Lapeny man pire tek tutwalle pi jo ma gurwenyo mongi nyo coggi i to. Jo magi gitye ki miti madit me ribbe doki i nyom i nge cer i lobo manyen. Laco mo acel ma dakone oto owaco ni: “An kacel ki dakona pe wayero me giko nyomwa. Obedo mitiwa me medde ki woro Jehovah kacel macalo laco ki dako pi naka. Kit ma awinyo kwede peya olokke.” Tika tye tyen lok mo mucwiny ma miyo wabedo ki gen ni jo ma kibicerogi gibinyomme? Ket mere macek ni pe waromo waco gin mo iye.

Pi mwaki mapol, wabedo ka wacone i bukkewa ni lok ma Yecu owaco madok i kom nicer ki nyomme-ni onongo kwako jo ma kibicerogi me kwo i lobo mayen ki dok ni jo magi pe gibinyomme i nge cerogi. * (Mat. 22:29, 30; Mar. 12:24, 25; Luka 20:34-36) Kadi bed ni pe wamito bedo lugingi tutwal, tika twero bedo ni Yecu onongo tye ka lok i kom cer me polo? Kong dong wanenu gin ma Yecu owaco.

Nen kong lok ma onongo kitye ka nyamone. (Kwan Luka 20:27-33.) Lucadukayo, ma onongo pe giye i kom nicer-ni, gutemo mako Yecu ki lapeny madok i kom nicer ki lako dako pa omeru. * Yecu owaco botgi ni, ‘Jo me kare man ginyomme; ento jo ma gikwanogi ni myero guo i kwo me kare me anyim, ki i cer ki i kin jo muto, pe ginyomo, pe gibigero co, pien pe dok gitwero to, dong girom ki lumalaika; gin litino pa Lubanga, ma gin litino me cer.’​—Luka 20:34-36.

Pingo kicoyo i bukkewa ni Yecu nen calo onongo tye ka lok i kom cer pa jo ma gibikwo i lobo? Kicoyo man pi tyen lok aryo. Mukwongo, Lucadukayo nen calo onongo gitye ka tamo pi cer pa jo ma gibikwo i lobo dok twero bedo ni Yecu ogamo lapenygi ma lubbe ki tamgi. Me aryo, Yecu ogiko lokke kun loko i kom Abraim, Icaka, ki dong Yakobo​—co ma lugen ma kibicerogi me kwo i lobo.​—Luka 20:37, 38.

Ento, twero bedo ni Yecu onongo tye ka lok i kom jo ma kibicerogi me kwo i polo. Pingo waromo mokone kumeno? Kong wanenu lok aryo ma pigi tego.

‘Jo ma gikwanogi ni gimyero me cer ki i kin jo muto.’ Lukricitayo ma kiwirogi ma gin lugen ‘gikwanogi ni gin jo ma myero i ker pa Lubanga.’ (2 Tec. 1:5, 11) Gin dong kikwanogi ni kitgi atir me nongo kwo pi ginkok-ki, pi meno gin pe gito macalo lubalo ma kingolo kop i wigi. (Rom. 5:1, 18; 8:1) Jo ma kikwanogi ni gin myero me cer i polo-ni kiwaco ni ‘gitye ki yomcwiny dok gileng.’ (Yabo 20:5, 6) Kitungcel, i kin jo ma kibicerogi me kwo i loboni tye iye “jo ma kitgi pe atir.”  (Tic 24:15) Tika kiromo wacone ni gin “jo ma myero” me cer?

“Pe dok gitwero to.” Yecu pe owaco ni ‘pe dok gibito.’ Ma ka meno, en owaco ni: ‘Pe dok gitwero to.’ Baibul mukene gonyo lok meno ni “gin pe gitye i te loc pa to” ki dong “to pe tye ki twero mo i komgi.” Lukricitayo ma kiwirogi ma gubedo lugen nio wa i to kicerogi me kwo i polo pi naka ma pe gitwero to. (1 Kor. 15:53, 54) To pe dong tye ki twero mo i kom jo ma kicerogi me kwo i polo. *

Ngo ma waromo mokone ma lubbe ki gin ma dong waneno-ni? Twero bedo ni lok ma Yecu owaco i kom nyom ki cer-ni tye pi jo ma gibibedo i polo. Ka tye kumeno, ci lokke konyowa me niang jami mogo madok i kom jo ma kicerogi me kwo i polo: Gin pe ginyomme, pe gitwero to, ki dong gitye calo lumalaika. Ento, tam man kelo lapeny mogo.

Mukwongo, pingo Yecu oloko i kom cer me polo i kare ma tye ka miyo lagam bot Lucadukayo, ma onongo gitamo pi cer me kwo i lobo-ni? Yecu onongo kare ducu pe gamo lapeny pa lumonene i yo ma rwatte ki gin ma gitye ka tamone. Me labolle, en owaco bot Lujudaya ma gupenyo pi lanyut ki bote ni: “Wuket ot pa Lubanga man woko, an abigerone pi nino adek.” Yecu nen calo onongo ngeyo ni gitye ka tam i kom ot pa Lubanga, ‘ento en onongo oloko pi kome ma ot pa Lubanga-ni.’ (Jon 2:18-21) Oromo bedo ni Yecu onongo ni konye pe me gamo lapeny pa Lucadukayo, ma onongo pe giye i kom nicer nyo lumalaika. (Car. 23:9; Mat. 7:6; Tic 23:8) Ma ka meno, en nen calo onongo mito tuco lok ada i kom cer me kwo i polo wek lupwonnyene ma gibicito kunnu gunong adwogi maber.

Me aryo, pingo Yecu ogiko lokke kun loko i kom Abraim, Icaka ki dong Yakobo ma kibicerogi me kwo i lobo? (Kwan Matayo 22:31, 32.) Nge ni ma peya Yecu oloko i kom co magi ma lugen-ni, en kong oloko “i kom lok man me cer ki i kin jo muto-ni.” En owaco lok man me loko tamgi i kom gin mapat. I ngeye, Yecu okwanyo lokke ki i buk ma Moses ocoyo, ma Lucadukayo onongo bene giwaco ni giye, me mokone ni obedo yub pa Lubanga me cero dano bene i lobo kany.​—Nia 3:1-6.

Me adek, ka lok ma Yecu owaco i kom nicer kacel ki nyom-mi tye pi cer me cito i polo, man mono te lokke ni jo ma kibicerogi me kwo i lobo-ni gibinyomme? Lok pa Lubanga pe gamo lapeny meno atir atir. Ka Yecu onongo tye ka lok i kom cer me kwo i polo, ci lokke pe tittiwa ka ce jo ma kicerogi me kwo i lobo manyen-ni gibinyomme.

Kadi bed kumeno, wangeyo ni Lok pa Lubanga waco ka maleng ni to giko nyom. Pi meno, ngat ma orwenyo luotte i to pe myero owek cwinye opide ka ce mito nyomme. Man gin ma ngat acel acel omyero omok tamme iye pire kene, dok pe myero kilok marac i kome pi nyomme.​—Rom. 7:2, 3; 1 Kor. 7:39.

Watye ki lapeny mapol i kom kit ma kwo bibedo kwede i lobo manyen. Ma ka bedo ka byeko lagam pi lapeny magi, omyero wabed wakur wek wanen gin ma bitimme. Ento watwero bedo labongo akalakala ni dano ma luwiny gibibedo ki yomcwiny pien Jehovah bicobo mitigi ducu i yo maber loyo.​—Jab. 145:16.