LOK MA I POK NGEYE: PWONY MA WANONGO KI I LANEN PA MOSES
Moses Mono Obedo Anga?
Ngo ma bino i wii ka kilwongo nying Moses? Tika itamo i kom . . .
-
latin ma minne okano i aduku i Kulu Nile?
-
awobi ma odongo i cing nya pa Parao i lonyo me Ejipt ento wiye pe owil ni en Laicrael?
-
laco ma obedo lakwat i Midian pi mwaki 40?
-
laco ma oloko ki Jehovah * i nyim latin yat ma obedo ka lyel mac?
-
laco ma ocung ki tekcwiny i nyim kabaka me Ejipt kun penyo ni kigony Luicrael ki i opii?
-
laco ma otito pi Pwod Apar ma opoto i kom Ejipt i kare ma kabakane ojemo i kom Lubanga me ada?
-
laco ma otelo wi Luicrael ki i Ejipt?
-
laco ma kitiyo kwede me baro Nam Makwar?
-
laco ma omiyo bot Luicrael Cik Apar pa Lubanga?
MOSES otimo jami magi ducu ki mukene. Man aye oweko Lukricitayo, Lujudaya, ki Luicilam giworo laco man ma onongo obedo lagen-ni!
Nen ka maleng ni Moses obedo lanebi ma ‘otiyo kit tic madito ki ma kelo lworo madwong.’ (Nwoyo Cik 34:10-12) En oye ni Lubanga oti kwede i yo magwar. Kadi bed kumeno, Moses obedo dano adana calo wan. Calo lanebi Elia ma gunen gin ki Moses i ginanyuta i kare ma Yecu pud tye ka tiyo ticce me pwony, Moses obedo laco “ma kite cal kwedwa.” (Yakobo 5:17; Matayo 17:1-9) Moses orwatte ki pekki mapol ma wan bene warwatte kwedgi, ento en owok ki i igi ducu maber.
Tika imito ngeyo kit ma en otimo kwede meno? Kong wanenu kit mabeco adek ma Moses onyuto ki gin ma wapwonyo ki i lanenne.
^ para. 7 Jehovah aye nying Lubanga kit ma kinyuto kwede i Baibul.
