1, 2. Pingo Jehovah owaco ni etye calo lakwat?

 JEHOVAH owaco ni etye calo lakwat. (Ejek. 34:11-14) Meno pire tek pien konyowa me niang anga ma Jehovah obedo. Lakwat ma lamar tute me nenone ni egwoko romine maber. En cwalogi i olet ki bene wang pii mangic (Jab. 23:1, 2); gwokogi i dyeceng ki dyewor (Luka 2:8); gwokogi ki i kom nguu (1 Cam. 17:34, 35); tingo lutino romine i kore (Ic. 40:11); yenyo romi ma gurweny ki dok tweyo tyen romi ma ret tye iye.​—Ejek. 34:16.

² Pien jo pa Jehovah onongo gikwo i kare ma dano gimaro kwat kacel ki pur, gin guniang kit ma pire tek kwede ka kiporo Lubanga Jehovah ki lakwat. Gin onongo gingeyo ni romi gimito gwok maber wek gumedde ki bedo makwo dok ma komgi yot. I yo acel-lu, dano bene gimito gwok kacel ki tira pa Jehovah. (Mar. 6:34) Dano gideno can ka ce gwok ki tela maber i yo me cwiny pe. Man miyo gibedo ma nongo pe gingeyo gin matir ki marac​—kit “macalo romi ma gipe ki lakwat” giket woko ata. (1 Luker 22:17) Ento, Jehovah miyo jami ma jone gimito i yo me mar.

3. Ngo ma wabinyamo i pwony man?

³ I kareni bene watwero niang gin mumiyo kiporo Jehovah ki lakwat. Jehovah pud tye ka gwoko jone ma gubedo calo romi-ni. Kong wanenu kit ma en telo kwede romine ki dok miyo botgi jami ma gimito i kareni. Wabineno bene gin ma myero watim wek wanong adwogi maber ki i tira kacel ki gwok pa Jehovah.

4. Tic ango ma Yecu tye kwede ma lubbe ki gwoko romi pa Jehovah?

⁴ Jehovah ocimo Yecu macalo Lawi Kacokke. (Ep. 1:22, 23) Macalo “lakwat maber,” Yecu bene  nyuto ni mitine, yubbe, kacel ki kite rom aroma ki pa Wonne. Medo i kom meno, Yecu ‘omiyo kwone pi romine.’ (Jon 10:11, 15) Ginkok pa Kricito obedo twon mot madit pi dano! (Mat. 20:28) Ki lok ada, yub pa Jehovah tye ni “dano ducu ma ye en [Yecu] owek to, ento obed ki kwo ma pe tum”!​—Jon 3:16.

5, 6. (a) Angagi ma Yecu oketogi me gwoko romine, ki dok gin ango ma romi myero gutim wek gunong adwogi maber ki i yub man? (b) Tyen lok ma pire tek ango ma watye kwede me bedo luwiny bot luelda?

⁵ Romi ginyuto nining ni Yecu Kricito Lakwatgi? Yecu owaco ni “Romina winyo dwana, an angeyogi, gin luba.” (Jon 10:27) Winyo dwan Lakwat Maber-ri te lokke ni watimo jami ducu ma en mito. Man kwako winyo lok pa jo me en ocimogi me kwayo romine. Yecu onyuto ni lukwenane kacel ki lupwonnyene onongo gibimedde ki tic ma ecako. Gin onongo ‘gibipwonyo’ ki dok ‘gibikwayo romi pa Yecu.’ (Mat. 28:20; kwan Jon 21:15-17.) Ka dong kwena maber-ri woto ki romo kin piny, wel lupwonnye omedde ci Yecu oketo yub ni Lukricitayo ma guteggi i yo me cwiny gukwa romi me kacokke.​—Ep. 4:11, 12.

⁶ I kare ma Paulo tye ka lok ki luelda me kacokke me Epeco i cencwari me acel, en otito botgi ni cwiny maleng aye oketogi me ‘kwayo lwak pa Lubanga.’ (Tic 20:28) Man bene rom aroma ki luelda i kareni pien kicimogi i nge mokone ni gupore me bedo ki mot me tic kit ma kicoyo kwede i Baibul. Pi meno, ka wawinyo lok pa luelda, ci nongo nyuto ni waworo Jehovah gin ki Yecu, Lukwat madito loyo. (Luka 10:16) Man aye tyen lok ma pire tek mumiyo omyero wabed luwiny bot luelda. Kadi bed kumeno, tye tyen lok mukene mumiyo omyero walub tiragi.

