1, 2. Jehovah loko ki luticce nining?

 I KARE me Baibul, Jehovah obedo ka lok ki dano mapol kun tiyo ki yo mapat pat. Lubanga otito bot jo mogo gin ma bitimme i anyim kun tiyo ki lumalaika, ginanyuta, nyo lek. Jehovah bene ominigi tic me atiya. (Wel 7:89; Ejek. 1:1; Dan. 2:19) Jo mukene gunongo tira kun wok ki bot luwang Jehovah ma gitiyo i but dulle ma i lobo. Kadi bed ni jo pa Jehovah gunongo tirane i yo mapat pat, jo ma gulubo gunongo adwogi maber.

² I kareni, Jehovah tiro jone kun tiyo ki Baibul, cwiny mere maleng, ki dong kacokke. (Tic 9:31; 15:28; 2 Tem. 3:16, 17) Tira ma wanongo ki bote winye malongo dok bedo calo ‘wawinyo lok ma a ki yo tung ngewa, kun waco ni, “Yo ene, wulubi.”’ (Ic. 30:21) Yecu bene kubo lok pa Jehovah botwa kun tiyo ki “lagwok ot ma lagen dok maryek” me telo kacokke. (Mat. 24:45) Pe myero water tira man calo gin me tuko pien omyero wabed luwiny wek wanong kwo ma pe tum.​—Ibru 5:9.

3. Ngo ma twero gengowa ki winyo tira pa Lubanga? (Nen cal ma tye i pot karatac man.)

³ Catan Larac-ci temme me wiro tamwa wek pe wawiny tira pa Jehovah. Medo i kom meno, ‘cwinywa ma  bwolowa-ni’ twero gengowa ki jolo tira ma a ki bot Jehovah. (Jer. 17:9) Pi meno, kong dong wanenu kit ma watwero lweny ki ariya mogo ma twero gengowa ki winyo tira pa Lubanga. Wabinyamo bene kit ma lok ki Jehovah twero gwoko watwa kwede kadi bed gin mo keken otimme.

4. Catan temo doro tam pa dano nining?

⁴ Catan temme me doro tam pa dano ki miyo ngec me gobagoba kacel ki bwola ma tere pe. (Kwan 1 Jon 5:19.) Gajeti akwana, bukke, magajin, redio, telebijon, ki dong intanet kitiyo kwedgi me poko ngec mapol i twok lobo lung. Jami magi gire gitwero konyowa me ngeyo lok ma pigi tego, ento pol kare gicuko cwinywa me kwo i yo ma pe rwatte ki cik pa Jehovah. (Jer. 2:13) Me labolle, giromo waco ni nyomme i kin co ki co nyo mon ki mon obedo gin maber, dok dano mapol gitamo ni gin ma Baibul waco i kom lok man diyo dano.​—1 Kor. 6:9, 10.

5. Ngo ma twero konyowa wek pe wawiny lok goba pa Catan?

⁵ Jo ma gimaro kit ma atir pa Lubanga gitwero timo gin ango wek Catan pe obwolgi? Gin gitwero poko kin gin maber ki marac nining? Omyero ‘gugwokke kun gilubo cik pa Lubanga!’ (Jab. 119:9) Lok pa Lubanga tye ki tira ma konyowa me poko kin lok ada ki lok goba. (Car. 23:23) Yecu owaco ni ‘dano bedo kwo ki lok ducu ma a ki i dog Jehovah.’ (Mat. 4:4) Pire tek ni omyero wapwony kit me keto i tic cik ma igi lac me Baibul. Me lapore, i kare ma Yucepu pud bulu, en onongo dong oniang ni tim me abor obedo bal i wang Lubanga, ma peya Moses ocoyo cik meno piny. Tam mo keken me timo bal i kom Jehovah pe ongolle i wiye i kare ma dako pa Potipar otemo bite me timo gin marac. (Kwan Acakki 39:7-9.) Kadi bed ni dako man okete ka mucek pi kare malac, Yucepu pe owinyo lokke ento olubo tira pa Lubanga. Gin ma pire tek ma twero konyowa me poko kin gin maber ki marac aye winyo tira pa Lubanga kun wakwero winyo lok goba pa Catan.

