1, 2. Lukwena nen calo gubedo ka tamo gin ango i kare ma Yecu tye i wotte me cito i Jerucalem pi tyen me agikki?

 LUKUR piny ma i Jerucalem onongo dong guneno dwe ma pud otuc nyen. Kiniango Lukiko pa Lujudaya ci gumoko ni dwe manyen me Nican dong ocakke. I ngeye, kioro dano me cwalo kwena man oyotoyot i kin piny. Lukwena pa Yecu onongo gingeyo ni nino me Kato dong onyiko cok. Oromo bedo ni onongo gingeyo bene ni Yecu mito cito i Jerucalem ma peya nino me Kato oo.

² I kare meno, Yecu kacel ki lukwenane onongo gitye i Perea (loka Jordan) i wotte me cito i Jerucalem pi tyen me agikki. (Mat. 19:1; 20:17, 29; Mar. 10:1, 32, 46) Ka dong kimoko ni dwe manyen me Nican ocakke litap, onongo kikwero nino me Kato i nge nino 13, i Nican 14 ma ceng cito ka poto.

3. Pingo Lukricitayo gitye ki miti madit i kom nino dwe ma onongo kikwero iye nino me Kato?

³ Cam me Otyeno pa Rwot kibikwero i April 14, 2014, pien poto i nino dwe ma onongo kikwero iye nino me Kato. Nino meno pire bibedo tek adada bot Lukricitayo me ada ki bene jo ma gitye ki miti. Pingo? Pien wakwano ki i 1 Jo Korint 11:23-25 ni: “I wor meno ma giketo roro i kome-ni, Rwot Yecu omako mugati; ka dong opwoyo, ci obaro iye, omiyogi kun wacci, ‘Man aye koma ma tye piwu. Wutim kuman me po pira.’ Kumeno ka gucamo otum, [en] otingo kikopo [bene].”

4. (a) Lapeny mene ma waromo penye kwede ma lubbe ki Nipo? (b) Kitiyo cura me ngeyo nino dwe me Nipo nining mwaka ki mwaka? (Nen bok ma wi lokke tye ni “ Nipo me 2014.”)

⁴ Labongo akalakala, ibibedo tye i kwero nino acel keken ma Yecu ociko lulub kore ni gukwer-ni. Ma peya nino meno oo, penye kekeni ni: ‘Atwero yubbe nining pi kwer meno? Kibitic ki jami ango i otyeno meno? Gin ango ma kibitimone i kwer  meno? Dok pingo kwer meno ki jami ma kibitic kwedgi pigi tek bota?’

5. Yecu owaco bot lukwenane ni gutim gin ango me yubbe pi kwero nino me Kato pi tyen me agikki?

⁵ I kare ma Yecu owaco bot lukwenane ni guyub kabedo me camo cam me Kato, en pe ocikogi ni gunyat ot ki deyo mapat pat. Ma ka meno, en onongo mito kabedo mupore, maleng dok malac ma romo en kacel ki lukwenane. (Kwan Marako 14:12-16.) Lukwena onongo gibinongo jami ducu ma mitte pi cam meno, ma man kwako mugati ma tobi pe iye ki dong vino makwar. I nge tyeko cam me Kato, Yecu oloko tamme i kom jami aryo magi.

6. (a) I nge camo cam me Kato, Yecu owaco gin ango i kom mugati? (b) Kodi mugati ango ma kitiyo kwede i Nipo?

