1. Gin ango ma twero weko pe wadiyo cwinywa?

 I KARE ma kiketo Ker pa Meciya i 1914, lobo pa Catan-ni odonyo i karene me agikki. Ma lubbe ki lweny ma obedo tye i polo, Yecu obolo Larac-ci kacel ki jogine i lobo kany. (Kwan Niyabo 12:7-9.) Catan ngeyo maber adada ni “karene tye manok.” (Yabo 12:12) Ento ‘kare meno manok-ki’ dong orii cokcok pi mwaki ma romo 100 kulu, dok jo mukene giromo tamone ni kare me agikki-ni dong orii tutwal. Tika dong waweko diyo cwinywa woko ka nongo wakuro ni Jehovah okel agikki me loboni?

2. Gin ango ma wabinyamo i pwony man?

² Bedo ma pe wadiyo cwinywa rac, pien twero weko watimo jami labongo kong tamone matut. Wan watwero bedo ma wakuro Lubanga nining? Pwony man bikonyowa me timo meno kun nongo wagamo lapeny magi. (1) Lanen pa Mika pwonyowa gin ango ma lubbe ki diyo cwiny? (2) Jami mene ma gibinyuto ni agikki piny dong cok? (3) Watwero nyuto pwocwa nining pi diyo cwiny ma Jehovah onyuto?

3. I kare pa Mika, kwo onongo tye nining i Icrael?

³ Kwan Mika 7:2-6. Lanebi Mika oneno kit ma Luicrael gitye ka to kwede mot mot i yo me cwiny ki dok kit ma odoko rac kwede adada i te loc pa Kabaka Akaj. Mika oporo Luicrael ma pe lugen-ni ki “ocok” ki bene “cel okuto.” Kit macalo ka ngat mo onyono ocok nyo okuto ci cubo tyene-ni, Luicrael magi onongo gitero luwotgi marac ma weko gideno can. Kwo onongo tek adada ma oweko wat maber onongo pe i kin jo me ot. Pien Mika onongo ngeyo ni pe eromo kelo alokaloka mo keken, en olego bot Jehovah ki cwinye ducu. Mika onongo geno ni Jehovah  bitimo gin mo i kare ma En oyero.

4. Pekki macalo mene ma warwatte kwedgi?

⁴ Calo Mika, wan bene i kareni wakwo i kin dano ma luworo me jami. Pol pa dano magi ‘pe gimiyo pwoc mo, pe gileng, dok bene pe gimaro dano wadgi.’ (2 Tem. 3:2, 3) Cwero cwinywa ka jo ma watiyo kwedgi, lutino kwan wadwa, ki dong jiraniwa ginyuto ni giketo tamgi i komgi keken. Jo mukene ma bene gitiyo pi Lubanga girwatte ki pekki madongo makato magi. Yecu otito ni lulub kore gibirwatte ki aunauna ma a ki bot jo me odi, dok en otiyo ki lok ma rwatte ki ma kicoyo i Mika 7:6 me nyuto kit ma lokke-ni bicobbe kwede. En owaco ni: “Abino me poko kin dano woko ki wonne, nyako bipokke woko ki minne, ki ci-wod bene bipokke woko ki dane. Lukwor pa dano bibedo jo ma i pacone.” (Mat. 10:35, 36) Tek adada me kanyo ngala kacel ki aunauna pa jo me pacowa ma pe ginywako niyewa. Ka ce warwatte ki atematema ma kit man, pe omyero wail cingwa pi lyeto ma jo me pacowa giketo i komwa. Ma ka meno, wamedde wunu ki bedo lugen bot Jehovah kun wakuro en wek ocob pekowa. Ka wapenyo pi kony ma mege kare ducu, ci en biminiwa kero ki ryeko wek wamedde ki diyo cwinywa.

5, 6. Mot ango ma Jehovah omiyo bot Mika, ento gin ango ma Mika pe oneno?

