1, 2. (a) Carolok mene ma Yecu otito bot lureme ma gicok kwede? (Nen cal ma tye i pot karatac man.) (b) Gin ango ma myero wange ma lubbe ki carolok madok i kom romi ki dyegi?

 YECU obedo ka lok ki lureme Petero, Anderiya, Yakobo ki dong Jon, lureme ma onongo en cok kwedgi adada. Gin pud gua ka winyo carolok ma Yecu obolo i kom lagwok ot ma lagen dok maryek, anyira apar-ri, ki dong ciling. Yecu odolo te pwonye kun bolo carolok mukene. En oloko i kom kare ma “Wod pa dano” bingolo kop i wi “rok ducu.” Carolok-ki nen calo pud dong oweko gubedo ki miti madit adada! I carolok man, Yecu oloko i kom gurup aryo mapat pat, gurup me acel aye romi ki mukene-ni dyegi. En bene oloko i kom gurup me adekke ma pire tek ma olwongogi ni ‘utmege’ pa “Kabaka.”​—Kwan Matayo 25:31-46.

² Calo lukwena pa Yecu, jo pa Jehovah i kareni bene gitye ki miti madit adada i kom carolok-ki pien kwako kwo pa dano. En otito gin mumiyo jo mogo gibinongo kwo ma pe tum ki dong mukene kibinekogi matwal. Kwowa cung i kom  niang ki dok timo jami ma Yecu owacogi i carolok man. I pwony man, wabigamo lapeny magi: Jehovah okonyowa me niang carolok man nining? Wan wangeyo nining ni carolok man nyuto kit ma tic me tito kwena pire tek kwede? Anga ma kimiyo bote tic me tito kwena? Dok pingo pire tek ni dano i kareni gubed lugen bot “Kabaka” ki dok ‘omegine’?

3, 4. (a) Gin ango ma myero wange wek waniang carolok madok i kom romi ki dyegi? (b) I 1881, Zion’s Watch Tower otito ni carolok man te lokke ngo?

³ Me niang maber carolok madok i kom romi ki dyegi, omyero waniang jami adek ma pigi tego: angagi ma kiloko i komgi, awene ma kibingolo kop iye, ki dong gin mumiyo kibingolo kop i wi ngat moni ni obedo romo nyo dyel.

⁴ I 1881, Zion’s Watch Tower otito ni Yecu aye “Wod pa dano” ki bene ngat ma kilwongo ni “Kabaka.” Ki bene otito ni ‘omege’ pa Kabaka pe gubedo jo ma gibiloc kacel ki Yecu keken ento bene dano ducu ma gibikwo i lobo ka nongo dong gipe ki roc. Lutino kwan me Baibul guwaco ni poko romi ki i kin dyegi bitimme i kare me Loc me Mwaka Alip Acel pa Kricito. Dok gin onongo giye ni dano ducu gibibedo romi pien gukwo i yo me mar ma lubbe ki cik pa Lubanga.

5. I 1923, jo pa Lubanga guniang carolok ma Yecu obolo i kom romi ki dyegi nining?

⁵ Lacen, Jehovah okonyo jone me niang carolok man i yo matir. Watch Tower me Oktoba 15, 1923, omoko ka maleng ni “Wod pa dano” aye obedo Yecu. Ento bene otiyo ki tyeng me Baibul me tito angagi ma gubedo ‘omege’ pa Kricito ma gibiloc kacel kwede i polo, dok owaco ni romi gubedo jo ma gibikwo i lobo kany i te loc pa Yecu kacel ki omegine. Awene ma kibipoko romi ki i kin dyegi? Pwony man bene otito ni omege pa Kricito gibiloc kacel kwede ki i polo i kare me Loc me Mwaka Alip Acel, ma oweko jo ma gibikwo i lobo pe giromo konyogi nyo tenyogi ata. Pi meno, poko kin romi ki dyegi bitimme ma nongo kare me Loc me Mwaka Alip Acel peya ocakke. Ma lubbe ki gin mumiyo kikwano ngat moni ni romo, pwony man odolo tere ni kibingolo kop i wigi ni gubedo romi pien guye Yecu ni Rwotgi dok gitye ka kuro Ker-ri wek okel kwo maber i lobo.

