1. Mot macalo mene ma Jehovah miniwa wek wabed ki yomcwiny?

 JEHOVAH mito ni wabed ma cwinywa yom, dok en miniwa mot mapol ma gitwero keliwa yomcwiny. Me acel, watye ki kwo. Pi meno, watwero tic ki kwowa me pako Lubanga, pien en onyikowa cok bote i woro me ada. (Jab. 144:15; Jon 6:44) Jehovah ocikke botwa ni emarowa dok ekonyowa me medde ki tic pire. (Jer. 31:3; 2 Kor. 4:16) Watye ka limo mot mapol pi wat ma watye kwede ki Jehovah pien wanongo cam me cwiny muromo ki dok wanote macalo utmege ma gimarre i kingi. Ma dong dit loyo, watye ki gen ma pire tek i anyim.

2. Tam mene ma lutic mogo pa Lubanga gilwenyo kwede?

² Kadi bed ni tyen lok magi gikeliwa yomcwiny, ento lutic mogo ma lugen pa Lubanga gitamo marac i komgi kekengi. Gitamo ni Jehovah terogi nyo ticgi calo gin ma pire pe tek. Pi jo ma pe gitwero weko kodi tam man, lok man ni bedo ki yomcwiny pi “mwaka mapol[-li]” obedo calo lek ki botgi. Kwo twero bedo calo nino me colpiny.​—Latit. 11:8.

3. Pingo watwero bedo ki tam maraco?

³ Omege ki lumege magi gitwero bedo ki tam maraco pienni nongo cwinygi otur, komgi lit, nyo gutii woko. (Jab.  71:9; Car. 13:12; Latit. 7:7) Ento bene, Lukricitayo ducu myero gukemme ki lok ada pien cwinywa aye bwolowa dok twero ngolo kop i wiwa kadi bed ni Lubanga cwinye yom i komwa. (Jer. 17:9; 1 Jon 3:20) Larac-ci loko lok goba i kom lutic pa Lubanga. Dok bene jo ma gitamo calo Catan giromo weko wabedo ki tam maraco kit ma Erifaji otimo kwede-ni, ni meno piwa pe tek bot Lubanga. Meno obedo lok goba i kare pa Yubu dok pud bene tye i kareni.​—Yubu 4:18, 19.

4. Ngo ma wabinyamo i pwony man?

⁴ Jehovah onyuto ka maleng i Ginacoya ni en bibedo kacel ki jo ma ‘giwoto i nota me tipo to.’ (Jab. 23:4) Yo acel ma en tiyo kwede me bedo kwedwa aye Lokke. Baibul obedo “tek pa Lubanga, ma turo cel gogo pa lumonewa woko,” ma man kwako tam maraco. (2 Kor. 10:4, 5) Kong dong wanenu kit ma watwero tic kwede ki Baibul me konyowa wek wabed ki yomcwiny. Man twero keli adwogi maber, ki bene ibipwonyo jami ma twero konyi me cuko cwiny jo mukene.

5. Ngo ma myero watim wek wabed ki yomcwiny?

⁵ Lakwena Paulo oloko i kom jami mogo ma gitwero konyowa me bedo ki yomcwiny. En ocuko cwiny kacokke me Korint ni: “Kong wungine kekenwu, wek wunen ka ce wucung matek i niyewu.” (2 Kor. 13:5) ‘Niye’ aye pwony ducu pa Lukricitayo kit ma kinyuto kwede i Baibul. Ka ce lokwa kacel ki ticwa rwatte ki pwony magi, ci man nyuto ni wacung matek ‘i niyewa.’ Ki lok ada, omyero watute me nenone ni watye ka lubo pwony ducu ma i Baibul. Pe myero wayer pwony ma wamito lubone kun wakwero lubo mukene.​—Yak. 2:10, 11.

