1. Pingo mar ma tye i kin Lubanga gin ki Wode odongo?

 YECU KRICITO, Wod pa Jehovah owaco ni: “An amaro Won.” (Jon 14:31) Yecu dok omedo ni: “Won maro Wod.” (Jon 5:20) Meno myero pe omi wabed ki ur. Pi mwaki mapol, Lubanga obedo ka tic ki Yecu macalo ‘ladiro ticce’ ma peya en obino i lobo. Pien Jehovah gin ki Yecu gutiyo kacel, man oweko Wod opwonyo kit mabeco pa Wonne dok man omiye tyen lok mapol me marre. Ki lok ada, bedo cok omiyo mar ma tye i kingi odongo.

2. Lapeny mene ma wabinyamogi?

² Laco jabuli owero ni: “Amari, ai Rwot [Jehovah], pien in i tekka.” (Jab. 18:1) Meno aye cwiny ma myero wabed kwede i kom Lubanga, pien en marowa. Ka wawinyo dog Jehovah, ci en bimarowa. (Kwan Nwoyo Cik 7:12, 13.) Kit macalo pe watwero neno Lubanga-ni, tika waromo marre? Te lokke ngo me maro Jehovah? Pingo omyero wamarre? Ki dong, wan watwero nyuto marwa pi Lubanga nining?

3, 4. Pingo watwero bedo ki mar matut i kom Jehovah?

³ “Lubanga en cwiny,” pi meno pe watwero nenne. (Jon 4:24) Kadi bed kumeno, pud watwero maro Jehovah dok bene Ginacoya wacciwa ni myero wanyut mar meno. Me lapore,  Moses owaco bot Luicrael ni: ‘Mar Rwot Lubangani ki cwinyi ducu, ki kwoni ducu ki tekki ducu.’​—Nwo. 6:5.

⁴ Pingo watwero bedo ki mar matut i kom Lubanga? Pien en ocweyowa ki miti me wore dok bene ominiwa kero me nyuto mar. Ka wacobo mitiwa me ngeyo Jehovah, ci marwa pire bidongo dok wabibedo ki tyen lok mucwiny me bedo ki yomcwiny. Yecu owaco ni: ‘Gitye ki yomcwiny jo ma gingeyo ni gin lucan i yo me cwiny, pien ker me polo megi.’ (Mat. 5:3) Ma lubbe ki miti ma kicweyowa kwede me woro Lubanga, lacoc mo owaco ni: “Omyero wabed ki ur madit pien dano giyenyo dok gimito bedo ki niye i kom Lubanga.”​—Man Does Not Stand Alone, buk ma lacoyone obedo A. C. Morrison.

5. Wangeyo nining ni waromo nongo Lubanga?

⁵ Tika konye pe me yenyo Lubanga? Pe, en mito ni wabed ki wat macok kwede. Lakwena Paulo otito meno atir i kare ma tye ka miyo caden bot jo ma gucokke i Areopago. Man otimme cok ki Parthenon​—ot ma kidyero bot Athena, lubanga ma dako me Atene. Go kong ni itye kunnu i kare ma Paulo tye ka lok i kom “Lubanga ma yam ocweyo lobo ki jami ducu ma tye iye-ni” ki dok otito ni En “pe bedo i ot ma dano gutiyo ki cinggi.” Lakwena Paulo omedo ni Lubanga “ocweyo rok ducu nia ki i kom dano acel wek gubed i wi lobo ma nongo en omoko kare kikome ma myero gubed iye, ki wang apokki lobo me kabedogi, wek gubed ka yenyo Lubanga wek ka gibongo abonga gwok nyo gugud kome ci ginonge, pien en pe tye cen ka mabor ki bot ngat acel acel i kinwa.” (Tic 17:24-27) Ada, dano gitwero nongo Lubanga. Dano makato milion abiro ki nucu kulu ma gitye Lucaden pa Jehovah dong ‘gunongo en’​—dok gimarre ki cwinygi ducu.

6. Yecu owacci cik mene “madit makato cik ducu”?

⁶ Marwa pi Jehovah myero oa ki i cwinywa. Yecu otito man ka maleng i kare ma Luparicayo gupenye ni: “Lapwony, cik mene madit makato cik ducu?” Ci Yecu odoko iye ni: ‘Mar Jehovah Lubangani ki cwinyi ducu, ki kwoni ducu, ki tammi ducu. Man aye cik madit dok mukwongo.’​—Mat. 22:34-38.

