1, 2. Jehovah neno luticce ma i lobo nining?

 KA LUNYODO gineno lutinogi ka tuko, cwinygi pol kare bedo yom ka gineno diro ma gitye kwede. Lanyodo, tika iromo moko lok meno? Latin acel romo bedo ki diro me gweyo odilo, nyo ngwec, ento nongo mukene ngeyo goyo cal nyo yubo jami. Ento kadi bed gitye ki diro magi, lunyodo cwinygi yom me konyogi wek gudong dirogi.

² Jehovah bene tye ki miti madit i kom lutinone ma gitye i lobo kany. En neno luticce me kareni macalo “lonyo me rok ducu.” (Ag. 2:7) Pigi tek tutwal pi niyegi kacel ki dyeregi bot Jehovah. Oromo bedo ni ineno ni i kin Lucaden me kareni, omege ki lumege gitye ki diro mapat pat. Omege mogo gitye ki diro me miyo pwony bot lwak, mukene gingeyo yubo kit ma jami myero owot kwede. Lumegiwa mapol gipwonyo leb oyotoyot adada ma konyogi i ticwa me pwony, ki mukene gitye lanen maber i miyo kony bot jo ma gimito cuko cwiny nyo gwoko jo ma komgi lit. (Rom. 16:1, 12) Lukricitayo magi ducu mono pe giweko wanongo mit pa bedo i kacokke?

3. Lapeny mene ma wabinyamogi i pwony man?

³ I kin luye luwotwa mukene tye iye jo matino nyo ome ge ma pud gunongo batija anonga, ma ginongo ni tek me loko lok me ada wek odok yo me kwogi nyo nywako i tic me kacokke. Watwero konyogi nining wek gudong i yo me cwiny? Pingo omyero waket cwinywa me neno kit mabeco ma gitye kwede kun wanenogi kit ma Jehovah nenogi kwede?

4, 5. Lok ma kicoyo i Lungolkop 6:11-16 nyuto nining ni Jehovah neno diro ma luticce gitye kwede?

⁴ Baibul nyuto ka maleng ni Jehovah pe neno kit mabeco pa luticce keken, ento bene neno diro ma gitye kwede. Me lapore, i kare ma kiyero Gideon me laro jo pa Lubanga ki i dic pa jo Midian, en nen calo obedo ki ur i kare ma lamalaika omote ni: “Rwot [Jehovah] tye kwedi, in twon oteka lweny.” I kare meno, Gideon onongo pe tamo ni ebedo “oteka.” En obedo ki gung cwiny dok obwone kekene. Ento, Jehovah onongo geno laticce kadi bed ni Gideon onongo tye ki akalakala i kome kekene.​—Kwan Lungolkop 6:11-16.

⁵ Jehovah onongo geno ni Gideon bilaro Luicrael pien En oneno dirone. Me lapore, lamalaika pa Jehovah oneno kit ma Gideon dino kwede ngano ki kerone ducu. Tye gin mukene ma lamalaika-ni bene oneno. I kare me Baibul, lupur onongo pol kare gidino ngano ka maleng i laro moyo wek yamo okwor cunge woko. Tye me ur ni Gideon onongo tye ka dino ngano i bur biyo olok wek ekan nganone manok-ki ki bot jo Midian. Man pud dong nyuto ryeko madit adada! I wang Jehovah Gideon onongo pe latic ma tiyo matek keken, ento bene onongo ryek. Ada, Jehovah oneno dirone ci opwonye.

6, 7. (a) Kit ma Jehovah oneno kwede Amoc onongo pat ki pa Luicrael nining? (b) Gin ango ma nyuto ni Amoc onongo pe obedo dano ma kwiya piny?

⁶ I yo acel-li bene, Jehovah onongo tye ki gen madit i kom lanebi Amoc kadi bed ni jo mukene nen calo gunene macalo ngat ma konye pe. Amoc owaco ni ebedo lakwa romi ki dok layub nyig olam me acama​—cam ma onongo kitamo ni obedo pa lupeko. I kare ma Jehovah ocimo Amoc me tiro kaka apar me Icrael ma onongo giworo jogi-ni, Luicrael mukene nen calo gutamo ni en pe opore pi tic meno.​—Kwan Amoc 7:14, 15.

