1. Dano ducu gitye ki miti ango, ki dok nga ma twero cobo mitigi-ni?

 DANO ducu gitye ki miti madit me bedo cok ki jo mukene. Kiromo wacci jo moni “kingi cok ka ce gimarre dok gingene maber adada.” Wabedo ki yomcwiny ka ce lupacowa kacel ki luremwa gimarowa, giparo piwa ki dok giniang kit ma wawinyo kwede. Ento, Ngat ma myero wabed ki wat macok kwede makato ducu aye Lacwewa.​—Latit. 12:1.

2. Jehovah ocikke botwa me timo gin ango, ento pingo dano mapol pe giye cikke meno?

² Jehovah cuko cwinywa me ‘nyiko cok’ bote kun tiyo ki Lokke, dok bene ocikke ni ka watimo meno, ci ‘ebinyikke cok botwa.’ (Yak. 4:8) Lok man pud dong miyo wabedo ki yomcwiny madit ya! Ento, dano mapol gitamo ni obedo tam me mingo me ye ni Lubanga mito nyikke cok botwa; gin gitamo ni pe gipore me nyikke cok bote nyo ni en bor kwedwa. Tika ada twere me nyikke cok bot Jehovah?

3. Lok ada ango ma myero wange madok i kom Jehovah?

³ Lok ada tye ni Jehovah “pe tye cen ka mabor ki bot ngat acel acel” ma mito nonge; pien twere me ngeyo en. (Kwan Tic pa Lukwena 17:26, 27; Jabuli 145:18.) Lubanga onongo oyubo ni dano ma gitye ki roc myero gubed cok kwede, dok en tye atera me minigi cwakke macalo lureme macok. (Ic.  41:8; 55:6) Ma lubbe ki kwo ma en okato ki iye, laco Jabuli ocoyo lok i kom Jehovah ni: ‘Pien in aye ma igamo lega-gu ducu. Dano ducu gibibino boti. Dano ma iyero ka ikelo cok boti tye ki gum [yomcwiny].’ (Jab. 65:2, 4) Lok ma kicoyo i Baibul i kom Kabaka Aca me Juda miniwa labol pa ngat mo ma onyikke cok bot Lubanga, dok nyuto kit ma Jehovah ojolo kwede. *

4. Lanen ango ma Kabaka Aca oweko bot jo Juda?

⁴ Kabaka Aca onyuto arima pi woro me ada i kare ma oryemo lutim kwele ki i ot pa Lubanga dok okwanyo cal jogi woko ducu ma onongo gunya tutwal i Juda. (1 Luker 15:9-13) Pien Aca onongo tye ki wat macok ki Jehovah dok bene olubo cikke, man oweko en ocuko cwiny dano ni “gubin bot Rwot [Jehovah], ma Lubanga pa kwarigi, dok gugwok cikke ki gin ma en ociko.” Jehovah oweko Aca obedo ki kuc pi mwaki apar mukwongo me locce. Aca owaco ni man otwere nining? En owaco ki dano ni: “Lobo dong pud mewa, pien wabedo ka bino bot Rwot Lubangawa, wabedo ka bino bote ci en omiyowa kuc i kabedo ducu.” (2 Tekwaro 14:1-7) Nen kong gin mutimme i ngeye.

5. I yo ango ma Aca onyuto kwede ni egeno Lubanga, ki dok adwogine obedo ningo?

⁵ Ket kong ni ibedo Aca. Jera ma Laetiopia-ni otelo wi mony ma romo milion acel ki gadigadi miya adek me bino ka lweny i kom loboni. (2 Tekwaro 14:8-10) Ngo ma ibitimo ka ineno mony mapol kit man gitye ka bino me lweny i kom kerri? Mony ma itye kwede wele romo 580,000 keken! Kit macalo wel monnye bamo megi kiryo-ni, tika ibipenye kekeni gin mumiyo Lubanga oweko mony ma kit man gitye ka bino me lweny i komi? Itute ni me yenyo gin me atima, tika ibijenge i kom ryekoni? Kit ma Aca odok kwede i lok man onyuto wat macok kacel ki gen ma onongo en tye kwede i kom Jehovah. En olego ki cwinye ducu ni: “Konywa, ai Rwot Lubangawa, pien wageno in, wabino ka lweny i kom lwak man madwongngi pi nyingi. Ai Rwot [Jehovah], in aye Lubangawa; pe iye dano mo oloyi.” Lubanga ogamo lega pa Aca nining? ‘Jehovah omiyo Aca oloyo jo Etiopia.’ Pe tye ngati mo keken ma obwot ki i kingi!​—2 Tekwaro 14:11-13.

