1, 2. Pekki ango ma jo mapol gukato ki iye, dok ngo ma lutic pa Lubanga gimito?

 WATYE ka kwo i kare me peko. Lobo-ni opong ki pekki mapat pat. Oyengyeng, tsunamis [tuge pa pii i nam], wang pa piny, pong pa pii i kabedo moni, volkano, yamo lapiro/ajuru madongo, ki dong kot ma cwer ki yamo magwar gutyeko kelo pekki mapol i kom dano. Medo i kom meno, peko me ot ki peko ma ngat acel acel tye kwede okelo lworo ki par mapol. Tye lok ada ni “kare kacel ki jami ma gitimme atura” poto i komwa ducu.​—Latit. 9:11.

² Macalo lwak, lutic pa Lubanga giyelle matek ki kodi jami magi ma kelo cwer cwiny-nyi. Kadi bed kit meno, wamito ni wabed atera me lweny ki peko mo keken ma wabirwatte kwede i anyim kit ma agikki piny tye cok-ki. Wan mono watwero lweny ki pekki magi kun pe waweko ginurowa nining? Ngo ma bikonyowa me lweny ki pekki me kare-ni ki tekcwiny?

3. Kit ma kitito kwede i Jo Roma 15:4, wan waromo nongo kwe cwiny nining i kare me peko?

³ Kadi bed jo mapol gitye ka rwatte ki pekki mapol makato kare macon, ento peko pe obedo gin manyen bot dano. Kong dong wanenu pwony ma waromo nongone ki i lanen pa jo ma gutiyo pi Lubanga i kare mukato angec kun ginyuto tekcwiny i lweny ki pekki mapat pat.​—Rom. 15:4.

4. Pekki ango ma Daudi olwenyo kwedgi, dok ngo ma okonye?

⁴ Tam kong i kom Daudi. I kin pekki ma en oyelle kwedgi aye kiniga pa kabaka Caulo, lweny ki lumone, mone ma kimakogi, roro [erupe] ma kiketo  i kome, ki dong tur cwiny. (1 Cam. 18:8, 9; 30:1-5; 2 Cam. 17:1-3; 24:15, 17; Jab. 38:4-8) Baibul konyowa me niang kit ma pekki magi gukelo kwede arem i cwiny Daudi. Ento, pekki magi pe gubalo watte ki Jehovah. Pi niyene matek, en owacci: “Rwot [Jehovah] gwoka ki i gin marac ducu: pi meno abibedo ki lworo i kom anga?”​—Jab. 27:1; kwan Jabuli 27:5, 10.

5. Ngo ma okonyo Abraim ki Cara me lweny ki kwo matek?

⁵ Abraim ki Cara gutyeko pol pa kwogi kun gibedo macalo welo i kema i lobo pa lurok. Kwo pe onongo yot botgi. Ento kadi bed kumeno, gin gulwenyo ki peko me kec kacel ki ayela pa lobe macok kwedgi. (Acak. 12:10; 14:14-16) Gulwenyo ki pekki man nining? Lok pa Lubanga wacciwa ni Abraim “onongo tye ka kuro gang ca ma tye ki gutine ducu matek, ma Lubanga aye obedo ngat mugoyo calle, ki lagedone kikome.” (Ibru 11:8-10) Abraim ki Cara guciko wanggi i kom jami ma tye anyim, kun pe giye ni kwo me kare ca odwo tamgi.

6. Wan waromo lubo lanen pa Yubu nining?

⁶ Yubu bene odeno can malit adada. Tam kong kit ma en owinyo kwede i kare ma jamine onongo pe tye ka wot i wange. (Yubu 3:3, 11) Marac dong loyo aye ni en pe oniang pingo jami magi gutimme i kome. Kadi bed kit meno, en pe oilo cinge. En ogwoko gennene nio wa i to dok niyene onongo tek i kom Lubanga. (Kwan Yubu 27:5.) Man pud dong tye lanen maber adada me aluba!

