1. Paulo opo i kom jo ma gutute matek me tito kwena maber-ri nining?

 LAKWENA Paulo wiye opo i kom jo ma onongo gitute matek me tito kwena maber-ri. Paulo ocoyo ni: “Wapo i nyim Lubanga Wonwa i kit ma wuketo kwede niyewu i tic, ki kit ma wucanne kwede pi mar, dok ki kit ma wudiyo kwede cwinywu pi gen ma wutye kwede i Rwotwa Yecu Kricito.” (1 Tec. 1:3) Ada, Jehovah bene wiye po i kom jo ma gitute me tic pire ki cwinygi ducu, kadi bed kit me kwogi weko gitiyo pire pi cawa malac nyo manok.​—Ibru 6:10.

2. Gin ango ma wabinyamo i pwony man?

² Lutic luwotwa mapol​—i kare macon ki bene i kareni​—gujalo jami mapol wek gibed ki kare me tic pi Jehovah pi kare malac. Kong dong wanenu kit ma jo mogo gutiyo kwede pi Jehovah i cencwari me acel. Wabinyamo bene yo mapat pat me tic pi kare malac i kareni ki dong kit ma wiwa romo po kwede i kom jo ma gujalle me tic i yo magi.

3, 4. (a) Jo mogo gutiyo pi Jehovah nining i cencwari me acel? (b) Gin gunongo jami me kom nining?

³ I nge kare manok keken ma onongo batija, Yecu ocako  tic ma onongo bio i twok lobo lung. (Luka 3:21-23; 4:14, 15, 43) I nge to pa Yecu, lukwenane gutelo yo i tito kwena wek oket i kin piny ducu. (Tic 5:42; 6:7) Lukricitayo mukene calo Pilipo, guweko pacogi wek giti macalo lumiconari i lobo Palestina. (Tic 8:5, 40; 21:8) Paulo kacel ki jo mukene guwoto i lobbe mapat pat kun gitito kwena maber-ri. (Tic 13:2-4; 14:26; 2 Kor. 1:19) Me labolle, i kingi tye iye Silvano (Cira), Marako, ki dong Luka​—ma gin ducu gutiyo macalo lukaran. (1 Pet. 5:12) Lumege bene gutiyo kacel ki omege magi ma lugen-ni. (Tic 18:26; Rom. 16:1, 2) Jami mutimme i kom jo magi weko kwano Ginacoya ma Kicoyo i Leb Grik bedo mit adada, dok nyuto ni Jehovah wiye po i kom luticce ma gitye ki cwakke.

⁴ Jo ma yam con gitye i tic pi kare malac gunongo jami me kom nining? I kine mogo, Lukricitayo luwotgi gujologi i pacogi dok gumiyo kony mapat pat, ento gin onongo pe gipenyo pi kony magi tektek. (1 Kor. 9:11-15) Jo mukene kacel ki kacokke mapat pat gumiyo kony labongo dic. (Kwan Tic pa Lukwena 16:14, 15; Jo Pilipi 4:15-18.) Paulo ki luwote ma onongo giwoto kwede gubedo ka tiyo tic mogo matino tino wek ginong cente.

5. Gin ango ma jo mo ma gunyomme guwaco ma lubbe ki tic pi kare malac?

⁵ I kareni bene, dano mapol gitye ka tute matek i tic pi kare malac. (Nen bok  ma wi lokke tye ni “Yo Mapat pat me Tic pi Kare Malac.”) Gin giwinyo nining ma lubbe ki tam ma gumoko me tic pi kare malac? Meno aye lapeny ma iromo penyogi kwede dok ibinongo lagam ma cuko cwinyi. Nen kong labol acel: Omego mo ma otiyo macalo painia marii, painia keken, lamiconari, ki dong otiyo i Betel i lobo mukene owaco ni: “Awinyo ni donyo i tic pi kare malac obedo tam ma pud dong ber loyo ma amoko. I kare ma atye mwaka 18, anongo moko tam obedo tek adada ka ce omyero acit i univaciti, anong dog tic, nyo abed painia. Jami mutimme i kwona nyuto ni Jehovah wiye pe wil i kom jalleni me tic pi kare malac. Atiyo ki ngec nyo diro ma Jehovah omiya i yo ma onongo pe aromo tic kwede ka ce ayero tic me lobo-ni.” Dakone owaco ni: “Tic mo keken ma Jehovah omiya oweko adongo i yo me cwiny. Waneno kit ma Jehovah ogwokowa ki bene otirowa kwede teretere dok man onongo pe obitimme ka wabedo abeda mot ma pe wayelle. Apwoyo Jehovah nino ducu pien watye ka tic ki kwowa i tic pi kare malac.” In bene imito ni inen kwoni kumeno?

