GIN MUMIYO JO MOGO GITYE KI AKALAKALA: Dano mapol gitamo ni Lubanga pe keto cwinye i komgi pien nenogi ni gubedo lubalo keken ma pe gileng. Kendra, dako mo ma cwinye otur adada onongo tamo ni pe etwero kwo i yo ma rwatte ki cik pa Lubanga, man omiyo cwinye obedo ka pide. Macalo adwogine, en owaco ni, “Agiko lega woko.”

GIN MA LOK PA LUBANGA PWONYO: Jehovah pe keto cwinye i kom roc-ci keken ento en niang nga ma ibedo. Baibul waco ni, “En ngeyo kit gin ma ecweyowa kwede; en po ni wan apwa mamwa.” Medo i kom meno, en pe terowa ma lubbe ki “roc ducu ma watimo,” ento en timiwa kica ka wangut.​—Jabuli 103:10, 14.

Nen kong labol pa Daudi, kabaka me Icrael ma kiloko i kome i pwony mukwongo. Daudi olego bot Lubanga ni: “Ineno koma kede wangi kun mom ru ocweo otum, dul koma acel acel tye ocoo oko i bukki . . . Ngi kwona i diro, Ama Obanga, me inge gin ame tye i cunya.” (Jabuli 139:16, 23, Baibul me leb Lango.) Ada, Daudi onongo pe ki akalakala ni Jehovah onongo pud twero niang ni engut ki cwinye ducu kadi bed ni i kine mukene en otimo bal madongo.

Jehovah niang in makato ngat mo keken. Baibul waco ni, “Dano neno kome ki woko, ento Rwot [Jehovah] neno cwinye.” (1 Camuel 16:7) Lubanga ngeyo kit ma remoni tye kwede, kit ma idongo kwede, ki dong ka ma idongo iye. Pi meno en ngeyo pingo kiti tye lakite moni. En neni dok tye ki pwoc madit atika pi tuteni me bedo ngat maber kadi bed ni i kine mukene itimo bal.

Ento, Lubanga tiyo ki ngecce madok i ‘komi’ me kweyo cwinyi nining?