1, 2. Gin ango ma nyuto mar matut ma Yecu tye kwede pi dano?

 LATIN kayo pa Lubanga aye obedo ngat ma kikwongo cweyone dok en oweko lanen maber i nyuto ryeko matut pa Jehovah. En onyuto ryeko macalo “ladiro tic” i kare ma obedo ka tic kacel gin ki Wonne. Go kong yomcwiny ki dong yengo ma en obedo kwede i kare ma Wonne “oketo polo” ki dok “oketo guti me te lobo ducu.” Ento, kadi bed ni en onongo tye ki pwoc pi jami ducu ma Wonne ocweyogi, cwiny Latin kayo pa Lubanga ‘omaro litino pa dano’ makato. (Car. 8:22-31) Ada, Yecu onyuto mar pi dano kadi wa i kare ma en peya obino i lobo.

² Lacen, me nyuto genene kacel ki marre pi Wonne, ki dok mar matut ma en tye kwede pi “litino pa dano,” Latin kayo pa Lubanga “oweko meno ducu”[omine kene] ka ginywale macalo dano. En otimo meno me miyo “kwone me koko jo mapol.” (Pil. 2:5-8; Mat. 20:28) En onongo pud dong maro litino pa dano ya! I kare ma Yecu onongo pud tye i lobo kany, Lubanga omine teko me timo tango mapol me nyuto mar matut ma en tye kwede pi dano. Pi meno, Yecu onyuto jami mabeco ma en bitimone i wi lobo lung i anyim.

3. Gin ango ma wabinyamo i pwony man?

 ³ Bino pa Yecu i lobo bene okonye me ‘tito lok me kwena maber me ker pa Lubanga.’ (Luka 4:43) En onongo ngeyo ni Ker meno bikonyo me lonyo nying Wonne ki dok jwayo woko matwal peko ducu ma dano gitye ka denone. I kare ma Yecu obedo ka tito kwena, en otimo tango mapol dok tango magi gunyuto mar madit ma en tye kwede pi dano. Pingo man pire tek botwa? Pien pwony ma wanongo ki iye miniwa tekcwiny kacel ki gen pi anyim. Kong dong wanyamu tango angwen ma Yecu otimogi.  

4. Ngo ma otimme i kare ma Yecu orwatte ki laco mo ma kome ki dobo?

⁴ Yecu onongo tye i ticce me pwony i Galilaya. I gang mo acel ki kunnu, Yecu orwatte ki laco mo ma kome lit. (Mar. 1:39, 40) Laco meno onongo tye ki two dobo. I kare ma daktar Luka tye ka tito kit ma two pa laco-ni lit kwede, en owaco ni “dobo orwato i kome.” (Luka 5:12) “Ka oneno Yecu, ci oryebbe piny olege ni, ‘Ladit, ka imito, itwero lonya.’” Laco ni onongo pe ki akalakala mo keken ni Yecu tye ki teko ma romo cange, ento gin ma onongo en mito ngeyone aye ni, tika Yecu tye ki miti me cange? Yecu onongo bidok i kwacce-ni nining? Gin ango ma onongo Yecu tye ka tamone i kare ma oneno kit ma kom laco-ni orwato kwede ki dobo? Tika Yecu onongo bibedo calo Luparicayo ma pe giparo pi dano ma gitye ki two dobo-ni? Gin ango ma onongo ibitimo?

5. Pingo Yecu onongo mito cango laco mo ma kome ki dobo?

⁵ Laco ma kome ki dobo-ni nen calo pe obedo ka redo ni “koma ki keni, koma ki keni” kit ma kicoyo kwede i Cik pa Moses. Ento Yecu pe okeco i kom laco-ni. Ma ka meno, en oketo cwinye i kom laco-ni wek ekonye. (Levi 13:43-46) Pe wangeyo ngo kikome ma Yecu obedo ka tamone ento wangeyo kit ma en owinyo kwede. Ki cwiny me kica, Yecu otimo gin me aura. En oryeyo cinge ci ogudo ladobo-ni, kun loko ki dwon ma nyuto teko kacel ki cwiny me kica ni: “Amito; komi olony.” Ci “dobo ocang [woko] ki i kome.” (Luka 5:13) Ki lok ada, teko pa Jehovah pe okonyo Kricito me timo tango meno keken ento bene me nyuto kit ma Yecu maro kwede ki dano.​—Luka 5:17.