7. Te lokke ngo me maro Lubanga ki (a) ‘cwinywa ducu’? (b) ‘kwowa ducu’? (c) ‘tamwa ducu’?

⁷ Ngo ma Yecu onongo tye ka wacone i kare ma en owaco ni omyero wamar Lubanga ki ‘cwinywa ducu,’ ‘kwowa ducu,’ ki dong ‘tamwa ducu’? ‘Cwinywa ducu’ kwako mitiwa ki kit ma wawinyo kwede. ‘kwowa ducu’ kwako ngat ma wabedo macalo dano adana ki dok jami ducu ma watimo i kwowa. ‘Tamwa ducu’ kwako kit ma watamo kwede ki jami ma watamo i komgi. I yo man, Yecu onyuto ni omyero wamar Jehovah ki kwowa ducu kacel ki jami ducu ma watye kwedgi.

8. Maro Lubanga biweko watimo gin ango?

⁸ Ka wamaro Lubanga ki cwinywa, kwowa, ki dong tamwa ducu, ci wabiketo cwinywa i kwano Lokke, wabitimo jami ma en mito ki cwiny acel, dok wabitito kwena me Ker-ri ki mit kom. (Mat. 24:14; Rom. 12:1, 2) Mar me ada pi Jehovah binyikowa cok bote. (Yak. 4:8) Tye kono ni pe waromo ryeyo ki pete tere ducu gin mumiyo omyero wamar Lubanga. Ento, kong wanenu tyen lok mogo.

9. Pingo imaro Jehovah macalo Lacwecwa ki dok Lami Jami Ducu?

⁹ Jehovah Lacwecwa dok Lami Jami Ducu. Paulo owaco ni, “Wakwo i en, wawoto i en, wabedo i en,” (Tic 17:28) Jehovah ocweyo lobo me bedo pacowa mamwonya. (Jab. 115:16) En bene miyo cam kacel ki jami mukene ma wamito wek ogwok kwowa. Pi meno, Paulo owaco bot luwor cal jogi me Licitra ni “Lubanga makwo . . . kare ducu en obedo ki cadenne ma nyutu ni en tye. En otimowu ber kun cwalo botwu kot mucwer ki i polo, dok miyowu kit cam mapatpat macek ka karegi oromo ma miyo wuyeng ki cam, cwinywu bene bedo yom.” (Tic 14:15-17) Meno mono pe tye tyen lok mupore me maro Lacwecwa Madit ma Lami Jami Ducu?​—Latit. 12:1.

10. Omyero wajol ginkok ma Lubanga omiyo me jwayo bal ki to-ni nining?

¹⁰ Lubanga bijwayo bal ki to ma walako ki bot Adam. (Rom. 5:12) Ada, “Kricito yam oto piwa i kare ma pud wan lubalo; meno nyuto kit mar ma Lubanga marowa kwede.” (Rom. 5:8) Labongo akalakala, cwinywa opong ki mar pi Jehovah pien en oyabo yo me timiwa kica pi balwa ka wangut kun bene wanyuto niye i kom ginkok pa Yecu Kricito.​—Jon 3:16.

11, 12. I yo macalo mene ma Jehovah ominiwa gen?

¹¹ Jehovah ‘miyo wabedo ki gen ma kelo yomcwiny ki kuc.’ (Rom. 15:13) Gen ma Lubanga miyo konyowa me ciro atematema. Jo ma kiwirogi ma gibibedo ‘lugen nio wa i to kibimiyo botgi tok me deyo me kwo i polo.’ (Yabo 2:10) Jo ma gitye ki niye matek dok gengi tye me kwo i lobo gibinongo mot mapol mari nakanaka i Paradic ma kiciko pire-ni. (Luka 23:43) Wan wawinyo nining ma lubbe ki gen man? Tika watye ki yomcwiny, kuc ki mar pi ngat ma Miyo “kit gin mo ducu maber, ki mot ducu mabeco twatwal[-li]”?​—Yak. 1:17.

