino ki nino, ibimedde ki nongo pwony ma a ki bot Jehovah.
14. (a) Pwonnye ango ma watye ka nongone? (b) Tam mene ma kimiyo ma lubbe ki otyeno me Woro pi Jo me Ot ma dong ityeko nongo adwogi maber ki iye?
14 Cabit ki cabit, dano me Ker-ri ginongo pwonnye i kacokkegi. Me labolle, Cukul me Tiokraci pi mwaki makato pyerabicel kulu pud tye ka medde ki konyo lutino kwan me Baibul me doko jo mucwiny i tito lok pa Lubanga. Tika dong idonyo i cukul me tiokraci? Mwaka ma pud okato cokcok-ki lagwok ot ma lagen okati ki yub me otyeno me Woro pi Jo me Ot. Yub man tye me jingo wat i kin jo me ot. Tika dong ibedo ki kare me keto yub man me pwonnye-ni i tic? *
15. Mot madit ango ma watye kwede?
15 Dano ma gitye i te gamente moni pol kare gimiyo cwakgi i kom pati me wibye ma gicwako, dok bene giwoto i ot ki ot me bito kwir pire. Makato meno, dano me Ker-ri myero gumi cwakgi pi Ker pa Lubanga ki mit kom i rwom ma lamal kun ginyuto i teng gudo nyo i ot ki ot. I ada, kit ma kitito kwede i pwony mukato-ni, Watchtower ma tito pi Ker pa Jehovah-ni, pud dong kicoyo dok kipoko mapol loyo i wi lobo! Mot madit ma watye kwede aye me tito ki dano ngec i kom Ker pa Lubanga. Tika dong itye ka tito kwena man me Ker-ri ki mit kom?—Mat. 28:19, 20.
16. Itwero nyutone nining ni kiti ber dok itye dano me Ker pa Lubanga?
16 Cokcok-ki Ker pa Lubanga keken aye biloyo lobo ducu. Bidoro jami ma watimogi nino ducu. Tika ibikwo calo dano me Ker-ri kun kiti bedo ber i kare meno? Man aye dong kare me nyutone. Itam ma imoko nino ki nino, tim jami ducu i yo ma keto deyo i kom Jehovah dok medde ki kwo i yo maber calo dano me Ker pa Lubanga.—1 Kor. 10:31.
[Lok ma tye piny]
^ Me laporre, nen Awake! me Julai 2011, pot karatac 24-27; Agucito 2011, pot karatac 10-13; ki Febuari 2012, pot karatac 3-9.
^ Nen Wi Lubele me Marci 15, 2012, pot karatac 30-31.
^ Nen Wi Lubele me Agucito 15, 2011, pot karatac 6-7 ki Ticwa me Ker me Januari 2011, pot karatac 3-6.
[Peny me Kwan]
[Boro buk i pot karatac 21]
Tika ilubo cik ma Baibul miyo i kom kabedo me intanet?
[Cal ma tye i pot karatac 19]
Calo lutino pa Kora, tika imaro woro me ada kacel ki tekwarone?
[Cal ma tye i pot karatac 22]
Otyeno me Worowu pi Jo me Ot twero konyi ki jo me odi me yubo kitwu wek wudok dano me Ker-ri
