1, 2. Lok mene ma lubbe ki kare me agikki-ni ma nen calo ogudo cwiny lupwonnye pa Yecu, ki dok pingo?

 PETERO, Yakobo, Jon, ki dong Anderiya onongo gitye kengi ki Laditgi. Tam onongo ocirogi woko pien Yecu owaco con ni ot pa Lubanga kibimukone woko piny. (Mar. 13:1-4) Pi meno, gin gupenye ni: “Tit botwa, lok man bitimme awene, dok kit gin ango ma binyuto dwogoni, ki agikki piny?” (Mat. 24:1-3) Yecu ocako tittigi jami ma bitimme ma nongo peya kituro Jerucalem dok bene binyuto ni watye ka kwo i kare me agikki me lobo pa Catan-ni. Nen calo gin mo acel ogudo cwiny lupwonnye pa Yecu. I nge lok i kom jami maraco calo lweny, kec ki dong nya pa tim maraco, Yecu otito ni tye gin mo maber ma obitimme ma nyuto kare me agikki. En owaco ni: “Lok man me kwena maber me ker pa Lubanga gibitito i wi lobo ducu, me bedo caden bot rok ducu; ka dong lacen agikki piny bibino.”​—Mat. 24:7-14.

² Lupwonnye pa Yecu onongo dong gubedo ka tito pi kwena maber i kom Ker-ri kacel ki Kricito. (Luka 8:1; 9:1, 2) Nen calo wigi opo i kom lok ma en owaco ni: “Kac tye dwong, ento lukac aye nok; pi meno wuleg Won poto, wek ocwal lutic ka kac.” (Luka 10:2) Ento gin onongo gitwero tito kwena i “wi lobo ducu” ki dok miyo “caden bot rok ducu” nining? Lutit kwena magi onongo gibia kikwene? Racce tye ni lupwonnye magi onongo pe gitwero neno gin ma bitimme i anyim i kare ma gubedo kacel ki Yecu i nino meno. Onongo gubibedo ki ur adada me neno kit ma lok ma wakwano i Matayo 24:14 tye ka cobbe kwede kombeddi-ni.

3. Luka 21:34 tye ka cobbe nining i kare-ni, dok lapeny ango ma myero wapenye kwede?

³ Lok ma Yecu owaco-ni tye ka cobbe i kare-ni.  Dano milion mapol guribbe kun gitye ka tito kwena maber me Ker-ri i twok lobo lung. (Ic. 60:22) Ento Yecu owaco ni jo mukene gibinongo tek tutwal me keto cwinygi i tito kwena i kare man me agikki-ni. Jami mapol bidwoyo tamgi ci ‘cwinygi doko nwang.’ (Kwan Luka 21:34.) Watye ka neno bene kit ma lok man tye ka cobbe kwede. Jo mogo ma gitiyo pi Lubanga cwinygi tye ka doko nyap. Man nen i tam ma gimoko ma lubbe ki dog tic, kwan i rwom mamalo, yenyo jami me kom, ki dong cawa ma gicwalo i tuko ki galo wang. Jo mukene gitye ka ol woko pi lyeto kacel ki par pi jami me kwo me nino ki nino. Penye kekeni ni: ‘An mono atye ka timo nining i kabedo magi? Tam ma amoko tika nyuto ni atye ka keto timo miti pa Lubanga bedo mukwongo i kwona?’

4. (a) Gin ango ma Paulo olego pire pi Lukricitayo me Pilipi, ki dok pingo? (b) Gin ango ma wabinyamo i pwony eni kacel ki ma lubo, dok ki miti me timo gin ango?

⁴ Onongo mitte ni Lukricitayo i cencwari me acel gutute matek me keto pi woro Lubanga obed mukwongo i kwogi. Wek Jehovah okony Lukricitayo me Pilipi, lakwena Paulo olego ni gin myero guket pi “jami ma pigi tego obed mukwongo.” (Pil. 1:9-11, NW) Calo lakwena Paulo, pol pa Lukricitayo me Pilipi bene gutito “lok pa Lubanga ki tekcwiny madwong twatwal, labongo lworo.” (Pil. 1:12-14) I yo acel-lu, pol pa wan bene i kareni watito Lok pa Lubanga ki tekcwiny. Ento kadi bed kumeno, tika nyamo jami ma tye ka cobbe i dul pa Jehovah i kare-ni romo konyowa me keto cwinywa i tiyo tic ma pire tek me tito kwena-ni? Twero konyowa maber adada! I pwony man, kong wanyamu yub ma Jehovah oketo wek lok ma tye i Matayo 24:14 ni ocobbe kakare. Gin ango ma dul pa Jehovah tye ka timone, dok ngeyone romo cuko cwinywa kacel ki jo me odiwa nining? I pwony ma lubo man, wabinyamo jami ma romo konyowa me cung matek i dul pa Jehovah kun wawoto kacel kwede.