6. I 1995, alokaloka ango ma kitimo i niangowa ma lubbe ki carolok madok i kom romi ki dyegi?

⁶ Pi mwaki mapol, jo pa Jehovah gubedo ka tamone ni tic me tito kwena-ni dong nyuto ni gitye ka ngolo kop ni ngat moni obedo romo nyo dyel i kare man me agikki-ni, ma man lubbe ki kit ma gin nongo gujolo kwede kwena me Ker-ri. Ento i 1995, kitimo alokaloka i niangowa ma lubbe ki carolok man. Pwony aryo ma gukati i Watchtower me Oktoba 15, 1995, gunyuto kit ma lok ma Yecu owaco i Matayo 24:29-31 (kwan) ki Matayo 25:31, 32 (Kwan.) * girom kwede. Lok man kidolo tere ningo? Pwony mukwongo i magajin meno waco ni: “Ngolo kop ni ngat moni obedo romo nyo dyel bitimme i anyim.” Man bitimme awene kikome? “Ngolo kop man bitimme ka ‘can madit’ ma kitito pire i Matayo 24:29, 30 ocakke ki dok ka Wod pa dano  ‘bidwogo ki deyo.’ . . . I ngeye, kit ma lobo man dong cok gik-ki, Yecu bibedo ki kot ci ngolo kop.”

7. Niango matir ango ma watye kwede ma lubbe ki carolok ma Yecu obolo i kom romi ki dyegi?

⁷ I kareni, watye ki niango matir ma lubbe ki carolok ma Yecu obolo i kom romi ki dyegi-ni. Ma lubbe ki jo ma kiloko i komgi-ni, Yecu aye “Wod pa dano” dok bene tye Kabaka. Jo ma en olwongogi ni “utmegina[-ni]” gin aye co ki mon ma kiwirogi ki cwiny maleng, ma gibiloc kacel ki Kricito i polo. (Rom. 8:16, 17) “Romi” kacel ki “dyegi” gicung pi jo ma gia ki i rok ducu. Jo magi pe kiwirogi ki cwiny maleng. Ento kare ma kibingolo iye kop kono? Ngolo kop man bitimme tung i agikki me twon can madit atika ma tye ka bino-ni. Ki dong, gin ango mumiyo kibingolo kop ni ngat moni obedo romo nyo dyel? Adwogine cung i kom kit ma ngat moni otero kwede omege pa Kricito ma kiwirogi ma pud gitye i lobo kany. Kit macalo agikki me lobo man dong tye i doggola-ni, cwinywa yom adada ni Jehovah okonyowa me niang carolok man motmot kacel ki mukene ma kicoyogi i Matayo cura 24 ki 25!

8, 9. Pingo Yecu owacci romi ma i carolokke-ni “kitgi atir”?

⁸ I carolok ma Yecu obolo i kom romi ki dyegi-ni, en pe oloko atir atir i kom tic me tito kwena. Ci dong, wan wangeyo nining ni carolok-ki pwonyowa ni tic me tito kwena-ni pire tek adada?

⁹ Mukwongo, omyero i nge ni Yecu tye ka pwony kun tiyo ki carolok. Ngene kene ni en onongo pe tye ka lok i kom poko romi ki dyegi kikome. I yo acel-li, en onongo pe tye ka wacci ngat acel acel ma kingolo kop i wiye ni tye romo myero opit, oruk, ogwok nyo olim omegi Yecu ki i buc. Ma ka meno, en onongo tye ka lok i kom cwiny ma jo ma gitye calo romi myero gunyut bot omegine. En owacci romi magi “kitgi atir” pien giye ni Kricito tye ki gurup pa omegine ma kiwirogi i lobo kany, dok i kare man me agikki-ni romi magi gicwakogi ki cwinygi ducu.​—Mat. 10:40-42; 25:40, 46; 2 Tem. 3:1-5.

