1, 2. In tika imaro moko tam, dok iwinyo nining ma lubbe ki tam ma dong i mokogi?

 NINO ducu wamoko tam mapol mapat pat. In iwinyo nining ma lubbe ki tam ma i mokogi? Jo mogo gimito ni gin aye gimok tam ducu. Gicero lok ni obedo twerogi me moko tamgi, dok bene ka jo mukene guminigi tam gikwero woko lajwac. Ento, tye jo mukene ma gilworo moko tam ma pigi tek i kwogi. Jo mukene gicito bot wayogi, nerogi nyo bot laremgi wek ominigi tam.

² Pol pa wan wamito moko tam ento i kine mukene walwor. Wangeyo ni tye jami mukene ma wape ki twero iye dok pe waromo timo gin mo iye; ento cwinywa yom ni i jami mapol ma timme i kwowa, watwero moko tam ma lubbe ki kit ma wamito. (Gal. 6:5) Kadi bed kumeno, wan weng waye ni tam ducu ma wamokogi pe twero bedo me ryeko nyo keliwa adwogi maber.

3. Ngo ma romo konyowa me moko tam matir, ento peko ango ma wakemme kwede?

³ Macalo lutic pa Jehovah, cwinywa yom ni en ominiwa tira ma lubbe ki jami ma pigi tego i kwowa. Wangeyo ni ka walubo tira magi, ci waromo moko tam ma yomo cwiny Jehovah dok keliwa mot mapol. Kadi bed kumeno, i cawa mukene wakemme ki pekki nyo jami mogo ma Baibul pe loko i komgi atir atir. Ci dong, watwero moko tam i kom gin ma myero watim nining? Me labolle, wangeyo ni omyero pe wakwal kwo. (Ep. 4:28) Kwalo kwo mono kwako gin ango? Tika jenge i kom wel gin ma kikwanyoni, miti pa ngat moni, nyo kece pi tyen lok mo mukene? Wan watwero moko tam nining i kom gin mo ma cik pe gudo atir atir? Gin ango ma romo konyowa?

4. Tam ango ma i kine mukene kiminiwa ka wamito moko tam?

⁴ Ka wawaco bot Lakricitayo lawotwa mo ni wamito moko tam ma pire tek, en romo wacci omyero wamok tam ki wic makwiri. Meno gire tam maber.  Baibul cikowa ni pe myero warune ka moko tam kun wacci: “Ngat ma tiyo jami oyotoyot bibedo lacan.” (Car. 21:5) Ento te lokke ngo me moko tam ki wic makwiri? Man mono te lokke ni omyero kong wacwal kare, watam matut, wanyut niango, ki dok wange jami ducu ma peya wamoko tam moni? Jami magi ducu pigi tego ka wamito moko tam matir, ento tye jami mukene bene ma myero watim ka ce wamito moko tam ki “wic makwiri.”​—Rom. 12:3; 1 Pet. 4:7, NW.

5. Pingo pe watye ki wic makwiri adada?

⁵ Wan ducu omyero waye ni pe tye ngat mo ma kinywalo ki wic makwiri adada. Pingo wawaco kumeno? Pien wan ducu kinywalowa ki bal dok watye ki roc, man oweko komwa goro dok tamwa pe tye atir tutwal. (Jab. 51:5; Rom. 3:23) Medo i kom meno, pol pa wan onongo watye i kin jo ma Catan ‘oumo’ tamgi woko; onongo pe wangeyo Jehovah kacel ki cikke matir. (2 Kor. 4:4; Tito 3:3) Kadi bed walwod lok i kom tam moni pi kare ma rom mene, ka ce pud wamoko tamwa ma lubbe ki gin ma waneno ni ber piwa, ci nongo watye ka bwolle kekenwa.​—Car. 14:12.