7. Pekki ango ma Paulo okato ki iye i ticce pi Lubanga, ento ngo ma omiyo en omedde ki tekcwiny?

⁷ Tam kong bene i kom lanen pa Paulo. En odeno can ‘i gang, tim, ki nam.’ En oloko i kom ‘ri kec ki orwo pii, piny mangic labongo ginaruka.’ Paulo bene oloko i kom ‘ri i nam matut dyeceng ki dyewor benebene tyen acel,’ dok man nen calo otimme pi mel ma otur i nam i kare ma en tye ka wot. (2 Kor. 11:23-27) Kadi bed jami magi ducu gutimme, nen kong kit ma en ocoyo kwede i kare ma oloyo to cwicwi ni: “Meno otimme wek pe wajenge i komwa kekenwa, ento wajenge i kom Lubanga ma cero jo muto. En olarowa ki i can me to marac macalo man, dok bene bilarowa.” (2 Kor. 1:8-10) Dano mapol pe gukato ki i kodi pekki ma Paulo okato ki iye-ni. Ento, pol pa wan bene waromo winyo kit ma en owinyo kwede dok wanongo kwe cwiny ki i lanen-ni.

8. Pekki me kare-ni giromo gudowa nining? Mi lapor.

⁸ I lobo man ma opong ki peko ma poto atura, ariya kacel ki lyeto-ni, dano mapol ginongo ni pekki magi obwoyogi woko. Kadi wa Lukricitayo mukene bene guwinyo kumeno. Lani, * gin ki cware ma onongo gitye ka tic i lobo Australia macalo painia-ni, owacci wiye oballe dok cwinye otur i kare ma kinongo ni etye ki kanca me tunu kor. En owacci, “Yat ma abedo ka tic kwede-ni oweko lit koma omedde, dok man oweko anongo ni konya pe.” Medo i kom twone-ni, en myero ogwok cware ma kitimo ayango i cogo ogur ngeye. Ka ce warwatte ki kodi peko ma kit man, gin ango ma waromo timone?

9, 10. (a) Ngo ma myero pe wawek Catan otim? (b) Omyero wabed ki cwiny ango wek wacir pekki kit ma kicoyo kwede i Tic pa Lukwena 14:22?

⁹ Omyero wange ni Catan mito turo niyewa kun kelo can i komwa. Ento, omyero pe wawek okwany yomcwinywa i yo me bwolo bwolo kit man. Carolok 24:10 wacci: “Ka ce ibedo nyap [cwinyi  otur] i kare ma ayelayela tye, tekoni nongo nok adada.” Lwodo lok i kom lanen pa jo ma kicoyo lok komgi i Baibul, bikonyowa me bedo ki tekcwiny i kare me peko.

¹⁰ Wiwa myero opo ni pe watwero lweny ki pekki ducu. Ki lok ada, pe myero wabedo ki cwiny ni pe wabirwatte ki pekki magi. Tic pa Lakwena 14:22 wacciwa ni: “Myero wadony i can madongo ka wakat kwede i ker pa Lubanga.” Ma ka bedo ma cwinywa otur, pingo pe wanen man calo kare me nyuto tekcwinywa kun wabedo ki niye ni Lubanga bikonyowa?​—2 Tem. 3:12.

11. Gin ango ma waromo timone wek peko ma watye iye pe onurwa?

¹¹ Omyero wabed ka tamo pi jami mabeco keken. Lok pa Lubanga wacciwa ni: “Dano ma tye ki yomcwiny gineno ki i wange, ento dano ma cwinye cwer bedo ma cwinye ryange aryanga.” (Car. 15:13) Ludaktari gingeyo ni wek latwo moni ocang, en myero obed ki gen ni ebiwinyo alokaloka. Tyen mapol, ka ngat moni munyo yat ma tye kikwangala ento tamo ni bikonye, en biwinyo alokaloka mo manok. Ento ka latwo moni tamo ni yat ma etye ka munyone-ni miyo kome doko lit, ci twone medde ameda. Bedo ka tamo tutwal peko ma pe waromo kwanyone turo cwinywa matwal. Gin maber aye ni Jehovah pe miniwa “yat ma ngeye lim.” Ma ka meno, kadi wa i kare me peko, en kweyo cwinywa kun tiyo ki Lokke, omegiwa ki lumegiwa, ki dong cwiny mere maleng. Ka waketo tamwa i kom jami magi miyo wabedo ki yomcwiny. Ma ka tamo pi peko ma watye iye, omyero watim jami ma konyowa me lweny ki peko acel acel kun watamo pi jami mabeco ma timme i kwowa.​—Car. 17:22.

12, 13. (a) Ngo ma okonyo lutic pa Lubanga wek gucir adwogi ma peko okelo i komgi? Mi lapor. (b) Wangeyo nining ni gin moni pire tek botwa i kare me peko?