6. Watwero lubo lanen pa Aca nining?

⁶ Gin ango ma oweko Aca oketo genne ducu i kom gwok kacel ki tela pa Lubanga? Baibul wacci “Aca otiyo gin ma nen atir i wang Rwot [Jehovah]” ki dok “obedo ki lengic i kom Rwot [Jehovah].” (1 Luker 15:11, 14) Wan bene omyero wati pi Lubanga ma iwa leng dok ki cwinywa ducu. Man pire tek ka wamito ni wabed ki wat macok ki Lubanga i kareni ki bene i anyim. Pud dong watye ki yomcwiny madit ya, pien Jehovah okwanyo kare me nyikowa cok bote dok konyowa me bedo ki wat macok kwede! Nen kong yo aryo ma Lubanga onyikowa kwede cok bote.

7. (a) Gin ango ma Jehovah otimo me nyikowa cok bote? (b) Yo mene ma pire tek loyo ma Jehovah onyikowa kwede cok bote?

⁷ Jehovah onyuto marre pi dano i kare ma ocweyo lobo mamwonya wek obed pacogi. En tye ka medde ki nyuto marre piwa kun miniwa jami ma mitte me gwoko kwowa. (Tic 17:28; Yabo 4:11) Ma pud dong pire tek loyo aye ni  Jehovah miniwa jami ma mitte i yo me cwiny. (Luka 12:42) En kikome ocikke me winyo legawa. (1 Jon 5:14) Ento, yo ma pire tek loyo ma Lubanga nyikke kwede cok botwa ki dok wanyikke cok bote aye ni en onyuto marre piwa ki miyo ginkok. (Kwan 1 Jon 4:9, 10, 19.) Jehovah ocwalo “Wode acel keken” i lobo wek olarwa ki i bal kacel ki to.​—Jon 3:16.

8, 9. Tic ango ma Yecu tye kwede ma lubbe ki yub pa Jehovah?

⁸ Jehovah onongo oyubo ni dano ducu gunong adwogi maber ki i ginkok, kadiwa jo ma guto ma peya kiculo ginkok-ki. Nicakke ma Jehovah otito pi lalar ma bilaro dano, kitung bote onongo nen calo iwacci dong kityeko culo ginkok woko pien en ngeyo ni yubbe pe twero poto nono. (Acak. 3:15) Mwaki miya mapol anyim, lakwena Paulo onyuto pwocce bot Lubanga pi ‘kit ma Yecu Kricito okokowa kwede.’ En dok omedde ni: “Lubanga yam ojukke kene, pe otimo gin mo i kom bal ma yam dano gutimo con.” (Rom. 3:21-26) Pi meno, pe watwero nyikke cok bot Lubanga labongo Yecu!

⁹ Yecu keken aye twero weko jo mamwol gingeyo Jehovah dok gibedo ki wat macok kwede. Ginacoya konyowa me niang lok ada man nining? Paulo ocoyo ni: “Kricito yam oto piwa i kare ma pud wan lubalo; meno nyuto kit mar ma Lubanga marowa kwede.” (Rom. 5:6-8) Ginkok pa Yecu-ni pe kimiyo pienni wapore pire, ento pien kimarowa. Yecu owaco ni: ‘Dano mo pe twero bino bota, ka Wora ma yam oora pe opeye [onyikke].’ Lacen en dok owaco ni: “Pe tye ngat mo ma bino bot Won, kono ki i an keken.” (Jon 6:44; 14:6) Jehovah tiyo ki cwiny mere maleng me nyiko dano cok bote kun giwok ki bot Yecu, dok konyogi me bedo i Marre wek gunong kwo ma pe tum. (Kwan Juda 20, 21.) Nen dok yo mukene ma Jehovah nyikowa kwede cok bote.

