1. Jami mabeco ango ma tye anyim pi “lwak dano mapol ata[-ni]”?

 TAM kong i kom jami mabeco ma gamente matek ma lalocce lakica dok tero dano ducu ma rom aroma romo timone pi mwaka alip acel bot jo ma en loyogi. Jami mabeco tye i anyim pi “lwak dano mapol ata” ma welgi pe kwanne, ma gibibwot ki i “can madit atika,” ma bikelo agikki pa lobo pa Catan-ni.​—Yabo 7:9, 14.

2. Gin ango ma dong otimme i kwo pa dano pi mwaki 6,000 mukato angec?

² Pi mwaki 6,000 kulu, dano gutemo lone kengi, ento locgi-ni okelo arem ki deno can malit atika. Baibul owaco wacon ni: “Dano ma tye ki twero loyo jo mukene ki tek.” (Latit. 8:9) Gin ango ma tye ka timme i kare-ni? Mapat ki lweny kacel ki jemo, inongo ni can, two, balo kabedo murumowa, alokaloka me oro ki cwir, ki pekki mukene gitye ka gudo kwo pa dano matek adada. Ludito gamente pol kare gipoyo wi dano ni ka dano pe gugiko balo lobo, ci adwogine bibedo marac.

3. Ngo ma bitimme i kare me Loc me Mwaka Alip Acel?

³ I te loc pa Yecu Kricito kacel ki jo 144,000 ma gibiloc kacel kwede, Ker pa Lubanga bikwanyo jami ducu maraco ma tye ka diyo dano i lobo. Loc me Mwaka Alip Acel-li bicobo cikke me yomcwiny ma Lubanga Jehovah ociko ni: “Aketo polo manyen ki lobo manyen; pe dong gibipo pi jami macon, pe bene dano mo bitamo pigi.” (Ic. 65:17) Pud dong watye ki jami mabeco ma pe ginen i anyim. Kikony ma a ki i Lok pa Lubanga, kong dong wanenu jami magi mabeco ma ‘pe ginen-ni.’​—2 Kor. 4:18.

4. Peko madit ango ma dano gitye kwede ma lubbe ki can ot i kare-ni?

⁴ Nga ma pe mito bedo ki ode, ka ma en ki jo me ode giwinyo agonya? Ento i kare-ni, dano mapol gipe ki ot ma meggi kikome. Dano gibedo i boma madongo ma dano pol iye ma gidine adiya. Jo mapol gibedo i kabedo ma nongo lucan gutore iye ma odine kiyubogi maraco raco. Bot jo mapol, bedo ki ot ma megi obedo twon lek mada.

5, 6. (a) Icaya 65:21 ki Mika 4:4 gibicobbe nining? (b) Wan waromo nongo mot meno nining?

⁵ I te Ker pa Lubanga, mitiwa me bedo ki ot ma mewa bicobbe, pien lanebi Icaya ocoyo ni: “Dano gibigero odi ci gibedo i igi, gibipuro poto olokgi, ci gibicamo nyige bene.” (Ic. 65:21) Ento mapat ki bedo ki ot ma megi, tye gen mukene ma dano gitye kwede. Ka ineno mot, jo mogo i kare-ni gibedo i odigi, mukene gibedo i odi madongo. Ento pol kare jo magi gilworo ni odi magi cwalo cente mapol nyo lukwo ki luyak giromo turone. Pud dong jami bibedo maber i te Ker pa Lubanga! Lanebi Mika ocoyo kuman: “Ngat acel acel bibedo i te olokke ki i te odurone, pe tye ngat mo ma bimiyo gibedo lwor.”​—Mika 4:4.