⁷ Amoc onongo a ki i caro mo mabor, ento ngecce i kom lok me tekwaro kacel ki luloc onyuto ni en pe obedo ngat ma kwiya piny. Nen calo en onongo tye ki ngec matut i kom gin ma obedo ka timme i Icrael, dok twero bedo ni en ongeyo lok kom lobbe ma gurumo ka nget Icrael pien en onongo kubbe ki lucat wil. (Amoc 1:6, 9, 11, 13; 2:8; 6:4-6) Jo mogo ma gukwano matut lok me Baibul i kareni giwacci Amoc onongo tye ki diro me coc. Kadi bed ni Amoc otiyo ki lok ma niang iye yot dok gudo cwiny dano adada, ento en bene otiyo ki lapor. Ada, Amoc obedo ki tekcwiny me yaro ka maleng bal pa lalamdog Amajia, ma man onyuto ni Jehovah oyero dano matir ma romo tic ki dirone kadi bed ni jo mukene onongo pe gineno.​—Amoc 7:12, 13, 16, 17.

8. (a) Gin ango ma Jehovah ocikke me timone bot Daudi? (b) Pingo Jabuli 32:8 cuko cwiny jo gibwone kekengi nyo gitamo ni gipe ki diro?

⁸ Jehovah ngeyo diro pa luticce  ducu dok en konyogi me tic kwede i yo maber. En owaco bot Kabaka Daudi ni kare ducu ebibedo ka tirre kun ‘enene.’ (Kwan Jabuli 32:8.) Man pud dong myero ocuk cwinywa adada. Kadi bed ni i kine mukene wabwone kekenwa, Jehovah twero konyowa me timo jami ma onongo watamo ni pe watwero. Kit macalo lapwony mucwiny konyo latin kwan ma ngecce nok me timo gin moni i yo maber, Jehovah bene konyowa me dongo dirowa. I yo ma nining?

9. Wan watwero tamo pi omegiwa ki lumegiwa nining?

⁹ Paulo ocuko cwiny Lukricitayo ducu me tamo pi luye luwotgi. (Kwan Jo Pilipi 2:3, 4.) Paulo onongo tye ka wacone ni omyero wange diro pa jo mukene ki dok wapwogi. Wawinyo nining ka ngati mo oneno kit ma wadongo kwede i yo me cwiny ci bene opwoyowa iye? Pol kare, meno cuko cwinywa me medde ki dongo kun watute ki kerowa ducu. I yo acel-li bene, ka wapwoyo luye luwotwa pi kit mabeco ma gitye kwede, ci wakonyogi me medde ki dongo i yo me cwiny.

10. Jo macalo mene ma myero watam pigi adada?

¹⁰ Jo macalo mene ma myero watam pigi adada? Tye kono ni, wan ducu wamito ni kitam piwa kare ki kare. Kadi bed kit meno, mitte ni jo matino nyo ma pud gunongo batija anonga gunge ni gitye ki tic i kacokke. Meno bikonyogi me niang ni pigi tek i kin jo pa Jehovah. Ki tungcel, ka pe wapwoyo omege magi, ci man gengogi pe me bedo ki miti me tiyo tic mapol, kun inongo ni Lok pa Lubanga cuko cwinygi me bedo mupore pi tic magi.​—1 Tem. 3:1.

11. (a) Laelda acel okonyo omego mo ma onongo pud tidi me lweny ki lewic nining? (b) Pwony ango ma wanongo ki i gin mutimme i kom Julien?