10. Baibul konyowa nining me nyiko cok ki Lubanga?

¹⁰ Cakke ki i paragraf me acel nio wa i paragraf man, dong watyeko tic ki ginacoya ma kikwanyogi ki i bukke 14 me Baibul. Labongo Baibul, tika onongo wabingeyo ni watwero nyikke cok bot Lacwecwa? Tika onongo wabingeyo lok i kom ginkok ki dok kit ma watwero nyikke kwede bot Jehovah kun wawok ki bot Yecu? Jehovah oweko kicoyo Baibul kun tiyo ki cwiny mere maleng wek wange kite mogo mabeco kacel ki yubbe. Me labolle, i Nia 34:6, 7, Jehovah otuco bot Moses ni ebedo “Lubanga ma lakica dok maro dano, kiniga pe make oyot, marre ma pe lokke dwong, en lagen mada. En ogwoko mar ma pe lokke pi jo alip ki alip, kun weko rocgi, ki tim aranyigi ki balgi.” Anga ma dag nyikke cok bot dano ma kit man? Jehovah ngeyo ni ka wamedde ki pwonyo lok kome ki i Baibul, ci wabingeyo en macalo dano adana dok wabiwinyo ni wacok kwede.

11. Pingo omyero watute matek me pwonyo kit Lubanga mapat pat kacel ki yone? (Nen cal ma tye i pot karatac 18.)

¹¹ Ma lubbe ki gin ma myero watim wek wabed ki wat macok ki Lubanga, buk me Draw Close to Jehovah [Nyikke Cok bot Jehovah] tito i lok me cakone ni: “Wek wabed ki wat macok ki ngat moni, omyero wange en maber adada dok wanyut pwoc pi kite mabeco. Pi meno, pire tek ni omyero wakwan Baibul wek waniang kit Lubanga mapat pat kacel ki yone.” Pud dong watye ki pwoc madit ya  pien Jehovah oweko kicoyo Lokke i yo ma dano gitwero niang iye maber!

12. Pingo Jehovah otiyo ki dano me coyo Baibul?

¹² Jehovah onongo twero tic ki lumalaika me coyo Baibul. Man onongo twere pien gin giparo piwa kacel ki jami ma watimogi. (1 Pet. 1:12) Labongo akalakala, lumalaika onongo gitwero coyo lok pa Lubanga bot dano. Ento, tika onongo nenogi birwatte ki neno pa dano? Tika onongo gibiniang mitiwa, gorowa, nyo yubwa? Pe, Jehovah onongo ngeyo ni lumalaika gipat ki dano. Kit macalo otiyo ki dano me coyo Baibul-li, Jehovah oweko Lokke gudo cwinywa ka wakwano. Man weko waniang kit ma luco Baibul kacel ki jo mukene ma kiloko i komgi i Ginacoya onongo gitamo dok giwinyo kwede. Watwero niang tur cwinygi, akalakala ma gubedo kwede, lworogi kacel ki rocgi dok bene cwinywa bedo yom pi jami mabeco ma gutimo. Calo lanebi Elia, jo ducu ma gucoyo Baibul ‘kitgi cal kwedwa.’​—Yak. 5:17.

13. Lega pa Yona-ni miyo iwinyo nining?

¹³ Me labolle, tam kong ka ce lamalaika onongo romo coyo kit ma Yona owinyo kwede i kare ma lanebi-ni oringo woko ma pe mito tiyo tic ma Lubanga omiye. Pud dong obedo ber adada ni Jehovah otiyo ki Yona me coyo lok kome, medo ki legane i kare ma tye i te nam matut! Yona owaco ni: “Wiya opo i kom Jehovah i kare ma kwona onongo tye ka rweny woko.”​—Yon 1:3, 10; 2:1-9, NW.

14. Pingo itwero niang lok ma Icaya ocoyo i kome-ni?

¹⁴ Nen kong bene gin ma Jehovah oweko Icaya ocoyo i kome kekene. I kare ma oneno deyo pa Lubanga i ginanyuta, lanebi-ni ocoyo ni en dano ma tye ki roc kun waco ni: “Aneno can dong ba! Ato  woko do! Pien an dano ma lok ma a i doga pe leng, dok bene abedo i kin rok ma lok ma giloko pe leng; ento aneno kabaka ki wanga, ma en aye Rwot [Jehovah] me mony.” (Ic. 6:5) Lamalaika mene ma onongo romo waco lok ma kit magi? Icaya owaco lok meno dok watwero niang kit ma en owinyo kwede.

