Mwolo te lokke ni bedo labongo awaka nyo cac i kom jo mukene. Ngat ma mwol pe neno jo mukene calo konygi peke. Ngat mo keken ma tye ki roc dok mwol myero bene onge ka ma kerone gik iye.

Moses pe odoko lawaka i kare ma kimiye twero. Pol kare, ka kimiyo bot dano twero mo manok, en nyuto oyotoyot ka emwol nyo pe. Lacoc mo acel ma nyinge Robert G Ingersoll ma okwo i cencwari me apar wiye abongwen owaco kuman: “Dano mapol gitwero kanyo pekki malit. Ento, mi twero bot ngat moni ka imito ngeyo kite.” Ma lubbe ki meno, Moses onyuto lanen maber adada me mwolo. En otimo man nining?

Moses onongo twero madit adada pien Jehovah omiye tic me telo Luicrael. Ento, twero meno pe oweko Moses ocako wakke. Me lapore, nen kong kit ma en ocobo kwede i yo me mwolo koko mo matek madok i kom twero me ginaleya. (Wel 27:1-11) Koko meno onongo pire tek adada pien tam ma kimoko onongo pe bigudo mon-ni keken ento bene bimako yalwak ma bibino i anyim.

Moses odok iye nining? Tika en otamo ni macalo latela pa Luicrael, epore me ngolo kop man? Tika en ojenge i kom ryeko me anywali, mwakane malac i tela, nyo ngecce matut i kom kit ma Jehovah tamo kwede?

Gwok nyo laco ma wakke onongo bitimo kumeno. Ento Moses pe otimo meno. Baibul wacciwa ni: “Moses otero lok me kokogi i nyim Rwot [Jehovah].” (Wel 27:5) Tam kong! Kadi bed ni en otelo rok me Icrael pi mwaki 40 kulu, Moses ojenge i kom Jehovah. Man onyuto ka maleng ni Moses obedo laco mamwol adada.

Moses pe otamo ni en keken aye myero ebed ki twero. Cwinye obedo yom i kare ma Jehovah oye ni Luicrael mukene bene gubed lunebi. (Wel 11:24-29) I kare ma won dakone omiye tam ni oyer co mogo wek gukonye ki tic, Moses oye tam man ki mwolo dok oketo i tic. (Nia 18:13-24) I kare ma dong Moses cok to, kadi bed ni onongo kome pud tek, en olego Jehovah ni ocim ngat mo ma bileyo kakare. I kare ma Jehovah oyero Yocwa, Moses omiyo cwak ki cwinye ducu, kun cuko cwiny lwak me lubo tela pa Yocwa nio wa i Lobo ma Kiciko Pire-ni. (Wel 27:15-18; Nwoyo Cik 31:3-6; 34:7) Labongo akalakala mo, Moses otero telo wi Luicrael i woro Lubanga ni obedo mot madit. Ento pe oketo pi twerone ni obed gin ma pire tek makato ber bedo pa jo mukene.

Pe myero wawek twero nyo ryeko me anywali omi wadok luwaka. Po ni: Wek watim tic pa Jehovah i yo maber loyo, mwolowa myero obed gin ma pire tek loyo ryekowa. (1 Camuel 15:17) Ka pe waporo bedo ki mwolo apora, ci wabitemme matek me keto i tic tira me Baibul ni: “Gen Rwot [Jehovah] ki cwinyi ducu, pe ibed ka jengnge i kom niang ma itye kwede.”​—Carolok 3:5, 6.

Lanen pa Moses-ni pwonyowa ni myero pe wawek rwomwa nyo twerowa obed gin ma pire tek loyo.

Tika wanongo adwogi maber ka walubo lanen me mwolo pa Moses-ni? Ngene kene! Ka wadongo kit me mwolo, waweko kwo pa jo ma i ngetwa bedo yot, ci gibimarowa. Ma pire tek loyo, waweko Lubanga Jehovah marowa, ma en kikome nyuto kit man me mwolo-ni. (Jabuli 18:35) “Rubanga kwero jo ma giwakke, ento miyo gum [mot] bot jo mamwol.” (1 Petero 5:5, Baibol pa Katoli) Man pud dong obedo tyen lok maber ya me lubo lanen me mwolo pa Moses!