Ka iwinyo lok angeya, ci twero bedo ni dong ityeko niang ni i kine mukene dano gitimo jami maraco adada i nying dini. Dini ducu pe gitye ki cwak pa Lubanga me ada. (Matayo 7:15) Ki lok ada, dano mapol dong kibwologi.​—Kwan 1 Jon 5:19.

Kadi bed kumeno, Lubanga paro pi jo ma cwinygi atir ma gimaro timo jami mabeco ki lok me ada. (Jon 4:23) Lubanga tye ka lwongo jo magi me pwonyo lok me ada ki i Baibul.​—Kwan 1 Temceo 2:3-5.

Jehovah tye ka noto dano ma gia ki i dini mapat pat kun pwonyogi ki lok me ada ki bene kit me maro jo mukene. (Mika 4:2, 3) Pi meno, itwero ngeyo dini me ada ki i kit ma jone giparo kwede pi luwotgi.​—Kwan Jon 13:35.

Jo ma gitye i woro me ada pwonygi kacel ki yo me kwogi cung i kom Baibul. (2 Temceo 3:16) Gitye ki woro i kom nying Lubanga. (Nia 3:15) Gitito ni Ker pa Lubanga keken aye bicobo pekki pa dano ducu. (Daniel 2:44) Gilubo lanen pa Yecu kun giweko derogi “menyo piny calo tara” ki timo jami mabeco bot luwotgi. (Matayo 5:16) Pi meno, dong kitwero ngeyo Lukricitayo me ada ka giwoto i pacci pa dano wek ginywak kwena maber me Ker pa Lubanga kwedgi.​—Kwan Matayo 24:14; Tic pa Lukwena 5:42; 20:20.