¹² Cokcok-ki, peko ma poto atura gutimme i lobe mogo. Ento utmegiwa ma i lobe magi guciro pekki magi ki tekcwiny. Dok man pe obedo yot botgi. I acakki me mwaka 2010, oyengyeng kacel ki tuge pa pii i nam i lobo Chile obalo odi kacel ki jami pa omegiwa, dok bene gurwenyo dog ticgi. Kadi bed pekki man gutimme, gin gumedde ki tiyo tic pa Jehovah. Samuel, ma ote otur woko-ni owacci: “Kadi bed i kare man me peko-ni, an kacel ki dakona pe wakeng bedo tye i cokke ki dong tito kwena. Man okonyowa pe me bedo ma wanen calo piny obwoyowa woko.” Gin kacel ki jo mukene, guketo peko man mutimme-ni i ngegi kun gimedde ki tiyo tic pa Jehovah.

¹³ I Sektemba mwaka 2009, kot ocwer magwar ci opongo but boma me Manila i lobo Philippines. Lalonyo mo ma orwenyo jami mapol owacci, “Pii aluka man omiyo dano girom aroma, okelo peko kacel ki deno can bot lulonyo ki lucan ducu.” Man poyo wiwa i kom tam me ryeko ma Yecu omiyo ni: “Wukan lonyo piwu kenwu i polo, ka ma nyenye ki nyal pe gibalo, dok ka ma lukwo pe bino gituro ot ci gikwalo.” (Mat. 6:20) Yenyo jami me kom ma pol kare pe rii pi naka-ni kelo tur cwiny. Ento pud dong tye me ryeko ni myero waket pi watwa ki Jehovah obed gin mukwongo i kwowa pienni rii pi naka kadi bed watye i peko!​—Kwan Jo Ibru 13:5, 6.

14. Tyen lok ango ma watye kwede me nyuto tekcwiny?

¹⁴ Yecu otito ka maleng ni peko bibedo tye i kare me dwogone, ento owaco bene ni: “Pe wubed ki lworo.” (Luka  21:9) Pien en tye Kabakawa dok Jehovah miniwa kony, man miyo wabedo ki tekcwiny. Paulo ocuko cwiny Temceo kun wacci: “Lubanga yam pe omiyowa cwiny me lworo, ento omiyowa cwiny me teko ki mar ki me gwokke kenwa [wic makwiri].”​—2 Tem. 1:7.

15. Mi lapor pa jo mogo ma gunyuto gengi i kom Lubanga, dok tit kit ma watwero nyuto kwede gen acel-lu.

¹⁵ Baibul tittiwa kit ma jo mogo guketo kwede gengi i kom Lubanga. Daudi owacci: “Rwot [Jehovah] aye tekka dok kwota; agene ki cwinywa ducu. En okonya omiyo cwinya opong ki yomcwiny madwong.” (Jab. 28:7) Paulo onyuto tekcwinye kun wacci: “Gin magi ducu watye ka loyogi matek pi ngat ma ceng omarowa-ni.” (Rom. 8:37) I kare ma Yecu oniang ni kibimake ci kineke, en owaco gin mo ma nyuto ni wat tye i kin en ki Lubanga ni: “Pe atye kena pien Won tye kweda.” (Jon 16:32) Lok pa jo magi nyuto gin ango? Gin weng guketo gen i kom Jehovah ki cwinygi ducu. Bedo ki kodi gen acel-lu i kom Lubanga romo miyo wabedo ki tekcwiny me lweny ki pekki i kare-ni.​—Kwan Jabuli 46:1-3.

16. Pingo pire tek ni wakwan Lok pa Lubanga?

¹⁶ Jehovah miniwa kony wek walweny ki peko me kare-ni ki tekcwiny. Ma pire tek aye ni en ominiwa Baibul. Pe watwero dongo tekcwiny kekenwa. Ma ka meno, tekcwiny bino ka wangeyo Lubanga dok wajenge i kome. Watwero timo man ka wakwano piwa kenwa kare ki kare. Laminwa mo acel onongo tye ki two tur cwiny ma odoko calo two otito pi kony ma enongo ni, “Abedo ka kwano tyeng mogo ma kweyo cwiny ki i Baibul teretere.” Tika ada walubo tira ma kimiyo me bedo ki otyeno me woro pi jo me ot? Timo jami magi bikonyowa me bedo ki kodi cwiny pa laco ma jabuli ma ocoyo ni: “Amaro cikki twatwal! Abedo ka lwodo lok i kom cikki dyeceng jwi.”​—Jab. 119:97.