⁵ Jehovah omiyo mot bot Mika pien odiyo cwinye. Mika oneno agikki pa Kabaka Akaj kacel ki locce marac-ci. En oneno wod pa Akaj, Kabaka Kejekia ka leyo kom ker dok roco woro me ada. Ki bene, lok pa lanebi Mika ma lubbe ki jwero Camaria-ni ocobbe i kare ma Aciria olwenyo i kom ker ma tye tung kumalo me Icrael.​—Mika 1:6.

⁶ Ento, Mika pe oneno cobbe pa lok ducu ma Jehovah omiyo en otitogi. Me labolle, Mika ocoyo ni: “I kare ma pud tye anyim: got me ot pa Rwot [Jehovah] bicung macalo got mabor makato godi ducu, borre bikato cere ducu; rok ducu gibimol gicito iye, dok lwak lurok mapol gibibino, gibiwacci, ‘Wubin, waitu i wi got pa Rwot [Jehovah].’ ” (Mika 4:1, 2) Mika oto wacon ma peya lok meno ocobbe. Kadi bed kumeno, en omoko tamme me bedo lagen bot Jehovah nio wa i to labongo paro pi jami ma jo mukene gitimo. Pi meno, Mika ocoyo ni: “Rok ducu giwoto kun ngat acel acel woto i nying lubangane, ento wan wabiworo Rwot Lubangawa nakanaka.” (Mika 4:5) Mika odiyo cwinye i kare me peko pien onongo geno ni Jehovah bicobo Cikkene ducu. Lanebi man ma lagen-ni oketo genne i kom Jehovah.

7, 8. (a) Pingo watye ki tyen lok matir me bedo ki gen i kom Jehovah? (b) Gin ango ma biweko kare kato oyotoyot adada?

⁷ Tika wan bene watye ki gen ma kit meno i kom Jehovah? Watye ki tyen lok matir me geno en. Watyeko dong neno ki wangwa kit ma lok pa lanebi Mika-ni ocobbe kwede. I kare man me agikki-ni, dano milion mapol ma gia ki i rok, kaka, ki dong leb ducu gibimol gicito i wi “got me ot pa Rwot [Jehovah].” Kadi bed ni gua ki i lobbe ma gilwenyo i kingi, jo magi ma giworo Jehovah-ni guteto ‘pala lucwangi odoko lak kweri dyang’ ki dok gukwero “pwonyo lweny.” (Mika 4:3) Pud dong tye mot madit atika me bedo i kin jo pa Jehovah ma gikwo ki kuc i kingi!

⁸ Ngene gire kene ni wamito ni Jehovah okel agikki me lobo pa Catan-ni oyotoyot. Ento wek wakurre, mitte ni omyero watam kit ma Jehovah tamo kwede. En otyeko moko nino ma ebingolo iye kop i kom dano kun tiyo ki  Yecu Kricito, ‘dano ma en oyero.’ (Tic 17:31) Ento ma peya meno otimme, Lubanga tye ka miyo kare bot jo ducu wek “gunge lok me ada,” guket i tic, ci dong gunong larre. (Kwan 1 Temceo 2:3, 4.) Ka walungo wiwa i konyo jo mukene wek gunge lok me ada madok i kom Lubanga, ci dong nino ma Jehovah bingolo iye kop-pi bio oyot. Ka agikki piny obino, cwinywa bibedo yom ni walungo wiwa i tic me tito kwena-ni.

9-11. Tika dong 1 Jo Tecalonika 5:3 ocobbe? Tit kong.

⁹ Kwan 1 Jo Tecalonika 5:1-3. Cokcoki, lobbe gibiwacci, “Kuc tye, piny okwe mot, gin mo marac pe.” Wek lok man pe oturwa atura calo arem nywal, mitte ni omyero ‘wabed ma wangwa twolo kun wagwokke.’ (1 Tec. 5:6) Wek wabed ma wangwa twolo i yo me cwiny, kong wanyamu jami mogo ma pigi tego ma dong gutimme ma biweko kimiyo lok angeya man ma pire tek-ki.