7. Luelda gikonyi nining me gwoko wat maber ki Jehovah?

⁷ Lok me cuko cwiny kacel ki tira ma luelda gimiyo bot luye luwotgi pol kare jenge i kom Baibul. Luelda gitimo man pe ni pien gin aye gidoro kwo pa utmegigi. (2 Kor. 1:24) Ma ka meno, gin gimito ni gikony Lukricitayo luwotgi me moko tamgi ma rwatte ki cik ma igi lac me Baibul, ma man weko anyobanyoba bedo pe dok jami ducu woto kore ki kore i kacokke. (1 Kor. 14:33, 40) Baibul waco ni luelda gitye ka ‘gwoko kwowa.’ Man nyuto ni luelda gimito konyo dano acel acel me kacokke wek gugwok wat maber ki Jehovah. Pi meno, gin pe gigale me konyo omego nyo lamego mo macok moko tam marac, nyo ma dong otyeko moko tamme. (Gal. 6:1, 2; Juda 22) Tika magi pe tyen lok matir mumiyo omyero ‘wawinyo lok pa jo ma gitelowa’?​—Kwan Jo Ibru 13:17.

8. Luelda gigwoko romi pa Lubanga nining?

⁸ Lakwena Paulo, ma bene obedo lakwat ma paro pi romi, ocoyo bot omegine me Kolocai ni: “Wugwokke wek ngat mo pe ongakwu woko ki tam me ryeko nyo me bwola mo ma tere pe, kun wulubo kit pa kwaro ki pwony pa jogi macon me lobo, ma pe wulubo Kricito.” (Kol. 2:8) Lok man me poyo wic-ci nyuto tyen lok mukene mumiyo omyero walub tira ma luelda giminiwa kun jenge i Ginacoya. Gin gigwoko utmege kun giweko gibedo ma wanggi bit me neno ngat mo keken ma mito balo niyegi. Lakwena Petero ociko ni myero wagwokke ki i kom “lunebi ma lugoba” ki dok “lupwony ma lugoba” ma gibitemme me “mako  jo ma cwinygi wirre atata” wek gupot i bal. (2 Pet. 2:1, 14) Luelda me kareni bene gimiyo lok me poyo wic ma kit meno ka ce mitte. Macalo Lukricitayo ma guteggi i yo me cwiny, gin gitye jo ma gukato ki i kwo mapat pat. Medo i kom meno, ma pud peya kicimogi, gin ginyuto ni gitye ki ngec matir i kom Ginacoya dok gitye lupwonye maber ma gicuko cwiny dano ki pwony me ada. (1 Tem. 3:2; Tito 1:9) Gin gimiyo tira maber bot romi pienni guteggi i yo me cwiny dok ryekogi jenge i Baibul.

9. Yecu tiro ki dok pito kacokke i kareni nining?

⁹ Jehovah tiyo ki dulle me miyo cam muromo i yo me cwiny bot Lukricitayo ma kiwirogi ki bene utmege ma gitye i twok lobo ducu. Kiminiwa tira mapol ma jenge i Ginacoya kun kitiyo ki bukkewa. Medo i kom meno, i kine mukene dul pa Jehovah miyo tira atir bot luelda kun kitiyo ki waraga nyo luneno ma giwoto awota. I yo magi, romi ginongo tira matir.

10. Gin ango ma lakwat ma paro pi romi myero otim ka omego nyo lamego mo oa woko ki i adwol?

¹⁰ Luelda gitye ki tic me gwoko ki dok paro pi jo ma komgi lit i yo me cwiny i kacokke, tutwalle jo ma niyegi odoko goro nyo gutimo bal madongo. (Kwan Yakobo 5:14, 15.) Oromo bedo ni jo magi gua woko ki i kacokke dok guweko tic pi Lubanga. Ka meno otimme, laelda ma paro pi romi bitute  ki kerone ducu me yenyo romo acel acel ma orweny, ci cuko cwinye me dwogo i dwol nyo anok, ma obedo kacokke. Yecu otito ni “Wora ma tye i polo bene pe mito ni ngat mo acel i kin jo magi matino myero oto.”​—Mat. 18:12-14.

11. Pingo jo mukene ginongo ni tek me lubo tira pa luelda?

¹¹ Jehovah gin ki Yecu gitye Lukwat ma gipe ki roc. Ento, luelda ma gikwayo romi me kacokke gitye ki roc. Man twero weko bedo tek tutwal bot jo mogo me lubo gin ma luelda waccigi. Jo magi giromo tamone ni: ‘Gin bene gitye ki roc calo wan. Pingo omyero wawiny tiragi?’ Ada, luelda gire gitye ki roc. Kadi bed kumeno, omyero wabed ki neno mupore i kom goro ma gitye kwede.

12, 13. (a) Ngo ma watwero wacone ma lubbe ki bal pa jo mogo ma Jehovah otiyo kwedgi me telo jone? (b) Pingo Jehovah oweko kicoyo i Baibul bal pa jo ma en ocimogi me tela?

¹² Ginacoya tito ka maleng bal pa jo mogo ma Jehovah otiyo kwedgi me telo jone i kare mukato angec. Me labolle, kiwiro Daudi me bedo kabaka ki dok laloc me Icrael. Kadi bed kumeno, atematema oweko en otimo abor ki dok oneko nek. (2 Cam. 12:7-9) Ki bene, nen kong gin mutimme i kom lakwena Petero. Kadi bed ni i cencwari me acel kimiye tic ma pire tek i kacokke, en pud otimo bal madongo. (Mat. 16:18, 19; Jon 13:38; 18:27; Gal. 2:11-14) Nicakke wa i kare ma Adam gin ki Kawa gubalo kwede, pe tye ngati mo ma obedo labongo roc nikwanyo Yecu keken.

