Jo mogo i kin Lucaden pa Jehovah guwaco lok macalo man i kare ma gitye ka yenyo ngat ma myero ginyomme kwede. Kadi bed kit meno, jo magi ducu gingeyo tira ma Paulo omiyo ma lubbe ki nyomme “i kin jo pa Rwot keken”​—man kwako kit ma Lukricitayo ducu myero gukwo kwede. (1 Kor. 7:39) Ento, pingo giloko kuman?

Jo ma giwaco lok macalo meno giromo tamone ni wel omege ki lumege ma gupore me anyoma pe rom. I lobbe mapol, man aye gin ma tye ka timme. Nen kong labol aryo eni: I lobo Korea, i kom Lucaden 100 ma wigi nono, 57 gubedo lumege ki 43 gubedo omege. Ripot ma a ki i lobo Colombia wacci pacen 66 pa Lucaden gubedo lumege ki 34 gubedo omege.

I lobo mukene kono, ripot tye ni lunyodo ma pe gubedo Lucaden pol kare gipenyo wel lim-akumu ma lamal tutwal, ma weko bedo tek adada pi omege ma centegi nok me nyom. Kodi ariya ma kit magi gitwero weko laminwa mo me cwiny cako bedo ki tam ni nongo omego me anyoma “i kin jo pa Rwot” wange ding adada. Man miyo en twero penye keken ni, “Tika nyuto ryeko me bedo ki tam ni atwero nongo ngat mupore me anyoma ki i kin Lukricitayo luwota?” *

Ka ce yam ibedo ki kodi tam acel-li, bed ki gen ni Jehovah ngeyo kit ma iwinyo kwede ki i cwinyi. Ki lok ada, en ngeyo miti ma itye kwede me nyomme.​—2 Tekwaro 6:29, 30.

 Ento kadi bed kit meno, Jehovah ominiwa tira i Lokke ni myero wanyomme i kin jo pa Rwot keken. Pingo? Pien en ngeyo gin maber pi jone. En pe mito ni wamok tam marac ma weko wakoko ange lacen nyo cwero cwinywa i anyim. I kare ma Luicrael gubedo ka nyomo anyira mukene ma pe giworo Jehovah, Nekemia otito botgi lanen marac pa Solomon. Kadi bed ni “Lubanga omaro Solomon . . . mon ma gin anyira rok mukene gumiyo en opoto i bal.” (Nek. 13:23-26) Pi meno, wek luticce gunong adwogi maber, Lubanga cikowa i kare-ni me nyomme i kin jo ma giwore keken. (Jab. 19:7-10; Ic. 48:17, 18) Lukricitayo me ada gitye ki pwoc madit ni Lubanga minigi tira ma nyuto mar dok ma genne. Ka ce wawinyo en macalo Lalocwa, ci nongo waye ni en tye ki twero me wacciwa gin ma myero watim.​—Car. 1:5.

Ki lok ada, pe imito ‘ribbe kun ibedo kacel’ ki ngat mo ma twero miyo ibarre woko ki bot Lubanga. (2 Kor. 6:14) Tira pa Lubanga tiyo kare ducu dok Lukricitayo mapol i kareni gunyuto ryeko kun gilubo gin ma Jehovah waco. Ento jo mukene guyero me timo olungtuke.

Maggy, * lamego mo ma bedo i lobo Australia, otito gin mutimme i kome i kare ma ocako winye ki ngat mo ma pe woro Jehovah, en owacci: “Akeng cokke tyen mapol ata wek wanong kare me bedo kacel kwede. Adoko goro i yo me cwiny adada.” Ratana ma bedo i lobo India odonyo i miti gin ki awobi mo ma gikwano kwede i ot kwan acel, ma bene pud ocako kwano Baibul akwana. Ento, awobi-ni ocako kwano Baibul wek enong yo me ywayo tamme. Ratana oweko woro Jehovah kun lokke i dini mukene wek enyomme oyot.

Labol mukene obedo pa Ndenguè ma bedo i lobo Cameroon. En onyomme ki mwaka 19. Cware ocikke bote ma peya gunyomme ni en bibedo agonya me medde ki bedo Lacaden. Ento cabit aryo i nge nyomgi, jami olokke odoko lawang dyang pien cware ogenge ni pe ocit i cokke. En owacci: “Abedo kic kic kun bene akok. Aniang ni pe dong aloyo kwona kit ma amito. Cawa weng nongo atye ka koko ange.”

Pi meno, pe ni dano ducu ma pe giworo Jehovah giger dok pe giniang. Wati ki Wonwa me polo ma lamar-ri tye nining kadi bed ni peya inongo adwogi marac ma bino pi nyomo ngat ma pe wore? Iwinyo nining i nge niang ni pe ilubo tira ma en omiyo me konyi? Ma dong pire tek loyo aye ni, itamo ni Jehovah winyo nining ma lubbe ki tam ma imoko-ni?​—Car. 1:33.