¹⁰ Adwogi ma obino pi lweny me wi lobo ma otimme tyen aryo kulu-ni oweko lobbe gubedo ki miti madit pi kuc. I nge lweny me acel me wi lobo, kicako League of Nations ki gen me kelo kuc. Lacen, i nge lweny me aryo me wi lobo, dano mapol guketo gengi i kom United Nations me kelo kuc i lobo. Gamente ki lutela dini mapat pat guketo gengi i kom dul aryo magi ni gibimiyo dano bedo ki kuc. Me labolle, United Nation okatti ki lok ni 1986 obedo Mwaka me Kuc pi Lobbe Ducu. I mwaka meno, lucungo wibye kacel ki lutela dini mapat pat gurwatte ki papa i Assisi, i lobo Italy me lega pi kuc.

¹¹ Ento, lok angeya meno ma United Nation okatti kwede-ni, medo ki mukene pe gucobo lok ma kicoyo i 1 Jo Tecalonika 5:3. Pingo? Pien lok man ni “to biturugi atura[-ni]” peya otimme.

12. Ngo ma wangeyo ma lubbe ki lok man ni “Kuc tye, piny okwe mot, gin mo marac pe”?

¹² I kare me anyim, anga ma bimiyo lok angeya man ma pire tek ma wacci  “Kuc tye, piny okwe mot, gin mo marac pe”? Gin ango ma lutela dini pa Lukricitayo ata-ni kacel ki lutela dini mukene gibitimone? Lutela gamente mapat pat gibimiyo lok angeya man nining? Ginacoya pe tittiwa. Ento gin ma wangeyo aye ni man pe bibedo lok ada kadi bed kitit pire i yo ma gudo cwiny dano. Lobo-ni tye i te loc pa Catan dok otop ma lemo cwiny dano ki bene dong pe biyubbe. Pud dong bicwero cwinywa adada ka ngat mo i kinwa oye bwola pa catan-ni kun pe gwoko gennene!

13. Pingo lumalaika gitye ka gengo yamo mager me twon can madit atika-ni?

¹³ Kwan Niyabo 7:1-4. I kare man ma watye ka kuro cobbe pa 1 Jo Tecalonika 5:3, lumalaika matego adada gitye ka gengo yamo mager me twon can madit atika-ni. Gin gitye ka kuro gin ango? Gitye ka kuro gin mo ma pire tek ma lakwena Jon otito pire​—keto lanyut me agikki i tur nyim ‘lutic pa Lubanga,’ Lukricitayo ma kiwirogi. * Ka dong kityeko keto lanyut meno me agikki-ni, lumalaika magi gibiweko yamo mager me twon can madit atika-ni. Ngo ma bitimme i ngeye?

14. Ngo ma nyuto ni dong kicok jwero Babilon Madit?

¹⁴ Babilon Madit, twon ker malac me dini goba me wi lobo-ni pore me ajwera dok kibijwerone woko. Watye ka neno lanyut mapol ma cimo ni agikkine dong cok. “Dano ma i wi lobo, ki lwak rok ducu ki leb-gu ducu” pe gibimiyo cwak muromo bote. (Yabo 16:12; 17:15-18; 18:7, 8, 21) Ki lok ada, ngec ma katti ki i odi me poko lok angeya nyuto ni kitye ka kok tutwal i kom dini kacel ki lutelane. Kadi bed kumeno, lutela dini pa Babilon Madit gitamo ni gin mo marac pe wacel. Man pud dong tam magoro adada! I nge miyo lok angeya ni “Kuc tye, piny okwe mot, gin mo marac pe,” gamente mapat pat gibilweny i kom dini goba ki dok gibijwere woko. Pe dong kibineno Babilon Madit matwal! Ada, pire tek adada me kuro timme pa jami magi.​—Yabo 18:8, 10.

15. Pingo Jehovah odiyo cwinye?

¹⁵ Kadi bed ni dano gubalo nying Jehovah, en pud tye ka diyo cwinye kun kuro nino me tic i komgi. Jehovah pe mito ni kityek jo ma cwinygi atir. (2 Pet. 3:9, 10) Tika wan bene wawinyo kumeno? Ma peya nino pa Jehovah obino, watwero nyuto pwocwa pi diyo cwiny ma mege i yo macalo magi.

