1, 2. Yecu tye ka tic ki angagi me pitowa i kare-ni, dok pingo pire tek ni wange jo man?

 “OMEGINA, pe aromo cako kwano pwony ma dong anongogi i kare ma nongo amitogi adada.” Man aye lok ma laminwa mo acel ocoyo me nyuto pwocce pi tic ma omege gitimo i gang kalwa madit. Tika in bene iwinyo ki i cwinyi calo laminwa-ni? Pol pa wan wawinyo kumeno. Tika meno myero omi wabed ki ur? Pe wacel.

² Cam me cwiny ma wanongo i karene kikome-ni nyuto ni Yecu, ma tye Lawi kacokke-ni, tye ka gwoko cikkene me pitowa i yo me cwiny. En tye ka timo man kun tiyo ki angagi? I kare ma Yecu tye ka tito pi lanyut me dwogone, en owacci ebitic ki “lagwok ot ma lagen dok maryek” me miyo ‘cam i kare ma mitte’ bot dano ducu me ode. * (Kwan Matayo 24:45-47.) Yecu tye ka tic ki lagwok ot ma lagen me pito lulub kore me ada i kare man me agikki-ni. Pire tek ni omyero wange lagwok ot man ma lagen-ni. Niyewa kacel ki watwa ki Lubanga cung i kom kony ma lagwok ot ma lagen miniwa.​—Mat. 4:4; Jon 17:3.

3. Gin ango ma kicoyo i bukkewa ma lubbe ki carolok madok i kom lagwok ot ma lagen?

³ Ci dong, omyero waniang carolok ma Yecu omiyo i kom lagwok ot ma lagen-ni nining? I kare mukato angec, kicoyo i bukkewa kit man: I Pentekote 33 K.M., Yecu oweko dano ducu me ode i cing lagwok ot ma lagen. Cakke i kare meno, lagwok ot ma lagen cung pi Lukricitayo ducu ma kiwirogi macalo gurup, ma gikwo i kare moni i lobo. Dano ducu ma gibedo i ode cung pi Lakricitayo acel acel ma kiwiro. I 1919, Yecu ocimo lagwok ot ma lagen me ‘loyo jamine ducu’​—jami ducu ma kitye ka tic kwedgi me teno kor tic me tito kwena me Ker-ri. Ento, lega kacel ki kwan matut okonyowa me niang ni omyero walok  niangowa i kom lok ma Yecu owaco ma lubbe ki lagwok ot ma lagen dok maryek. (Car. 4:18) Kong wanyamu carolok man kun waneno kit ma gudowa kwede, kadi bed ni watye ki gen me kwo i polo nyo i lobo.

4-6. Pingo waromo mokone ni carolok ma Yecu omiyo madok i kom lagwok ot ma lagen-ni oero cobbe i nge 1914?

⁴ Tyeng mukene ma tye i Matayo cura 24 nyuto ni carolok man madok i kom lagwok ot ma lagen-ni pe ocako cobbe i Pentekote 33 K.M., ento i kare me agikki. Kong wanenu kit ma Ginacoya konyowa kwede me niang lok man.

⁵ Carolok madok i kom lagwok ot ma lagen-ni tye but lok ma Yecu owaco madok i kom ‘gin ma binyuto dwogone, ki agikki piny.’ (Mat. 24:3) But lokke mukwongo ma tye i Matayo 24:4-22 bicobbe i yo aryo mapat pat​—me acel, cakke i mwaka 33 K.M. me o i 70 K.M., ki dong me aryone, bicobbe i yo madit i karewa-ni. Man mono te lokke ni lok ma Yecu owaco madok i kom lagwok ot ma lagen-ni bicobbe i yo aryo mapat pat? Pe.

⁶ Ka wacako neno ki lok ma Yecu owaco i Matayo 24:29, en oloko tutwalle i kom jami ma bitimme i karewa-ni. (Kwan Matayo 24:30, 42, 44.) Kun loko i kom gin ma bitimme i kare me twon can madit atika-ni, en owaco ni dano “gibineno Wod pa dano ka bino ki i wi pol me polo.” I ngeye, en ocuko cwiny jo ma gibikwo i kare me agikki-ni ni gubed ma wanggi twolo, kun wacci: “Pe wungeyo nino ma Rwotwu bibino iye” dok bene “Wod pa dano bibino i cawa ma nongo pe wutamo pire.” * I nge tito gin ma bitimme i kare me agikki i tyeng magi, Yecu omiyo carolok i kom lagwok ot ma lagen. Pi meno, watwero mokone ni lokke i kom lagwok ot ma lagen-ni oero cobbe ma dong kare me agikki ocakke i 1914. Niango ma kit man pore. Pingo?

