Tika Itwero ye Tango ma Kicoyogi i Baibul?

KET kong ni ki titti lok mo mamit adada, tika pe kong ibitamo ka ngat meno gene nyo pe? Bedo ki gen i kome pe cung keken i kom kit ma en titti kwede lok meno, ento ka ce ada en gene. Oromo bedo ni pi mwaka mapol en obedo ka titi lok ada, man miyo ibedo ki tyen lok matir me ye lokke.

Man bene rom aroma ki tango ma kicoyogi i Baibul. Pe tye ngat mo i kinwa ma onongo tye i kare ma tango magi gitimme. Ento pud watwero ngeyone ka tango ma kicoyogi i Baibul-li gigene dok gitye ada. Man twere nining? Magi aye jami ma miyo itwero bedo ki gen i kom tango ma kicoyogi i Baibul:

Tango mapol kitimogi i dye lwak. I kare mogo, kitimo ma nongo dano alip nyo milion mapol tye ka nenone. (Nia 14:21-31; 19:16-19) Onongo pe kitimo ka mukane, ka ma dano pe iye.

Tango magi onongo timogi yot. Onongo pe dok mito nyutte kacel ki bwola me gobagoba. Tango mapol ma kicoyogi i Baibul-li nongo pe kiyubo ayuba dok bene ngat moni nongo pe openyo pire. (Marako 5:25-29; Luka 7:1-16) Ngat ma timo tango-ni bene nongo pe otimo pi cobo mitine.

Jo ma gitimo tango-ni mitigi onongo pe tye me nongo yweka, deyo nyo lonyo. Ma ka meno, onongo mitigi tye me miyo deyo bot Lubanga. (Jon 11:1-4, 15, 40) Tute pa ngat mo keken me nongo lonyo ki i tango magi onongo pe kiye.​—2 Luker 5:15, 16, 20, 25-27; Tic pa Lukwena 8:18-23.

Tango mapol ma kicoyogi i Baibul-li nyuto atir ni man pe obedo tic pa dano adana. Me lapore, kijuko yamo ki i nam ci nam oling mot, kiloko pii odoko kongo, kijuko kot ci dok kiweko ocako cwer, kicango lutwo mapol, jo mapol ma wanggi oto guneno piny. Tango magi ducu medo ki mukene mapol ginyuto ada ni Lubanga aye onongo tye ka timogi ento pe  dano adana.​—1 Luker 17:1-7; 18:41-45; Matayo 8:24-27; Luka 17:11-19; Jon 2:1-11; 9:1-7.

Jo ma guneno tango magi pe gubedo ki akalakala ka otimme ada nyo pe. I kare ma Yecu ocero lareme Lajaro, lumone pe gubedo ki akalakala ni Lajaro onongo pe oto. Pingo pe gubedo ki akalakala? Lajaro onongo dong orii i lyel pi nino angwen. (Jon 11:45-48; 12:9-11) Ma dong otero mwaki mapol ma Yecu oto kwede, Lujudaya ma gucoyo Talmud bene guye ni Yecu onongo tye ki teko me timo tango. Ento gin gubedo ka penyo ka ma Yecu onongo teko man ki iye. I yo acel-lu bene, i kare ma kikelo lupwonnye pa Yecu i lukiko pa Lujudaya, pe kipenyogi ni “Wun aye mono wutimo tango man?” Ento ni: “Wun wutiyo man pi kit teko ango, nyo pi nying anga?”​—Tic pa Lukwena 4:1-13.

Tika itwero ye gin ma Baibul wacciwa i kom tango? Ma lubbe ki jami ma dong wanenogi-ni, nen ka maleng ni tango ducu ma kicoyogi i Baibul-li gigene dok gitye ada. Tye dok tyen lok mukene muweko watwero bedo ki gen i kom tango ma kicoyogi i Baibul. Me lapore, ka Baibul tito pi gin moni mutimme, pol kare tito karene, kakwene, ki dong nying jo ducu ma onongo gitye iye. Wa jo ma pe giye lok me Baibul pol kare gidong ki ur pi kit ma Baibul tito kwede jamine ducu kore ki kore. Lok mapol pa lunebi dong gucobbe, pe kiweko wa mo matidi woko. Medo i kom meno, Baibul tye ki pwony mapol ma weko dano bedo ki wat maber i kingi​—tam ma konyo jo matino ki madito. Pe watwero poro Baibul ki buk mo keken ka odok i lok i kom wat i kin dano.

Ka pud itye ki akalakala i kom Baibul, pingo pe ikwany kare kong me kwanone motmot piri keni? Ka ikwano kare ki kare, ibidongo genni i lok ada ma tye iye. (Jon 17:17) Ibinongo ni jami ducu ma Baibul waco i kom tango ma gutimme con ducu kara gitye ada. Ka iye i kom jami magi ducu, ci nongo itye ki tyen lok matir me geno gin ma Baibul wacci bitimme cokcok-ki i anyim.

[Cal ma tye i pot karatac 5]

Lumone pa Yecu pe gubedo ki akalakala ka ada Lajaro oto