5, 6. (a) Pingo Jehovah oweko ki neno but dulle ma i polo i ginanyuta? (b) Gin ango ma Ejekiel oneno i ginanyuta?

⁵ Tye jami mapol ma Jehovah oweko pe kicoyo i Baibul. Me lapore, en pe omiyo ngec matut i kom kit ma adam wic nyo polo ki lobo gitiyo kwede kadi bed ngec ma kumeno onongo bigudo cwinywa adada! Ma ka meno, Jehovah ominiwa ngec ma wamito wek waniang yubbe kun wakwo i yo ma lubbe ki yub meno. (2 Tem. 3:16, 17) Tye me yomcwiny ni Baibul ominiwa ngec mo manok i kom but dul pa Jehovah ma i polo! Man pud dong gudo cwinywa adada ka wakwano kit ma buk pa Icaya, Ejekiel, Daniel ki buk me Niyabo giloko kwede i kom dul man ma Jehovah oketo i polo-ni. (Ic. 6:1-4; Ejek. 1:4-14, 22-24; Dan. 7:9-14; Yabo 4:1-11) Man bedo calo iwacci Jehovah oyuro katen wek wanen jami ma tye ka timme i polo. Pingo en omiyo ngec man?

⁶ Jehovah onongo pe mito ni wiwa owil ni wan bene watye but dul man ma tye i polo ki i lobo-ni. Tye jami mapol ma tye ka timme me teno kor yub pa Jehovah makato jami ma waneno ki wangwa. Me lapore, Ejekiel oneno gadigadi mo madit ma tye ki lawala, gadigadi man onongo cung pi but dul pa Jehovah ma i polo. Gadigadi-ni onongo woto oyotoyot adada ento tugi loko yone atura. (Ejek. 1:15-21) Gadigadi-ni onongo ngweco ka mabor adada teke  lawalane guwire kadi kicel keken. I ginanyuta ma Ejekiel oneno-ni, en oneno ngat ma tye ka Ngwec ki gadigadi man. En owacci: ‘Aneno gin mo ma onongo tye ka ryeny calo mola, ma nen calo mac ma omoko orumo kome woko ducu . . . Meno aye kit ma yam cal me deyo pa Jehovah nen kwede.’ (Ejek. 1:25-28) Nen calo pud dong obedo me ur bot Ejekiel ya me neno ginanyuta man! En oneno kit ma Jehovah tye ka doro kwede dulle kun tiyo ki cwiny mere. Gadigadi man nyuto kit ma but dul pa Jehovah ma i polo tye ka medde kwede anyim i yo me aura!

7. Ginanyuta ma Daniel oneno-ni miniwa gen nining?

⁷ Daniel bene oneno jami mapol ma miniwa gen. En oneno Jehovah, “Ngat ma yam okwongo bedo kwo wa con” obedo i wi komker ma lyel mac. Dok komker man onongo tye i wi lawala. (Dan. 7:9) Jehovah onongo mito ni Daniel onge ni Dulle tye ka medde anyim kun cobo Yubbe. Daniel bene oneno “dano moro ame calo wot a dano,” Yecu, kun kitye ka miye twero me loyo but dul pa Jehovah ma i lobo. Loc pa Kricito ma roc mo pe iye-ni pe bitero mwaki mo manok keken. Ma ka meno, “loccere bino bedo loc ame perakino nakanaka, loccere mom bino gik kadi acel, dok loccere gire mom obino turo.” (Dan. 7:13, 14, Baibul me leb Lango) Man miyo waketo genwa i kom Jehovah ki dok me bedo ki pwoc pi gin ma en tye ka cobone. En omiyo ‘loc, ker, ki dong deyo’ bot Wode Yecu, ngat ma kitemo dok kinongo ni tiyo maber. Jehovah tye ki gen madit i kom Wode. Pi meno, wan  bene watwero bedo ki gen i kom tela pa Yecu.