¹² Lubanga ominiwa gen me nicer ma yomo cwinywa. (Tic 24:15) Tye kono ni cwinywa cwer ka dano ma wamaro oto, ento pien watye ki gen me nicer, wan ‘pe wabedo ki cwercwiny macalo jo mukene ma gipe ki gen.’ (1 Tec. 4:13) Pi mar ma Lubanga Jehovah tye kwede, en tye ki miti madit me cero jo muto, tutwalle jo ma kitgi atir calo Yubu. (Yubu 14:15) Go kong kit ma cwinywa bibedo yom kwede me rwatte ki jo ma kicerogi i lobo kany. Cwinywa opong ki twon mar madit pi Wonwa me polo, ma ominiwa gen me nicer!

13. Gin ango ma nyuto ni Lubanga ada paro piwa?

¹³ Jehovah paro piwa adada. (Kwan Jabuli 34:6, 18, 19; 1 Petero 5:6, 7.) Pien wangeyo ni Lubangawa ma lamar-ri pol kare konyo jo ma lugen bote, man miyo wabedo agonya macalo ‘romine ma en kwayogi.’ (Jab. 79:13) Medo i kom meno, mar pa Lubanga piwa binen i gin ma en bitimone i te Ker pa Meciya. Ka Yecu Kricito, Kabaka ma en oyero-ni ojwayo tim gero, dic, kacel ki tim maraco ki i lobo, ci jo ma luwiny gibibedo ki kuc kacel ki lonyo me labed naka. (Jab. 72:7, 12-14, 16) Pe itamo ni gen macalo man miniwa tyen lok matir me maro Lubanga ma paro piwa-ni ki cwinywa, kwowa, kerowa, ki dong tamwa ducu?​—Luka 10:27.

14. Mot madit ango ma Lubanga ominiwa?

¹⁴ Jehovah ominiwa mot madit me bedo Lucadenne. (Ic. 43:10-12) Watye ki mar madit i kom Lubanga pi miniwa mot man me cwako twero me locce ki dok me miyo gen bot dano ma gikwo i lobo man ma opong ki ayela-ni. Medo  i kom meno, waromo lok ma nongo watye ki niye kacel ki tekcwiny pien wan watito kwena maber ma a ki i Lok pa Lubanga me ada, ngat ma pe turo cikkene. (Kwan Yocwa 21:45; 23:14.) Tye kono ni, mot kacel ki tyen lok mumiyo wamaro Jehovah pe romo gik. Ento waromo nyuto marwa pire nining?

15. Kwano Lok pa Lubanga ki dok ketone i tic konyowa nining?

¹⁵ Kwan Lok pa Lubanga ki cwinyi ducu dok iket i tic. Timo man nyuto ni wamaro Jehovah kun wamito ni Lokke obed ‘ceng ma menyo yo ma wawoto iye.’ (Jab. 119:105) Ka watye i peko, waromo nongo kwe cwiny ki i lok macalo magi: “In pe ibicayo ngat ma cwinye cwer ki ma ongut.” “Mar meri ma pe lokke otinga malo, ai Rwot [Jehovah]. Ka atamo pi jami mapol, in ikweyo cwinya ki kicani.” (Jab. 51:17; 94:18, 19) Jehovah nyuto cwiny me kica i kom jo ma gitye ka deno can, dok Yecu bene kica mako i kom dano. (Ic. 49:13; Mat. 15:32) Kwano Baibul twero konyowa me ngeyo ni Jehovah paro piwa adada, dok man bene miyo wamare ki cwinywa ducu.

16. Lega kare ki kare twero miyo marwa pi Lubanga dongo nining?

¹⁶ Leg bot Lubanga kare ki kare. Legawa nyikowa cok bot ‘ngat ma gamo lega-gu ducu.’ (Jab. 65:2) Ka waniang ni Lubanga tye ka gamo legawa, ci marwa pire dongo medde. Me lapore, oromo bedo ni waneno ni en pe mito ni kitemwa makato kerowa. (1 Kor. 10:13) Ka watye ki par i cwinywa ci walego bot Jehovah kun wabako dogwa, ci wanongo “kuc pa Lubanga,” ma en keken aye romo miyone. (Pil. 4:6, 7) I kine mukene, waromo lega lalingling ki i cwinywa​—kit ma Nekemia otimo kwede-ni​—ci wabiniang lacen ni Jehovah ogamo. (Nek. 2:1-6) Ka ‘wamine i lega’ kun waneno kit ma Jehovah gamo legawa kwede, man bimiyo marwa pire dongo dok wabedo ki tekcwiny ni en bikonyowa me lweny ki jami mogo ma temo niyewa i kare me anyim.​—Rom. 12:12.

