LOK MA I POK NGEYE: CER PA YECU KELI ADWOGI MABER

Cer pa Yecu Tika Otimme Ada?

HERODOTUS, dano ma okwano lok me tekwaro pa Lugrik dok okwo mwaki 2,500 mukato angec, otito kit ma jo Ejipt onongo gikwo kwede i karegi ca. En ocoyo ni, “Ka lulonyo dong gutyeko cam, ci laco mo nyuto cal apaya ma kiwero nyo kilingo ma nen calo dano muto dok nongo tye i canduk lyel bot jo ducu ma gubino ka cam. En nyuto calli kun woto ki wacci ‘Mat wek cwinyi obed yom, pien ka i to litap, ci ibibedo calo cal apaya man.’”

Bedo ki cwiny ma kit meno i kom kwo ki to onongo pe obedo gin manyen bot jo Ejipt. I kare-ni bene, lok ni “Cam, dok imat mat, kun ibedo ki yomcwiny,” dwong mada. Ka ce kwo gik woko ka ito, ci pingo pe icam kwo? Pingo ibalo kare ni itimo gin matir? Ka jami ducu gik woko ka ito, ci pore ni myero icam kwo kombeddi. Lakwena Paulo bene oloko i kom lok acel-lu. En oloko i kom cwiny ma jo ma pe giye nicer gitye kwede, en owaco ni: “Ka cero jo muto pe, ci ber dong ‘wacamu, wamatu, pien diki wabito woko.’”​—1 Jo Korint 15:32.

Ada, Paulo onongo pe ye ni ka dano oto, ci wic wil woko i kome matwal. En onongo tye ki gen ni jo muto pud dok gitwero kwo aye, kun gibedo ki gen me kwo naka. Gen meno onongo cung i kom lok ada mo ma pire tek adada ma gin mo keken pe twero lokone​—cer * pa Kricito Yecu. Ada, cer pa Yecu onongo tye gin mo ma pire tek adada ma ojingo niye pa lupwonnye me kare ca.

Cer pa Yecu mono pire tek botwa ma rom mene? Wangeyo nining ni en ocer? Kong wanenu kit ma Paulo onyamo kwede lok man i kare ma en ocoyo waraga bot Lukricitayo me Korint.

KA YECU ONONGO PE OCER KONO?

I kare ca, Lukricitayo mogo i Korint onongo wigi onywene woko ma lubbe ki lok me cer, ma jo mukene onongo pe giye ni dano twero cer. I waraga mukwongo ma en ocoyo botgi, Paulo  oryeyo adwogi ma onongo bibino ka nicer pe ada. En ocoyo ni: “Ka ce cer pa jo muto pe, ci Kricito bene kara pe gicero. Ka Kricito yam pe gicero, ci kwena ma watito-ni dong yone pe, kadi wa niyewu bene yone pe. Medo ki meno, wan bene lucaden me goba i kom Lubanga . . . kony me niyewu bene pe, nongo pud wutye i balwu. . . . jo muto i Kricito nongo dong gurwenyo woko matwal.”​—1 Jo Korint 15:13-18.

Paulo ocako lokke i yo mo ma pe kitwero pyem iye ni: Ka jo muto pe kibicerogi, ci Kricito ma oto-ni bene pe ocer. Ket kong ni Kricito onongo pe ocer, itamo ni adwogine onongo bibedo ningo? Adwogine onongo bibedo ni kwena maber ma watito pire-ni konye pe, nongo obedo twon goba madit. Cer pa Kricito onongo tye gin mo ma pire tek i jingo niye pa Lukricitayo, ma kubbe ki pwony ma pigi tego me Baibul calo twero me loc pa Lubanga, nyinge, Ker-re, ki dong larrewa. Ka Yecu onongo ada pe ocer, ci kwena ma Paulo ki lukwena mukene gubedo ka titone-ni onongo tye lok goba ma konye pe dok balo kare.

