1. Ngo ma Yecu owaco ma lubbe ki kwongo kwong dok pingo?

 POL kare pe mitte ni Lukricitayo myero gukwong kwong me moko ni gitye ka loko lok ada. Man timme pien gin giwinyo lok pa Yecu, ma owaco ni: ‘Wuwek lokwu ni Eyo ocung ni Eyo.’ En onongo tye ka wacci ngat moni myero olub cikkene. Yecu ocako lokke kun ciko ni: “Pe ikwong kwong.” En owaco man pien dano mapol guloko odoko kitgi me kwonge nino ducu i lokgi ento pe gitimo gin ma gukwonge pire. Ka ngat mo oloko gin “makato” Eyo nyo Pe man ma jwi-ni me tito mitine, ci ngat meno nongo tye ka nyutone ni pe egenne dok nongo “Larac” aye tye ka tic kwede​—Kwan Matayo 5:33-37.

2. Tit kong gin mumiyo pe rac me kwongo kwong.

² Yecu mono onongo tye ka wacci kwongo kwong rac? Man twere nining? I pwony mukato-ni, waneno ni Lubanga Jehovah gin ki Abraim gukwongo kwong ma lubbe ki lok ma pigi tek. Cik pa Lubanga bene ye ni myero ki kwonge me cobo peko ma tye. (Nia 22:10, 11; Wel 5:21, 22) Pi meno, pore pi Lakricitayo me kwonge i kot ni ebitito lok ada. Kicel kicel bene, romo mitte ni Lakricitayo myero okwonge wek jo mukene pe gubed ki akalakala i kom mitine me timo gin moni nyo cobo lok ma tye. Ki lok ada, i kare ma lalamdog madit owaco ki Yecu ni omyero okwonge, en pe okwero lok meno, oloko lok ada i nyim Kot Mamalo pa Lujudaya. (Mat. 26:63, 64) Ento onongo pe mitte ni Yecu myero okwonge i nyim ngat mo keken. Kadi bed kit meno, me nyuto ni en pe lagoba, Yecu obedo ka wacci: “Adada awacciwu ni.” (Jon 1:51; 13:16, 20,  21, 38) Kong wanenu pwony mukene ma wanongo ki i lanen pa Yecu, Paulo ki dong jo mukene ma guweko Eyogi ocung ni Eyo.

3. I legane bot Lubanga, ngo ma Yecu ocikke me timone, dok Wonne me polo odok iye nining?

³ “An a ene, dong abino ka cobo mitini, in Lubanga.” (Ibru 10:7) Ma lubbe ki lok man, Yecu omine me timo jami ducu ma kitito wacon ni Lakwaro ma kiciko pire-ni bitimone, dok man onongo kwako ‘tongo opunye’ ma Catan aye otimo. (Acak. 3:15) Ma naka yam peya tye ngat mo ma ojalle me yeyo yec mapek ma kit man. Jehovah otito kun loko ki i polo ni eketo genne ducu i kom Wode, ma oweko onongo pe mitte ni Yecu okwong kwong mo keken.​—Luka 3:21, 22.

4. Yecu otute lakwene wek lokke ni Eyo ocung ni Eyo?

⁴ Yecu kare ducu otimo gin ma en pwonyo kun weko Eyone cung ni Eyo. En pe oweko gin mo keken owiro tamme ki i tic ma Wonne omiye me tito kwena maber me Ker pa Lubanga ki dong loko dano ma Lubanga onyikogi bote me doko lupwonnyene. (Jon 6:44) Baibul cimo ka maleng kit ma Yecu ogwoko kwede cikkene bot Lubanga kun wacci: “Gin ma Lubanga ociko ni etimo ducu ocobbe kakare i kome.” (2 Kor. 1:20) Ada, Yecu tye lanen maber loyo pien en ocobo cikkene bot Wonne. Me aryo, kong dok wanenu labol pa ngat mukene ma otute me lubo lanen pa Yecu.