⁶ Lakwena Matayo, ma obedo tye i kwer meno, lacen ocoyo ni: “Yecu omako mugati, ci olego gum i kome, ka ocako baro iye, omiyo bot lupwonnyene, kun wacci ‘Wugam, wucam.’” (Mat. 26:26) “Mugati” ma tobi pe iye aye kitiyo kwede, kit ma kitimo kwede i nino me Kato. (Nia 12:8; Nwo. 16:3) Mugati man onongo kiyubo ki ngano ki pii, labongo medo iye tobi, kado nyo jami mukene. Pien pe kiketo iye tobi, man onongo weko mokone pe kwot. Dok ka kitedo, bedo ma nongo otwo woko likang calo odeyo ma kituro atura. I kareni, me yubbe pi Nipo, luelda guromo penyo ngati mo me yubo mugati man kun tiyo ki ngano ki pii, ci dong tedo ki moo manok. (Ka ngano peke, kitwero tic ki moko mucele, moko unga nyo moko kal nyo moko ma rom ki ma kiryeyogini.)

7. Kodi vino ango ma Yecu otiyo kwede, dok vino mene ma kitwero tic kwede i Nipo i kareni?

⁷ Matayo bene ocoyo ni: “[Yecu] otingo kikopo, ka dong opwoyo, ci omiyo botgi, kun wacci, ‘Wun ducu wumat man.’” (Mat. 26:27, 28) Gin ma Yecu otingo i cinge obedo kikopo ma tye ki vino makwar. (Man pe obedo olok ma  pud kibiyo abiya, pien kare me ngolo olok onongo dong okato woko.) Kadi bed ni pe kimato vino i cam me Kato mukwongo i Ejipt, ento Yecu oye ni kiti kwede. En bene otiyo kwede i Cam me Otyeno pa Rwot. Pi meno, Lukricitayo gitiyo ki vino i kwer me Nipo. Kit macalo onongo pe mitte ni myero kimed gin mo keken i remo pa Yecu wek obed gin ma pire tek-ki, vino ma kitiyo kwede i Nipo-ni bene pe myero kimed iye kongo nyo gin mo keken. Omyero kiti ki kongo vino makwar labongo medo gin mo iye, dok kiromo yubone ki paco nyo kiwilo awila calo Beaujolais, Burgundy, nyo Chianti.

8. Pingo Lukricitayo gimito niang gin ma mugati ki vino gicung pire?

⁸ Lakwena Paulo otito ka maleng ni Lukricitayo mukene mapat ki lukwena bene omyero gukwer Cam me Otyeno pa Rwot. En ocoyo bot luye luwote ma i Korint ni: “Pwony ma yam apwonyowu kwede, Rwot aye mumiya . . . Yecu omako mugati; ka dong opwoyo, ci obaro iye, omiyogi kun wacci, ‘Man aye koma ma tye piwu. Wutim kuman me po pira.’” (1 Kor. 11:23, 24) Pi meno, Lukricitayo i kareni gikwero nino man ma pire tek-ki mwaka ducu dok gimito niang gin ma mugati ki vino gicung pire.

9. Tam marac ango ma jo mogo gitye kwede i kom mugati ma Yecu otiyo kwede-ni?

⁹ Ludini mogo giwaco ni i kare ma Yecu owaco ni ‘man aye koma-ni,’ en onongo tye ka lok atir atir i kome, pi meno gin gitamo ni mugati olokke i yo me tango ci odoko ringo kome. Ento, meno pe otimme. * Kom Yecu kacel  ki mugati ma tobi pe iye-ni onongo gitye ka maleng i nyim lukwena ma lugen-ni. Ada, Yecu onongo tye ka tic ki lapor kit ma otiyo kwede i kare mukene-ni.​—Jon 2:19-21; 4:13, 14; 10:7; 15:1.

10. I Cam me Otyeno pa Rwot, mugati cung pi gin ango?

¹⁰ Mugati ma lukwena onongo gitye ka nenone ki dok gicok camone-ni onongo cung pi kom Yecu. Kom mene? I kare mukato angec, jo pa Lubanga onongo gitamo ni kit macalo Yecu oturo mugati ento cogone mo keken pe kituro-ni, man te lokke ni mugati-ni cung pi “kom Kricito,” kacokke pa Lukricitayo ma kiwirogi. (Ep. 4:12; Rom. 12:4, 5; 1 Kor. 10:16, 17; 12:27) Ento, i nge kwedo lok matut, guniang ni mugati cung pi kom Yecu ma en onongo tye kwede i lobo-ni. Yecu “ociro arem me kom,” nio ma kigure i kom yat. Pi meno, i Cam me Otyeno pa Rwot, mugati cung pi kom Yecu ma “otingo balwa.”​—1 Pet. 2:21-24; 4:1; Jon 19:33-36; Ibru 10:5-7.

