Lubanga Jehovah mito ni wabed agonya me tite pekowa kare ducu. (Luka 18:1-7) En winyo legawa pien keto cwinye i komwa. Kit macalo Wonwa me polo lwongowa me lega-ni, tika pe nyuto mingo ka wakwero lwongone?​—Kwan Jo Pilipi 4:6.

Lega pe obedo yo me penyo pi kony keken. Ma ka meno, lega konyowa me nyikke cok bot Lubanga. (Jabuli 8:3, 4) Ka watito bot Lubanga kit ma wawinyo kwede ki i cwinywa kare ki kare, man dongo liremwa kwede.​—Kwan Yakobo 4:8.

Ka walego, Lubanga pe mito ni wati ki nyig lok madongo nyo wabed ka nwoyo lega ma wamako i wiwa. Dok bene pe mitte tutwal ni myero wabed ka lega i yo mogo calo gungugi-ni. (Matayo 6:7) Me lapore, Anna olego pi peko mo me ot ma onongo tye ka cwero cwinye adada. Lacen, i kare ma cwinye odoko yom, en opwoyo Lubanga i lega.​—Kwan 1 Camuel 1:10, 12, 13, 26, 27; 2:1.

Man pud dong obedo twon mot madit ya! Watwero tito pekowa bot Lacwecwa. Waromo bene pakke ki dok pwoye pi jami ma en timo. Ki lok ada, omyero pe water mot man i yo me tukutuku.​—Kwan Jabuli 145:14-16.