7. Ma dong kare me kac ocakke, lapeny mene ma onongo pire tek, dok pingo?

⁷ Tam kong dok i kom lapeny man, “Anga ma lagwok ot ma lagen dok maryek?” I cencwari me acel, onongo pe tye tyen lok mo mumiyo omyero kipeny lapeny man. Kit ma waneno kwede i pwony mukato-ni, lukwena onongo gitimo tango dok giketo cinggi me poko mot me cwiny maleng me nyuto cwak pa Lubanga. (Tic 5:12) Pi meno, onongo nen ka maleng ni Kricito tye ka tic ki lukwena me telo jone. I 1914, jamine onongo pe rom ka iporo ki kare pa lukwena. Tic me kac ocakke i kare meno. Kare onongo dong otyeko romo me poko doo ki i kom kal. (Mat. 13:36-43) Ma dong kare me kac ocakke, lapeny ma pire tek onongo tye ni: Kit macalo jo mapol ma giporo bedo Lukricitayo giwacci gin lulub kor Kricito-ni, mono onongo kibingeyo Lukricitayo ma kiwirogi ma gubedo kal-li nining? Carolok madok i kom lagwok ot ma lagen miniwa lagamme. Jo ma kiwirogi, ma gilubo kor Kricito aye onongo kibimingi cam muromo i yo me cwiny.

8. Pingo pore tutwal ni lagwok ot ma lagen myero obed Lukricitayo ma kiwirogi?

⁸ Lukricitayo ma kiwirogi ma pud gikwo i lobo aye gitye lagwok ot ma lagen. Jo magi kilwongogi ni “ajwagi [lulamdog] pa kabaka” dok kiminigi tic me ‘tito pi tic me deyo pa ngat ma olwongogi nia ki i piny macol wek gudony i lengone me aura.’ (1 Pet. 2:9) Pore tutwal ni jo meno ma gitye “ajwagi [lulamdog] pa kabaka[-ni]” myero gupwony luye luwotgi ki lok ada me Baibul.​—Mal. 2:7; Yabo 12:17.

9. Tika Lukricitayo ducu ma kiwirogi gitye lagwok ot ma lagen? Tit kong.

 ⁹ Tika jo ducu ma kiwirogi ma pud gikwo i lobo-ni gitye lagwok ot ma lagen? Pe. Lok ada tye ni pe jo ducu ma kiwirogi gimiyo cam me cwiny bot luye luwotgi i twok lobo ducu. I kin omege ma gitye kal-li, mogo i kingi gitye lukony kor tic nyo luelda i kacokke. Gin gipwonyo i ot ki ot ki dong i kacokkegi, dok bene gilubo ki cwinygi ducu tira ma a ki i gang kal madit. Ento pe ginywako i miyo cam me cwiny bot utmege ma i twok lobo lung. Ki bene, i kin jo ma kiwirogi-ni tye iye lumegiwa ma gimwol ma pe gicere me bedo lupwonye i kacokke.​—1 Kor. 11:3; 14:34.

10. Anga ma lagwok ot ma lagen dok maryek?

¹⁰ Ci dong, anga mono ma lagwok ot ma lagen dok maryek? Kit macalo Yecu otiyo ki jo manok me pito jo mapol i cencwari me acel-li, lagwok ot ma lagen-ni tye gurup mo matidi pa omege ma kiwirogi ma gin aye ticgi me yubo ki dok miyo cam me cwiny i kare man ma Kricito tye ka loc iye-ni. Nicakke ma kare me agikki-ni oere kwede, omege magi ma kiwirogi ma gitye lagwok ot ma lagen-ni gubedo ka tic kacel i gang kal madit. I mwaki mogo mukato cokcok-ki, lagwok ot ma lagen obedo ka tic macalo Lukiko Madit pa Lucaden pa Jehovah. Ento nge ni, lok man ni “lagwok ot,” ma Yecu otiyo kwede i lapore-ni loko i kom ngat acel keken. Pi meno, Lukiko Madit gimoko tam kacel.

11, 12. (a) Kicimo lagwok ot ma lagen me tiyo tic aryo mene? (b) Awene ma Yecu ocimo iye lagwok ot ma lagen me loyo dano ducu me ode, dok en oyero angagi?

