1. Ngo ma oweko Yecu obedo ki “yomcwiny [madit] i cwiny maleng”? (Nen cal ma tye i pot karatac man.)

 TIKA itwero goyo kit ma Yecu Kricito obedo kwede ki “yomcwiny [madit] i cwiny maleng”? Twero bedo ni onongo tye ka bwunyo ma wange nyuto yomcwiny madit ma tye i cwinye. Gin ango ma oyomo cwinye? En onongo ocwalo lupwonnyene gin 70 ka tito kwena maber me Ker pa Lubanga. Mitine madit onongo tye me ngeyo kit ma gubitimo kwede tic man. Lumone ma gitego me kwena maber-ri onongo gipol adada, calo lupwony cik ki Luparicayo ma gunongo pwonnye i rwom ma lamal. Gucuko cwiny dano me jemo i kom Yecu kun gicaye ni obedo lapa bao mamwa ki dok ni lupwonnyene gubedo “jo mogo ata ma pe gupwonnye.” (Tic 4:13; Mar. 6:3) Kadi bed kumeno, lupwonnyene gudwogo ki yomcwiny madit i nge tito kwena maber-ri. Gin gutito kwena kadi bed ni gukemme ki ariya, ma wa cen maraco bene gujemo i komgi! Gin ango ma oweko gubedo ki yomcwiny kacel ki tekcwiny?​—Kwan Luka 10:1, 17-21.

2. (a) I yo ango ma lupwonnye pa Yecu onongo gitye calo lutino? (b) Gin ango ma okonyo lulub kor Kricito me niang lok ada ma pigi tego?

² Nen kong gin ma Yecu owaco bot Jehovah: “Apwoyi Wora, in Rwot me polo ki me lobo, pien ikano lok magi woko  ki bot luryeko ki lunge-piny, ci inyutogi bot litino lukere. Iyo, Wora, pien onongo kit meno ineno ber i wangi, ipwoyo kit yo macalo meno.” (Mat. 11:25, 26) Tye kono ni, Yecu onongo pe tye ka wacci lupwonnyene gubedo lutino matino. Ma ka meno, en onongo ngeyo ni gitye macalo iwacci lutino ka kiporogi ki luryeko kacel ki jo ma gunongo pwonnye i rwom ma lamal, ma onongo ginenne calo giryek tutwal. Ma pire dong tek loyo, Yecu opwonyo lulub kore me bedo calo lutino matino, ma gimwol kun bene pwonyogi yot. (Mat. 18:1-4) Adwogi maber ango ma gunongo ki i bedo jo mamwol? Jehovah otiyo ki cwiny mere maleng me konyogi wek guniang lok ada ma pigi tego ento luryeko ki jo ma gitye ki ngec ma gicayo lupwonnyene-ni, Catan kacel ki cwiny me awaka oumo wanggi woko.

3. Gin ango ma wabinyamo i pwony man?

³ Man aye gin mumiyo Yecu onongo cwinye yom adada! Cwinye obedo yom me neno kit ma Jehovah konyo kwede jo ma gimwol me ngeyo lok me ada, kadi bed ni rwom me kwangi lapiny nyo gubedo jo ma pe gupwonye. En bene onongo cwinye yom pien Wonne ocwako yo man me pwony-nyi. Jehovah tika olokke, dok en tye ka nyutone nining ni pud ecwako yo man me pwony-nyi? Ka nongo wanyamo lagamme, man romo keliwa yomcwiny madit kit ma okelo kwede bot Yecu-ni.

