Ma lubbe ki neko Yecu kacel ki lubal aryo mukene-ni i kom yat, wakwano i Jiri ni: “Lujudaya gukwayo Pilato ni myero gitur tyen dano ma gigurogi, gitergi woko.”​—Jon 19:31.

Cik pa Lujudaya onongo waco ni lubal ma kingabogi i kom yat i nge nekogi ‘pe gibiwekogi bedo i wi yat dyewor lung.’ (Nwoyo Cik 21:22, 23) Lujudaya nen calo bene onongo gitiyo ki cik man i kom jo ma Luroma aye onekogi i kom yat. Pi meno, turo tyengi miyo gito oyot dok weko kiyikogi ma peya kwer me Cabat ocakke i otyeno ma ceng cito ka poto.

I nek mapol ma kitimogi, ngat ma kingolo to i wiye onongo kiguro cinge ki tyene i kom yat ki cumar. Ka ki ilo yat meno ocung atir, ci en nongo ongabbe agaba ki arem malit adada, kun nongo kome ducu cumar aye otingo. Ka ngat moni mito yweyo, en myero onyikke malo ki i cumar ma kiguro ki tyene-ni. Ento, ka onongo dong kituro tyene woko, ci en nongo dong pe romo timone. Man romo weko en to oyotoyot pien nongo pe tye ka yweyo nyo remone pe tye ka mol maber.

Latangdiyo obedo gin lweny ma Daudi otiyo kwede me neko twon oluma mo ma nyinge Goliac. Daudi nen calo opwonyo kit me tic kwede i kare ma en pud tye awobi ma kwayo kwat.​—1 Camuel 17:40-50.

I kare me Baibul, jo Ejipt ki Aciria onongo gigoyo cal latangdiyo. Gin lweny man onongo kiyubo ki del nyo bongo ma ktiweyo i kom tol. Ngat ma bayo-ni onongo keto iye gweng mapwot ma rom ki mucungwa matidi. I ngeye, en wiro latangdiyo ka dong weko tolle acel, ma miyo gwengnge cito i cipid matek adada ci celo gin moni litap.

I kupiny me lobo Acia, kigolo piny ci kinongo latangdiyo mapol ma onongo kitiyo kwedgi me lweny. Lulweny ma ludiro nen calo onongo gitiyo ki latangdiyo me bayo gweng i cipid matek adada. Jo ma gukwano matut peya gumoko tamgi ka latangdiyo onongo romo celo gweng o wa ka ma atum twero celo iye atero. Kadi bed kumeno, latangdiyo onongo pud twero wano dano marac adada.​—Lungol. 20:16.