6. Pingo omyero wangine kekenwa me niang ‘ka ce wacung matek i niye’? (Nen cal ma tye i pot karatac 12.)

⁶ I cawa mukene ikwero ngine kekeni, tutwalle ka itamo ni pe ibitwero. Ento, kit ma Jehovah nenowa kwede pire tek loyo kit ma wanenne kwede kekenwa, dok tamme bene tye malo kato tamwa woko. (Ic. 55:8, 9) En pe ngiyo jo ma giwore wek enong tyen lok me pwodogi, ento wek enge kitgi mabeco ki dok ekonygi. Ka itiyo ki Lok pa Lubanga me ngine wek iniang ‘ka ce icung matek i niye,’ ci ibinenne kekeni kit ma Lubanga neni kwede. Man twero konyi me leyo kaka tam mo keken ni konyi pe i wang Lubanga ki lok me cuko cwiny ma i Baibul ni: Piri tek adada i wang Jehovah. Adwogine kiromo porone ki yuyo katen wek dero nyo lero odony i ot.

7. Watwero nongo adwogi maber nining ki i lanen pa jo mogo ma lugen ma kicoyo lok komgi i Baibul?

⁷ Yo maber me ngine keni aye me bedo ka lwodo lok i kom lanen pa jo mogo ma lugen ma kicoyo lok i komgi i Baibul. Tem poro kwo ma gukato ki iye ki megi nyo kit ma guwinyo kwede ki i cwinygi ki kit ma iwinyo kwede, dok go gin ma onongo ibitimo ka ibedo gin. Kong dong wanenu labol adek ma ginyuto kit ma itwero tic kwede ki Baibul me niang ka ce icung matek ‘i niye’ wek ibed ki yomcwiny.

8, 9. (a) Dato ma lacan-ni owok ki i kwo ma nining? (b) Dato-ni nen calo obedo ki tam maraco macalo mene?

⁸ I ot pa Lubanga ma i Jerucalem, Yecu oneno dato mo ma lacan. Lanen pa dato man konyowa me bedo ki yomcwiny kadi bed pe waromo timo jami  ducu ma wamito ni watim. (Kwan Luka 21:1-4.) Tam kong i kom kwo ma dato-ni owok ki iye: Mukwongo, en ociro arem me rwenyo cware. Medo i kom meno, lutela dini onongo gitye luworo dok “gimayo odi pa mon-to” ma ka konyogi. (Luka 20:47) Dato-ni obedo lacan adada mumiyo en obedo ki kero me bolo lim manok adada ma rom aroma ki lim ma latic pakaca twero nongone i nge tic pi dakika manok.

⁹ Tem kong goyo kit ma dato-ni owinyo kwede i kare ma en odonyo i dyekal me ot pa Lubanga ki cente nyige aryo keken i cinge. Tika en obedo ka tamo i kom kit ma cente ma ebibolo nok kwede ka eporo ki cente ma onongo ebolo i kare ma cware pud kwo? Tika lewic omake i kare ma oneno cente madongo ma dano ma gurye i nyime gitye ka bolone, ma gwok nyo bene openye kekene ka ce motte-ni pire tek? Kadi bed ni en obedo ki tam ma kit meno, dato-ni otimo gin ma en twero pi woro me ada.

10. Yecu onyuto nining ni dato-ni onongo pire tek bot Lubanga?

¹⁰ Yecu owaco ni dato-ni kacel ki motte onongo pigi tek adada i wang Jehovah. En owaco ni dato-ni “obolo lim madwong makato dano ducu.” Motte-ni onongo biribbe ki pa jo mukene, ento Yecu opwoye pi nyuto cwiny me dyere bot Jehovah. Jo ma onongo gikwano cente ma kibolo i ot pa Lubanga pe guniang kit ma nyig cente aryo meno nyo dato-ni pigi tek kwede bot Jehovah. Kadi bed kumeno, tam pa Jehovah aye obedo gin ma pire tek loyo, ento pe tam pa dano nyo kit ma dato-ni onene kwede. Tika itwero tic ki lok kom dato-ni me ngine kekeni me niang ka ce icung matek i niye?

11. Pwony ango ma itwero nongone ki i lok kom dato-ni?

¹¹ Kwo ma itye ka wok ki iye twero gudo gin ma iromo miyo bot Jehovah. Pi mwakagi nyo goro ma gitye kwede, jo mogo gitero cawa manok i tic me tito kwena maber-ri. Tika myero gutam ni  pe pore me miyo ripot i kom cawa ma gutero i ticwa me pwony? Kadi bed ni pud itye bulu nyo komi yot, iromo tamone ni itye ka tute pi cawa manok keken ka iporo ki cawa ma jo pa Jehovah gitero i wore mwaka ki mwaka. Ento, pwony ma wanongo ki i labol pa dato ma lacan-ni aye ni Jehovah neno dok pwoyo jami ducu ma watimo pire, tutwalle ka watimo i kare ma kwo tek. Tam i kom kit ma ibedo ka woro kwede Jehovah i mwaka mukato-ni. Tika cawa ma idyero bot Jehovah-ni onongo mito jalo jami mogo ma pigi tego? Ka tye kumeno, itwero bedo ki gen ni en tero gin ma itimo pire i cawa meno calo gin ma pire tek. Ka itye ka tute ki keroni ducu i tic pa Jehovah calo dato-ni, itwero bedo labongo akalakala ni icung matek ‘i niye.’