6, 7. Ngo ma myero watim wek pe wawiny tam pa Catan?

⁶ Loboni opong ki pwony me dini mapat pat ma pe girwatte dok man omiyo dano gitamo ni konye pe me yenyo dini me ada. Ento, Jehovah omiyo tirane ka maleng pi jo ma gimito lubone. Omyero wamok tamwa i kom anga ma wabiwinyo lokke. Kit macalo pe twere me winyo dwan aryo lawang acel-li, pire tek ni ‘wange’ dwan Yecu dok wawiny lokke. En aye ngat ma Jehovah  ocimo me telo Romine.​—Kwan Jon 10:3-5.

⁷ Yecu owaco ni ‘Wuket cwinywu i kom lok ma wuwinyo.’ (Mar. 4:24) Tira pa Jehovah tye atir, ento omyero wawiny kun waketo cwinywa ducu iye. Ka pe wagwokke, ci waromo cako winyo tam pa Catan ma ka winyo tira pa Lubanga. Pe iwek wer, vidio, yub me telebijon, bukke, lurem, lupwonye, nyo luryeko me loboni gudor kwoni.​—Kol. 2:8.

8. (a) Cwinywa twero miyo wapoto i abita pa Catan nining? (b) Ngo ma twero timme i komwa ka ce pe waparo pi lanyut pi gin ma tye ka timme i cwinywa?

⁸ Catan ngeyo ni cwinywa pukke me timo bal, dok en temo bitowa me cobo mitiwa. Ka Catan temo bitowa kuman, ci bedo tek adada me gwoko gennewa. (Jon 8:44-47) Ngo ma waromo timone me lweny ki atematema man? Tam kong i kom ngati mo ma mitine obwoye ci otimo bal ma en onongo tamo ni pe eromo timone. (Rom. 7:15) En ocako timo bal man nining? Twero bedo ni ngat meno pe obedo ka keto cwinye i winyo tira pa Lubanga. Onyo en pe obedo ka lega, wot i ticwa me pwony nyo obedo ka keng cokke. Magi weng lanyut pi gin ma onongo tye ka timme i cwinye ento pe oparo wacel. En oweko mitine obwoye ci otimo gin en onongo ngeyo ni rac. Pe wabipoto i peko ka ce wabedo ma wangwa twolo me neno lanyut pi gin ma tye ka timme i cwinywa kun watimo alokaloka oyotoyot. Dok ka wawinyo tira pa Jehovah, ci pe wabiwinyo lok pa jo mungak.​—Car. 11:9.

9. Pingo pire tek me niang con kitwa mogo ma twero miyo wapoto i bal?

⁹ Kiromo laro kwo pa ngat moni ka ce kiniang twone con. I yo acel-li bene, watwero bwot ki i peko ka ce waniang con kitwa mogo ma twero miyo wadonyo i atematema. Ka waniang kit magi litap, ci obedo me ryeko me timo gin mo cutcut ma peya ‘Catan omakowa wek watim gin ma en mito.’ (2 Tem. 2:26) Ngo ma myero watim ka ce waniang ni tamwa kacel ki mitiwa ocako ngak woko motmot ki i gin ma Jehovah mito ni watim? Labongo galle, omyero wadok bote ki cwiny me mwolo, wawiny tirane ki cwinywa ducu, ki dong waket i tic. (Ic. 44:22)  Omyero wange ni moko tam marac twero keliwa arem cwiny malit ma warego kwede ingewa kadi bed wadwogo bot Jehovah. Bedo ber ka warune oyotoyot me cobo peko mo keken ma twero miyo wapokke woko ki bot Jehovah!

