Tika iromo tamo i kom laremi mo macok kwedi adada ma pe ingeyo nyinge? Meno pe twere. Lamego mo ma nyinge Irina, ma bedo i Bulgaria owaco ni, “Pe twere me bedo cok ki Lubanga ka ce pe ingeyo nyinge.” Kit ma waneno kwede i pwony mukato-ni, tye me yomcwiny ni Lubanga mito ni inyikke cok bote. Pi meno, Lubanga otiyo ki Baibul me tuco nyinge boti kun waco ni: “An Jehovah. Meno aye nyinga.”​—Icaya 42:8, NW.

Tika Jehovah paro ka pe ingeyo nyinge ki dok pe itiyo kwede? Tam kong i kom lok man: Nying Lubanga kicoyo i nukuta angwen i leb Ibru, dok tye nonge cokcok tyen 7,000 kulu i Ginacoya macon me leb Ibru. Man aye pud dong nying ma kicoyo tyen mapol loyo i Baibul. Ada, man nyuto atir ka maleng ni Lubanga mito ni wange en dok wati ki nyinge. *

Ento, jo mogo gitamo ni pe nyuto woro me tic ki nying Lubanga pien en leng dok tye won twer ducu. Ki lok ada, pe nyuto woro me tic ki nying Lubanga i yo ma pe opore, kit macalo in pe ibalo nying lawoti macok kwedi-ni. Ento, miti pa Jehovah tye ni jo ma gimare myero guket deyo i kom nyinge dok gutit pire bot jo mukene. (Jabuli 69:30, 31; 96:2, 8) Wi opo ni Yecu opwonyo lulub kore me lega ni: “Wonwa ma tye i polo, giwor nyingi maleng.” Wan bene waromo lonyo nying Lubanga wek obed leng kun watito pire bot dano. Timo meno nyikowa cok bote.​—Matayo 6:9.

Baibul nyuto ni Lubanga keto cwinye adada i kom jo ma “gitamo pire [pi nyinge].” (Malaki 3:16) Ma lubbe ki ngat ma tamo pi nyinge, Jehovah ocikke ni: “Abigwoke, pien en ngeya [ngeyo nyinga]. Ka okok bota, abigamo doge; abibedo kwede i kare me ayelayela.” (Jabuli 91:14, 15) Ngeyo ki dok tic ki nying Jehovah pire tek ka wamito bedo ki wat macok kwede.