POL pa dano olo dong gubedo ki par i kwogi mumiyo gupenyo pi kony ki bot ngat mo. Ma lubbe ki gin ma keliwa par, pol kare wapenyo larem ma lakica dok tye ki ngec i kom peko ma odiyowa-ni. Larem ma lakica dok tye ki ngec muromo pire tek botwa.

Jo mukene bene gitamo kumeno ka odok i lok kom lega. Ma ka lega atir bot Lubanga​—ma nen ngat madit tutwal dok me aura-ni​—gin giwinyo agonya me lega bot ngat acel i kin jo muto ma kiwacci gitye jo maleng. Gitamo ni jo maleng-ngi gukato ki i atematema kacel ki kwo matek calo wan, ma weko gibedo ki kica madit adada. Me labolle, jo ma gurwenyo jami ma pigi tek giromo yero me lega bot Anthony “Maleng” me Padua i lobo Italy​—ngat ma konyo me nongo jami murweny nyo ma kikwalogi. Ka gitye ka lega pi lee ma kome lit, gitwero yero Francis “Maleng” me Assisi i lobo Italy nyo Jude Thaddeus “Maleng” ka ce giwinyo ni cwinygi otur.

Ento, wan watwero mokone nining ka ce lega bot jo maleng rwatte ki Ginacoya? Kit ma legawa obedo lok ma i cwinywa ma watito bot Lubanga-ni, omyero wange lagam me lapeny man: Lubanga tika ada tye ka winyo legawa? Dok bene omyero wapenye kekenwa ni: Lubanga mono tamo ningo ka walego bot jo maleng?

Kanica pa Katoli aye pwonyo ni myero kileg bot jo maleng, pien gitamo ni jo maleng giromo lega piwa. Buk me New Catholic Encyclopedia waco ni gin ma pire tek aye “lega pi kica pa Lubanga kun iwok ki bot ngat acel i kin jo maleng.” Kit ma jo maleng gitye cok ki Lubanga-ni, jo ma gilego botgi gitimo man ki gen ni giromo konyogi.

Baibul tika pwonyo kodi gin ma kit man? Jo mogo giwaco ni i kare ma lakwena Paulo ocoyo waragane, en ocibo te guti me lega bot jo maleng. Me labolle, bot Lukricitayo me Roma, en ocoyo ni: “Abako doga botwu wun utmegina, pi Rwotwa Yecu Kricito ki pi mar pa cwinya maleng, wuket tek wuribbe kacel i legawu pira bot Lubanga .” (Jo Roma 15:30) Tika Paulo onongo tye ka wacci Lukricitayo luwote guleg pire bot Lubanga? Pe wacel. Ma ka meno, gin aye onongo myero gupeny Paulo, lakwena pa Kricito ni oleg pigi. Paulo onongo tye ka wacone ni pe rac me penyo Lakricitayo mo me lega piwa bot Lubanga. Ento pe rwatte matwal me lega bot ngat mo ma kitamo ni tye i polo wek en aye ocwal legawa bot Lubanga. Pingo?

 I Jiri ma lakwena Jon ocoyo, Yecu owaco ni: “An a yo, ki ada, ki kwo: pe tye ngat mo ma bino bot Won, kono ki i an keken.” (Jon 14:6) En bene omedo ni: “Gin ducu ma wubilego ki bot Won i nyinga, en [biminiwu].” (Jon 15:16) Yecu pe owaco ni myero kong waleg atir bote, ka dong en ebilego piwa bot Lubanga. Ma ka meno, wek Lubanga owiny legawa, omyero waleg bote kun wawok ki bot Yecu ento pe ngat mukene.

I kare ma lupwonye pa Yecu gulege ni opwonyogi kit me lega, Yecu odok iye ni: “Ka wulego, wuwac kit man ni, ‘Wonwa, giwor nyingi maleng.’” (Luka 11:2) Ada, i cawa mo keken “ka” watye ka lega, omyero pe waleg bot Yecu nyo ngat mukene mapat ento waleg bot Lubanga keken. Kit ma pwony pa Yecu-ni niang iye yot-ti, pore me lega bot Lubanga kun wawok ki bot Yecu Kricito ento pe bot “jo maleng”, pe kumeno?

Lega tye but worowa ma pire tek adada, dok bene Baibul pwonyo atir ni pe myero wawor ngat mo mapat ki Lubanga. (Jon 4:23, 24; Niyabo 19:9, 10) Meno aye gin mumiyo omyero waleg bot Lubanga keken.

I Pwonye me Wi Got, Yecu omiyo lapor i kom latin mo ma openyo wonne pi gin acama. Tika wonne bimiye gweng ma ka kwon? Nyo kece bimiye twol ma ka miye rec? (Matayo 7:9, 10) Wego ma lamar pe romo timo gin ma kit meno bot latinne!

Me lapore, ket kong ni in lanyodo. Latinni mito penyi gin mo ma pire tek adada. Idongo wat maber adada i kin in ki latinni-ni dok en nongo lok kwedi yot kare ducu. Ento pi lworo mo ma tere pe i kom kit ma ibigamo kwede, en ocwalo lawote mo aye ni openyi pi gin meno. Ibiwinyo nining? Ento ka ce en oloko odoko kite me medde ki lok kwedi kun tiyo ki lawote-ni kono? Tika cwinyi bibedo yom? Ngene kene ni cwinyi pe bibedo yom! Lunyodo ma lumar gimito ni lutinogi gulok kwedgi atir wang ki wang kun bene gibedo agonya me penyo pi gin mo keken ma gimito.

I tito te lok me lapore madok i kom latin ma openyo pi ginacama-ni, Yecu owaco bot lwak ma gucokke bote ni: ‘Ka ce wun jo maraco wungeyo miyo mot mabeco bot litinowu, ci Wonwu ma tye i polo pe bimiyo jami mabeco makato ducu bot jo ma lege?’ (Matayo 7:11) Labongo akalakala, lanyodo tye ki miti madit me miyo jami mabeco bot latinne. Wonwa me polo bene tye ki miti madit me winyo ki dok gamo legawa.

Lubanga mito ni waleg bote atir kadi bed ni i kine mogo goro ma watye kwede turo cwinywa. En pe waco ni ngat mukene aye owiny legawa ka okub bote. Baibul cuko cwinywa ni: “Kel pekoni ducu bot Rwot [Jehovah], ci en bikonyi.” (Jabuli 55:22) Ma ka jenge i kom jo maleng nyo ngat mo mukene, omyero wabed ki neno mupore i kom Lubanga Jehovah.

Wonwa me polo paro piwa ki acel acel. En mito ni ekonywa ki i pekki ma watye iye dok cuko cwinywa ni wanyikke cok bote. (Yakobo 4:8) Cwinywa yom adada ni watye ki kare me lega bot Lubangawa ki dok Wonwa, ma en aye ‘gamo lega-gu ducu.’​—Jabuli 65:2.