⁶ Gin ango ma myero watim ma lubbe ki gen man mamwonya ma tye i anyim-mi? Tye kono ni wan ducu wamito ni wabed ki odiwa. Ento kadi bed kumeno, ma ka bedo ka tamo pi ot​—kun wadonyo i banya madongo me gedone​—mono pe bedo me ryeko me keto cwinywa i kom cikke pa Jehovah? Wi opo i kom gin ma Yecu owaco i kome kekene ni: “Too tye ki boro, winyo me polo tye ki odigi, ento Wod pa dano pe tye ki ka ma myero epyel iye wiye.” (Luka 9:58) Yecu onongo tye ki kero kacel ki teko me yubo ot mo maber ma pud dong loyo pa ngat mo keken. Ento pingo en pe oyubo? Ngene kene ni Yecu onongo pe mito ni gin mo keken odwo tamme ma weko pe eketo pi Ker-ri bedo mukwongo. Tika waromo lubo lanene kun wabedo ki wang ma pe wor​—labongo paro pi jami me kom?​—Mat. 6:33, 34.

7. Jehovah ociko ni wat ango ma myero obed i kin dano ki lee?

⁷ I kare ma Jehovah tye ka cweyo jami ducu i lobo, en ocweyo dano me agikki. Jehovah owaco bot Latin kayone ma obedo Ladiro Ticce tyen lok mumiyo ecweyo dano: “Weku wacweyu dano ma gical ki wan; wek gin aye gulo rec ma i nam, ki winyo me polo, ki lee ma paco, ki wi lobo ducu, gulo bene gin ducu ma lak alaka wi lobo.” (Acak. 1:26) Pi meno, Lubanga ociko Adam gin ki Kawa, ki dong dano ducu ni gugwok dok gulo lee weng.

8. Calo dano, lee mono giwinyo nining?

⁸ Tika twere pi dano me loyo lee ducu kun gibedo ki kuc i kingi? Dano mapol gimaro lee ma kigwokogi paco calo bura ki dong gwok. Ento lee ma bedo i lum kono? Wangeyo ni lee gikeco dok gidoko ger kace i burogi. Ento jo ma gukwano lok kom lee gunongo ni lee bene giwinyo ki i cwinygi, lukica dok ginyuto mar calo dano. Ripot pa jo ma gukwano lok i kom lee bene medde ki waco ni lee ginyuto mar madit ma pe wacce i kare me gwoko lutinogi.

9. Ma lubbe ki lee, alokaloka ango ma watye ka kurone?

 ⁹ Man nyuto ni omyero pe wabed ki ur ka Baibul wacci kuc bibedo tye i kin dano ki lee. (Kwan Icaya 11:6-9; 65:25.) Pingo myero pe wabed ki ur? Wi opo ni i kare ma Nua ki jo me ode gukati woko ki i yeya i nge Pii Aluka nyo Abwol Pii, Jehovah owaco botgi ni: “Lee tim ducu bilworowu ki myelkom.” Lworo man onongo tye me gwoko kwo pa lee. (Acak. 9:2, 3) Itamo ni Jehovah onongo pe romo kwanyo lworo mogo wek wat ma tye i kin lee ki dano obedo kit ma onongo en oyubo kwede con? (Koc. 2:18) Kwo pud dong bibedo yot bot jo ducu ma gibikwo i lobo i kare meno!

10. Pingo dano gikok?

¹⁰ I kare ma Solomon oneno “kit macalo jo mukene tye ka uno ki luwotgi i lobo man,” en owaco ni: “Nen, jo ma giunogi gikok akoka ki pig wanggi, pien pe gitye ki ngat mo ma myero okwe cwinygi!” (Latit. 4:1) I kareni, jamine rom aroma nyo bene rac loyo. Anga i kinwa kany ma peya okok? Tye lok ada ni i kine mukene wakok koko me yomcwiny. Ento pol kare wakok nongo cwinywa cwer.

11. Lok i kom jo mene ma kicoyogi i Baibul ma dong gudo cwinyi loyo?

¹¹ Tam kong i kom jo mogo ma kicoyo lok komgi i Baibul ma gukok ki pig wanggi. I kare ma Cara oto ki mwaka 127, “Abraim odonyo i ot okumo, okoko Cara ki pig wange.” (Acak. 23:1, 2) I kare ma Naomi tye ka ciko mon wote, gin “gucako kok matek,” ka dok bene “gucako kok matek ki dwangi malongo.” (Ruth 1:9, 14) I kare ma Kabaka Kejekia onongo kome lit macok to, en olego bot Lubanga ci “ocako kok matek twatwal kun cwinye cwer,” ma man ogudo cwiny Jehovah. (2 Luker 20:1-5) Kwero Yecu ma Petero okwero tyen adek kulu-ni mono pe gudo cwinywa? I kare ma Petero owinyo twong gweno okok, en “okato woko okok ki cwer cwiny madwong.”​—Mat. 26:75.