6. Jehovah winyo nining ma lubbe ki tic ma watiyo pire?

⁶ Tye kono ni, jo mukene kwogi pe ye ni gudony i tic pi kare malac. Wangeyo ni Jehovah tero tutegi me tic pire ki cwinygi ducu-ni calo gin ma pire tek. Tam kong i kom jo ma Paulo oloko i komgi i Pilemon 1-3, medo ki jo ma onongo gitye i kacokke me Kolocai. (Kwan.) Paulo opwoyogi kadi wa Jehovah bene. I yo acel-li, Wonwa me polo pwoyo tic ma itiyo pire. Ento, i yo ma nining ma itwero konyo kwede jo ma gitye i tic pi kare malac?

7, 8. Tic macalo painia kwako gin ango, dok jo me kacokke gitwero konyogi nining?

⁷ Calo lutit kwena me cencwari me acel, painia i kareni gicuko cwiny jo  me kacokke. Polgi giyelle me dyero cawa 70 dwe ki dwe i ticwa me pwony. In itwero konyogi nining?

⁸ Laminwa mo ma nyinge Shari ma tye painia owaco ni: “Painia ginen tek pien gibedo i ticwa me pwony nino ducu. Kadi bed kit meno, gin bene gimito cuko cwiny.” (Rom. 1:11, 12) Laminwa mukene ma kong otiyo macalo painia owaco ni painia ma i kacokkene gitiyo matek adada labongo yweyo. Dok bene owaco ni cwiny painia bedo yom ka jo mukene gilwongogi ka cam, giminigi cente mo manok me giwot nyo wilo jami mogo, pien man nyuto ni nongo kiparo pigi.

9, 10. Ngo ma jo mogo gutimo wek gikony painia ma i kacokkegi?

⁹ In tika imito konyo painia i ticwa me pwonyo? Painia mo ma nyinge Bobbi owaco ni: “Wamito ni omege ki lumege guten korwa i dye cabit.” Lawote mo ma bene tye painia i kacokke acel-li owaco ni: “Nongo ngat ma myero iti kwede i otyeno tek adada.” Laminwa mo ma kombeddi tye ka tic i Betel ma tye i Brooklyn wiye po maber adada i kom kony ma kimiye i kare ma en onongo pud tye painia, en owaco ni: “Laminwa acel ma onongo tye ki mutoka owacca ni, ‘Ka ngat ma myero iti kwede pe, gona cim, ci abicito i ticwa me pwony kwedi.’ En okonya me medde ki tic macalo painia.” Ki bene, laminwa acel ma nyinge Shari owaco ni: “I nge ticwa me pwony, painia ma wigi nono nongo gitye kengi. Iromo lwongo omege nyo lumege ma wigi nono me bedo tye i worowu pi jo me ot kare ki kare. Ka wutimo jami kacel, man weko gibedo matek i yo me cwiny.”

¹⁰ Laminwa mo ma obedo i tic pi kare malac pi mwaki ma romo 50 kulu oloko i kom kony ma en kacel ki lumege mukene ma wigi nono gunongo kun waco ni: “Luelda ma i kacokkewa onongo gilimo painia i nge dwe mogo. Gin onongo gipenyo yotkomwa, dog ticwa ki dong ka watye ki lok mo keken. Onongo giketo cwinygi i komwa adada. Gin gubedo ka bino wa paco wek ginge ka wamito kony  mo keken.” Man poyo wi i kom pwoc ma Paulo onyuto i kom laco mo ma omiye kony i Epeco.​—2 Tem. 1:18.