12-14. (a) Tam maraco ma Elia obedo kwede-ni ogude nining? (b) Pingo Elia owinyo kit ma owinyo kwede-ni?

¹² Lanebi Elia obedo lagen bot Jehovah ki dok onongo tye ki niye matek. Ento i nino mo acel, en cwinye otur adada mumiyo openyo Jehovah ni okwany kwone woko, kun wacci: “Dong otum, ai Rwot [Jehovah], tin dong ikwany kwona woko.” (1 Luker 19:4) Jo ma peya cwinygi otur kuman giromo wacci lega pa Elia-ni obedo mere “lok atata.” (Yubu 6:3) Ento, en onongo tye ka winyo kumeno. Nge bene ni, ma ka keco i kom Elia pienni mito to, Jehovah okonye.

¹³ Elia ocako winyo kumeno nining? Con kong, Elia otimo tango ma onyuto ni Jehovah aye Lubanga me ada, dok man oweko kineko lunebi 450 kulu pa Baal. (1 Luker 18:37-40) Elia nen calo obedo ki gen ni i kare meno jo pa Lubanga gibidwogo i woro me ada, ento meno pe otimme. Daker Jejebel ma onongo kite rac tutwal-li ocwalo lok bot Elia ni ebiweko kineke woko. Elia oringo odok tung kupiny i dye tim kun ngolo ki i Juda pien obedo ki lworo ni kibineke woko.​—1 Luker 19:2-4.

¹⁴ I kare ma tye kene kunnu, Elia otamo ni tic ma etiyo macalo lanebi-ni konye pe. En owaco bot Jehovah ni: “An pe aber akato kwarina ducu.” En onongo nenne kekene macalo gin ma konye pe calo apwa ki cogo pa kwarine ma guto con. Man onyuto ni en otiyo ki yone me ngine kekene dok omoko tamme ni jami dong ongayo wange woko, dok pire pe tek bot Jehovah nyo ngat mo keken.

15. Lubanga omoko bot Elia nining ni en pire tek?

¹⁵ Ento, Won Twer Ducu oneno Elia i yo mapat. I wang Lubanga, Elia onongo dano ma pire tek, dok En otimo jami me mokone bote. Lubanga ooro lamalaika me jingo cwiny Elia. Jehovah bene omiye cam ki pii ma okonye me wot tung kupiny pi nino 40 me o i Got Koreb. Medo i kom meno bene, Lubanga otiro tam mugom ma Elia onongo tye kwede ni pe tye Laicrael mo mudong ma lagen bot Jehovah. Ma dong pire tek loyo, Lubanga omiyo bot Elia tic manyen me atiya, ma en ojolo. Elia onongo adwogi maber ki i kony pa Jehovah, mumiyo en odok ka tic macalo lanebi ki mit kom.​—1 Luker 19:5-8, 15-19.

16. I yo macalo mene ma Lubanga ogwoki kwede?

¹⁶ Gin mutimme i kom Elia-ni romo konyi me ngine kekeni ka ce itye i niye dok twero cuko cwinyi me bedo ki yomcwiny. Me acel, tam i kom yo mapat pat ma Jehovah ogwoki kwede. Tika laelda nyo Lakricitayo mo muteggi i yo me cwiny okonyi i kare ma onongo imito kony? (Gal. 6:2) Tika Baibul, bukkewa, nyo cokkewa okonyi me winyo ki i cwinyi ni Jehovah paro piri? I nino mukene  ma inongo adwogi maber i yo magi, tam i kom Ngat ma omiyo kony meno ci mi pwoc Bote i lega.​—Jab. 121:1, 2.