12. Loc me Mwaka Alip Acel-li bikelo bedo agonya nining bot dano?

¹² Pien jami maraco mapol gutimme​—matino ki madito, dano gimito kony ki kwe cwiny. Meno aye gin ma bitimme i kare me Loc me Mwaka Alip Acel pi jo ma gitye i te loc pa Kricito: “[Lubanga] bijwayo pig wanggi woko ducu. To bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal.” (Yabo 21:4) Pud dong mwonya me bedo ka lwodo lok man pien koko nyo kumo ki dong arem gibibedo pe, dok Lubanga bene ocikke me jwayo lamone pa dano​—to. Man bitimme nining?

13. Cakke wa i kare pa Adam, to ogudo kwo pa dano nining?

¹³ Cakke wa i kare ma Adam obalo kwede, to obedo ka loc macalo kabaka. To pud tye oteka mo ma loyone tek dok pe ringe ki bote, okelo deno can kacel ki kumo bot dano mapol. (Rom. 5:12, 14) Ki lok ada, “lworo to,” omiyo dano milion mapol gitye i “twec me opii pi kare me kwogi ducu.”​—Ibru 2:15.

14. Gin ango ma bitimme ka to dong pe?

 ¹⁴ Baibul wacciwa ni i kare mo i anyim, “lakwor ma gibityeko woko me agikki en aye to.” (1 Kor. 15:26) Tye gurup aryo ma gibinongo adwogi mabeco mapol ka to dong pe. Pi “lwak dano mapol ata” ma pud gikwo i kare-ni, gin gibibwot kun gidonyo i lobo manyen ki gen me kwo pi naka labongo to. Pi dano bilion ma dong guto woko-ni, gin gibicerogi. Tika iromo tamo pi yomcwiny ma jo ma gubwot-ti gibibedo kwede ka gijolo jo ma gucer-ri? Kwano lok i kom nicer ma kicoyogi pigi i Baibul-li bikonyowa me niang kit ma kwo bibedo kwede i anyim.​—Kwan Marako 5:38-42; Luka 7:11-17.

15. Ibiwinyo nining ka ineno dano-ni me amara ma kicero?

¹⁵ Tam kong lok man ni ‘gubedo ki yomcwiny madit adada’ ci “gupako Lubanga.” Ka onongo itye i nino ma jami aryo magi gitimme-ni, oromo bedo ni in bene onongo ibiwinyo kumeno. Ada, neno jowa me amara ma gucer biminiwa yomcwiny madit ma pe wacce. Yecu owaco ni: “Kare bibino ma jo ducu ma tye i lyel biwinyo iye dwane, ci gibikatti woko.” (Jon 5:28, 29) Pe tye ngat mo keken i kinwa ma oneno dano ma ocer, man bibedo gin acel madit ma bitimme ki i kin jami mogo ma ‘pe ginen.’

16. (a) Pingo omyero walok ki mit kom pi mot ma pe ginen ma tye i anyim? (b) Gin ango ma Paulo owaco me cuko cwiny Lukricitayo me Korint?