11, 12. (a) Yecu owaco gin ango i kom vino? (b) Vino ma kitiyo kwede i Cam me Otyeno pa Rwot cung pi gin ango?

¹¹ Meno konyowa me niang gin ma Yecu owaco i kom vino. Wakwano ni: “Kumeno ka gucamo otum, otingo kikopo kun wacci, ‘Kikopo man aye gicikke manyen i remona.’” (1 Kor. 11:25) Tika kikopo ma Yecu otingo i cinge-ni aye gicikke manyen? Pe. “Kikopo” man onongo cung pi gin ma tye iye​—vino. Yecu owaco ni vino cung pi gin ango? Pi remone ma oony-nyi.

¹² I jiri pa Marako, Yecu owaco ni: ‘Man aye remona me gicikke ma bicwer pi jo mapol.’ (Mar. 14:24) Ada, remo pa Yecu onongo “biony pi jo mapol pi kwanyo bal.” (Mat. 26:28, Baibol pa Katoli.) Pi meno, vino makwar-ri onongo cung pi remo pa Yecu. Remo meno omiyo gikokowa dok bene “giweko balwa.”​—Kwan Jo Epeco 1:7.

13. Tit kong kit ma kikwero kwede Nipo me to pa Yecu mwaka ki mwaka?

¹³ Ngo ma bitimme ka ce ibibedo tye pi tyen mukwongo i kwero Nipo kacel ki Lucaden pa Jehovah? Gure man bibedo i kabedo ma kideyo maber dok maleng, ka ma dano ducu gitwero nongo mit pa kwer meno. Oromo bedo ni ibineno ature, ento pe kibinyato ot ki deyo mapat pat, dok kwer man pe bibedo calo pati. Laelda mupore bimiyo pwony kun tito ka maleng dok i yo me woro gin ma Baibul waco i kom kwer meno. En bikonyo jo ducu me bedo ki pwoc pi gin ma Kricito otimo piwa. En oto macalo ginkok wek wabed kwo. (Kwan Jo Roma 5:8-10.) Laelda-ni bitito pi gen aryo mapat pat ma Baibul waco ni Lukricitayo gitye kwede.

14. Gen mene ma kibinyamo ka kitye ka miyo pwony me Nipo?

¹⁴ Me acel aye gen me loc kacel ki Kricito i polo. Lukricitayo manok keken calo lukwena ma lugen-ni, gitye ki gen man. (Luka 12:32; 22:19, 20; Yabo 14:1) Gen me aryo-ni tye pi pol pa Lukricitayo ma gitiyo ki gen pi Lubanga i kareni. Gin gitye ki gen me kwo i paradic i lobo kany pi naka. Ci dong miti pa Lubanga bitimme i lobo kit ma gitimo i polo, gin ma Lukricitayo gubedo ka lega pire pi kare malac-ci. (Mat. 6:10) Ginacoya tito kit ma gibilimo kwede mit pa kwo pi naka.​—Ic. 11:6-9; 35:5, 6; 65:21-23.

15, 16. Ngo ma kitimo ki mugati i Cam me Otyeno pa Rwot?