17. Ngo ma Jehovah tero calo gin ma pire tek ma lubbe ki luticce?

¹⁷ Me aryo, omyero i nge ni bedo ki neno ma pe opore twero bwolowa. Gin ma pire tek aye kit ma Jehovah nenowa kwede. (Kwan Jo Roma 14:4.) Jehovah tero dyerewa kacel ki bedo lugen bote calo gin ma pire tek, ento pe pimowa ki jami ma watimogi wek piwa obed tek bote. Dok kit ma otimme kwede i kom Elia-ni, oromo bedo ni in bene itimo jami mapol pi Jehovah ento nongo pe ingeyo. Oromo bedo ni tye jo mogo ma i kacokke ma ikonyogi, ki bene tuteni okonyo dano ma i wang ticwu me ngeyo lok ada.

18. Tic ma Jehovah omini nyuto gin ango?

¹⁸ Me agikkine, nen mot me tic ducu mua ki bot Jehovah macalo gin ma nyuto ni en tye kwedi. (Jer. 20:11) Calo Elia, cwinyi romo tur pien kor ticci pe nen nyo nen calo pe iromo cobo yubbi me cwiny. Ento, pud itye ki mot ma pire tek loyo ma ngati mo keken twero bedo kwede i kareni​—mot me tito kwena maber-ri ki dong me lwonge ki nying Lubanga. Medde ki bedo lagen bot Jehovah kun icung matek labongo tagge. Ci dong, kit ma Yecu owaco kwede-ni, ‘Ibidonyo i yomcwiny pa laditti.’​—Mat. 25:23.

19. Laco Jabuli 102 owok ki i kwo ma nining?

¹⁹ Laco Jabuli 102 onongo tye ka wok ki i kwo matek. En onongo tye ka deno “can” dok tye ka ciro arem nyo turcwiny, dok bene en onongo pe ki kero me lweny ki pekkine. (Jab. 102, lok me kawiye) Lok ma en oloko nyuto ni arem, bedo kic kic, ki dong tam mapol obwoye woko. (Jab. 102:3, 4, 6, 11) En onongo tamo ni Jehovah mito bolle woko.​—Jab. 102:10.

20. Lega twero konyo ngat ma tye ka lweny ki tam maraco nining?

²⁰ Ento, laco jabuli pud omedde ki pako Jehovah. (Kwan Jabuli 102:19-21.) Kit ma kicoyo kwede i Jabuli 102, kadi wa luye bene giwinyo arem dok gitute atuta me keto cwinygi i jami mukene. Laco jabuli owinyo “calo winyo ma bedo kene i wi ot malo” pien pekkine orume woko dyere. (Jab. 102:7) Ka ce iwinyo kumeno, yab cwinyi bot Jehovah kit ma laco jabuli otimo kwede-ni. Lega pa dano ma tye ki can​—ma obedo legani-ni​—twero konyi me medde ki lweny ki tam maraco. Jehovah ocikke ni ‘ebiwinyo lega pa jo ma piny dong obwoyogi woko adada, pe ebicayo lega me bako dog ma gikelo i nyime.’ (Jab. 102:17) Ket genni i kom cikke meno.

21. Ngat ma tye ka lweny ki tam maraco twero nongo yomcwiny nining?

²¹ Jabuli 102 bene nyuto kit me nongo yomcwiny. Laco jabuli otimo meno kun keto cwinye i kom watte ki Jehovah. (Jab. 102:12, 27) En onongo kwe cwiny i kare ma oniang ni Jehovah kare ducu gwoko Jone ka gitye ka wok ki i atematema. Pi meno, ka tam maraco tye ka gengi pe me tic pi Lubanga kit ma onongo imito kwede-ni, leg bote. Leg Lubanga pe ni okwany pekkini keken ento bene ni wek ‘dano gupak nying Jehovah.’​—Jab. 102:20, 21.

22.  Wan ki acel acel watwero yomo cwiny Jehovah nining?

²² Ada, waromo tic ki Baibul me moko ni watye i niye dok ni piwa tek bot Jehovah. Ento, i lobo man ma tye ite loc pa Catan-ni, pe waromo jwayo tam maraco kacel ki turcwiny ducu. Kadi bed kumeno, wan ki acel acel pud watwero yomo cwiny Jehovah dok wabinongo larre ka wadiyo cwinywa i ticce.​—Mat. 24:13.