17. Ka wamaro Lubanga, wabitero bedo tye i cokke nining?

 ¹⁷ Bed tye kare ducu i cokke, gure, ki dong gure madito. (Ibru 10:24, 25) Luicrael gugure kacel wek giwiny dok gipwony kit me woro Jehovah kun gilubo Cikke. (Nwo. 31:12) Ka ce wamaro Jehovah, ci pe wabinongo ni timo mitine nurowa. (Kwan 1 Jon 5:3.) Pi meno, pe myero wawek gin mo keken omi water bedo tye i cokke calo gin me tuko. Pe wamito ni gin mo keken orweny mar ma wakwongo nyutone pi Jehovah.​—Yabo 2:4.

18. Mar pi Lubanga miyo watimo gin ango ma lubbe ki kwena maber-ri?

¹⁸ Tit “lok ada me kwena maber[-ri]” ki mit kom bot jo mukene. (Gal. 2:5) Marwa pi Lubanga miyo waloko i kom Ker pa Meciya ma tye ite loc pa Wode ma ‘biringo ngwec me lweny pi ada’ i Armagedon. (Jab. 45:4; Yabo 16:14, 16) Pud dong watye ki twon yomcwiny madit ya me loko dano wek gudok lupwonnye kun wapwonyogi lok i kom mar pa Lubanga ki lobo manyen ma en ocikke pire!​—Mat. 28:19, 20.

19. Pingo omyero wabed ki pwoc i kom luelda?

¹⁹ Nyut pwoc pi luelda ma Lubanga omiyogi. (Tic 20:28) Luelda gitye mic mua ki bot Jehovah dok kare ducu gitiyo pi ber bedowa. Luelda gitye “macalo ka-gwok ka yamo tye, dok macalo ka-gwok ka kot ocorre piny, macalo kulu mapol ma piine mol i kabedo mutwo, dok macalo tipo got madit ma tye i lobo mutwo matar atara ligwek.” (Ic. 32:1, 2) Pud dong cwinywa bedo yom adada ka wanongo kagwok ki i yamo matek nyo kot magwar! Ka ceng lyet, cwinywa bedo yom ka wacito ite tipo mangic. Lapor man konyowa me niang ni luelda gimiyo kony ma mitte i yo me cwiny. Ka wabedo luwiny bot jo ma gitelowa, ci nongo watye ka nyuto pwoc pi “mot ma obedo dano” dok man nyuto marwa pi Lubanga ki Kricito, Lawi kacokke.​—Ep. 4:8, NW; 5:23; Ibru 13:17.

20. Ka imaro Lubanga, ngo ma ibitimo ma lubbe ki Yakobo 1:22-25?

²⁰ Ka itye ki wat maber ki Jehovah, ci ibibedo ngat ma ‘keto gin ma giloko i tic, ento pe ngat ma winyo awinya keken.’ (Kwan Yakobo 1:22-25.) Ngat ma “keto gin ma giloko i tic” tye ki niye ma weko en bedo ki mit kom i ticwa me pwony kacel ki miyo lagam i cokke. Pien imaro Lubanga ki cwiny me ada, man miyo ilubo “cik maber” ma Jehovah omiyo, ma tye ki jami ducu ma en mito ni itim.​—Jab. 19:7-11.

21. Kiromo poro lega ma a ki i cwinyi ki gin ango?

²¹ Mar pi Lubanga Jehovah bimiyo ilego bote ki cwinyi ducu kare ki kare. Daudi oporo lega ki odok eceta ma onongo kiwango ite Cik ma Kimiyo bot Moses kun wero ni: “Wek legana obed i nyimi macalo odok eceta ma giwango ma duny makur, ki cinga ma atango boti-ni myero obed calo gitum ma gityero boti otyeno.” (Jab. 141:2; Nia 30:7, 8) Pi meno, omyero waleg ki mwolo, ki cwinywa ducu, ki dong wami pwoc wek legawa obed calo odok eceta ma ngwece kur dok yomo cwiny Jehovah.​—Yabo 5:8.

22. Gin ango ma wabinyamo ipwony ma lubo man?

²² Yecu owaco ni myero wamar Lubanga ki luwotwa. (Mat. 22:37-39) Ka wamaro Jehovah kacel ki cikke ma igi lac, man bikonyowa me maro luwotwa. Wabinyamo lok meno ipwony ma lubo man.