11. Tic macalo painia keken kwako timo gin ango?

¹¹ Kacokke mogo gitye ki omege ki lumege ma kilwongogi ni painia keken. Pol pa jo magi gitute me tic pi cawa 130 kulu dwe ki dwe i ticwa me pwony. Kit macalo gitero cawa malac i ticwa me pwony kun bene gimiyo kony i yo mukene-ni, man weko gibedo ki cawa manok me tiyo cente. Jang gang kal minigi cente mo manok dwe ducu wek guket cwinygi i ticwa me pwony.

12. Luelda ki jo mukene giromo konyo painia keken nining?

¹² Wan watwero konyo painia keken nining? Laelda mo ma tiyo i jang gang kal dok kubbe ki painia mapol owaco ni: “Luelda myero gulok kwedgi, guniang pekogi dok guyeny yo me konyogi. Lucaden mukene gitamo ni painia keken kiminigi jami ducu pien ginongo cente mo manok, ento omege ki lumege ma i kacokke giromo konyogi i yo mapat pat.” Calo painia marii, painia keken cwinygi bedo yom ka ngat mo tiyo kwedgi i ticwa me pwony. Tika iromo tic kwedgi?

13, 14. (a) Ngo ma myero wiwa pe owil me timone pi luneno me adwol? (b) Gin ango ma itamo ni iromo timone me konyo luneno ma giwoto awota?

¹³ Pol kare kineno luneno me adwol ki mongi calo jo ma niyegi tek. Meno tye lok ada, ento gin bene gimito ni kicuk cwinygi, kiti kwedgi i ticwa me pwony, ki dong gibed tye i mato yamo i yo mupore. Ento ka komgi lit ci kigengogi i ot yat ma gwok nyo gimito ayango kono? Gin gibedo ki pwoc madit ka omege ki lumege giminigi jami ma mitte dok ginyuto ni giparo pigi. Luka, ma obedo ‘daktar ma kimaro-ni,’ omiyo jami ma mitte bot Paulo kacel ki luwote ma onongo giwoto kwede.​—Kol. 4:14; Tic 20:5–21:18.

¹⁴ Luneno ma giwoto awota kacel ki mongi gimito mar ki cuko cwiny ma a ki bot lurem macok. Laneno mo me adwol ocoyo ni: “Lurema nen calo gingeyo awene ma amito ni kicuk cwinya. Gitiyo ki lapeny ma golo lok ki i cwinya, dok man konya me tito ka ma pekona tye iye. Gukonya adada pien gitero itgi ka winyo lokka.” Luneno me adwol ki mongi gibedo ki pwoc madit ka omege ki lumege giparo pigi.

15, 16. Tic ango ma jo ma gitiyo i Betel gitimo, dok waromo konyogi nining?

¹⁵ I twok lobo lung, jo ma gitiyo i Betel ticgi pire tek adada i teno kor tic me tito kwena me Ker-ri. Ka jo ma gitiyo i Betel gitye i kacokkewu nyo adwolwu, in itwero nyutone nining ni wi po i komgi?

¹⁶ Ka pud gudonyo adonya i Betel, gin giparo gang pien nongo guweko lupacogi kacel ki luremgi. Pud dong gibedo ki pwoc madit adada ka jo mukene ma gitiyo i Betel ki dong jo me kacokke gimako lirem kwedgi! (Mar. 10:29, 30) Tic ma gitiyo minigi kare me bedo tye i cokke ki dok me nywako i ticwa me pwony cabit ducu. Ento, i kine mukene tic diyo jo ma gitiyo Betel. Wek dano ducu gunong adwogi maber, jo me kacokke myero gunyut niango dok gubed ki pwoc pi tic ma jo me Betel gitimo.​—Kwan 1 Jo Tecalonika 2:9.

17, 18. Tic ango ma jo ma gitye i tic pi kare malac i lobbe mukene gitimo?

