Yot tutwal me wacone ni Catan ma wakwano pire i Baibul-li cung mere pi jami ducu maraco ma dano gitimo. Ento meno tika ada gin ma Baibul pwonyo? Ka ce tye kumeno, ci pingo Baibul waco ni Catan oloko ki Yecu Kricito kacel ki Lubanga Won Twer Ducu? Nen kong tyen aryo ma Catan oloko kwede kwedgi.

I kare ma Yecu ocako ticce me pwony, Larac-ci otemo bite tyen adek kulu. Mukwongo, Catan otute me diyo Yecu wek oti ki teko ma Lubanga omiye-ni me cobo mitine kene pi kec ma onongo tye ka neke. I ngeye, Larac-ci owacci Yecu opot piny ki i wi ot pa Lubanga wek dano ducu gunene. Me agikkine, Catan owaco ni ebimiyo bot Yecu ker me lobo-ni ducu ka ce owore kicel keken. Yecu okwero bwola magi ducu kun tiyo ki Ginacoya.​—Matayo 4:1-11; Luka 4:1-13.

Yecu mono onongo tye ka lok ki anga? Tika en onongo tye ka lok ki kit mo marac ma tye i  cwinye? Ma lubbe ki Ginacoya, “Catan yam obite [Yecu] i yo ducu calo wan, ento en pe omedo ki timo bal mo.” (Jo Ibru 4:15) Baibul bene waco ni: “Bal mo pe ma en otimo, doge bene pe oloko lok goba.” (1 Petero 2:22) Yecu pe otimo bal mo keken dok bene ogwoko gennene. Yecu pe oye ni kit mo marac odongo i cwinye. Ada, Yecu onongo pe tye ka lok ki kit mo marac ma tye i cwinye; en onongo tye ka lok ki dano adana.

Lok i kin Yecu ki Catan-ni bene miyo wamoko atir ni Catan obedo dano adana.

• Wi myero opo ni Larac-ci owaco ni ebimiyo ker me lobo-ni ducu bot Yecu ka ce owore kicel keken. (Matayo 4:8, 9) Konye onongo pe me miyo ker magi ducu ka Catan pe obedo dano adana. Medo i kom meno, Yecu pe openyo ka ma Catan onongo iye twero madit kit meno.

• I nge kwero bita magi ducu, Larac-ci “oweke kun kuro kare maber.” (Luka 4:13) Tika ginacoya man nyuto ni Catan obedo kit mo marac ma tye i cwinywa nyo lamone marac ma dong omoko tamme me medde ameda?

•   Lumalaika magi tika onongo gitye cwec me cwiny ma gitye ka cuko cwiny Yecu kun gimiye kony? Meno lok ada. Ci dong, pingo dano gibyeko abyeka ni Catan obedo gin mo ata ento pe cwec me cwiny?

Gin mukene ma wabineno aye lok i kom Yubu, dano ma onongo lworo Lubanga. Buk pa Yubu nyuto ni Larac-ci oloko ki Lubanga tyen aryo kulu. Pi tyen aryo magi ducu, Lubanga opako Yubu pien ogwoko gennene. Catan owaco ni Yubu tiyo pi Lubanga pi rwot ineka keken, kun wacci Lubanga tye ka wilo Yubu wek obed lagen. Ki lok man, Catan onongo tye ka wacci engeyo Yubu maber adada loyo Lubanga. Jehovah oweko Catan ojwero jami pa Yubu ducu, oneko lutinone, ki dok okelo two i kome. * Lacen, kiniang ni Jehovah onongo tye ka loko lok ada i kom Yubu ki dok ni Catan obedo lagoba. Lubanga ogoyo laa i kom Yubu pi gwoko gennene.​—Yubu 1:6-12; 2:1-7.

I kare ma Lubanga tye ka lok gin ki Catan, tika Jehovah onongo tye ka lok ki kit mo marac ma tye i cwinye? Baibul waco ni: “Gin ducu ma en [Lubanga] tiyo tye atir.” (2 Camuel 22:31) Lok pa Lubanga bene wacci: “Leng, leng, leng en Rwot Rubanga Latwer ducu.” (Tucu mung 4:8, Baibol pa Katoli.) Lengo te lokke ni bedo labongo roc, bal, nyo cilo mo keken. Jehovah pe ki roc. En pe romo bedo ki kit mo keken marac.

Kadi bed kumeno, jo mukene bene giwaco ni Yubu pe obedo dano kikome, pi meno lok ma kicoyo i kome-ni obedo mere ododo mamwa. Ento tika meno lok ada? Wang Baibul mukene waco ni Yubu onongo tye dano adana. Me lapore, i Yakobo 5:7-11, kitiyo ki Yubu macalo lapor wek ocuk cwiny Lukricitayo me diyo cwinygi ka kwo tek ki dok me kweyo cwinygi ni Jehovah miyo mot bot jo ma diyo cwinygi. Lanen pa Yubu-ni konyowa nining ka ce en pe obedo dano kikome dok peko ma Catan okelo i kome-ni kiteto ateta? Medo i kom meno, i Ejekiel 14:14, 20, nying Yubu tye kiketo i kin nying Nua ki Daniel, co ma kitgi atir. Calo Nua ki Daniel, Yubu onongo tye dano adana ma obedo ki niye matek. Ka Yubu onongo tye dano adana, ci ngat ma obedo ka une-ni mono pe obedo dano adana?

Ki lok ada, Baibul waco ni Catan tye cwec me cwiny ma obedo dano adana. Ento, iromo penye kekeni ni: ‘Tika en tye ka keto lyeto i koma ki dong i kom lupacona i kare-ni?’

Go kong ni lutim aranyi mapol gubino i taun ma ibedo iye. Ngene kene ni ber bedo kacel ki kit ma dano gikwo kwede biballe adada. Tam kong i kom lapor ma rom aroma: Catan kacel ki jogine ma gitye cwec me cwiny calo Catan-ni, gujemo i kom Lubanga ci kiryemogi gitye i lobo kany. Adwogine obedo ningo? Tam kong i kom jami ma ineno tye ka timme i kabedo ni kacel ki i lobo mukene:

•   Tika itye ka neno kit ma tim gero tye ka nya kwede kadi bed ni wi lobo ducu tye ka tute matek me jwayone woko?

• Tika itye ka neno nya pa galowang ma opong ki tim tyet tyet kadi bed lunyodo mapol pe giye?

• Tika itye ka neno kit ma kitye ka balo kwede kabedo murumowa i yo marac kadi bed ni kitye ka tute me gwokone?

• Tika gin mo marac tye ka timme i kwo pa dano pien teko mo tye ka miyo pekogi woto kimedde ameda?

Nen kong ngat ma Baibul waco ni tye i nge pekki magi: “Gibolo min kulu madit ca woko piny i ngom, ma yam obedo min kulu macon-ni, ma gilwongo ni Ladot, ki Catan, labwol dano ma i wi lobo ducu; gibole woko piny i ngom kacel ki lumalaikane. . . . Ento wun lobo ki nam, wubineno can malit atika, pien Ladot dong olor piny obino woko piny botwu ma tye ki akemo madwong, pien ngeyo ni karene tye manok!” (Niyabo 12:9, 12) I nge nyamo lok man, jo mapol dong giye ni Catan tye dano ma kite rac adada ma tye ka doro lobowa-ni ki mit kom.

Iromo tamo kit ma itwero gwokke kwede. Meno tam matir. Pwony ma lubo man bitito jami mogo ma romo konyi.