10, 11. (a) Cwiny me awaka romo nyutte nining? (b) Pwony ango ma wanongo ki i labol marac pa Kora, Datan, ki dong Abiram?

¹⁰ Omyero wange ni cwinywa twero terowa i yo marac. Miti maraco ma i cwinywa twero bwoyowa woko! Me lapore, tam kong i kom cwiny me awaka kacel ki woro. Nen kong kit ma jami magi gitwero gengowa kwede ki winyo tira pa Lubanga dok gimiyo wapoto i peko. Ngat ma lawaka kette malo. En twero tamone ni etye ki twero me timo gin mo keken ma emito dok ngati mo pe twero wacce gin me atima. En romo tamone ni Lukricitayo luwote, luelda, nyo dul pa Jehovah pe gupore me mine tira. Dano ma kit man bitero tira pa Lubanga calo gin ma pire pe tek.

¹¹ I kare ma jo Icrael gitye i dye tim, Kora, Datan ki dong Abiram gujemo i kom twero pa Moses gin ki Aron. Pi cwiny me awaka, lujemo magi guketo yubgi mapat me woro Jehovah. Jehovah odok iye nining? En onekogi ducu. (Wel 26:8-10) Man pud dong pwonyowa gin ma pire tek ya! Jemo i kom Jehovah miyo wapoto i peko madit. Wiwa bene myero opo ni “wakke tero dano i can.”​—Car. 16:18; Ic. 13:11.

12, 13. (a) Mi labol ma nyuto kit ma cwiny me woro twero kelo kwede can. (b) Tit kong kit ma woro twero dongo kwede i cwinywa ka pe wagwokke.

¹² Nen kong bene cwiny me woro. Ngat ma laworo kwanyo gin mo keken kadi bed ni pe mege. I kare ma kicango two dobo ki i kom Naaman ladit wi mony me Ciria, en omiyo mot bot lanebi Elica ento en okwero woko. Kadi bed ni Elica okwero, laticce Gikaji ocako wanyo mot magi. Gikaji oloko kekene ni: “Macalo Rwot [Jehovah] tye makwo-ni, abiringo i kore, wek anong gin mo ki bote.” En olwi labongo ngec pa Elia ka oringo i kor Naaman ci ocako wacce lok goba wek omiye “talanta me ryal ki bongo aryo me nino madito.” Ngo mutimme pien Gikaji otimo gin man dok bene obwolo lanebi pa Jehovah? Dobo pa Naaman-ni okobo i kom Gikaji ma laworo-ni!​—2 Luker 5:20-27.

¹³ Cwiny me woro romo dongo motmot, ento ka pe kilwenyo kwede ci romo bwoyo ngat moni woko. Gin ma Baibul waco i kom Akan nyuto teko pa cwiny me woro. Nen kong kit ma woro pa Akan odongo kwede oyotoyot. En owaco ni: ‘Ka aneno bongo maber mua ki i Cinar ki i kin jami ma giyako-ni, ki cekel me ryal miya aryo, ki dul jabu ma pekke romo cekel pyerabic, pigi obedo mitta, ci akwanyogi.’ Ma ka kwero miti meno ma marac-ci, Akan okwalo jami magi ci okanogi i kemane. I kare ma kiyaro bal pa Akan ka maleng, Yocwa owacce ni Jehovah bikelo can i kome. Kicelo Akan kacel ki jo me ode ki gweng ci guto woko i nino meno. (Yoc. 7:11, 21, 24, 25) Ngat mo keken twero dongo cwiny me woro ci bwoye woko. Pi meno, ‘wagwokke wunu ki woro me lim.’ (Luka 12:15) Kadi bed ni i cawa mukene tam macilo ngole i wiwa, pire tek ni omyero wador tamwa kun pe waweko miti maraco dongo i cwinywa ma twero miyo watimo bal.​—Kwan Yakobo 1:14, 15.