¹⁷ Jo ma giye me cito ka tic i lobo mukene ginongo ni cam, leb, tekwaro, ki dong kit me kwo pa dano pat adada ki megi. Pingo gin giye kwo matek ma alokaloka man kelo botgi?

¹⁸ Mogo gitiyo macalo lumiconari, dok gicwalo cawa malac i ticwa me pwony wek dano mapol gunong adwogi maber ki i pwonye ma gunongo. Jang gang kal pango ot ma wele yot pi lumiconari dok minigi cente manok wek okonygi nongo jami ma mitte. Jo mogo ma gitiyo i lobbe mukene gitiyo i jang gang kal nyo gikonyo gedo odi me jang gang kal, opic me gonyo leb, Odi me Gure, nyo Odi me Ker. Gin bene kiminigi cam, kabuto mupore, ki dong jami mukene. Calo jo ma gitiyo i Betel, gin gibedo tye i cokke dok ginywako i ticwa me pwony. Pi ngec ma gitye kwede, jo me kacokke ginongo adwogi maber ki bot omege ki lumege magi.

19. Kony ango ma itwero miyone bot jo ma gitye i tic pi kare malac ma gua ki i lobbe mukene?

¹⁹ Wi twero po i kom jo magi ma gitye i tic pi kare malac-ci nining? Wi myero opo ni ka pud gubino abina, gin nongo pe gungiyo ki cam me kabedo moni. Ma peya ilwongogi ka cam, omyero kong ipenygi gin ma gicamo nyo gimito bilone. Di cwinyi ka gitye ka pwonyo leb ki tekwaro. Kare mo twero kato wek guniang jami ducu ma iwaco botgi, ento itwero konyogi wek gulok maber. Gin gimito pwonyo jami mapol!

20. Wan waromo konyo jo ma gitye i tic pi kare malac kacel ki lunyodogi nining?

²⁰ Jo ma gitye i tic pi kare malac giwoto ki tii kadi wa lunyodogi bene. Pi lunywal ma gin Lucaden, mitigi madit tye ni lutinogi gumedde ki tic i lobo mukene. (3 Jon 4) Ki lok ada, jo ma gitye i tic pi kare malac gitute me miyo jami ma mitte cutcut bot lunyodogi ka gimito kony. Kadi bed kumeno, jo ma gudong paco giromo konyo kor jo ma gitye i tic pi kare malac kun gimiyo kony bot lunyodogi ma dong guteggi. Omyero inge ni jo ma gitye i tic pi kare malac gulungo wigi i tic ma pud dong pire tek loyo ma kitye ka timone i twok lobo lung. (Mat. 28:19, 20) Tika in nyo kacokkewu romo miyo kony ka lanyodo pa ngat mo ma tye i tic pi kare malac mito kony?

21. Jo ma gitye i tic pi kare malac gitero kony kacel ki cuko cwiny ma jo mukene gimiyo nining?

²¹ Jo ma gidonyo i tic pi kare malac mitigi pe tye me tiyo cente ento me miyo gin maber loyo bot Jehovah kacel ki jo mukene. Gin gibedo ki pwoc madit pi kony mo keken ma itwero miyone. Laminwa acel ma tye ka tic i lobo mukene owaco ni: “Ka kicoyo waraga boti me nyuto pwoc, man konyi me niang ni jo mukene gitamo piri dok nyuto ni cwinygi yom pi tic ma itye ka timone.”

22. In itamo ningo ma lubbe ki tic pi kare malac?

²² Tic pi kare malac pud dong obedo yo maber loyo me tic ki kwowa. Tic pi kare malac pe yot, weko ipwonyo jami mapol dok keli adwogi maber. Dok bene weko iyubbe pi tic ma kelo yomcwiny marii ma jo ducu ma lugen gibitimone i te Ker pa Lubanga. Pi meno, wan ducu ‘wiwa myero opo i kom tic me niye ki me mar’ ma jo ma gitye i tic pi kare malac gitimo.​—1 Tec. 1:3.