¹¹ Omyero i nge ni i carolok pa Yecu-ni, kicimo lagwok ot ma lagen dok maryek me tiyo tic aryo mapat pat. Me acel aye me loyo dano ducu me ode; ki me aryo aye me loyo jami ducu pa ladit-te. Kit macalo carolok man onongo bicobbe i kare man me agikki-ni, man nyuto ni cimo lagwok ot ma lagen me tiyo tic aryo magi onongo bitimme ka Yecu ocako loc macalo kabaka i 1914.

¹² Awene ma Yecu ocimo iye lagwok ot ma lagen me loyo dano ducu me ode? Me gamo lapeny meno, omyero wadwok wiwa cen i 1914​—kare ma kac ocakke iye. Kit ma waneno kwede con, gurup mapol  onongo giwacci gibedo Lukricitayo. Lapeny dong tye ni, Yecu mono onongo biyero dok bicimo lagwok ot ma lagen-ni ki i gurup mene? Lapeny meno kigamo i kare ma Yecu gin ki Wonne gubino ka ngiyo ot mere nyo yub me woro me ada i 1914 me o i acakki me 1919. * (Mal. 3:1) Cwinygi obedo yom i kom gurup mo matidi pa Lutino Kwan me Baibul ma gunyuto ni gimaro Jehovah kacel ki Lokke. Tye kono ni, onongo mitte ni myero kong kilonygi, ento gin gujolo tira ma kiminigi i kare me atematema. (Mal. 3:2-4) Lutino Kwan magi me Baibul-li gin aye onongo kal kikome. I 1919, Yecu oyero ki i kingi omege ma kiwirogi ma gupore me tic macalo lagwok ot ma lagen dok maryek ci ocimogi me loyo dano ducu me ode.

13. Angagi ma bene gitye i kin dano ducu me ot pa Yecu, dok pingo?

¹³ Dano ducu ma gibedo i ode-ni kono? Ket mere i yo macek ni gin aye jo ma kipitogi ki cam me cwiny. Ma pud kare me agikki ocakke acaka, dano ducu me ode-ni onongo gitye Lukricitayo ma kiwirogi. Lacen, dano ducu me ode onongo dong kwako lwak dano mapol ata-ni nyo romi mukene-ni. I kare-ni, romi mukene-ni aye gipol loyo ki i “lwak [romi] acel” ma tye i te tela pa Kricito. (Jon 10:16) Gurup aryo magi ducu ginongo adwogi maber ki i cam me cwiny ma lagwok ot ma lagen miyo i kare ma mitte kikome. Ento lumemba me Lukiko Madit ma gicung pi lagwok ot ma lagen dok maryek-ki kono? Omege magi bene myero gunong cam me cwiny. Pi meno, gin giniang ni macalo ngat acel acel, gin bene gitye dano me ot pa Yecu, calo lulub kore mukene-ni.

14. (a) Tic ango ma kimiyo bot lagwok ot ma lagen, dok man kwako gin ango? (b) Yecu ociko lagwok ot ma lagen pe me timo gin ango? (Nen bok ma wi lokke tye ni “Ento ka Latic Meno . . . ”)

¹⁴ Yecu omiyo tic ma pire tek adada bot lagwok ot ma lagen dok maryek. I kare me Baibul, lagwok ot onongo tye opii ma kiketo gen i kome kun loyo ot pa laditte. (Luka 12:42) Pi meno, lagwok ot ma lagen dok maryek kimiye tic me loyo ot pa Kricito. Tic meno kwako neno jamine, ticwa me pwony-nyi, yub me gure me nino acel ki me adwol ki dong gure madit, ki dok goyo bukke ma gijenge i Baibul me konyowa i ticwa me pwony ki dong kwan piwa kenwa nyo i kacokke. Jo  me ot pa Kricito gijenge i kom cam me cwiny ma lagwok ot ma lagen miyo.

15, 16. Awene ma Yecu bicimo iye lagwok ot ma lagen me loyo jamine ducu?

