Sylvia, lamego mo ma gwoko lutwo owaco ni, “Akwano i cukul mo ma lutino kwan mapol gitimme ni gin ludini. Ento inongo ni gikwalo peny dok gitiyo ki yadi calo jayigi-gu. Dini pe gudo kit me kwogi me nino ducu.”

Laco mo ma nyinge Lionel owacci: “Lutic luwota giloko lok goba dok gigoyo cim ni komgi lit kun nongo komgi yot. Gin giwacci gin ludini ento pe gilubo gin ma dinigi pwony​—gitye calo gin mo ma kiketo me anyuta.”

Dini pe gudo kit me kwo pa dano mapol. Dano mapol i kareni ‘gimako dini dok gilubo i kitgi ma nen ki woko keken’ ento “gikwero tekone woko.” (2 Temceo 3:5) Lutela dinigi pe ginyuto lanen maber me aluba, dok bene pe gimiyo tira ma a ki i Ginacoya bot romigi wek gukwo i yo matir. Man weko pe wabedo ki ur ka dano giwaco ni Lubanga pe paro pi kit ma gikwo kwede.

Baibul nyuto ni kit ma wakwo kwede gudo kit ma Lubanga winyo kwede ki i cwinye. I kare ma jo Icrael gujemo i kom Lubanga, gin “gucwero cwinye.” (Jabuli 78:40) Ento, “yomcwiny madit tutwal [tye] i wi polo” ka ngat mo oweko timo gin marac ki cwinye ducu. (Luka 15:7) Ka ngat mo ocako bedo ki pwoc pi kit mabeco pa Wonwa me polo, marre pi Lubanga bidongo, ma weko en maro gin ma Lubanga maro ki dok kwero gin ma Lubanga kwero.​—Amoc 5:15.

Gajeti mo ma kilwongo ni Deseret News me Salt Lake City, Utah, i lobo Amerika owacci Lucaden pa Jehovah “gikonyo dano me yubo wat ma tye i pacogi, wek gukony jo mukene kun gibedo jo ma genne.” Gajeti man omedo ni: “Lucaden pa Jehovah gilubo cik me Baibul. Gin giye ni mato taa, mato kongo wa i labyel kweri, tic ki yadi i yo marac, tuko me goyo cente, tim tarwang, ki dong tim me buto i kin co ki co balo watgi ki Lubanga.”

Pwonyo kit pa Lubanga konyo Lucaden nining? Sylvia, ma kiloko i kome malo-ni owacci, “Kwo dwong tutwal i odi yadi.” En omedo ni, “Yot tutwal me cako timone. Ento, niang kit ma Jehovah winyo kwede okonya me timo gin matir. * Cwinya yom dok atye ma wiya opye mot.” Sylvia pe ki akalakala mo keken ni lubo gin ma Lucaden pa Jehovah pwonyo oyubo kwone.