Nineve onongo obedo gang madit i Ker me Aciria. Onongo obedo boma madit adada ma tye ki odi mabeco me gang kal ki me lega-gu, yo malac, cel ma lamal me gang. Lanebi Nakum ma obedo Laibru olwongo ni “gang ma oyo remo pa dano.”​—Nakum 3:1.

Lwongo man onongo pore mada, pien cal ma nonge i wi obur me gang kal pa Cenakerib i Nineve nyuto gero pa jo Aciria. Cal acel nyuto kit ma kitye ka ngolo kwede leb lamabuc mo ma kidiyo piny i ngom. Coc ma kicoyogi loko i kom kit ma kitweyo kwede ki mabuc ki tol kun kituco goli i umgi nyo del dogi. Luditte me ker ma kimakogi onongo kiweko giruko wi kabakagi i ngutgi, calo gingut malik.

Laco mo ma kwedo lok i kom Aciria, Archibald Henry Sayce otito pi tim gero ma timme i nge mayo boma moni ni: “Wi dano ma kinekogi kidurogi i odure mapol i teng yo ata; awobe ki anyira kiwangogi makwo nyo kinekogi ki nek alany; co onongo kigurogi i kom yat, kiyango del komgi ma gikwo calo lee, kikolo wangi woko nyo kingolo cinggi, tyengi, itgi ki umgi woko.”

Lubanga ociko Lujudaya kit man: “Ka ce igero ot manyen, ibigoyo [nyo ibiketo lageng i] wi ot meri irumo woko, wek pe ikel bal me oyo remo i odi, ma nongo ngat mo . . . opoto piny ki i wiye.” (Nwoyo Cik 22:8) Lageng onongo mitte, pien i kare me Baibul Lujudaya onongo gitiyo malo i wi odigi.

Pol odi pa Luicrael onongo wigi tye mupire apira. Wi odi magi onongo kioyo iye ceng, ginamo iye, nyo kitimo iye tic mogo me paco. I kare me oro, dano onongo gibuto malo iye. (1 Camuel 9:26) Lapur onongo moyo jami calo tworo, nyig oduru, nyig olok ki dong kalgi-ni malo i wi ot.​—Yocwa 2:6.

Wi ot bene onongo tye ka ma woro me ada ki me goba timme iye. (Nekemia 8:16-18; Jeremia 19:13) Lakwena Petero oito malo i wi ot ka lega i kine ka cawa abicel me dyeceng. (Tic pa Lukwena 10:9-16) Ka ce kiyubo bolo nyo gango ki jang otit, ci wi ot doko ka yweyo mo maber adada.

Buk mo ma wi lokke tye ni The Land and the Book wacci odi pa jo Icrael onongo tye ki citep ma ki ito kwede malo, dok “pe bedo ki i ot ento bedo ki woko i kom ot.” Ma nyutti rwod ot pe lor donyo atir i ot. Man miyo waniang lok ma Yecu owaco ma lubbe ki ngwec woko ki i gang ma kicok jwerone ni: “Dano ma onongo tye i wi ot pe dok olor piny me bino ka kwanyo gin mo ma tye i ode.”​—Matayo 24:17.