Kit macalo Lubanga Jehovah * aye Lacwec ki dok won twer ducu-ni, dano mapol gikok i kome pi jami ducu ma timme i lobo kadi bed ni giraco. Ento, nen kong gin ma Baibul waco i kom Lubanga me ada:

•   “Gin ducu ma Rwot [Jehovah] tiyo tye atir.”​—Jabuli 145:17.

•   “Gin ducu ma en tiyo tye atir. En Lubanga ma lagen, ma pe ki bal mo; kite atir, gin ma en timo ducu tye maber.”​—Nwoyo Cik 32:4.

•   “Rwot [Jehovah] cwinye ber wa lakica”​—Yakobo 5:11, Baibol pa Katoli.

Lubanga aye pe weko jami maraco timme. Ento, tika en piyo dano wek gutim jami maraco? Pe wacel. Ginacoya waco ni, “Ka gibito ngat mo, en pe myero owacci, ‘Lubanga aye ma bita’” Pingo? Pien “Lubanga pe gibito ki tiyo gin marac, en bene pe bito ngat mo.” (Yakobo 1:13) Lubanga pe temo ngat mo keken kun bite me timo gin marac. Lubanga pe kelo jami maraco dok pe piyo jo mukene me timo jami maraco. Pi meno, omyero wakok i kom anga nyo i kom gin ango ka jami maraco otimme?

Baibul tito tyen lok acel mumiyo dano gideno can kun wacci: ‘Kare kacel ki jami ma timme atura poto i komgi ducu.’ (Latitlok 9:11) Ka peko mo otimme atura ci owano ngat mo nyo kadi bed pe owano, meno dong lubbe ki ka ma en onongo tye iye i cawa meno. Cokcok mwaki 2,000 mukato angec, Yecu Kricito oloko i kom peko mo ma opoto atura ci dano18 guto i kare ma ot ma wiye bor opoto i komgi. (Luka 13:1-5) Peko man pe otimme i komgi pi kit ma gukwo kwede; ento pienni onongo gitye i te ot meno i kare ma opoto i komgi. Cokcok-ki, oyengyeng otimme i lobo Haiti i Januari 2010; gamente me lobo meno owaco ni dano makato 300,000 gurwenyo kwogi. Peko man oneko dano mapol labongo paro anga ma obedo anga. Two bene twero mako ngat mo keken i cawa mo keken.

Jo mogo giromo penye kekengi ni: ‘Lubanga mono onongo pe twero gengo pekki magi wek pe gutimme? En mono onongo pe twero gwoko jo ma kitgi ber ki i pekki magi?’ Wek Lubanga otim jami magi, en myero onge jami maraco ma peya gutimme. Kadi bed ni Lubanga tye ki kero me ngeyo gin ma tye anyim, lapeny ma myero wange lagamme aye ni: Tika en tiyo ki tekone me ngeyo jami ducu?​—Icaya 42:9.

Ginacoya waco ni: “Lubanga tye i polo, en  tiyo gin ma cwinye mito.” (Jabuli 115:3) Jehovah timo gin ma en nongo ni pire tek me atima​—ento pe jami ducu ma en twero timogi. Man bene gudo gin ma en yero me ngeyone con. Me lapore, i kare ma tim maraco onya adada i Codom ki Gomora, Lubanga owaco bot Abraim ni: “Abicito botgi wek acinen ka ada gitye ka tiyo kit ma koko i komgi winnye kwede bota-ni; ka pe, ci abingeyo.” (Acakki 18:20, 21) Pi kare mo olo, Jehovah oyero pe me ngeyo jami maraco ducu ma onongo tye ka timme i gangi magi. I yo acel-li bene, Jehovah twero yero pe me ngeyo jami ducu ma peya gutimme. (Acakki 22:12) Man pe nyuto ni en tye ki goro. Kit macalo “ticce ducu cobbe kakare[-ni],” Lubanga tiyo ki kerone me ngeyo gin ma tye anyim ma lubbe ki yubbe; en pe diyo dano me lubo yo moni. * (Nwoyo Cik 32:4) Pi meno, dong watwero dolo te lokwa nining? Me ketone i yo macek: Lubanga yero me ngeyo gin ma tye anyim ka onongo ni mitte.