4. I yo mene ma Watchtower ma kicoyo i leb munu ma niang iye yot-ti obedo mic me mar?

⁴ I mwaki mogo mukato cokcok-ki, pwonye ma dul pa Jehovah obedo ka miyone-ni tye tutwalle me konyowa wek wapwony i yo ma niang iye yot. Nen kong labol adek-ki. Mukwongo, watye ki Watchtower ma kicoyo i leb munu ma niang iye yot. * Watchtower man obino macalo mic bot jo ma gitute atuta me kwan. Luwi odi mapol gitye ka nongo ni lutinogi i kareni giketo cwinygi adada i cawa me kwano Watchtower, yo ma pire tek loyo ma Jehovah pitowa kwede i yo me cwiny. Jo mapol dong gucoyo waraga me nyuto yomcwiny kacel ki pwocgi. Laminwa mo acel owaco ni onongo pe emiyo lagam i cawa me Kwano Watchtower. En owaco ni: “Lewic onongo maka mada.” Ento meno dong pe timme i kareni. I nge tic maber ki Watchtower ma kicoyo i leb munu ma niang iye yot, en ocoyo ni: “I kareni dong amiyo lagam tyen mapol pien ape ki lworo mo keken! Amiyo pwoc bot Jehovah ki botwu bene.”

5. Adwogi maber ango ma wanongo ki i Baibulwa manyen me New World Translation of the Holy Scriptures?

⁵ Me aryo, watye bene ki Baibul me New World Translation of the Holy Scriptures ma kigoyo i leb Munu ma niang iye yot adada, ma kicwalo woko i cokke ma timme mwaka ki mwaka ma obedo i Oktoba 5, 2013. * Tyeng mapol dong gitye ki nyig lok manok, ento pen lok ma iye pe olokke ki bene niang iye yot. Me labolle, Yubu 10:1 onongo tye ki nyig lok 27 ento odwogo wa i 19; Carolok 8:6 onongo tye ki nyig lok 20 ento odwogo wa i 13. Niang tyeng magi yot kato kit ma onongo tye kwede con. Ki lok ada, omego mo ma kiwiro dok otiyo ki gen pi Jehovah pi mwaki mapol owaco ni: “Pud akwano buk pa Yubu akwana ki i  Baibul manyen-ni dok awinyo calo iwacci aniang pi tyen mukwongo!” Dano mapol bene guwaco lok ma kit meno.

6. Iwinyo nining pi alokaloka ma kitimo i kom niangowa ma lubbe ki Matayo 24:45-47?

⁶ Me adek, tam kong i kom alokaloka mogo ma kitimo i kom niangowa. Me labolle, niangowa i kom “lagwok ot ma lagen dok maryek” ma kicoyo pire i Wi lubele me Julai 1, 2013 oyomo cwinywa adada. (Mat. 24:45-47) Kitito ni lagwok ot ma lagen aye Lukiko Madit, dok “dano ducu ma bedo i ode” gubedo jo ducu ma kipitogi ki cam me cwiny kadi bed ni kiwirogi nyo gitye “romi mukene.” (Jon 10:16) Pud dong watye ki yomcwiny madit ya me ngeyo lok ada man ki dok me pwonyone ki jo manyen! Yo mene mukene ma Jehovah onyuto kwede ni ecwako yo me pwony ma niang iye yot?

7, 8. Labol ango ma gitye i Baibul ma gicung pi gin madit ma bitimme i anyim?

⁷ Ka dong irii i tic pi Jehovah pi mwaki mapol, twero bedo ni dong ineno alokaloka i kit ma bukkewa gonyo kwede lok me Baibul. I yo ma nining? I kare mukato angec, onongo kimaro wacone ni lok mogo i Baibul cung pi gin moni madit ma bitimme anyim. Tika tye tyen lok mogo ma pigi tego mumiyo kigonyo lok mogo me Baibul kumeno? Tye. Me labolle, Yecu oloko i kom “lanyut pa lanebi Yona.” (Kwan Matayo 12:39, 40.) Yecu otito ni kare ma Yona ocwalo i i rec cung pi kare ma en ebibedo kwede i lyel.

⁸ Tye lok mogo me Baibul ma cung pi gin madit ma bitimme anyim. I kine tye iye lok magi ma lakwena Paulo onyamogi-ni. Me labolle, wat i kin Abraim gin Agar kacel ki Cara onongo cung pi wat ma tye i kin Jehovah ki rok me Icrael kacel ki but dulle ma tye i polo. (Gal. 4:22-26) I yo acel-li bene, kema me woro, ot pa Lubanga, Nino me Kwanyo Bal, lalamdog madit, ki jami mogo ma i Cik pa Moses onongo gicung pi “lanyut keken me jami mabeco me kare me anyim.” (Ibru 9:23-25; 10:1, Baibol pa Katoli) Yomo cwinywa dok jingo niyewa ka wakwano lok magi me Baibul kacel ki gin ma gicung pire. Ento, tika waromo mokone ni ngat mo keken, jami ducu mutimme, ki dong jami ducu mapat pat ma kiloko pigi i Baibul-li cung pi dano moni nyo gin mukene?