¹⁵ Awene ma Yecu ocimo iye lagwok ot ma lagen tyen me aryo me loyo “jamine woko ducu”? Yecu owaco ni: “Latic meno tye ki gum, ma laditte ka obino onongo en tye ka tiyo ticce kit meno. Ada awaco botwu ni ladit-tu bimiye twero me loyo jamine woko ducu.” (Mat. 24:46, 47) Nge ni Yecu bicimo lagwok ot ma lagen tyen me aryo ka en bibino ci onongo ni tye ka “tiyo ticce” me miyo cam me cwiny. Pi meno, kare kong bikato i kin cimo lagwok ot ma lagen-ni pi tyen mukwongo ki me aryo. Omyero kong wange jami aryo ka wamito niang i yo mene ki dok awene ma Yecu bicimo iye lagwok ot ma lagen me loyo jamine ducu: awene ma en bidwogo iye ki dok jamine-ni kwako gin ango.

¹⁶ Yecu mono bibino awene? Lagamme nonge i tyeng mogo ma i Matayo cura 24. Wi opo ni i tyeng magi, Yecu oloko i kom ‘binone,’ ma lubbe ki kare ma en bibino iye ka ngolokop i kom jo maraco i kare me agikki piny. * (Mat. 24:30, 42, 44) Pi meno, ‘dwogo’ kacel ki ‘bino’ pa Yecu ma kitito pire i carolok madok i kom lagwok ot ma lagen-ni bitimme i kare me twon can madit atika-ni.

17. Jami pa Yecu bene kwako gin ango?

¹⁷ ‘Jami ducu’ ma Yecu tye kwede-ni kwako gin ango? Jami pa Yecu pe tye i lobo kany keken. Ki lok ada, Yecu tye ki twero madit i polo. “Twero ducu ma i wi polo ki i lobo dong gityeko miyo woko bota.” (Mat. 28:18; Ep. 1:20-23) Jamine  bene kwako Ker pa Meciya, man aye Ker ma en tye kabakane cakke wa i 1914 dok lulub kore ma kiwirogi gibiloc iye kacel kwede.​—Yabo 11:15.

18. Pingo Yecu cwinye bibedo yom me cimo lagwok ot ma lagen me loyo jamine ducu?

¹⁸ Pi meno, gin ango ma dong waromo mokone? Ka Yecu odwogo ka tyeko jo maraco i kare me twon can madit atika-ni, en binongo ni lagwok ot ma lagen tye ka miyo cam me cwiny bot dano ducu me ode i kare ma mitte kikome. Pi tyen me aryo, Yecu cwinye bibedo yom me cimo lagwok ot ma lagen me loyo jamine ducu. Man bitimme ka jo ma gitiyo macalo lagwok ot ma lagen-ni gucito i polo ka loc kacel ki Kricito.

19. Lagwok ot ma lagen mono binongo mot madit i polo makato jo mukene ma kiwirogi-ni? Tit kong.

¹⁹ Man mono te lokke ni lagwok ot ma lagen binongo mot madit makato Lukricitayo mukene ma kiwirogi-ni? Pe. Mot ma kicikke me miyone bot gurup mo matidi i kare moni, jo mukene bene gitwero nywakone. Me lapore, nen kong gin ma Yecu owaco bot lukwenane 11 ma lugen i dyewor ma en peya oto. (Kwan Luka 22:28-30.) Yecu ocikke bot lukwena magi ni mot maber tye ma kiyubo pigi pienni gubedo lugen. Gin gibiloc macalo kabaka kacel ki Yecu i polo. Ento tye gin mo ma en owaco lacen ma nyuto ni jo 144,000 ducu gibiloc macalo kabaka i polo. (Yabo 1:1; 3:21) I yo acel-lu, kit ma kicoyo kwede i Matayo 24:47, Yecu owaco ni gurup mo matidi pa omege ma kiwirogi ma gitye lagwok ot ma lagen​—kibicimogi me loyo jamine ducu. Lok ada tye ni, jo 144,000 ducu gibinywako twero madit ma Yecu tye kwede.​—Yabo 20:4, 6.

20. Pingo Yecu ocimo lagwok ot ma lagen, dok imoko tammi me timo gin ango?

²⁰ Kit ma Yecu opito dano mapol kun tiyo ki jo manok i cencwari me acel-li, en bene tye ka tic ki lagwok ot ma lagen me pito jo mapol i kare-ni. Yecu ocimo lagwok ot ma lagen me nenone ni lulub kore me ada gunongo cam me cwiny labongo keng i kare man me agikki-ni​—kono gitye Lukricitayo ma kiwirogi nyo romi mukene-ni. Wamoku wunu tamwa me nyuto pwoc kun wateno kor omege pa Kricito ma kiwirogi, ma gitye lagwok ot ma lagen dok maryek.​—Ibru 13:7, 17.