Omege ki lumege ma i twok loboni ducu giye lok man ni nyomme “i kin jo pa Rwot keken” obedo cik maber adada pi ber bedowa. Jo ma wigi nono gumoko tamgi me yomo cwiny Jehovah kun ginyero ngat mupore me anyoma ki i kin jo ma woro en keken. Michiko ma bedo i lobo Japan wadine gubedo ka diye ni onyomme ki ngat mo ma pe Lacaden. Medo i kom lweny ki lyeto meno, en oneno ka lureme macok ginyomme i kin jo pa Rwot. En owaco ni: “Abedo ka lok keken ni kit ma Jehovah aye ‘Lubanga ma layomcwiny-nyi,’ yomcwinywa pe cung i kom nyom nyo bedo ma wiwa nono. Aye bene ni en miniwa jami ma wamito. Pi meno, ka pe waromo nongo ngat mo mupore me anyoma kadi bed cwinywa tye iye, ber ka wabedo ma wiwa nono pi kare meno.” (1 Tem. 1:11) Lacen, Michiko onyomo omego mo maber adada, dok bene cwinye yom ni pe erune.

Omege mogo bene gukuro pi kare mo wek ginong ngat mupore me anyoma. Bill ma a ki i lobo Australia obedo ngat acel i kingi. En owaco ni i cawa mukene cwinye obedo ka cwale i kom mon mukene ma pe giworo Jehovah. Ento en ogwokke adada pe me ngiyo nyo naa i kom mon magi. Pingo? En onongo pe mito timo gin mo ma bimiyo ‘eribbe kun ebedo kacel ki jo ma pe guye Yecu.’ I nge mwaki mogo, en onongo tye ki cwiny me miti i kom lumege mogo, ento gin onongo gipe ki miti i kome. Ento Bill okuro pi mwaki 30 me nongo lamego ma tamme rwatte ki mege. Bill owaco ni: “Pe akoko ange wacel.” En otito ni: “Atye ki yomcwiny pien wawoto i ticwa me pwony, wakwano dok  waworo Jehovah kacel. Cwinya bene yom me rwatte ki dok bedo kacel ki lurem dakona pien gin ducu giworo Jehovah. Watye ka tic ki cik ma igi lac me Baibul i nyomwa.”

Gin ango ma iromo timone ka nongo iketo genni i kom Jehovah kun ikuro dako nyo laco mupore me anyoma? Gin acel ma myero itam iye aye gin mumiyo peya inyomme. Ka inongo ni tyen lokke tye ni pien itye ka lubo tira me Baibul me nyomme “i kin jo pa Rwot keken,” ci wapwoyi pi lubo cik pa Lubanga. Bed labongo akalakala ni meno Jehovah tye ki pwoc madit i komi pi moko tammi me lubo Lokke. (1 Cam. 15:22; Car. 27:11) Iromo medde ki ‘yabo cwinyi ducu’ bot Lubanga i lega. (Jab. 62:8) Medo i kom meno, medde ki lega bot Jehovah kare ki kare kun bene iwacce kit ma iwinyo kwede kikome ki i cwinyi. Wati ki Lubanga bijing nino ki nino ka nongo i cung matek kadi bed itye ka wok ki i atematema mapol ma bino ki i kacokke nyo ki woko. Bed ki gen ni Ngat Mamalo Twal keto cwinye i kom luticce ma lugen dok piri tek bote adada. En tamo pi piri adada. Ento nge ni meno en pe ocikke me miyo dako nyo laco bot ngat mo keken. Lubanga ngeyo yo maber loyo me cobo miti ma itye kwede ka ce ada imito dako nyo laco.​—Jab. 145:16; Mat. 6:32.

I kine mukene itwero winyo calo Daudi ma owaco ni: “Ai Rwot [Jehovah], gam doga oyotoyot! Cwinya mito tum woko! Pe ikanne woko ki bota.” (Jab. 143:5-7, 10) I kare macalo meno, mi bot Abani me polo kare me nyuto gin ma en bitimo piri. Iromo timo meno ka ce ikwanyo kare me kwano Lokke ki dok lwodo lok i kom gin ma itye ka kwanone. Ibiniang gin ma cikke obedo ki bene ibineno kit ma en okonyo kwede ki jone i kare mukato angec. Ka iwinyo lokke, ci ibibedo ki gen me medde ki lubo cikke.

Ngo mukene ma myero itim wek iti maber ki kare ma nongo wi tye nono? Itwero tic ki kare ma wi pud tye nono me dongo i yo me cwiny, bedo ngat ma cinge yot, nyuto cwiny me lirem, tic matek, lworo Lubanga, ki dong bedo ki nying maber​—jami magi pigi tego adada wek yomcwiny obed tye i kwo me ot. (Acak. 24:16-21; Ruth 1:16, 17; 2:6, 7, 11; Car. 31:10-27) Ket pi Ker-ri obed mukwongo kun iketo cwinyi i tic me tito kwena kacel ki tic mukene ma Lukricitayo myero gutim pien meno bigwoki. Bill ma waloko i kome con-ni, oloko i kom kare ma onongo en mito nyomme ni: “Okato oyotoyot adada! Atiyo ki kare meno me tic pi Jehovah macalo painia.”

Ada, nyomme “i kin jo pa Rwot keken” pud dong obedo tam me ryeko ya! Lubo tira meno weko i keto deyo i kom Jehovah dok inongo adwogi mabeco kacel ki yomcwiny. Baibul wacci: “Tye ki gum [yomcwiny] dano ma lworo Rwot [Jehovah], ma bedo ki yomcwiny mada ka lubo cikke . . . Jone gibilony dok gibedo ki lwak jami mapol, dok kite ma atir-ri bene bibedo nakanaka.” (Jab. 112:1, 3) Pi meno, mok tammi me lubo cik pa Lubanga me nyomme “i kin jo pa Rwot keken.”