I nge cencwari angwen ma kityeko coyo kwede buk me Malaki, lok pa lanebi Mika madok i kom Meciya ocobbe kakare: Yecu kinywalo i Beterekem. I nge mwaki ma romo 30, i 29 K.M., but lok pa lanebi Daniel madok i kom bino pa Meciya bene ocobbe. Yecu onongo batija ki dong Lubanga owire ki cwiny maleng. Meciya ma kiciko pire, ma en aye Lakwaro-ni obino i karene kikome!

Cutcut, Yecu ocako ticce me pwony kun “tito dok nyuto lok me kwena maber i kom ker pa Lubanga.” (Luka 8:1) Kit ma onongo kitito kwede con-ni, Yecu obedo lakica, mwol, ki dok onongo paro pi jo mukene. En omiyo pwony ma konyo dano i yo me mar, ki dok ocango dano ma gitye ki “kit goro ducu,” me nyuto ni Lubanga onongo tye kwede. (Matayo 4:23) Dano me mwaka mapat pat gubedo ka bino bot Yecu ma oweko guwacci: “Watyeko nongo Meciya”!​—Jon 1:41.

Yecu otito con ni ma peya Kerre ocako loyo lobo ducu, lweny, oyengyeng, ki dong pekki mukene gibibedo tye i lobo. En ocuko cwiny dano ducu ni: “Wuki piny.”​—Marako 13:37.

Yecu onongo tye dano ma pe ki roc ma obedo lawiny bot Lubanga, ento en onongo tye ki lumonene ma guneke woko. Tone omiyo ginkok wek wabed ki gen me nongo kwo ma pe tum i Paradic, gin ma Adam ki Kawa gurwenyo-ni.

To kacel ki cer pa Yecu ma Lubanga ocerre kwede i nge nino adek me doko cwec me cwiny-nyi gucobo lok pa lunebi. I ngeye, Yecu onyutte bot lupwonnyene makato 500 kulu. Ma peya ocito i polo, Yecu ociko lulub kore ni gucwal kwena maber madok i kome kacel ki Kerre bot “jo me rok ducu.” (Matayo 28:19) Gin gutiyo tic meno kore ki kore nining?

​​—Jenge i Matayo, Marako, Luka, Jon, 1 Jo Korint.