LOK MA I POK NGEYE: LUBANGA TIKA CWINYE COL?
Pingo Dano Giwacci Lubanga Cwinye Col?
TIKA inongo ni lapeny ma i pok nge magajin man miyo ibedo ki ur? Jo mogo gitamo kumeno, ento jo mapol i kare-ni gipenye kekengi ka Lubanga cwinye col ada—nyo mogo gitamo ni en cwinye col. Pingo?
Jo mogo ma gubwot ki i peko ma poto atura gipenyo ni: “Pingo Lubanga ye ni jami magi gutimme? En mono pe paro piwa? Kece en cwinye col?”
Jo mukene bene gibedo ki ur ka gitye ka kwano Baibul. Ka gukwano jami mogo mutimme calo ma kicoyogi i kom Nua ki Pii Aluka, gin gipenye kekengi ni, ‘Pingo Lubanga ma lamar oneko jo magi ducu? Tika en cwinye col?’
Tika ipenye ki lapeny magi i cawa mogo? Nyo tika inongo ni pe itwero miyo lagam bot jo ma gipenye kekengi ka Lubanga cwinye col? Nen kong lapeny mo acel ma twero konyi.
PINGO WADAG NGAT MA CWINYE COL?
Me ketone i yo macek, wadag ngat ma cwinye col pien wan waneno ka ce gin moni tye atir nyo rac. Man aye gin mumiyo wapat ki lee. Lacwecwa ocweyowa “i kit calle kikome.” (Acakki 1:27) Man te lokke ngo? En ominiwa kero me nyuto kite kacel ki rwomme me kwo ma atir, ma obedo gin ma en neno ni tye atir nyo rac. Tam kong lok man: Ka Lubanga ominiwa kero me neno ka gin moni tye atir nyo rac ki dok pol kare wadag ngat ma cwinye col, tika man pe nyuto ni Lubanga bene dagi?
Ada, Baibul nyuto ni Lubanga dag ngat ma cwinye col, pien Lubanga cuko cwinywa ni: “Yona bene tye malo kit meno makato yowu, ki tamma bene tye malo kato tamwu woko.” (Icaya 55:9) Ka wangolo kop i wi Lubanga ni en cwinye col, tika nongo pe watye ka waco olungtuke pa ginacoya meno—ni yowa tye malo kato mege? Twero bedo me ryeko ka wamedo ngecwa ma peya wamoko tam ma kit man. Ma ka bedo ka penye ka Lubanga cwinye col, pingo pe wapeny gin mumiyo ticce mogo miyo wanene calo ngat ma cwinye col. Me konyowa, kong wanenu te lok man ni “col cwiny-nyi.”
Ka kilwongo ngat moni ni cwinye col, nongo en tye ki tam marac. Ngat ma cwinye col iye bedo yom ka jo mukene gideno can nyo pe paro pi cangi. Pi meno, wego ma pwodo wode pien maro cwero cwiny wode nongo cwinye col. Ento wego ma pwodo wode wek onong pwony nyo ogwoke nongo kite ber. Kit macalo pe wangeyo gin mumiyo jo mukene gitimo jami mogo, man weko bedo yot tutwal me nianggi i yo marac.
Kong wanenu tyen lok aryo mumiyo jo mogo gitamo ni Lubanga cwinye col—peko ma poto atura ma waneno i kare-ni ki dong kop ma Lubanga ongolo ma wakwanogi i Baibul. Lubanga tika ada cwinye col?