¹⁵ Ma dong cok tyeko miyo pwonye,  laelda-ni biwacone ni cawa oromo me timo gin ma Yecu owacci lukwenane gutim. Kit ma kitito kwede malo-ni, kibitic ki mugati ma tobi pe iye ki dok vino makwar. Jami magi gibibedo i wi meja macok ki lalok. En biyabo Baibul ci kwano gin ma Yecu owaco dok otimo i kare ma tye ka cako kwer man. Me labolle, wakwano i Matayo ni: “Yecu omako mugati, ci olego gum i kome, ka ocako baro iye, omiyo bot lupwonnyene, kun wacci ‘Wugam, wucam; man aye koma.’” (Mat. 26:26) Yecu oturo mugati ma tobi pe iye-ni wek emi bot lukwenane ma gubedo i cinge tung acam ki acuc. I April 14, ibineno mugati ma tobi pe iye ma kituro matino tino ci kiketogi i cwan.

¹⁶ Kibitic ki cwan muromo wek mugati olwore i kin dano i cawa manok. Man pe bibedo kwer ma rwomme lamal tutwal. I nge lego lega macek, kibiweko mugati lwore i kin dano. Jo manok (nyo pe tye ngat mo) ma bicamo mugati, kit ma otimme kwede i pol pa kacokke i 2013 i kare ma kilworo mugati i kin dano.

17. I kwer me Nipo, kilubo lanen ma Yecu oweko ma lubbe ki vino nining?

¹⁷ Lacen, lalok biloko tam pa lwak i kom gin ma Matayo owaco ni: ‘Yecu otingo kikopo, ka dong opwoyo, ci omiyo botgi, kun wacci, Wun ducu wumat man; pien man aye remona me gicikke, ma biony pi jo mapol pi weko bal.’ (Mat. 26:27, 28) Kit ma Yecu otimo kwede-ni, kibilego lega mukene ci kilworo vino makwar-ri i kin dano ducu.

18. Pingo pire tek me bedo tye i Nipo kadi bed ni jo manok nyo pe tye ngat mo ma bicamo mugati dok bimato vino?

¹⁸ Pol pa dano ka gubino pe gibimato vino nyo gibicamo mugati ka kitye ka lworone i kin dano, pien Yecu owaco atir ni jo ma gibiloc kacel kwede i polo keken aye gicamo dok gimato. (Kwan Luka 22:28-30; 2 Tem. 4:18) Jo mukene-ni ducu gibibedo macalo lucaden. Kadi bed kumeno, pire tek ni gubed tye i Cam me Otyeno pa Rwot, pien nyuto ni gitye ki pwoc madit pi ginkok pa Yecu. I kwer me Nipo, gin gitwero lwodo lok i kom mot mapol ma ginkok pa Yecu-ni twero keligi. Gin gitye ki gen me bedo i kin “lwak dano mapol ata” ma gibibwot ki i “can madit atika[-ni].” Jo magi ma giworo Lubanga-ni “gutyeko lwoko jorgi i remo pa Latin romo odoko matar adada.”​—Yabo 7:9, 14-17.

19. Ngo ma iromo timone me yubbe pi Cam me Otyeno pa Rwot dok ngo ma myero itim wek inong adwogi maber ki iye?

¹⁹ Lucaden pa Jehovah i twok lobo lung giyubbe pi cokke man ma pire tek-ki. Ma nongo cabit mogo pud odong, wabibedo ka lwongo dano mapol wek gubin. Medo i kom meno, pi nino mogo ma peya Nipo oo, pol pa wan wabikwano ki i Baibul jami ma Yecu otimo ki dok gin mutimme ma peya kikwero Cam me Otyeno pa Rwot i mwaka 33 K.M. Wabigoyo pulan con me nenone ni wabedo tye i Nipo. Pire tek ni wao con ma peya kiwero wer ki dok kilego wek wajol wele ki bene pe wakeng gin mo keken ki i yub man. Wan ducu, Lukricitayo kacel ki wele, wabinongo adwogi maber ka walubo ki i Baibulwa ka kitye ka miyo pwony. Ma dong pire tek loyo, bedo tyewa i Nipo binyuto ni watye ki pwoc madit pi ginkok ki dok ni watye ka lubo cik pa Yecu * ni: “Wutim kuman me po pira.”​—1 Kor. 11:24.