9. I kare mukato angec, onongo kitito lok i kom Nabot nining?

⁹ I kare mukato angec, bukkewa onongo tito ni ngat mo keken, jami ducu, ki dong jami ducu mapat pat ma kiloko i komgi i Baibul gicung pi dano moni nyo gin mukene. Me labolle, nen kong lok i kom Nabot ma Daker Jejebel oketo roro [erupe] i kome ci oweko kingolo kop alenga i wiye dok kineke labongo bal mo keken, wek cware Akab obed ki kare me leyo poto olok pa Nabot. (1 Luker 21:1-16) I 1932, kiwaco ni lok meno cung pi gin mo ma onongo bitimme i anyim. Kitito ni Akab ki Jejebel onongo gicung pi Catan kacel ki dulle; Nabot onongo cung pi Yecu; to pa Nabot onyuto kit ma Yecu onongo bito kwede. Ento lacen i nge mwaki mapol, i buk me “Let Your Name Be Sanctified,” ma kigoyo i 1961, kicoyo ni Nabot onongo cung pi jo ma kiwirogi, ki Jejebel cung pi dini pa Lukricitayo ata-ni. Pi meno, aunauna ma Jejebel oketo i kom Nabot onongo cung pi kit ma kibiuno kwede jo ma kiwirogi i kare me agikki. Pi mwaki mapol, jo pa Lubanga gunongo ni yo man me tito te lok me Baibul-li jingo niyegi adada. Pingo  dok watye ka tito te lok me Baibul i yo mapat i kareni?

10. (a) I yo mene ma lagwok ot ma lagen otiyo kwede ki ryeko me gonyo te lok mogo me Baibul? (b) Gin ango ma bukkewa loko iye tutwalle i kareni?

¹⁰ Ma lubbe ki gen ma watye kwede, Jehovah obedo ka konyo “lagwok ot ma lagen dok maryek” pi mwaki mapol wek ryekone obed ka medde motmot. I kareni lagwok ot ma lagen kong kwedo ki diro labongo rune me tito ni lok moni me Baibul cung pi gin mo madit i anyim, nikwanyo ka Ginacoya cwako lok meno. Medo i kom meno, kinongo ni tek tutwal pi dano mapol me niang kit ma onongo kigonyo kwede te lok mogo me Baibul ki kit ma gucobbe kwede. Pwony mogo calo anga ma cung pi anga ki dok pingo​—twero bedo tek me po i komgi ki dong ketone i tic. Ento ma dong pire tek loyo, ka kiloko tutwal i kom kit ma lok mogo me Baibul gucobbe kwede, ci man twero miyo wakeng pwony ma pigi tego. Pi meno, i kom kareni bukkewa tutwalle loko i kom pwony ma niang iye yot madok i kom niye, ciro peko, lworo Lubanga, kacel ki kit mogo ma pigi tego ma wanongo ki i Baibul. *

11. Kombeddi-ni dong waniang lok kom Nabot nining, ki dok pingo watwero nongo pwony ki i lanenne?

¹¹ Ento kombeddi-ni dong waniang lok kom Nabot nining? I yo mayot. Laco man ma kite atir-ri oto pe ni pien cung pi Yecu nyo jo ma kiwirogi, ento pien en ogwoko genne. En ogwoko Cik pa Jehovah kadi kono luloc matego gubedo ka keto aunauna i kome. (Wel 36:7; 1 Luker 21:3) Wanongo pwony ki i lanenne pien wan bene watwero rwatte ki aunauna pi gwoko Cik pa Jehovah. (Kwan 2 Temceo 3:12.) Lukricitayo ducu gitwero niang, wigi romo po ki dok giketo i tic pwony ma ginongo ki i lanen man ma jingo niyewa-ni.