¹¹ Ludovic, laelda ma kinyuto miti i kome ma en pud tidi owaco ni: “Ka anyuto miti me ada i kom omego mo, en dongo oyotoyot adada i yo me cwiny.” Ma lubbe ki Julien, awobi mo ma lewic onongo maro makone, Ludovic owaco ni: “Julien onongo kite pe nianga, dok loko lok atir wek dano bene gunene, ki dong kome bedo ka myel amyela ka en tye ka timo gin moni. Ento ki tung bota, en onongo nen lakica dok mito konyo jo mukene adada i kacokke. Pi meno, ma ka bedo ki akalakala i kome, aketo cwinya i kom jami mabeco ma en timogi kun acuko cwinye.” Lacen, kicimo Julien me tic macalo lakony kor tic dok kombeddi tye ka tic macalo painia marii.

12. Gin ango ma myero watim wek wakony omegiwa? Mi lapor acel.

¹² Ki lok ada, wek wakony jo mukene me dongo i yo me cwiny, omyero wange jami ma gitimo. Kit ma waneno kwede ki i gin mutimme i kom Julien-ni, omyero pe waket cwinywa i kom goro pa ngat moni ento wanen kite mabeco ki dok wakonye me dongo dirone. Man aye bene kit ma Yecu oneno kwede lakwena Petero. Kadi bed ni i kine mukene Petero onyuto gorone, Yecu ocako nyinge ni Kepa, nyo Petero, ma te lokke ni pata got. Man nyuto ni en onongo obyeko ni Petero bibedo matek calo pata got.​—Jon 1:42.

13, 14. (a) Barnaba onyuto niango nining i kom Marako? (b) Calo Marako, Alexandre onongo adwogi maber ki i kony ma kimiye nining? (Nen cal ma tye i pot karatac 22.)

 ¹³ Barnaba onyuto niango acel-lu i kom Jon, ma onongo kilwonge ni Marako, nying kwon pa Luroma. (Tic 12:25) I kare ma Paulo tye i wotte pi tyen mukwongo macalo lamiconari gin ki Barnaba, Marako onongo tye ngat ma ‘konyogi,’ kun minigi jami ma mitte. Ento, i kare ma guo Pampulia, Marako owekogi woko liyak. Gin gulubo yo ma cito tung kumalo kengi kun gikato ki i kabedo ma opong ki luyak. (Tic 13:5, 13) Barnaba nen calo pe oketo cwinye i kom goro pa Marako, ento lacen en otiyo ki kare man me tyeko pwonye. (Tic 15:37-39) Man okonyo Marako me doko dano mucwiny i tic pa Jehovah. Tye me yomcwiny ni i kare ma Paulo tye i buc i Roma, Marako onongo tye kacel kwede kunnu. En bene ocwalo mot bot Lukricitayo me kacokke me Kolocai, dok lakwena Paulo oloko i kome maber adada. (Kol. 4:10) Tam kong yomcwiny ma Barnaba obedo kwede i kare ma Paulo openyo Marako ni okonygi.​—2 Tem. 4:11.

¹⁴ Alexandre, ma pud kicime macalo laelda cokcok-ki, wiye po i kom kit ma omego mo acel okonye kwede: “I kare ma pud atidi, telo dano i lega onongo tek ma pe larre. Laelda mo onyuta kit me yubbe ki dong bedo ma cwinya opye. Ma ka kwero lwonga me lega, en obedo ka miya kare me lega teretere i cokke me cito i ticwa me pwony. I nge kare manok, cwinya odoko tek.”

15. Paulo onyuto pwoc pi utmegine nining?

¹⁵ Ka waneno ni Lakricitayo moni tye ki kit mabeco, tika wapwoye iye? I Jo Roma cura 16, Paulo opwoyo luye luwote makato 20 kulu pi kitgi mabeco ma oweko emarogi. (Rom. 16:3-7, 13) Me labolle, Paulo owaco ni Anduroniko gin ki Yunia gubedo ka tic pi Kricito pi kare malac makato en pien gin gudiyo cwinygi. Paulo bene oloko maber i kom min Rupo pi gwok ma nen calo omiye i kare mukato angec.