5. Lanen maber ango ma lakwena Paulo oweko botwa?

⁵ “Atim gin ango, Rwot?” (Tic 22:10) Man aye kit ma Paulo, ma onongo kilwongo ni Caulo-ni, odok kwede i kare ma Rwot Yecu owacce i ginanyuta ni omyero ojuk uno Lukricitayo. Pi gin man mutimme-ni, Caulo ongut i kom balle, onongo batija, ci oye tic ma kimiye me tito lok madok i kom Yecu bot rok ducu. Cakke i kare meno, Paulo omedde ki lwongo Yecu ni “Rwot” kun tiyo tic ma lubbe ki nying meno nio ka oto. (Tic 22:6-16; 2 Kor. 4:5; 2 Tem. 4:8) Paulo pe obedo calo jo mogo ma Yecu oloko i komgi ni: “Pingo wulwonga ni, ‘Rwot, Rwot,’ kun pe wutiyo gin ma acikowu?” (Luka 6:46) Ada, Yecu mito ni jo ducu ma gijole macalo Rwotgi myero gucob kwongi kit ma lakwena Paulo ocobo-ni.

6, 7. (a) Pingo Paulo oloko pulanne me cito i Korint, dok pingo onongo pe pore pi jo mogo me wacci en pe gene? (b) Omyero wanen jo ma kicimogi me telowa nining?

 ⁶ Paulo otito kwena me Ker-ri ki mit kom i lobo Acia ki dong Ulaya dok bene ocako kacokke mapol kun dok cen ka limogi. I kine mukene, onongo mitte ni en myero okwonge ni gin ma ecoyo-ni tye lok ada. (Gal. 1:20) I kare ma jo mogo i Korint gukok i kom Paulo ni en pe gene, en ocoyo botgi ni: “Lubanga genne, lok ma yam wawaco botwu pe waloko [ni Eyo] ka dok lacen wakwero woko [ni Pe].” (2 Kor. 1:18) I kare me coyo lok man, Paulo onongo oa ki i Epeco tye ka cito i Korint kun kato ki i Makedonia. I acakkine, pulanne onongo tye me cito i Korint ma peya ecito i Makedonia. (2 Kor. 1:15, 16) Calo luneno ma giwoto awoto i kare-ni, i cawa mogo pulan lokke. Alokaloka ma kit man pe kitimo ata ento kitimo ka angola ngola mo tye. Gin mumiyo Paulo ogalle kit ma onongo en oyubo kwede me cito i Korint obedo pi ber bedo pa kacokke ma kunnu. I yo ango?

⁷ Ma kare okato i nge Paulo goyo pulanne mukwongo me cito i Korint, en owinyo ki cwer cwiny ni apokapoka ki tim kwele onongo kitye ka nenone anena kunnu. (1 Kor. 1:11; 5:1) Me cobo peko man, Paulo omiyo tira magwar i waragane mukwongo bot jo Korint. I ngeye, ma ka a ki i Epeco cito atir i Korint, Paulo omiyo utmego ma i Korint kare me keto tirane i tic wek ka eo kunnu, ci limme obed me cuko cwiny. I waragane me aryo ma ocoyo botgi, Paulo otito tyen lok mumiyo eloko pulanne ni: “Alwongo Lubanga me bedo cadenna kun awacciwu ki cwinya ducu ni, gin mumiyo pe abino i Korint, pien onongo amito timowu kica.” (2 Kor. 1:23) Pe myero wabed calo jo ma gukok i kom Paulo-ni; ento wabedu ki woro muromo i kom jo ma kicimogi me telowa. Lok ada tye ni myero walub lanen pa Paulo kun wacobo kwongwa kit ma en bene olubo lanen pa Kricito.​—1 Kor. 11:1; Ibru 13:7.

8. Lanen maber ango ma Labeka oweko?

⁸ “Abiwot.” (Acak. 24:58) Labeka ogamo kuman i kare ma minne ki omegine gupenye ka en biye weko paco i nino meno ci cito ki laco mo ma bene pe ngeyo i bor piny me mairo 500, me doko dako pa Icaka wod pa Abraim. (Acak. 24:50-58) Labeka oweko lokke ni Eyo ocung ni Eyo kun bedo dako ma gwoko paco dok lworo Lubanga. Pi kwone ducu, en obedo i kema macalo welo i lobo ma yam Lubanga Ociko Pire. En onongo mot me bedo i kin dayo pa Yecu Kricito, Lakwaro ma kiciko pire-ni.​—Ibru 11:9, 13.