16, 17. (a) Pingo omyero wakony jo ma guweko tic pi Jehovah? (b) Pingo mitte tutwal ni jo ma guweko tic pi Jehovah gudwog cen bote?

¹⁶ Kony jo ma guweko tic pi Jehovah. Yecu owaco ni yomcwiny bedo tye i polo ka romo mo acel ma orweny kinongo. (Mat. 18:14; Luka 15:3-7) Labongo akalakala, Jehovah paro pi jo ducu ma gunyuto ni gimaro nyinge, kadi bed ni pe dong gitye ka tic pire i kareni. Ka wakonyo jo magi me dwogo cen i kacokke, ci wayomo cwiny Jehovah kacel ki lumalaika.

¹⁷ In tika itye i kin jo ma pe gitye ka tic pi Lubanga i kareni? Oromo bedo ni ngat mo i kacokke ocwero cwinyi dok man omiyo iweko dul pa Jehovah woko. Kit macalo kare dong okato-ni, penye kekeni ni: ‘Tika atye ki kwo ma yot dok bene cwinya yom? Jehovah aye mono ocwero cwinya kece dano ma tye ki roc? Jehovah tika ma naka yam dong  otimo gin mo marac bota?’ Ada, Jehovah kare ducu timo jami mabeco botwa. Kadi bed ni pe watye ka kwo ma lubbe ki dyerewa bote, Jehovah pud weko wanongo mit pa jami ma en miniwa. (Yak. 1:16, 17) Nino pa Jehovah dong cok bino. Man aye kare me dwogo cen bot Wonwa me polo ki dong i kacokke​—ka ma wanongo iye gwok maber i kare man me agikki-ni.​—Nwo. 33:27; Ibru 10:24, 25.

18. Pingo myero wacwak ki cwinywa ducu jo ma gitelo kacokke?

¹⁸ Cwak jo ma gitelo kacokke ki cwinyi ducu. Macalo Lakwat ma lamar, Jehovah tiro dok gwokowa. En ocimo Wode me bedo Lakwat Madit wek okwa romine. (1 Pet. 5:4) Luelda ma i kacokke makato 100,000 kulu gikwayo romi acel acel pa Lubanga. (Tic 20:28) Ka wacwako ki cwinywa ducu jo ma gitelo kacokke, ci nongo watye ka nyuto pwocwa bot Jehovah gin ki Yecu pi jami ducu ma gutimo piwa.

19. Gin ango ma myero watim i kareni?

¹⁹ Wunyike cok bot ngat acel acel. Man te lokke ngo? Lumony ma gitye ki diro me lweny gibedo ma kingi cok ka ce lumonegi gubino ka lweny i komgi. Gin gitimo kuman wek lumonegi pe gubed ki kero me donyo i kingi. Man konyogi me loyo lweny i kom lumonegi. Catan tye ka ilo malo lweny i kom jo pa Lubanga. Man pe obedo kare me lweny ki utmegiwa. Man obedo kare me nyikke cok bot luwotwa, me weko bal pa jo mukene, ki dong me nyuto gen i kom tela pa Jehovah.

20. Gin ango ma myero watim kombeddi?

²⁰ Pi meno, wabedu ma wangwa twolo i yo me cwiny kun bene wakuro Lubanga. Wadiyu cwinywa kun wakuro lok angeya man ma wacci “Kuc tye, piny okwe mot, gin mo marac pe,” ki dong keto lanyut me agikki i tur nyim jo ma kiyerogi. I ngeye, lumalaika angwen-ni gibiweko yamo mager me twon can madit atika-ni, ci Babilon Madit kibijwerone woko. Ka nongo wakuro ni jami magi gutimme, wajolu tira ma a ki bot jo ma kicimogi me telo dul pa Jehovah. Wanyikke wunu cok calo lumony wek walwenyu i kom Larac-ci kacel ki jogine! Man aye dong kare me lubo tira ma laco jabuli omiyo, ma wacci: “Wubed tek, dok wubed ma cwinywu nwang, wun jo ma wukuro Rwot [Jehovah].”​—Jab. 31:24.