6. Gin ango ma bikonyowa me bedo ki wic ma tiyo maber?

⁶ Kadi bed komwa goro dok tamwa pe tye atir tutwal, Jehovah Wonwa me polo pe tye ki roc mo keken. (Nwo. 32:4) Cwinywa yom ni en ominiwa kare me loko tamwa ki dok bedo ki wic ma tiyo maber. (Kwan 2 Jo Korint 5:13.) Macalo Lukricitayo, wamito ni watam dok walwod i yo matut ki dong watim jami i yo matir. Omyero wador tamwa kacel ki kit ma wawinyo kwede ki i cwinywa me lubo kit ma Jehovah tamo, winyo ki dong timo kwede jami.

7, 8. Mi labol acel ma nyuto ni watwero moko tam matir kadi bed watye i lyeto nyo kwo matek.

⁷ Nen kong labol acel. Jo mogo ma gudak i lobo mukene guloko odoko kitgi me dwoko lutinogi ma pud gunywalo anywala bot wadigi wek gugwokgi kun nongo gimedde ki tiyo cente. * Lamego mo acel ma onongo odak i lobo mukene onywalo latin awobi mo mamwonya adada. I kare meno, en ocako kwano Baibul ci odongo i yo me cwiny. Lureme kacel ki wadine gucako keto lyeto i kom gin ki cware me cwalo latingi paco bot lunyodo pa cware. Ento, i kare ma tye ka kwano Baibul, lamego-ni oniang ni en macalo lanyodo, gwoko latinne obedo tic ma Lubanga omiye. (Jab. 127:3; Ep. 6:4) Tika en myero otim gin ma dano mapol gitamo ni tye atir-ri? Nyo kece en myero olub gin ma en tye ka pwonyone ki i Baibul ci obed ki cente manok kun bene dano gingalle? Ka in kono, onongo ibitimo gin ango?

⁸ Pien onongo tye i lyeto kacel ki par mapol, dako-ni olego bot Jehovah wek okonye. I kare ma otito pekone bot ngat ma tye ka kwan kwede ki dok jo mukene i kacokke, kikonye me niang tam pa Jehovah i kom lok man. En bene oniang ni cwalo latinne paco poko kingi woko ma weko cwiny latinne pe bedo yom ka tye ka dongo. I nge ngiyo lok man kun tiyo ki Ginacoya, en omoko tamme ni pe ber me cwalo latinne paco. Cware oneno kit ma omege ki lumege me kacokke gumiyo kony kwede ki dok yomcwiny kacel ki yotkom pa  latinne. Cware oye kwano Baibul dok ocako bino i cokke kacel gin ki dakone.

9, 10. Te lokke ngo me moko tam ki wic makwiri, dok watwero timo man nining?

⁹ Meno labol acel, ento nyuto ni bedo ki wic makwiri pe te lokke ni timo gin ma watamo ni tye atir nyo timo gin ma jo mukene ginongo ni ber dok bene yot. Pien watye ki roc, wiwa nyo cwinywa kiromo porone ki cawa ma woto oyot nyo mot adada. Ka waketo genwa i kom cawa meno ci waromo poto i peko madit adada. (Jer. 17:9) Mitte ni omyero wawek cik pa Lubanga otir tamwa kacel ki kit ma wawinyo kwede ki i cwinywa.​—Kwan Icaya 55:8, 9.

¹⁰ Pi tyen lok matir, Baibul cuko cwinywa ni: “Gen Rwot [Jehovah] ki cwinyi ducu, pe ibed ka jengnge i kom niang ma itye kwede. I kit kwoni ducu wii myero opo i kom Rwot [Jehovah], ci en bitiro yo ma iwoto iye bedo atir.” (Car. 3:5, 6) Wang Baibul man wacci “pe ibed ka jengnge i kom niang ma itye kwede.” Dok bene medo ni “wii myero opo i kom Rwot [Jehovah].” En keken aye tye ki wic makwiri loyo. Pi meno, ka teke wamito moko tam, omyero kong wangi Baibul wek waniang tam pa Lubanga. Ka dong lacen wamoko tamwa ma lubbe ki gin ma wakwano. Ka walubo tam pa Jehovah, meno nyuto ni watye ki wic makwiri.