17. (a) Yo ango mukene ma tye me konyowa wek wabed ki tekcwiny? (b) Tit kong kit ma gin mutimme i kwo pa jo mogo ma kicoyogi i bukkewa gukonyi kwede.

¹⁷ Me aryo, watye ki bukke ma jenge i Baibul ma gikonyowa me bedo ki tekcwiny i kom Jehovah. Omegiwa ki lumegiwa mapol gunongo kony ki i gin mutimme i kwo pa jo mogo ma kicoyo lok komgi i bukkewa. Laminwa mo ma onongo tye ki two ma miyo cwiny ngat moni bedo yom nyo bedo ma jude ajuda ki yomcwiny i kare ma okwano kit ma omego mo ma onongo tye lamiconari olwenyo kwede ki two acel-lu. Lamego ni ocoyo ni, “Lok kom omego-ni okonya me niang ka ma pekona tye iye dok omiya gen.”

18. Pingo omyero waleg kare ducu?

 ¹⁸ Yo me adekke aye lega. Man konyowa i peko mo keken ma watye iye. Lakwena Paulo otito kit ma lega pire tek kwede kun wacci: “Pe wubed ki par i kom gin mo, ento i lok ducu wumi Lubanga onge gin ma wumito i lega ki i bako dogwu kacel ki miyo pwoc bene. Man bimiyo kuc pa Lubanga ma kato ngec pa jo ducu gwoko cwinywu ki tamwu maber i Kricito Yecu.” (Pil. 4:6, 7) Tika walego kare ki kare wek wanong tekcwiny i kare me peko? Alex, omego mo ma tye i lobo Britain dok onongo tye ki two cwiny ma odoko calo two owacci: “Lega bot Jehovah kacel ki kwano Lokke okonya adada.”

19. Pingo pire tek ni myero wabed tye i cokke?

¹⁹ Yo me angwen ma konyowa aye bedo tye i cokke. Laco jabuli ocoyo ni: “Cwinya mito mada ni abed kunnu, dok ol woko pi donyo ka bedo i dyekal” pa Jehovah. (Jab. 84:2) In bene iwinyo kumeno? Lani, ma kiloko i kome malo-ni otito kit ma ewinyo kwede ka etye kacel ki omege ki lumege ni: “Wot i cokke onongo pire tek adada. Onongo angeyo ni myero abed tye iye ka amito ni Jehovah okonya wek alweny ki peko.”

20. Nywako i ticwa me pwony-nyi konyowa nining?

²⁰ Kony me abic aye tito kwena me Ker-ri ki mit kom. (1 Tem. 4:16) Laminwa mo acel ma tye i lobo Australia dok okato ki i pekki mapol owaco ni: “Onongo pe amito cito i tic me tito kwena, ento laelda mo olwonga ni wacit wan kwede. Aye gire, pe bene akwero. Jehovah nen calo obedo ka konya, pien ka acito i ticwa me pwony, cwinya bedo yom adada.” (Car. 16:20) Jo mapol gunongo ni konyo jo mukene wek gubed ki niye i kom Jehovah okonyogi me dongo niyegi. Man weko wigi wil woko i kom pekogi kun giketo cwinygi i jami ma pigi tek.​—Pil. 1:10, 11.

21. Gen ango ma waromo bedo kwede ka watye i peko?

²¹ Jehovah ominiwa kony mapol wek walweny ki peko me kare-ni ki tekcwiny. Ka watiyo ki kony magi i yo maber kun walwodo dok walubo lanen pa jo ma gubedo ki tekcwiny, ci wabedo ki gen ni wabilweny ki peko ma warwatte kwedgi. Kadi bed ni jami mapol pud bitimme ma peya agikki piny oo, waromo winyo ki i cwinywa kit ma Paulo owaco kwede ni: “Gibolowa piny i ngom ligwek, pe bene wato. . . . [Ento] cwinywa dok pe tye ka dok cen.” (2 Kor. 4:9, 16) Kikony pa Jehovah, waromo lweny ki pekki me kare-ni ki tekcwiny.​—Kwan 2 Jo Korint 4:17, 18.