“In tika iye ni Lubanga pe? Dano milion mapol giwacci en pe.” Man aye lok ma tye i lanyut mo madit ma kicibo i teng gudo dok jo ma giwacci Lubanga pe aye guculo pire. Gin gitamo ni pe gimito kony pa Lubanga.

Ki tung cel, jo mapol ma giwacci giye ni Lubanga tye gimoko tam ma nyuto ni pe giye ni en tye. Acbicop me Katoli Salvatore Fisichella, oloko i kom lumemba me kanicane ni: “Ka ngat mo onenowa, en pe romo tamone ni wan Lukricitayo pien kit me kwowa rom aroma ki pa jo ma pe luye.”

Jo mukene ticgi pol ma pe gitamo pi Lubanga. Gitamo ni Lubanga bor kwedgi ma pe romo konyogi. Gin pe gitamo pi Lubanga, onyo gitamo pire ka peko tye ki dok ka gimito gin mo ki bote​—gitamo ni Lubanga obedo laticgi ma myero otim gin mo keken ma gimito.

Jo mukene pe gitimo gin ma dinigi pwonyo, gwok nyo pienni gitamo ni konye pe. Me labolle, pacen 76 pa Katoli i lobo Germany gineno ni pe rac pi laco ki dako me bedo kacel ma peya gunyomme kun inongo ni tam man pe rwatte ki pwony me dinigi nyo Baibul. (1 Jo Korint 6:18; Jo Ibru 13:4) Ki lok ada, pe Katoli keken ento dini mukene dong bene gutyeko niang ni kwo pa dano pe rwatte ki niyegi kadi bed giwacci gin ludini. Lutela me dini mapat pat gikok ni jo me kanicagi gikwo calo iwacci jo ma giwaco ni Lubanga pe.

Labol magi giweko wapenye kekenwa ni: Tika ada wamito Lubanga i kwowa? Man pe obedo lok manyen. Kicoyo lok man i cura mogo mukwongo me Baibul. Me nongo lagam pi lapeny man, kong wanenu pyem ma Catan okelo i kom Lubanga i buk me Acakki.