15, 16. (a) Pingo watwero niang kit ma jo mukene giwinyo kwede? Mi labol. (b) Gin ango ma bikonyowa me nyikke cok bot Jehovah?

¹⁵ Tika lumalaika onongo gitwero waco ni ‘pe gimyero kadi matidi mo’ calo Yakobo nyo ni gin ‘lubalo’ kit ma Petero onongo nene kwede-ni? (Acak. 32:10; Luka 5:8) Tika ‘lworo onongo twero makogi’ kit ma omako kwede lupwonnye pa Yecu, nyo tika lumalaika magi ma kitgi atir-ri onongo gibimito “tekcwiny” me tito kwena ka kitye ka unogi calo Paulo kacel ki jo mukene? (Jon 6:19; 1 Tec. 2:2) Pe, lumalaika gipe ki roc dok gitego giloyo dano woko. Ka dano ma gitye ki roc gutito kit ma giwinyo kwede, waniang maber adada pien wan weng oyo ot acel. Ka watye ka kwano Lok pa Lubanga, watwero ‘bedo ki yomcwiny kacel ki jo ma tye ki yomcwiny, wakok bene kacel ki jo ma kok.’​—Rom. 12:15.

¹⁶ Ka walwodo lok i kom gin ma Baibul waco i kom kit ma Jehovah obedo ka tero kwede luticce ma lugen i kare macon, ci wabipwonyo jami mapol madok i kome, ki kit ma odiyo cwinye dok onyikke cok bot jo magi ma onongo gitye ki roc-ci. Man biweko wangeyo Jehovah maber adada dok bene wamarre ki cwinywa ducu. Macalo adwogine wabinyikke cok bote.​—Kwan Jabuli 25:14.

17. (a) Tira ango ma Ajaria omiyo bot Aca? (b) Aca pe olubo tira pa Ajaria-ni nining, ki dok adwogine obedo ningo?

¹⁷ I kare ma Kabaka Aca oloyo lumony me Etiopia, lanebi Ajaria owaco bote kacel ki jo Juda lok mo me ryeko. Ajaria owacci: “Rwot [Jehovah] tye kwedwu, ka ce wun wutye kwede. Ka wuyenyo en, ci wubinongo en, ento ka wubwoto en, en bene bibwotowu.” (2 Tekwaro 15:1, 2) Lacen kono, Aca pe olubo tira meno maber ma kimine-ni. I kare ma ker me tung kumalo me Icrael obino ka lweny i kom Juda, Aca olokke bot jo Aciria pi kony. Ma ka lokke bot Jehovah pi kony, en oyenyo yo me note ki jo ma pe giworo Jehovah. Pi meno, kiwaco bot Aca ni: “In itimo lok me mingo mada i lok man; pienno cakke tin in ibibedo ki lweny.” Mwaki ma dong gudong me loc pa Aca opong ki lweny keken. (2 Tekwaro 16:1-9) Pwony ango ma wanongo ki iye?

18, 19. (a) Ngo ma myero watim ka ce waweko kinwa ocako doko bor ki Jehovah? (b) Watwero nyikke cok bot Jehovah nining?

¹⁸ Pe myero wanyikke cen ki bot Jehovah. Ka waweko kinwa ocako doko bor ki Jehovah, ci myero watim gin ma tye i Kocea 12:6, ma wacci: “In dong idwogi, Lubangani tye ka konyi, mok i kom mar ki ngolo kop atir, kun ikuro [igeno] Lubangani kare ducu.” Pi man dong, myero wabed ka nyikke cok bot Jehovah kun walwodo lok i kom ginkok ki bene waketo cwinywa i kwano Lokke.​—Kwan Nwoyo Cik 13:4.

¹⁹ Laco Jabuli ocoyo ni “ki tung bota, bedo cok ki Lubanga aye ber.” (Jab. 73:28) Wan ducu omyero wamedde wunu ki pwonyo jami manyen madok i kom Jehovah wek wabed ki pwoc madit pi tyen lok mapol ma watye kwede me marre. Ka wanyikke cok bot Jehovah, ci en bene bimedde ki nyikke cok botwa pi naka!