10. I yo ma nining ma romi ginyuto kwede cwiny me kica i kom omegi pa Kricito?

¹⁰ Me aryo, nen kong tyeng muromo ka nget lok ma Yecu owaco-ni. En onongo tye ka lok i kom gin ma binyuto dwogone i loc ki dong kare me agikki piny. (Mat. 24:3) Con kong, Yecu owaco ni lanyut meno kwako gin mo ma pire tek adada​—kwena maber me Ker-ri ma “gibitito i wi lobo ducu.” (Mat. 24:14) Ma peya Yecu obolo carolok i kom romi ki dyegi, en kong obolo carolok i kom ciling. Kit ma wanyamo i pwony mukato-ni, Yecu obolo carolok man me tito bot lupwonnyene ma kiwirogi, ma gubedo ‘omegine-ni,’ kit ma pire tek kwede me tito kwena ki mit kom. Ento, jo manok ma kiwirogi ma pud gudong i lobo kany i kare me dwogo pa Yecu gitye ki tic matek adada​—tic me tito kwena bot “rok ducu” ma peya agikki piny obino. Carolok madok i kom romi ki dyegi-ni nyuto ni jo ma kiwirogi gimito ni kikonygi. Pi meno, yo ma pire tek ma jo ma kingolo kop ni gitye romi ginyuto kwede cwiny me kica bot omegi Kricito aye ka gikonyogi i tic me tito kwena. Ento, miyo kony man kwako timo gin ango? Man mono kwako miyo jami me kom ki dong kwe cwiny keken, kece gin mukene mitte?

11. Lapeny mene ma jo mogo giromo penye kwede, ki dok pingo?

¹¹ I kareni, dano milion aboro kulu gitye lupwonnye pa Yecu dok polgi pe gitye jo ma kiwirogi. Gin pe kiminigi ciling ma Yecu omiyo bot luticce ma kiwirogi. (Mat. 25:14-18) Pi meno, jo mogo giromo penye ni, ‘Tika mitte ni jo ma pe kiwirogi ki cwiny maleng bene myero gutit kwena?’ Nen kong tyen lok mogo mumiyo wawaco ni myero gutit kwena.

12. Gin ango ma wapwonyo ki i lok ma Yecu owaco i Matayo 28:19, 20?

¹² Yecu ociko ni lupwonnyene weng myero gutit kwena. I kare ma kicero Yecu, en owaco bot lulub kore ni myero gulok dano wek gudok lupwonnyene, kun gipwonyogi me lubo “gin ducu” ma ecikogi. I kin jami ma ocikogi kwede tic me tito kwena tye iye. (Kwan Matayo 28:19, 20.) Pi meno, lupwonnye ducu pa Yecu myero gutit kwena kadi bed ni gengi tye me loc i polo nyo kwo i lobo kany.​—Tic 10:42.

13. Ginanyuta ma Jon oneno-ni nyuto gin ango, ki dok pingo?

¹³ Buk me Niyabo nyuto ni jo ma kiwirogi kacel ki jo mukene-ni gibitito kwena. Yecu oweko lakwena Jon oneno i ginanyuta “Nyako ger,” jo 144,000 ma kiwirogi ma gibiloc kacel ki Kricito i polo, ma gitye ka lwongo dano ni myero ‘gumat pii me kwo labongo wel.’ (Yabo 14:1, 3; 22:17) Pii meno cung pi gin ma Jehovah omiyo wek kilar dano ki i bal ki to kun nongo jenge i kom ginkok pa Kricito. (Mat. 20:28; Jon 3:16; 1 Jon 4:9, 10) Ginkok-ki obedo pen lok ma pire tek i kwena ma watito-ni dok jo ma kiwirogi gitye ka telo yo i konyo dano wek gunge kun ginongo adwogi maber ki iye. (1 Kor. 1:23) Ento i ginanyuta meno bene, Jon oneno jo mukene ma pe kiwirogi. Gin bene kicikogi ni myero gulwong dano ni, “Bin!” Gilubo lok  meno kun gipwoyo jo mukene ki kwena maber-ri. Gurup man me aryo-ni gitye ki gen me kwo i lobo kany. Pi meno, ginanyuta man nyuto ka maleng ni jo ducu ma gujolo lwongo man ni ‘bin-ni’ gitye ki tic me tito kwena bot jo mukene.