Adwogi mukene onongo dok bino. Ka ni Kricito onongo pe ocer, ci niye pa Lukricitayo onongo kono tere pe, pien gutine jenge i kom lok goba. Medo i kom meno, Paulo ki jo mukene-ni onongo kono guloko lok goba pe i kom cer pa Yecu keken ento bene i kom Lubanga Jehovah, ma ocero Yecu. Ki dok bene lok man ni Kricito ‘yam oto pi balwa-ni’ onongo kono tye lok goba—pien ka Lalar kulu pe kicero, ci en pe romo laro jo mukene. (1 Jo Korint 15:3) Man nongo te lokke ni Lukricitayo ma guto, ma gwok nyo bene kinekogi aneka nongo guto nyong pi bedo ki niye gobagoba ni kibicerogi.

Paulo odolo te lokke kit man: “Ka genwa i kom Kricito konyowa i kwo me kare-ni keken, ci dong nongo watye marac makato jo ducu.” (1 Jo Korint 15:19) Calo Lukricitayo mukene-ni, Paulo orwenyo jami mapol, kiunne, okanyo kwo matek, dok ki loyo nekke pi bedo ki gen i kom nicer ki dong jami ducu ma onongo kubbe kwede. Magi ducu onongo bedo balo kare keken ka nicer onongo tye lok goba!

GIN MUMIYO OMYERO IYE

Paulo pe oye kulu ni adwogi maraco-ni gitye ada. En onongo ngeyo ni kicero Yecu, dok omiyo caden ma nyuto bot Lukorint kun waco ni, “Kricito yam oto pi balwa, kun lubo coc ma yam gicoyo; dok bene ni giyike, ka dong gicere woko i nino me adekke, kun lubo coc ma yam gicoyo, dok ni yam onen bot Petero, ka dok onen bot jo apar wiye aryo ca.” * Paulo omedo ni: “Ka dok onen bot utmego makato miya abic lawangacel;pol dano mogo i kom jo-nu pud gitye kwo, kadi bed jo mogo dong guto woko. Dok oturu ki nen bot Yakobo, lacenne onen bot lukwena ducu. Me agikkine ducu, ci bene onen bota.”​—1 Jo Korint 15:3-8.

Paulo ocako lokke ma cwinye tek ni Kricito oto pi balwa, giyike, ka dong gicere. Ngo mumiyo Paulo obedo ki tekcwiny? Tyen lok me acel obedo caden pa jo ma guneno ki wanggi. I kare ma kicero Yecu, en onen bot dano mapat pat (ma i kine tye Paulo), ki dong bot jo manok ma gugure kacel, ki bene bot dano 500 kulu, ma jo mapol i kingi kong gubedo ki akalakala i kare ma guwinyo ni Yecu ocer! (Luka 24:1-11) Pol pa jo ma guneno ki wanggi-ni mukene onongo pud gitye kwo wa i kare pa Paulo dok onongo kiromo penyogi me moko ka ada Yecu onen botgi. (1 Jo Korint 15:6) Kiromo kwero lok pa caden acel nyo aryo, ento pe lok me caden pa dano 500 nyo makato.

Ka ineno bene, inongo ni Paulo oloko kiryo kulu ni to, yiko, ki dong cer pa Yecu onongo “lubo coc ma yam gicoyo.” Jami magi mutimme-ni gimoko ni lok ducu ma kicoyo i kom Meciya i Ginacoya me leb Ibru gucobbe kakare, ma moko atir ni Yecu aye Meciya ma kiciko pire.

Kadi bed caden mapol kacel ki Ginacoya gimoko lok man, ento onongo tye jo mogo, ma mukene bene pud tye wa i kare-ni ma gikalo akala ka Yecu ocer. Jo mogo giwacci lupwonnyene  gukwalo kome woko ka dong gibwolo dano ni gibedo lucaden ma moko cerre. Ento, lupwonnye magi onongo gipe ki twero nyo kero me bwolo askari me Roma ma gitye ka gwoko dog boro ka ma kiyiko iye Yecu. Jo mukene giwacci lok ni Yecu ocer, ci onen-ni obedo lok goba. Ma dong nyweno lok man aye ka kiwacci Yecu onen bot dano mapol dok i kare mapat pat. Ki bene, tika pore me ye ni ngat ma peke twero tedo rec kit ma Yecu otimo kwede i nge cerre i Galilaya-ni? (Jon 21:9-14) Tika ngat ma peke twero wacci jo mukene gumul kome?​—Luka 24:36-39.