16. Adwogi maber ango ma bino ka kimiyo pwoc bot jo matino?

¹⁶ Wan bene watwero nongo adwogi maber ka wamiyo pwoc ki cwiny me ada. Nen kong labol pa Rico, awobi mo ma bedo i lobo France, ma cwinye otur pien wonne ma pe obedo Lacaden-ni okwero ni en pe onong batija. Rico otamo ni myero kong ekur wang ma eo mwaka 18 ka wek ecak tic pi Jehovah ki cwinye ducu. Cwinye bene ocwer pien luwote gubedo ka nyware i cukul. Frédéric, ma tye laelda-ni kipenye ni okwan Baibul ki awobi man. En owaco ni: “Apwoyo Rico pien aunauna ma kit meno nyuto ni en obedo ki tekcwiny me tito pi niyene.” Lok magi me pwoc-ci ojingo  cwiny Rico me medde ki bedo lanen maber dok okonye me nyikke cok bot wonne. Lacen, Rico onongo batija ma tye ki mwaka 12.

17. (a) Wan waromo konyo utmegiwa nining wek gudong i yo me cwiny? (b) Lamiconari mo acel onyuto miti i kom utmege matino nining, dok adwogine obedo ningo?

¹⁷ Ka wapwoyo utmegiwa pi tic mabeco ma gutimo, man jingo cwinygi me medde ki tic pi Jehovah ki cwinygi ducu. Sylvie, * ma dong otiyo i Betel i lobo France pi mwaki mapol-li owaco ni lumege bene giromo pwoyo omege. En owaco ni lumege giromo miyo pwoc pi tic mabeco kacel ki tute pa omege. Pi meno, “lokgi me cuko cwiny medo kor lok ma omege ma guteggi i yo me cwiny giwaco.” En bene omedo ni: “Ki tung bota, miyo pwoc obedo gin ma myero atim.” (Car. 3:27) Jérôme, ma tye lamiconari i lobo French Guiana, okonyo omege mapol me bedo ma gupore me tic macalo lumiconari. En owaco ni: “Aniang ni ka amiyo pwoc bot omege matino pi gin mo ma gutimo maber i ticwa me pwony nyo miyo lagam i cokke, man minigi tekcwiny. Macalo adwogine, man miyo gidongo dirogi.”

18. Pingo tic kacel ki omege matino kelo adwogi maber?

¹⁸ Watwero bene cuko cwiny luye luwotwa me medde ki dongo i yo me cwiny ka watiyo kacel kwedgi. Laelda mo romo penyo omego mo ma pud tidi, ma ngeyo tic ki kompiuta me rudo ki i jw.org pwony mo ma twero cuko cwiny jo muteggi ma gipe ki kompiuta. Onyo ka itye ki tic me atima i Ot me Ker, pingo pe ilwong omego mo matidi wek wuti kacel kwede? Timo gin ma kit meno mini kare me neno jo matino kun ipwoyogi ki dok ineno adwogi maber.​—Car. 15:23.

19, 20. Pingo myero wakony jo mukene wek gudong i yo me cwiny?

¹⁹ I kare ma Jehovah ocimo Yocwa me telo Luicrael, En bene ociko Moses ni ‘ocuk cwiny’ Yocwa ki dok ‘omiye teko.’ (Kwan Nwoyo Cik 3:28.) Dano mapol adada gitye ka ribbe kwedwa i woro Jehovah. Lukricitayo ducu ento pe luelda keken myero gunenni gikonyo omege matino kacel ki jo manyen wek gudong i yo me cwiny. Macalo adwogine, omege mapol gibidonyo i tic pi kare malac, dok mapol bene nongo ‘giromo pwonyo jo mukene.’​—2 Tem. 2:2.

²⁰ Kadi bed watye i kacokke madit nyo i gurup ma pud tye ka dongo me doko kacokke, wan ducu omyero wanen ni wayubbe pi anyim. Gin ma pire tek aye me lubo lanen pa Jehovah, ma kare ducu neno kit mabeco ma luticce gitye kwede.