LOK man malit pa latin anyaka-ni nyuto kit ma kitero mon kwede i yo me tim gero ki apokapoka ma timme i kom anyira ki mon i lobo lung. Tam kong i kom jami magi ma gitye ka timme-ni.

• Apokapoka i kin co ki mon. I lobo Acia, pol pa lunyodo gimaro lutino awobe kato anyira. I mwaka 2011, ripot mo pa UN byeko ni i lobo Acia, mon ma romo milion 134 gurweny macalo adwogi me oyo ic, neko lutino matino ki weko lutino.

• Kwan. I wi lobo lung, mon ki anyira gitye i kin aryo me adek pa dano ma pe gukwano kulu nyo gukwano pi mwaka angwen keken.

• Diyo dako tektek i buto. Mon makato milion 2.6 gibedo i lobe ma gitero diyo mon tektek i buto calo pe obedo bal madit.

• Yotkom. I lobe ma pud gitye ka dongo adonga, i nge dakika aryo keken, dako to pien oyac nyo i cawa me nywal pien nongo ot yat matir atir peke.

• Twero me leyo jami. Kadi bed mon aye gipuro dit pa cam i lobo-ni, i lobe mapol mon gipe ki twero me leyo jami nyo ngom.

Pingo pe kiye ni mon gubed ki twero i kom jami magi ma mitte i kwogi-ni? Tekwaro mukene gilubo cik me dini ma cwako apokapoka nyo tim gero i kom mon. Lapilida ma dako Chandra Rami Chopra me Indian ocoyo i magajin me French daily ni: “Cik me dini ducu rwatte: Gicwako apokapoka i kom mon.”

Mono itamo ni lokke-ni tye ada? Tika itamo ni Baibul weko kineno mon calo jo ma pigi pe tek, kit ma bukke mapol me dini nyuto kwede-ni? Bot jo mukene, tyeng mogo i Baibul nyuto kumeno. Ento Lubanga kono neno mon nining? Kadi bed ni jo mapol cwinygi cwer i lok man, ngiyo kacel ki bedo ki cwiny me ada i kom gin ma Baibul waco bikonyowa me nongo lagamme.