11. Gin ango ma pire tek ka wamito ni wapwony kit me moko tam me ryeko?

¹¹ Pwonyo kit me moko tam ki dok ketone i tic pe yot. Man twero bedo tek tutwalle pi jo ma pud gunongo batija anonga nyo ma gitye ka dongo me doko Lukricitayo muteggi. Ento, jo magi ma Baibul lwongogi ni lutino i yo me cwinynyi gitwero dongo. Tam kong kit ma latin pwonyo wot kwede. Wek owoti, en kwanyo tyene motmot dok timo kumeno nino ki nino. Man bene rom aroma ki jo ma gitye lutino i yo me cwiny ka odok i lok me moko tam me ryeko. Wi opo ni lakwena Paulo owacci jo muteggi i yo me cwiny “ryekogi ma gupwonnye kwede me poko gin maber ki gin marac dong ojing pi ketone i tic.”  Lok man ni “pi ketone i tic” ki dong “gupwonnye” nyuto ni omyero wamedde ki tute matek, dok meno aye gin ma jo manyen myero gutim.​—Kwan Jo Ibru 5:13, 14.

12. Nyut kit ma waromo moko kwede tam me ryeko?

¹² Kit ma waneno kwede i acakkine-ni, nino ducu wamoko tam mapol mapat pat, kadi bed tamme dit nyo tidi. Ma lubbe ki kwed mo ma kitimo, kinongo ni pacen makato 40 kulu pa jami ma watimogi pe watamo i komgi matut ento cung i kom gin ma waloko odoko kitwa. Me labolle, odiko ducu omyero imok tam i kom bongo mene ma ibiruko. Iromo neno ni man obedo gin mo matidi, ma weko itwero moko tammi labongo tamone tutwalle ka itye ka rune. Ento pire tek ni myero kong ingi ka bongo ma ibiruko-ni obedo bongo ma latic pa Jehovah myero oruki. (2 Kor. 6:3, 4) Ka icito ka wilo bongo, iromo tamo pi cital ki dok kit ma dano mapol girukke kwede ento tika itamo i kom kit ma nen kwede kacel ki welle? Moko tam matir i kom jami magi bikonyowa me pwonye me poko kin gin maber ki marac, ma twero weko wamoko tam matir ka odok i lok mogo matego.​—Luka 16:10; 1 Kor. 10:31.

13. Gin ango ma myero watim wek waket tam ma wamoko i tic?

¹³ Wan weng wangeyo ni moko tam matir ki dong lubone gitye jami aryo mapat pat. Me lapore, jo mukene ma gimito weko mato taa pe gitwero wekone pien gipe ki miti muromo me timone. Gin ma pire tek aye ni omyero wabed ki miti matek me keto tam ma wamoko i tic. Jo mukene gitamo ni mitiwa me timo gin moni tye calo ler kom. Ka waryeyo ler komwa teretere, ci jing doko tek. Ento ka waryeyo kicel kicel, ci pe jing. Pi meno, ngo ma twero konyowa me jingo mitiwa me cobo gin moni ma wamito timone? Lega bot Jehovah twero konyowa.​—Kwan Jo Pilipi 2:13.

14. Pingo Paulo obedo ki kero me timo gin ma en onongo mito timone?

¹⁴ Paulo onongo ngeyo ni timo gin matir tek ma lubbe ki kwo ma en owok iye. En owaco ni: “Atwero mito gin ma atir, ento pe atwero tiyone.” En onongo ngeyo gin ma emito timone nyo ma onongo myero etim, ento i kine mukene gin mo obedo ka genge. En oye ni: “Pien amaro kwano cik pa Lubanga, kun alwodo lokke ki iya. Ento dok aneno cik mukene i dul koma ducu, kun tye ka lweny ki cik ma i tamma, tera i opii i te cik me bal ma bedo i dul koma ducu.” Man mono nyuto ni en onongo dong pe ki gen? Pe. En owaco ni: “Apwoyo Lubanga pi Yecu Kricito Rwotwa!” (Rom. 7:18, 22-25) I kabedo mukene, en ocoyo ni enongo kero me timo meno pi ‘teko madwong’ ma a ki bot Lubanga.​—2 Kor. 4:7.