8. I yo ango ma ginanyuta ma Jehovah omiyo-ni ogudo kwede Icaya ki Ejekiel, dok bene myero ogudwa nining?

⁸ Ginanyuta magi madok i kom but dul pa Jehovah ma i polo-ni myero ogudwa nining? Calo Ejekiel, watye ki ur dok wamwolle pi jami ma Jehovah tye ka cobogi. (Ejek. 1:28) Kit ma Icaya otimo kwede-ni, lwodo lok i kom dul pa Jehovah myero ocuk cwinywa me timo gin mo olo to. I kare ma ki yabbe yo me tito bot jo mukene gin ma Jehovah tye ka timone, en ojolo labongo galle. (Kwan Icaya 6:5, 8.) Icaya onongo tye ki gen ni ki kony pa Jehovah, etwero kato ki i peko mo keken ma romo ngolle. I yo acel-lu bene, ngec man manok madok i kom but dul pa Jehovah ma i polo-ni, myero omi wabed ki ur dok ocuk cwinywa pe me bedo abedo. Pud dong cuko cwinywa me lwodo lok i kom dul meno ma tye ka medde anyim kun bene tye ka tic matek me cobo yub pa Jehovah!

9, 10. Pingo mitte tutwal ni but dul pa Jehovah obed tye i lobo?

⁹ Kun tiyo ki Wode, Jehovah oketo but dulle i lobo kany, ma tiyo kacel ki dulle ma i polo. Pingo mitte ni but dul pa Jehovah obed tye i lobo kany me cobo tic ma kitito pire i Matayo 24:14? Nen kong tyen lok adek.

¹⁰ Mukwongo, Yecu otito ni tic man me tito kwena-ni bitero lupwonnyene “wa i agikki lobo ducu.” (Tic 1:8) Me aryo, mitte ni myero kiket yub me miyo cam me cwiny ki dok kicuk cwiny jo ma gitye ka tiyo tic man. (Jon 21:15-17) Me adek, omyero bene kiket yub wek jo ma gitye ka tito kwena maber-ri gucokke kacel me woro Jehovah kun kipwonyogi kit me tiyo tic man. (Ibru 10:24, 25) Jami magi ducu pe giromo timme pigi kengi. Wek lulub kor Yecu gutim jami magi duc, mitte ni myero guyubbe maber adada.

11. Wanyuto nining ni wacwako yub ma dul pa Jehovah oketo?

¹¹ Wanyuto nining ni wacwako yub ma dul pa Jehovah oketo? Yo acel ma pire tek aye me keto genwa kare ducu i kom omege ma Jehovah gin ki Yecu guketo gengi i komgi me telowa i tic me tito kwena-ni. Omege magi onongo giromo tic ki cawagi kacel ki kerogi me cobo pekki mogo me lobo-ni, ento gin pe gitye ka timo meno. Lapeny dong tye ni, but dul pa Jehovah ma i lobo-ni mono mitine kare ducu tye me timo gin ango?

12, 13. Luelda gitiyo tic ma giminigi nining, dok pingo meno cuko cwinyi adada?

¹² Luelda ma guteggi i yo me cwiny kicimogi i twok lobo ducu me yubo ki dok telo yo i tito kwena me Ker-ri i lobo ma gitiyo iye. Ka omege magi gimoko tam, gin giyenyo tira ki i Lok pa Lubanga, kun giweko bedo ‘tara ma menyo ka tyengi, dok tye calo ceng ma menyo yo ma giwoto iye,’ ki bene gilego bot Jehovah ki cwinygi ducu wek otirgi.​—Jab. 119:105; Mat. 7:7, 8.

¹³ Calo luelda me cencwari me acel, luelda ma gineno kit ma tic me tito kwena tye ka wot kwede i kare-ni bene gitye jo ma gumine i “tito lok.” (Tic 6:4) Cwinygi yom adada ka gineno ni tic me tito kwena-ni tye ka medde i lobo ma gitye iye ki dong i wi lobo lung. (Tic 21:19, 20) Pe giryeyo cik kacel ki yo mapol  mapat pat ma myero kitim kwede ki jami. Ma ka meno, gilubo gin ma Ginacoya waco kacel ki tela pa cwiny pa Lubanga ka giketo yub ma mitte wek tic me tito kwena-ni omedde anyim. (Kwan Tic pa Lukwena 15:28.) Itimo meno, omege magi ginyuto lanen maber pi jo ducu me kacokke.​—Ep. 4:11, 12.

