Tango ma Gicok Timme
Tango ma Gicok Timme
IBIWINYO nining ka dokto mo ma onongo myero otim ayango ma timone tek i komi ento iniang ni en kara pud peya otimo ayango ma kit meno i kwone? Ngene kene ni cwinyi pe bibedo yom. Ket ni dokto man mito timo ayango i komi, ento iniang ni en aye pud dong dokto mucwiny loyo i kit me timo ayango dok lutwo pe gito i cinge kono? Tika ibibedo ki gen muromo ni en bikonyi?
Lubanga Jehovah tye calo dokto mucwiny loyo i kit me timo ayango-ni, dok lobo man tye latwo ma myero kitim ayango i kome-ni. Kun tiyo ki Lokke Baibul, Lubanga ocikke ni ebidwoko Paradic i lobo. (2 Petero 3:13) Ento wek meno otimme, en myero kong onek lutim maraco ducu. (Jabuli 37:9-11; Carolok 2:21, 22) Jami maraco ma wanenogi i kare-ni myero kong kikwanygi woko ducu ma peya kikelo paradic. Jehovah bitimo meno i yo me tango!—Niyabo 21:4, 5.
Lucaden pa Jehovah gitye ki niye matek ni alokaloka magi madongo-ni gicok timme. Pingo? Pien tango mapol ma dong Lubanga Jehovah otimogi-ni ginyuto ni en tye ki teko me cobo cikkene. Por kong tango abicel ma kicoyo pigi i Baibul-li ki cikke pa Lubanga ma tye i anyim.
Medde ki pwonyo lok i kom cikke ma Baibul tye kwede piwa i anyim. Ka niyeni woto ki dongo genni bene bidongo, gen me kwo i kare ma ibinongo iye adwogi maber pi tango ma Jehovah bitimone.
[Bok/Cal ma tye i pot karatac 7]
TANGO:
YECU OPITO DANO ALIP MAPOL KI MUGATI KACEL KI REC MANOK.—MATAYO 14:13-21; MARAKO 8:1-9; JON 6:1-14.
CIKKE PA LUBANGA:
‘Lobo dong biceko cam mabup; Lubanga ma Lubangawa dong omiyowa mot.’—JABULI 67:6.
PWONY MA WANONGO:
PE TYE NGAT MO KEKEN MA KEC BINEKONE.
TANGO:
YECU OCANGO LUTOWANG.—MATAYO 9:27-31; MARAKO 8:22-26.
CIKKE PA LUBANGA:
“Lutowang wanggi biyabbe.”—ICAYA 35:5.
PWONY MA WANONGO:
LUTOWANG DUCU WANGGI BIYABBE.
TANGO:
YECU OCANGO LUNGOLO.—MATAYO 11:5, 6; JON 5:3-9.
CIKKE PA LUBANGA:
“Lungolo bipye malo calo til.”—ICAYA 35:6.
PWONY MA WANONGO:
KIBICANGO KIT GORO MO KEKEN.
TANGO:
YECU OCANGO KWAI TWO MAPAT PAT.—MARAKO 1:32-34; LUKA 4:40.
CIKKE PA LUBANGA:
“Pe tye dano mo ma bedo i lobowa ma biwaco ni, ‘An koma lit.’”—ICAYA 33:24.
PWONY MA WANONGO:
TWO DUCU MA YELO DANO DONG GIBIBEDO PE. WABIBEDO MA KOMWA YOT.
TANGO:
YECU OJUKO YAMO KI NAM.—MATAYO 8:23-27; LUKA 8:22-25.
CIKKE PA LUBANGA:
“Dano gibigero odi ci gibedo i igi, gibipuro poto olokgi, ci gibicamo nyige bene. Ngat mo i kingi pe biyelle ki tic nono.”—ICAYA 65:21, 23.
“Jona bibedo i kabedo me kuc, ka ma ayela mo pe iye, kabedo maber me yweyo mot.”—ICAYA 32:18.
PWONY MA WANONGO:
PEKO MA POTO ATURA DONG BIBEDO PE.
TANGO:
YECU OCERO JO MUTO.—MATAYO 9:18-26; LUKA 7:11-17.
CIKKE PA LUBANGA:
“Jo ducu ma tye i lyel . . . gibikatti woko.”—JON 5:28, 29.
“Nam bene odwoko jo ma yam guto i iye-ni woko cen, To ki Lyel bene gumiyo jo muto ma yam tye botgi.”—NIYABO 20:13.
PWONY MA WANONGO:
DANOWA ME AMARA DUCU GIBICEROGI.