¹⁶ Ada, jo ma gigwoko gennegi bot Jehovah i kare man ma kwo tek-ki gitye ki kwo mamwonya i anyim. Kadi bed kwo man mamwonya-ni pe nen, bedo ka lwodo lok i kome bikonyowa  me keto jami ma pigi tego bedo mukwongo dok pe waweko gin mo keken ma i lobo-ni dwoyo tamwa. (Luka 21:34; 1 Tem. 6:17-19) Waboku lok ki mit kom pi gen ma watye kwede i anyim i cawa me otyeno me woro pi jo me ot, ka watye ka kacel ki luye luwotwa, ka kwan ki lutino kwanwa me Baibul ki dong jo ma gunyuto miti. Man bimiyo wiwa pe wil ento wabed ka lwodone cawa ducu i cwinywa. Lakwena Paulo otimo meno kikome i kare ma tye ka cuko cwiny Lukricitayo luwote. Lokke okonyogi me bedo ka tamo pi jami ma bitimme i agikki me Loc me Mwaka Alip Acel pa Kricito. Tem kong goyo gin mumiyo Paulo ocoyo 1 Jo Korint 15:24, 25, 28.​—Kwan.

17, 18. (a) I yo ango ma onongo Jehovah “ocoko jami ducu i te locce” i acakki me cwecce? (b) Gin ango ma Yecu bitimone me dwoko kuc ki wat maber i kin dano ki Jehovah?

¹⁷ Pe tye nyig lok mukene ma kitwero tic kwede me tito kit ma kwo bibedo kwede i agikki me loc me mwaka alip acel mapat ki “wek Lubanga dong ocok jami ducu i te locce.” Ento man mono te lokke ngo? Wi kong opo i gin mutimme i Eden i kare ma Adam gin ki Kawa onongo gitye ki wat macok ki Jehovah dok gitye jo me ote. Jehovah, Ngat ma Loyo Polo ki Lobo-ni aye loyo ginacweya ducu, lumalaika ki dano. Cwecce magi onongo giloko ki Jehovah atir atir, giwore dok Jehovah minigi mot. Jehovah onongo bicoko “jami ducu i te locce.”

¹⁸ Catan obalo wat meno i kare ma en obwolo dano me jemo i kom twero me loc pa Jehovah. Cakke i mwaka 1914, Ker pa Meciya ocako keto yub me dwoko kuc ki wat maber i kin jo me ot pa Jehovah. (Ep. 1:9, 10) I kare me Loc me Mwaka Alip Acel, jami mapol ma ‘pe ginen’ i kare-ni gibidoko ada. Ci dong “agikki piny” bio, meno aye ka Loc me Mwaka Alip Acel pa Kricito dong cok cakke. Gin ango ma bitimme i ngeye? Kadi bed kimine “twero ducu ma i wi polo ki i lobo,” Yecu pe otemo mayo loc. Ento en ‘bimiyo ker i cing Lubanga Won.’ En bitic ki twerone me “miyo deyo bot Lubanga.”​—Mat. 28:18; Pil. 2:9-11.

19, 20. (a) Jo ducu ma gitye i te loc me Ker-ri ginyuto nining ni gijolo twero me loc pa Jehovah? (b) Jami mabeco ango ma tye ka kurowa i anyim?

¹⁹ I kare meno, dano ma gitye i te loc me Ker-ri i lobo nongo dong gipe ki roc mo keken. Gin gibilubo lanen pa Yecu kun gibedo luwiny dok gijolo Jehovah macalo lalocgi. Gibibedo ki kare me timo meno i kare me atematema ma bibedo i agikki. (Yabo 20: 7-10) I nge meno, lujemo ducu​—dano kacel ki cwec me cwiny​—kibinekogi matwal. Man pud dong bibedo kare me yomcwiny ki lelo! Pien Jehovah ‘bicoko jami ducu i te locce,’ jo me ote ma gitye i polo ki dong i lobo gibipakke.​—Kwan Jabuli 99:1-3.

²⁰ Tika jami mabeco ma Ker-ri cok kelone cuko cwinyi me tute ki kero ni ducu itiyo tic pa Lubanga? Tika iromo gwokke wek gen ki kwe cwiny me gobagoba ma tye i lobo pa Catan-ni pe odwo tammi? Tika ibimoko tammi me cwako ki dong cung matek pi twero me loc pa Jehovah? Nyut i ticci ni itye ki miti me timo meno pi naka. Man bikonyi me nongo mit pa kuc kacel ki lonyo madwong pi mwaka alip acel ki dong i ngeye!