14, 15. (a) Yub ango ma kiketo me teno kor tic me tito kwena i twok lobo ducu? (b) Iwinyo nining pi tic ma itye ka timone me teno kor yub me tito kwena me Ker-ri?

¹⁴ Gin ma pol pa dano pe gineno aye kero ma kiketo i yubo bukkewa, cokkewa, ki dong gurewa madito. Jo alip ki alip ma gudyere gitye ka tic ki mit kom i gonyo cam me cwiny i leb ma romo 600 kulu wek ka twere dano mapol gupwony pi “tic madito me twero pa Lubanga” i lebgi. (Tic 2:7-11) Omege ki lumege ma pud giyot gitye ka tic matek i goyo ki ribo bukkewa kacel kun gitiyo ki macin ma cipidgi gwa adada. Bukke magi kipokogi i twok lobo ducu kadi wa ka maboco.

¹⁵ Tye yub mapol ma kiketogi i kacokkewa wek waket cwinywa i tito kwena maber-ri. Me lapore, dano alip mapol gitye ka konyo i gedo Odi me Ker ki Odi me Gure, konyo jo ma gitye i can pi peko ma poto atura nyo two mogo ma cakke atura, yubo gurewa mapat pat, ki dong pwony i cukul calo Cukul me Ticwa me Ker, Cukul me Baibul pi Omege ma Wigi Nono, magi aye jami mogo manok nok ma kitye ka timogi. Pingo kitye ka timo jami magi ducu? Me konyowa i tito kwena maber-ri, wek jo ma gitye ka timo tic magi bene gudong i yo me cwiny, ki dong wek jo mapol gubin ka woro Jehovah. Tika but dul pa Jehovah ma i lobo-ni ocobo mitine me keto pi jami ma pigi tego bedo mukwongo? Ocobo labongo akalakala!

16. Ngo ma itwero kwedo iye lok i cawa me woro pi jo me ot nyo ka itye ka kwan piri keni?

¹⁶ Tika i kine mukene wakwanyo kare me lwodo lok i kom kit ma dul pa Jehovah tiyo kwede? Jo mogo guyero me keto i worogi pi jo me ot nyo kwan pigi kengi yub me kwedo lok i kom dul pa Jehovah ki dong me lwodo lok i kom kit ma tiyo kwede. Ginanyuta ma Icaya, Ejekiel, Daniel, ki dong Jon guneno-ni weko kwan bedo mit adada. Buk me Jehovah’s Witnesses​—Proclaimers of God’s Kingdom kacel ki bukkewa mukene nyo DVD ma gitye i lebwa giminiwa ngec i kom dul pa Jehovah dok man gudo cwinywa.

17, 18. (a) Adwogi maber ango ma inongo ki i pwony man ma wanyamo-ni? (b) Lapeny macalo mene ma myero watam i komgi?

¹⁷ Lwodo lok i kom jami ma Jehovah tye ka timogi kun tiyo ki dulle konyowa adada. Kun wamedde anyim kacel ki dul man mamwonya tutwal-li, myero dong wamoku tamwa me keto pi jami ma pigi tego obed mukwongo. Timo meno biweko wamoko tamwa matek calo Paulo, ma ocoyo ni: “Pi meno, wan ma dong giorowa i tic man pi kica pa Lubanga cwinywa pe dok tye ka dok cen.” (2 Kor. 4:1) En bene ocuko cwiny Lukricitayo luwote ni: “Pe myero waol ka tiyo gin maber, pien ka kare oromo, ka cwinywa pe odoko nyap, ci wabikayo kac.”​—Gal. 6:9.

¹⁸ Tika tye alokaloka ma myero watim i kwowa nyo macalo jo me ot wek waket pi jami ma pigi tego obed mukwongo i ticwa me nino ducu? Tika waromo dwoko piny rwom me kwowa nyo jami ma dwoyo tamwa wek watim tic mapol i tic ma pire tek me tito kwena me Ker-ri? Ipwony ma lubo man, wabinyamo jami abic ma bikonyowa wek wamedde anyim kacel ki dul pa Jehovah.