9. Ruth ocung matek i lokke nining?

⁹ “Pe kumeno; wan wabidok kwedi wa bot jowu.” (Ruth 1:10) Man aye lok pa Ruth gin ki Orupa ma gubedo jo Moab ma guwaco bot Naomi, ma onongo tye ka dok cen i Beterekem kun a ki i Moab. I agikkine, i kare ma Naomi obako doge botgi, Orupa odok paco. Ento Ruth oweko lokke ni Pe ocung ni Pe. (Kwan Ruth 1:16, 17.) En omoko i kom Naomi calo okwodo kun kwero lupacone kacel ki woro goba me Moab. En oworo Jehovah pi kwone ducu dok obedo i kin mon abic ma Matayo oloko i komgi ni gubedo dayo pa Kricito.​—Mat. 1:1, 3, 5, 6, 16.

10. Pingo Icaya tye lanen maber botwa?

¹⁰ “An ene; ora.” (Ic. 6:8) Ma peya en owaco lok man, Icaya oneno Jehovah  tye obedo i wi kom Kerre malo ka wi ot pa Lubanga i Icrael. Ma en pud tye ka neno ginanyuta man, Icaya owinyo ka Jehovah penyo ni: “Abioro anga mono? Anga ma bicito piwa?” Jehovah onongo tye ka penyo ka ngat mo tye me wek ecwalo otit Lokke bot jone ma gungak woko-ni. Icaya ocobo cikkene​—en oweko lokke ni Eyo ocung ni Eyo. Pi mwaki makato 46 kulu, en otiyo ticce ki gen macalo lanebi, en otito ni Jehovah bipwodo jone dok bene kibiroco woro me ada.

11. (a) Pingo pire tek ni wawek lokwa ni Eyo ocung ni Eyo? (b) Lanen pa jo mene ma pe guloko lok ada, ma tye me cikowa?

¹¹ Pingo Jehovah oweko kicoyo lanen magi i Baibul? Dok pire tek ma rom mene ni myero wawek lokwa ni Eyo ocung ni Eyo? Baibul otito atir ni ngat ma “pe genne” nongo tye i kin jo ma ‘gupore me to.’ (Rom. 1:31, 32) Parao me Ejipt, Jedekia Kabaka me Juda, ki dong Anania ki Capira kicoyo lok komgi i Baibul pien ni gitye lanen maraco pa jo ma pe guweko lokgi ni Eyo ocung ni Eyo. Gin ducu gudeno can i agikkine dok gitye calo lanen me cikowa.​—Nia 9:27, 28, 34, 35; Ejek. 17:13-15, 19, 20; Tic 5:1-10.

12. Ngo ma bikonyowa me cung i lok ma waloko?

¹² Pien watye ka kwo “i kare me agikki,” pol kare wabedo kacel ki jo ma pe ‘gigene,’ ma ‘gimako dini dok gilubo i kitgi ma nen ki woko keken, kun gikwero tekone woko.’ (2 Tem. 3:1-5) Omyero wagwokke ki kodi jo magi maraco-ni. Ento kare ducu omyero waribbe ki jo ma giyelle me weko lokgi ni Eyo cung ni Eyo.​—Ibru 10:24, 25.

13. Lagam ni Eyo mene ma pire tek loyo ma jo ma gimito lubo kor Yecu Kricito gigamo?

¹³ Kwong ma pire tek ma ngat moni romo kwonge kwede aye obedo dyerene bot Lubanga. Tyen adek kulu, jo ma gimito doko lupwonnye pa Yecu gitye ki kare me kwerre kekengi kun gigamo ni Eyo lapeny ma kipenyogi kwede ka gitye ki miti me tic pi Jehovah. (Mat. 16:24) Ka luelda aryo gipenyo ngat moni me doko latit kwena ma peya onongo batija, gin gipenye ni, “In tika ada imito bedo ngat acel i kin Lucaden pa Jehovah?” Lacen, ka ngat meno odongo i yo me cwiny dok mito ni enong batija, luelda girwatte kwede kun gipenye ni, “In dong ityeko dyere keni bot Jehovah i lega?” Ki dong i nino me batija, jo ducu ma gibinongo batija kipenyogi ni, “Ma lubbe ki gitum pa Yecu Kricito, in dong ityeko ngut i balli dok  idyere bot Jehovah me timo mitine?” Pi meno, i nyim lwak lucaden mapol, jo magi manyen-ni gigamo ni Eyo ma lubbe ki kwongegi pi naka bot Lubanga.