12. (a) Gin ango ma pe myero wamok ma lubbe ki jami mogo mutimme ma kicoyogi i Baibul? (b) Pingo watwero tito i yo matut jami mogo me Baibul? (Nen lok ma tye i tere piny.)

¹² Tika myero dong wamok ni jami  mogo mutimme ma kicoyogi i Baibul gitye ki pwony ma myero waketgi i tic keken labongo tyen lok mukene? Pe. I kareni, bukkewa tutwalle pwonyo ni gin moni ma kicoyo i Baibul poyo wiwa nyo rwatte arwata ki gin mukene ma tye iye. Man nyuto ni pe dong kimaro tito i bukkewa ni jami mogo mutimme ma kicoyogi i Baibul gicung pi gin moni madit ma bitimme anyim. Me labolle, watwero wacone ki tekcwiny ni kit ma Nabot ogwoko gennene i kare me aunauna ki tone-ni poyo wiwa i kom kit ma Kricito kacel ki jo ma kiwirogi gugwoko kwede ki gennegi. Ento, lanen pa Nabot-ti bene romo poyo wiwa i kom kit ma “romi mukene” pa Rwot gucung kwede matek i kare me atematema. Dong watwero neno kit ma Jehovah tye ka pwonyowa kwede i yo ma niang iye yot adada. *

13. Labol mene ma ginyuto ni dong watito carolok mogo pa Yecu i yo mayot?

¹³ Yecu Kricito aye Lapwony ma pud dong dit ma okwo i lobo. En onongo maro tic ki carolok ka tye ka pwony. (Mat. 13:34) Carolok weko dano gigoyo cal gin moni i wigi dok man konyogi me tam iye matut kun bene gudu cwinygi. Pi mwaki mapol dong, bukkewa obedo ka gonyo te carolok pa Yecu i yo ma niang iye yot adada. Tika cwinywa pe obedo yom me nongo niango manyen ma lubbe ki carolok ma Yecu obolo i kom tobi, kodi karadali, ki dong obwo i Watchtower me Julai 15, 2008? Dong watye ki niango matir ni carolok magi gicung pi Ker pa Lubanga, ma okonyo dano mapol me doko lulub kor Kricito ki i lobo pa Catan-ni.

14. (a) Con kong onongo watito carolok i kom Lacamaria-ni nining? (b) I kareni dong waniang carolok ma Yecu obolo-ni nining?

¹⁴ Ento carolok mogo ma Yecu oloko iye i yo matut kono? Mogo cung pi jami ma obitimme anyim; ento mukene tye ki pwony ma watwero ketogi i tic. Ento waromo ngeyone nining? Pi mwaki mapol, lagamme ocako nen ka maleng motmot. Me lapore, tam kong i kom kit ma onongo watito kwede carolok i kom Lacamaria. (Luka 10:30-37) I mwaka 1924, Watch Tower otito ni Lacamaria-ni cung pi Yecu; yo ma obedo lung ma a ki i Jerucalem cito i Jeriko-ni cung pi kit ma kwo pa dano tye ka balle kwede nicakke i kare ma jemo obedo i poto me Eden; lukwo-ni gicung pi biacara madongo; ki dong lalamdog ki Lalevi gicung pi dini pa Lukricitayo ata-ni. I kareni, bukkewa tiyo ki carolok meno me poyo wi Lukricitayo ducu ni pe myero gupok kin dano ka nongo gitye ka konyogi, tutwalle i yo me cwiny. Pud dong yomo cwinywa adada me neno ni Jehovah tye ka pwonyowa i yo ma niang iye yot!

15. Gin ango ma wabinyamo i pwony ma lubo man?

¹⁵ I pwony ma lubo man, wabinyamo carolok ma Yecu obolo i kom anyira apar. (Mat. 25:1-13) Yecu onongo mito ni lulub kore guniang carolokke nining i kare man me agikki-ni? Tika ngat mo keken, jami ducu mutimme, ki dong jami ducu mapat pat ma kiloko pigi i carolok-ki gicung pi gin moni madit ma bitimme anyim? Nyo kece en onongo mito ni lulub kore gunong pwony ma bikonyogi i kare me agikki? Kong wanenu.