Jo mukene giwacci cer pa Yecu obedo diro ma lupwonnye gutimo me tuko ki wi dano. Ento konye ngo me tuko diro ma kit meno? Tito pi cer pa Yecu oweko gingalo lukwena, gudeno can, dok bene kinekogi. Pingo guketo kwogi ka mading i cwako lok goba? Medo i kom meno bene, gucako miyo caden ki i Jerucalem labongo kanne ki bot lumonegi, ma onongo gitye atera me mako bal mo keken i komgi wek gingol lok i wigi.

Cer pa Yecu pud dong obedo gin acel mo ma omiyo tekcwiny bot lupwonnye me miyo caden i kom Rwotgi kadi bed ni onongo kitye ka unogi. Lok ada i kom cer pa Yecu odoko guti matek me niye pa Lukricitayo. Lukricitayo me kare macon pe guketo kwogi ka mading mere me miyo caden i kom lapwony mo maryek ma kineko. Ento guketo kwogi ka mading me tito pi cer pa Yecu pien onyuto ni en obedo Kricito, Wod pa Lubanga, ngat ma kwo dok tek ma okonyogi dok otirogi. Cer pa Yecu nyuto ni gin bene kibicerogi. Ada, ka ni Yecu onongo pe ocer, onongo kono Lukricitayo gipe. Ka onongo ni Yecu pe ocer, onongo kono romo bedo ni pe wawinyo lok kome.

Adwogi maber ango ma cer pa Kricito kelo botwa i kare-ni?

[Lok ma tye piny]

[Cal ma tye i pot karatac 3]

[Bok i pot karatac 3]

LAPENY MA KIMARO PENYO

Angagi ma Kibicerogi?

“Dano gibicer woko, jo ma kitgi atir wa ki jo ma kitgi pe atir.” (Tic pa Lukwena 24:15) Jo ma kitgi atir tye iye co ki mon ma gubedo lugen calo Nua, Abram, ki dong Cara. Jo ma kitgi pe atir tye iye jo ma pe gutimo jami matir ma lube ki cik pa Lubanga pien pe gubedo ki kare me pwonyone ki dong ketone i tic.

Jo ma kibicerogi-ni gibikwo kwene?

Jo mukene kibicerogi me kwo nakanaka i polo kacel ki Kricito macalo luker ki lulamdog kun giloyo lobo. (Niyabo 5:9, 10) Pol pa dano kibicerogi me kwo i lobo. Gibikwo pi naka i paradic i lobo kany.​—Luka 23:39-43.

Nicer mono bitimme awene?

I kare me anyim, ka dong kityeko jo maraco ducu ki i lobo. Baibul tito pi cer ma bibedo lumuku i kare me loc pa Yecu me mwaki alip acel, ma kibiloko iye lobo-ni doko paradic.​—Niyabo 20:6.

Kwer me Easter mono kubbe ki nicer?

I but lobo mapol, dano gikwero Easter kun gitimo jami ma pe kubbe ki cer pa Yecu kulu ento jami ma gua ki i pwony me dini goba. Jami magi ducu pe kubbe ki cer pa Yecu, ma kiwaco ni Easter obedo-ni. Tika pigi tego botwa? Ee. Pien Lok pa Lubanga wacci wapokke ki i kom dini goba ki ni omyero ‘wawor Won i cwiny ki ada.’​—Jon 4:23; 2 Jo Korint 6:17.

Ka Yecu obedo Lubanga kit ma Kanica mogo gipwonyo kwede, ci anga ma ocero Yecu?

Yecu pe obedo Lubanga​— ma nyinge Jehovah​— ento obedo Wod pa Lubanga. Jehovah ocero en ki i kin jo muto. (Jo Roma 10:9) Laco mo ma okwano Baibul i yo matut owaco ni, “Pe twere pi ngat mo​—kadiwa Kricito​—me cere kekene.” *

[Lok ma tye piny]