15. Pingo omyero wamok tamwa me timo gin matir?

¹⁵ Ki lok ada, me yomo cwiny Lubanga, omyero pe wabed ma tamwa opokke aryo. Wi opo i kom lok ma Elia owaco ki i Wi Got Karmel bot luwor Baal kacel ki jo Icrael ma gungak ni: “Wun mono wubicabbe atata i cwinywu nio kwede wa awene? Ka ce Rwot aye Lubanga, ci wulub en keken; ento ka Baal, ci wutugi lubo en cut.” (1 Luker 18:21) Jo Icrael onongo gingeyo gin ma myero gitim, ento gin gubedo ka ‘cabbe atata’ i tamgi. Yocwa onongo pat ki jo Icrael mukene-ni. Mwaki mapol mukato angec, en oweko lanen maber i kare ma  owaco bot Luicrael ni: “Ka pe wumito woro Rwot [Jehovah], ci tin dong wuyer ngat ma wubitiyo bote . . . Ento an gira ki jo ma i oda ducu wabitiyo bot Rwot [Jehovah].” (Yoc. 24:15) Tam ma en omoko-ni okelo adwogi ma nining? Yocwa kacel ki jo mukene ma bene guyero me tic pi Jehovah gunongo mot me donyo i Lobo ma Kiciko Pire, “lobo ma mol cak ki moo kic.”​—Yoc. 5:6.

16, 17. Tit kong adwogi ma bino ka ce wamoko tam ma rwatte ki miti pa Lubanga.

¹⁶ Omego mo ma onongo batija nyen tye ki dakone ma gunyomme gin kwede dok gunywalo lutino adek, awobi acel ki anyira aryo. I nino mo acel, latic lawote omiye tam ni gikob ka tic i kampuni mukene ma culo mucara oduk dok bene miyo kony bot luticce. Ominwa-ni otamo i kom lok man dok olego bot Jehovah. En oyero tic ma en tye ka timone-ni wek omiye kare me bedo tye i cokke ki dok wot i ticwa me pwony ki jo me ode kadi bed ni onongo pe kicule mucara madit. En oniang ni pe ebinongo kare muromo me timo jami magi ducu ka ce eye tic meno manyenni. Ka in kono, onongo ibitimo ngo?

¹⁷ I nge tamo matut kit ma tam ma ebimoko bigudo kwede watte ki Jehovah, en pe oye tic meno. Tika itamo ni en okoko ange? Pe wacel. En onongo ni nyikke cok bot Jehovah okelo bote kacel ki jo me ode mot mapol makato mucara ma onongo kibicule kwede. Omego-ni gin ki dakone cwinygi obedo yom i kare ma latingi ma mwakane tye apar owacci emarogi, emaro omegine ki lumegine ki dok ni emaro Jehovah adada. Latinni owacci emito dyero kwone bot Jehovah ki dok nongo batija. En obedo ki pwoc madit adada pi lanen maber pa wonne i keto miti pa Jehovah me bedo gin ma pire tek i kwone!

18. Pingo pire tek ni myero wamok tam me ryeko nino ducu?

¹⁸ Calo Moses, Yecu Kricito obedo ka telo jo ma giworo Jehovah pi mwaki mapol i lobo man pa Catan ma obedo calo dye tim-mi. Calo Yocwa, Yecu dong cok giko lobo pa Catan-ni ci cwalo lulub kore i lobo manyen ka ma kit ma atir bedo iye. (2 Pet. 3:13) Pi meno, man pe obedo kare me dok cen i tamwa, kitwa ki dong yubwa macon. Man obedo kare me niang maber adada gin ma Lubanga mito ni watim. (Rom. 12:2; 2 Kor. 13:5) Wek tam ma imoko ki dong jami ma iyero nino ducu gunyut ni ipore me nongo mot ma a ki bot Lubanga pi naka.​—Kwan Jo Ibru 10:38, 39.