14. Lapeny mene ma myero wabed ka penye kwede kare ki kare?

¹⁴ Kadi bed pud inongo batija nyen nyo itiyo pi Lubanga pi mwaki mapol, omyero ingine kekeni kun ipenye ki lapeny magi: ‘An tika atye ka weko lokka ni Eyo cung ni Eyo me nyuto ni alubo lanen pa Yecu Kricito? An tika aketo tic me tito kwena kacel ki loko dano me doko lupwonnye bedo gin mukwongo i kwona me nyuto ni awinyo lok pa Yecu?’​—Kwan 2 Jo Korint 13:5.

15. I kabedo mene i kwowa ma myero wawek lokwa ni Eyo ocung ni Eyo?

¹⁵ Cung i kwongewa ma wadyere kwede-ni te lokke ni myero wabed lugen i jami mukene ma pigi tego. Me lapore: Itye dano munyomme? Ci medde ki gwoko kwong ma ikwonge me maro ki dok tero lawoti ma inyomo calo ngat ma pire tek. Tika iketo cingi i kontrak me cato wil nyo ipongo fom me tiyo tic me tiokraci? Ci bed lagen dok icob cikkeni. Tika iye me cito ka cam i paco pa ngat mo ma lacan? Ci pe ikwer cito pien ni ngat mo mukene ma obitedo gin maber olwongi. Tika inongo ngat mo i ticwa me pwony i ot ki ot ci icikke me dok cen pi konye i yo me cwiny? Ci myero iwek lokki ni Eyo ocung ni Eyo pien Jehovah bigoyo laa i kom ticci me pwony.​—Kwan Luka 16:10.

16. Ka pe wacobo cikkewa, gin ango ma myero watim?

¹⁶ Baibul waco botwa ni calo dano ma luroc, wan “ducu watimo lwak roc mapol,” tutwalle kit ma watiyo kwede ki lebwa. (Yak. 3:2) Gin ango ma myero watim ka waniang ni pe wacobo cikkewa? I Cik ma Lubanga omiyo bot Luicrael, onongo kiromo timo kica bot ngat moni ka “oloko labongo tamo tere.” (Levi. 5:4-7, 11) Kiromo bene timo kica bot Lakricitayo moni ka oloko labongo tamo tere. Ka watuco bal ma watimo bot Jehovah, ci en bitimiwa kica kun tiyo ki Lalamdog Madit, Yecu Kricito. (1 Jon 2:1, 2) Ento wek wamedde ki nongo cwak pa Lubanga, omyero wanyut ni wangut pi balwa ma pe wanwoyo kun watute me yubo bal ma obino pi lok labongo tamo tere. (Car. 6:2, 3) Tye kono ni, omyero kong watam matut ma peya wacikke me timo gin ma pe waromo cobone.​—Kwan Latitlok 5:2.

17, 18. Anyim mamwonya ango ma tye pi jo ducu ma gitute me weko lokgi ni Eyo cung ni Eyo?

¹⁷ Anyim mamwonya tye pi jo ducu ma giworo Jehovah dok gitute me weko lokgi ni Eyo cung ni Eyo. Pi jo 144,000 ma kiwirogi, gin gibikwo i polo ka ma gibinywako loc kacel ki Yecu i Kerre “pi mwaka alip acel.” (Yabo 20:6) Pi dano milion mapol ata, gin binongo adwogi maber ma loc pa Kricito bikelone i lobo me Paradic. I paradic, gin gibibedo labongo roc mo keken kadi wa i tamgi.​—Yabo 21:3-5.

¹⁸ Ka wakato ki i atematema ma bibedo i agikki me Loc pi Mwaka Alip acel pa Yecu, pe wabibedo ki akalakala mo keken ka kiwacciwa lok mo. (Yabo 20:7-10) Dano ducu ma gibikwo i kare meno gibiweko lokgi ni Eyo cung ni Eyo ki Pe, ni Pe. Dano ducu bilubo lanen pa Wonwa me polo, Jehovah, “Lubanga me ada” maber adada. ​—Jab. 31:5.