14. Lubo “cik pa Kricito” kwako timo gin ango?

¹⁴ Jo ducu ma gilubo “cik pa Kricito” myero gutit kwena. (Gal. 6:2) Jehovah mito ni jo ducu ma giwore myero gulub cik acel. Me lapore, en owaco bot jo Icrael ni: “Cik bibedo acel pi anywalli ki pi lurok ma bedo i kinwu.” (Nia 12:49; Levi 24:22) Lukricitayo pe gitye i te Cik ma Kimiyo bot Moses. Ento wan ducu, kadi bed watye jo ma kiwirogi nyo pe, wan weng watye i te “cik pa Kricito.” Cik meno kwako jami ducu ma Yecu opwonyogi. Gin ma pire tek loyo i kin jami ma Yecu opwonyogi aye ni lulub kore myero gunyut mar. (Jon 13:35; Yak. 2:8) Yo ma pire tek loyo ma wanyuto kwede mar pi Lubanga, Kricito, ki dong luwotwa aye ka watito kwena maber me Ker-ri.​—Jon 15:10; Tic 1:8.

15. Pingo waromo wacone ni Yecu ociko lupwonnyene ducu ni myero gutit kwena?

¹⁵ Gin ma Yecu owaco bot gurup matidi tye pi gurup madit bene. Me lapore, Yecu omoko gicikke pi Ker ki lupwonnyene 11 keken, ento gicikke meno bene tye pi jo 144,000 ducu. (Luka 22:29, 30; Yabo 5:10; 7:4-8) I yo acel-li, Yecu ociko jo manok keken ki i kin lulub kore​—jo ma en onen botgi i nge cerre​—ni myero gutit kwena. (Tic 10:40-42; 1 Kor. 15:6) Ento lupwonnyene ducu me cencwari me acel bene gutito kwena kadi bed ni pe guwinyo ka Yecu cikogi. (Tic 8:4; 1 Pet. 1:8) I kare-ni bene, Yecu pe oloko en kikome bot dano milion aboro ma gitye ka tito kwena me Ker-ri. Ento gin ducu gingeyo ni myero gibed ki niye i kom Kricito dok ginyuto man i tito kwena.​—Yak. 2:18.

16-18. I yo ango ma jo ma gimito bedo romi gikonyo kwede omegi pa Kricito, dok pingo myero gutim meno i kareni?

¹⁶ Catan tye ka lweny i kom omegi pa Kricito ma kiwirogi ma pud gitye i lobo kany, en bimedde ki lweny kit ma ngeyoni “karene tye manok” dok bene tye ka tum woko-ni. (Yabo 12:9, 12, 17) Kadi bed ni gitye ka kanyo atematema magwar ma kiketo i komgi, jo ma kiwirogi gitye ka telo yo i tic me tito kwena dok dano mapol gitye ka jolone makato kare mo keken. Labongo akalakala, Yecu tye kwedgi dok telogi.​—Mat. 28:20.

¹⁷ Obedo twon kwogo madit adada botwa me konyo omegi Kricito i tic me tito kwena. Me lapore, wamiyo bene cente ki dok watiyo matek i tic me gedo Odi me Ker, Odi me Gure Madito, ki dong jang gang kal, dok bene gibedo luwiny ki cwinygi ducu bot luelda ki omege mukene ma “lagwok ot ma lagen dok maryek” ocimogi. Man nyuto ni ada wamito konyo omegi Kricito.​—Mat. 24:45-47; Ibru 13:17.

¹⁸ Cokcok-ki, lumalaika ma gumako yamo me twon can madit atika-ni dong gicok wekone. Man bitimme ka nongo omege pa Kricito ducu ma pud gitye i lobo kany nongo dong kiketo lanyut me agikki i tur nyimgi. (Yabo 7:1-3) Ma peya Armagedon ocakke, jo ma kiwirogi kibiterogi i polo. (Mat. 13:41-43) Pi meno, ka wamito ni kingol kop i wiwa ni wabedo romi, man aye dong kare me nyutone kun wakonyo omegi pa Kricito ki cwinywa ducu.