Lapeny ma Kigamo me Baibul
Ker pa Lubanga obedo gin ango dok pingo omyero waleg ni obin?
Tika imito ngeyo jami mapol i kom Ker pa Lubanga ki gin ma Ker-ri bitimone?
Ker pa Lubanga obedo gamente me polo. Yecu owaco bot lulub kore ni myero guleg pi Ker-ri wek okel kit ma atir kacel ki kuc i lobo. Pe tye gamente mo keken ma dano aye loyo ma romo jwayo tim gero, ngolo kop alenga, nyo two ento Ker pa Lubanga keken aye bitimone. Lubanga oyero Wode Yecu me bedo Kabaka me Ker-ri. Jehovah bene oyero jo mogo manok ki i kin lulub kor Yecu me loc kacel kwede i Ker man.—Kwan Luka 11:2; 22:28-30.
Cokcok-ki, Ker pa Lubanga bijwero jo ducu ma gikwero loc pa Lubanga. Pi meno, ka walego ni Ker pa Lubanga obin, man te lokke ni watye ka lega ni gamente pa Lubanga ole ka wang gamente pa dano.—Kwan Daniel 7:13, 14; Niyabo 11:15, 18.
Pingo Ker pa Lubanga bikelo adwogi maber bot dano?
Yecu keken aye opore me bedo Kabaka pien en lakica. Macalo Wod pa Lubanga, en tye ki teko me konyo jo ma gilego pi kony pa Lubanga.—Kwan Jabuli 72:8, 12-14.
Ker pa Lubanga bikelo adwogi maber bot jo ma gilego ki cwinygi ducu ni myero obin kun bene nongo gikwo ma lubbe ki miti pa Lubanga. Pe ibikoko ange pi pwonyo gin ma Baibul tito i kom Ker pa Lubanga.—Kwan Luka 18:16, 17; Jon 4:23.
