Ginywala i Santo Domingo, i lobo Dominican Republic, abedo latin cogo i kin lutino angwen. Lunyodona onongo gubedo jo mukwano matek dok onongo gimito ni wabed ki kwo maber kun nongo wadongo i kin jo ma kitgi beco. Mwaki angwen ma peya kinywala, lunyodona gurwatte ki lumiconari pa Mormon. Kit ma awobe magi gurukke kwede ki dong worogi ogudo cwiny lunyodona adada, ma oweko gumoko tamgi ni jo me pacowa gibibedo namba acel i cula nam meno me donyo i dini me Mormon nyo Church of Jesus Christ of Latter-day Saints.

I kare ma awoto ki dongo, onongo amaro gure ma gitimme i kanica ki dok woro ma Mormon giketo i kom kwo me ot kacel ki kwo matir. Onongo atye ki awaka madit me bedo i dini me Mormon dok bene aketo yub me bedo lamiconari.

Ma mwakana oromo 18, jo me pacowa gudak i lobo Amerika ki miti ni wek amedde ki kwan i univaciti. I nge mwaka acel, lamin mamana gin ki cware ma gitye Lucaden pa Jehovah gubino ka limowa i Florida. Gulwongowa me bedo tye kwedgi i gure madit pa Lucaden pa Jehovah. Neno kit ma jo ma gubedo ka ngeta giyabo ki Baibulgi kun giwoto ki coc ogudo cwinya adada. Pi man, apenyo pi karatac ki kalam ci an bene acako coc.

I nge gure man, lamin mamana gin ki cware guwacci kit ma mitina tye me doko lamiconari-ni, gitwero pwonya ki jami ma tye i Baibul. Atamo ni meno obedo tam maber, pien onongo dong akwano matut Buk me Mormon makato Baibul.

Tyen mapol ma wabedo ka nyamo lok me Baibul kun watiyo ki cim, lamin  mamana gin ki cware gubedo ka cuko cwinya kare ducu me bedo ka poro niyena ki gin ma Baibul pwonyo. Onongo gimito ni amok gin ma Baibul pwonyo an kikoma.

Onongo dong ajolo pwony mapol ma lubbe ki niye pa Mormon, ento onongo akalakala mada ka pwony magi girwatte ki gin ma tye i Ginacoya. Lamin mamana ocwala magajin me Awake! me November 8, 1995, ma Lucaden pa Jehovah aye gucoyo, ma onongo tye ki pwony mogo madok i kom niye pa Mormon. Man oweko abedo ki ur ni kara onongo pe angeyo pwony mapol pa Mormon. Man oweko abedo ki miti madit me kwedo ki i kabedo me Intanet pa Mormon me moko ka ada jami ma kicoyogi i Awake! ni gitye lok ada. Gubedo lok ada, dok bene amoko lokke i kare ma acito i museums [ka ma kigwoko iye jami macon] pa Mormon i Utah.

Kare ducu onongo aye ni lok ma tye i Buk pa Mormon rwatte ki lok me Baibul. Ento i kare ma acako kwano Baibul kore ki kore, aniang ni pwony me Mormon pe girwatte ki gin ma kicoyo i Baibul.

Medo i kom pwonygi ma pe rwatte-ni, tamgi ni lobbe mukene pigi tek loyo lobbe mukene-ni oyela mada. Me lapore, jo ma i dini Mormon kipwonyogi ni poto me Eden onongo tye i Jackson County, i Missouri, lobo Amerika. Ki dok lutela me kanica me Mormon giwaco ni “i nino mo acel Ker pa Lubanga biloyo lobo weng kun tiyo ki gamente me lobo Amerika.”

Abedo ka penye kekena ka gin ma Mormon pwonyo-ni bitimme i lobbe mukene, calo lobo ma ginywala iye. Akelo lok man i kare ma atye ka lok i cim ki bulu mo ma tye Mormon, ma onongo kitye ka pwonyone me doko lamiconari. Apenye atir ka en biye lweny i kom Mormon luwote ka lobone odonyo ilweny ki lobo mukene. Abedo ki ur i kare ma en owacci ebilwenyo! Amedde ki kwedo i yo matut pwony me Mormon dok bene apenyo lutela me kanica me Mormon. Kiwacca ni lagam pi lapeny mapol ma apenyogi-ni kwako jami mogo ma pe niange ento bicobbe ka dero me ngec omedde.

Pe ayeng ki lagamgi ma gumiyo-ni, man oweko acako ngine kekena ki dong tyen lok mumiyo amito doko lamiconari me Mormon. Aniang ni tyen lok acel mumiyo onongo amito doko lamiconari obedo me konyo jo mukene. Ki bene onongo amito ni dano guwora. Ento ma lubbe ki ngec madok i kom Lubanga, onongo pe atye ki ngec mapol. Kadi bed ni akwano Baibul tyen mapol i kare mukato angec, onongo pe atero calo gin ma pire tek. Onongo pe atye ki ngec mo keken ma lubbe ki yub pa Lubanga pi lobo nyo dano.

I kwano Baibul ki Lucaden pa Jehovah, apwonyo jami mapol ma i kine tye iye nying Lubanga, gin ma timme ka wato, ki tic pa Yecu i cobo yub pa Lubanga. Olo to onongo dong atye ka ngiyo ki buk man mamwonya-ni, dok onongo amaro nywako gin ma atye ka pwonnye-ni ki jo mukene. Con onongo angeyo ni Lubanga tye, ento kombeddi dong atwero lok kwede i lega calo Larema macok adada. Kibatija an me doko Lacaden pa Jehovah i Julai 12, 2004, i nge dwe abicel acako tic macalo painia.

Pi mwaki abic, abedo ka tic i gang kal madit pa Lucaden pa Jehovah i Brooklyn, New York. Cwinya obedo yom me konyo i yubo Baibul ki bukke ma gijenge i Baibul ma dano milion mapol i wi lobo lung gikwano, dok pud atye ka nongo yomcwiny i konyo jo mukene wek gupwony lok i kom Lubanga.