14. Gin ango ma myero watim ka ce waniang ni watye ki cwiny me awaka ki me woro?

 ¹⁴ Awaka kacel ki woro me jami gibolo dano i peko. Ka walwodo lok i kom adwogi maraco ma bino pi timo gin marac, man bikonyowa pe me cayo tira pa Jehovah. (Nwo. 32:29) I Baibul, Lubanga me ada tittiwa adwogi maber ma bino pi timo gin matir ki peko ma bino pi timo gin marac. Ka awaka nyo cwiny me woro tye ka terowa me timo gin moni, ci bedo me ryeko ka watamo i kom adwogi ma bibino! Omyero watam i kom kit ma timo bal twero gudowa kwede, lupacowa, ki dong tutwalle watwa ki Jehovah.

15. Pwony ango ma wanongo ki i lanen pa Yecu?

¹⁵ Jehovah mito gin maber loyo piwa. (Jab. 1:1-3) En miniwa tira i kare ma nongo wamito kikome. (Kwan Jo Ibru 4:16.) Kadi bed ni Yecu onongo pe ki roc, en ojenge i kom Jehovah kun lego bote kare ki kare. Jehovah okonyo dok otiro Yecu i yo me aura. En ooro lumalaika me konye, omiye cwiny maleng, ki dok otire i kare ma tye ka yero lukwenane 12. Dwan Jehovah owinye ki i polo, kun nyuto Cwakke i kom Yecu. (Mat. 3:17; 17:5; Mar. 1:12, 13; Luka 6:12, 13; Jon 12:28) Calo Yecu, wan bene omyero wayab cwinywa i lega bot Lubanga. (Jab. 62:7, 8; Ibru 5:7) Lega konyowa me bedo cok ki Jehovah dok weko wakwo i yo matir ma kelo deyo bote.

16. Jehovah twero konyowa nining me winyo tirane?

¹⁶ Kadi bed ni Jehovah miyo tirane me nono bot dano ducu, en pe diyo dano adiya me lubone. Omyero wapeny pi cwiny mere maleng ci en biminiwa mabup. (Kwan Luka 11:10-13.) Ento, pire tek ni ‘waket cwinywa i kom lok ma wawinyo.’ (Luka 8:18) Me lapore, wabwolle kekenwa ka walego Jehovah ni okonywa me jwayo miti maraco me buto ki i cwinywa kun nongo watye ka medde ki neno filim nyo jami mukene ma tugo miti me buto. Omyero wabed ka ma cwiny pa Jehovah tye iye. Wangeyo ni cwiny mere maleng tye i cokkewa. Lutic pa Jehovah mapol guweyo peko pien guwinyo tira pa Jehovah i cokkewa. Macalo adwogine, gin guniang miti maraco ma tye ka dongo i cwinygi ci guloko yogi.​—Jab. 73:12-17; 143:10.

17. Pingo rac me jenge i komwa kekenwa?

¹⁷ Tam kong i kom Kabaka Daudi me Icrael. I kare ma en pud tye bulu, en oloyo lweny i kom twon oluma mo ma nyinge Goliac, ma obedo Lapiliciti. Daudi odoko lamony, kabaka, lagwok, ki dong lamok tam pi Icrael. Ento, i kare ma Daudi ojenge i kome kekene, cwinye obwole ci otimo abor ki Batceba, ki bene oneko cware Uria. I kare ma kimiye tira, Daudi oye balle ki cwiny me mwolo ci oyubo watte ki Jehovah.​—Jab. 51:4, 6, 10, 11.

18. Ngo ma twero konyowa me medde ki winyo tira pa Jehovah?

¹⁸ Walubu wunu tira ma nonge i 1 Jo Korint 10:12 wek pe waket gen mukato kare i komwa. Kit macalo pe watwero ‘loyo kwowa-ni,’ ci wang ma dong wawinyo tira pa Jehovah nyo pa Catan. (Jer. 10:23) Walegu labongo keng, walubu tela pa cwiny maleng, ki dong wawinyu tira pa Jehovah.