¹³ Pingo Jehovah oweko kicoyo i Baibul bal pa jo ma en ocimogi me tela? Tyen lok acel aye ni Lubanga onongo mito nyuto ni etwero tic ki jo ma gitye ki roc me telo jone. Ki lok ada, en obedo ka timo man pi kare malac. Pi meno, omyero pe walok roc pa jo ma gitye ka telowa obed me gengo ngewa wek wacak nguro i komgi nyo cayo twerogi. Jehovah mito ni wawor omege magi dok wawiny lokgi.​—Kwan Nia 16:2, 8.

14, 15. Gin ango ma wapwonyo ki i kit ma Jehovah okubbe kwede ki jone i kare mukato angec?

¹⁴ Pire tek adada ni myero wawiny lok pa jo ma gitye ka telowa. Tam kong i kom kit ma Jehovah onongo kubbe kwede ki jone i kare ma kwo tek. I kare ma jo Icrael guweko lobo Ejipt, Lubanga onongo tittigi gin ma myero gutim kun tiyo ki Moses kacel ki Aron. Wek pe kinek lutino kayogi, Luicrael onongo myero gulub tira ma kiminigi me camo cam ma kite dok pat ki dok me cwinyo remo romo i kom okar me doggola ryoryo, ki dok i kom rii wiye malo. Dwan mo ma oa ki i polo aye pe omiyo tira meno. Gin onongo myero guwiny lok pa ludongo me Icrael, ma Moses onongo waccigi gin me atima. (Nia 12:1-7, 21-23, 29) I kare macalo meno, Moses kacel ki ludongo onongo gikubo lok pa Jehovah bot jo Icrael. I kareni, luelda bene gitimo tic man ma pire tek-ki.

¹⁵ Gwok nyo wi po i kom kare mapat pat ma Jehovah otiyo ki luwange nyo lumalaikane me miyo tira ma olaro kwo pa dano. I kare magi ducu, Lubanga oneno ni pore me miyo twero bot jo mukene. En ooro  luwange wek guwac bot jone gin ma myero gutim wek gubwot i kare ma kwo tek. Labongo akalakala, watwero bedo ki gen ni Jehovah romo timo gin ma kit meno bene i Armagedon. I kareni, luelda ma Jehovah ominigi tic i dulle omyero gugwokke pe me nywaro twero ma kiminigi.

16. “Lok” mene ma myero waket cwinywa iye?

¹⁶ Jo pa Jehovah gitye “lwak acel” i cing “lakwat acel,” Yecu Kricito. (Jon 10:16) Yecu owaco ni ebibedo ki lupwonnyene “kare ducu, nio i agikki piny.” (Mat. 28:20) Macalo Kabaka i polo, en tye ka doro jami ducu ma bitimme ma peya kijwero lobo pa Catan-ni. Wek wabed ma nongo wanote dok wanong gwok muromo i dul pa Jehovah, omyero ‘wawiny lok ma a ki yo tung ngewa,’ ma wacciwa yo ma myero walubi. “Lok” man kwako jami ducu ma cwiny maleng wacciwa kit ma kitito kwede i Baibul ki bene gin ma Jehovah ki Yecu giwacciwa kun gitiyo ki luelda.​—Kwan Icaya 30:21; Niyabo 3:22.

17, 18. (a) Gin ango ma tye ka miyo kwo tek bot jo pa Lubanga, ento watwero bedo ki gen ango? (b) Gin ango ma kibinyamone i pwony ma lubo man?

¹⁷ Baibul wacci Catan tye ka wirre “macalo labwor ma kok, kun yenyo dano me amwoda.” (1 Pet. 5:8) Macalo lee tim mager dok kec tye ka nekone, en tye ka libo kun kuro kare mupore me mwodo romi ma gigoro nyo ma guket woko ki i adwol. Man aye gin mumiyo omyero wabed cok ki kacokke ki bene ‘lakwat ki Lagwok kwowa.’ (1 Pet. 2:25) Ma lubbe ki jo ma gibibwot ki i twon can madit atika-ni, Niyabo 7:17 waco ni: “Latin romo [Yecu] . . . bibedo lakwatgi; en bitelogi terogi i wang it me pii me kwo, Lubanga bene bidunyo pig wanggi woko ducu ki i wanggi.” Man pud dong cikke mamwonya adada!

¹⁸ Kit ma dong watyeko nyamo tic ma pire tek ma luelda myero gutim-mi, ber ka wapenye kekenwa ni, Ngo ma luelda gitwero timone wek giter romi pa Yecu i yo mupore? Lapeny man kibinyamone i pwony ma lubo eni.