Myero wakok i kom dano pien gin bene olo to gitimo jami maraco. Nen kong kit ma Baibul tito kwede gin ma romo tero ngat moni i timo jami maraco. “Dano acel acel gire mitine kene aye ma bite, ywaye, kun omo cwinye. Miti ka oyac ci nywalo bal. Bal ka dong odongo muteggi nywalo to.” (Yakobo 1:14, 15) Ka dano gicobo miti maraco ma i cwinygi, ci gibinongo adwogi maraco. (Jo Roma 7:21-23) Ma lubbe ki lok me tekwaro, dano gutimo bal madongo maraco ma oweko jo mukene gudeno can malit adada. Medo i kom meno, jo maraco gitwero balo wi jo mukene wek gutim jami maraco bene.​—Carolok 1:10-16.

Lubanga mono myero ogeng dano ki i timo jami maraco? Tam kong i kom kit ma kicweyo dano kwede. Ginacoya waco ni Lubanga ocweyo dano i calle. Pi meno, dano gitye ki kero me nyuto kit pa Lubanga. (Acakki 1:26) Dano gitye agonya me moko tamgi pigi kengi dok gitwero yero me maro Lubanga ki me moko i kome kun gitimo gin matir. (Nwoyo Cik 30:19, 20) Ka Lubanga diyo dano me timo gin moni, man nyuto ni en dong okwanyo mic me moko tam piwa kenwa. Ki lok ada, man nongo dong te lokke ni dano gitye calo cuma ma kiyubogi me timo gin moni! Ka jami ducu ma watimo nyo ma timme i komwa dong kityeko yubone wacon, nongo pud watye calo cuma. Watye ki yomcwiny madit atika ni  Lubanga keto deyo i komwa dok ye ni wamok tam piwa kenwa! Ento, man pe te lokke ni dano gibideno can nakanaka pi jami maraco ma guyero me timone.

Ka ipenyo Hindu nyo Buddhist ki lapeny ma i pok nge magajin man, twero bedo ni gubigamo kuman: “Jami maraco timme i kom jo ma kitgi ber pi cik me Karma. * Gin gitye ka kayo adwogi maraco pi jami maraco ma gutimo i kwogi macon ma peya kinywalogi odoco.” *

Ma lubbe ki pwony me Karma, pire tek me ngeyo gin ma Baibul waco i kom to. I poto me Eden, ka ma kicweyo iye dano, Lacwec owaco bot Adam, laco mukwongo ni: “Yadi ducu ma tye i poto, camgi macalo i mito; ento yat me ngeyo gin maber ki marac pe icam, pien i nino ma ibicamo iye, en aye ibito iye bene.” (Acakki 2:16, 17) Ka Adam onongo pe otimo bal, kono okwo pi naka. To obino macalo pwod pi kwero lubo cik pa Lubanga. I kare ma kinywalo lutino, “to onya oromo kin dano ducu.” (Jo Roma 5:12) Pi meno, waromo wacone ni “mucara me bal en to.” (Jo Roma 6:23) Baibul bene tito ni: “Ngat ma oto, balle dong gik woko.” (Jo Roma 6:7) Waromo wacone ni dano pe gimedde ki culo pi balgi i nge to.

Dano milion mapol giwaco ni Karma aye tye ka weko dano mapol gideno can. Ngat ma ye pwony man pol kare jolo can ma en kacel ki jo mukene gitye ka denone labongo cwercwiny mapol. Ento, pwony magi pe miyo kit gen mo keken me giko jami maraco ma tye ka timme. Gin giye ni ka ngat moni tero jo mukene maber dok tye ki ngec madok pat, ci man aye gin ma romo konye wek pe kibed ka nywalle odoco. Tye kono ni, tam magi pe girwatte ki gin ma Baibul waco. *

Kadi bed ni dano gitimo jami maraco, ento pe gin aye gucako. Catan Larac-ci, ma kong obedo lamalaika ma lagen-ni, ‘pe ocung i ada’ dok okelo bal i lobo. (Jon 8:44) En otelo wi jemo i poto me Eden. (Acakki 3:1-5) Yecu Kricito olwonge ni “Larac” ki dok “lalo lobo man.” (Matayo 6:13; Jon 14:30) Dano gitye ka lubo Catan kun gikwero lubo cik matir pa Jehovah. (1 Jon 2:15, 16) 1 Jon 5:19 waco ni “lobo ducu tye i te loc pa Larac.” Tye cwec me cwiny mukene ma gudoko jo maraco dok guribbe ki Catan. Baibul nyuto ni Catan ki jogine gitye ka ‘bwolo dano ma i wi lobo ducu,’ kun gikelo ‘can malit atika i lobo.’ (Niyabo 12:9, 12) Catan Larac-ci aye ocako tim maraco.

Ada, Lubanga aye pe weko jami maraco timme i kom dano; dok en pe weko gideno can. Ma ka meno, en ocikke me jwayo jami maraco kit ma pwony ma lubo man binyutone kwede.