6. Gin ango ma pire tek ma lubbe ki tango ma Yecu otimogi-ni, dok ginyuto gin ango?

⁶ Teko pa Lubanga okonyo Yecu Kricito me timo tango mapol mapat pat me aura. En pe ocango dobo keken ento ocango two ki goro ducu mapat pat ma dano onongo gitye kwede. Ginacoya wacciwa ni: “Lwak guuro tutwal ka guneno lutelebgi oto guloko, jo ma cinggi okwe gucang, jo ma tyengi ongol guwoto, kadi wa lutowang bene guneno piny.” (Mat. 15:31) I kare ma Yecu ocango jo magi ma komgi lit-ti en onongo pe mito dul kom ngat mo ma kome yot wek ekobi i komgi. En ocango ka ma lit-ti kikome! Ki dok en ocango dano cutcut, i kine mukene bene ki ka mabor. (Jon 4:46-54) Tango magi me aura ni ginyuto ngo? Ginyuto ni kit macalo Yecu tye Kabaka i polo-ni, en pe tye ki teko keken ento bene tye wa ki miti me cango two kacel ki goro ducu matwal. Pwonyo kit ma Yecu otero kwede ki dano miniwa gen ni meno i lobo manyen lok pa lanebi me Baibul ma waco  ni: “Kica [bi]make i kom jo magoro ki ma piny obwoyogi” bicobbe. (Jab. 72:13) Ada, Yecu bitimo gin ma cwinye mito wek ekony dano ducu ma komgi lit.

7, 8. Gin ango ma Yecu otimo i kare ma oa ki i Galilaya me cito i Judaya?

⁷ Dwe mogo manok okato i nge kare ma Yecu orwatte ki laco mo ma kome ki dobo i Galilaya. I wotte me tito kwena maber me Ker pa Lubanga en oa ki Galilaya ci ocito kwede wa i Judaya. Pwony pa Yecu kacel ki kit me kwone nen calo ogudo kwo pa dano alip mapol adada. Cwinye onongo mito adada me tito kwena maber bot lucan, bot jo ma tye i opii ni gibigonyogi woko, ki dok me cango jo ma cwercwiny onurogi.​—Ic. 61:1, 2; Luka 4:18-21.

⁸ Dwe me Nican oromo. Yecu owoto i Jerucalem i kwer me Nipo me lubo cik pa Wonne. Gang meno onongo opong adada ki tic mapat pat i kare ma dano gitye ka bino i kwer. I kumalo me ot pa Lubanga, onongo tye iye kut mo ma kilwongo ni Beteceda, ki kunnu Yecu orwatte ki laco mo ma kome lit.

9, 10. (a) Ngo ma oweko dano onongo giwoto i kut me Beteceda? (b) Gin ango ma Yecu otimo i kut meno, dok man pwonyowa gin ango? (Nen cal ma tye i pot karatac 13.)

⁹ Dano mapol ma komgi lit dok gigoro onongo gicokke i Beteceda. Gin ango ma oweko guwoto kunnu? Pi tyen lok ma pe kitito, gin onongo giye ni ka dano ma kome lit olute i kut man ka otwagge, ci kome cang i yo me tango. Go kong kit ma pinye onywene kwede pienni nongo dano mapol ma gimito cang gitye ki par madwong adada dok gipe ki gen mo keken. Ento gin ango ma otero Yecu i dog pii meno kun onongo kome pe lit? Ki lok ada, cwiny me kica aye ma oweko Yecu owoto bot laco man ma twone orii makato wel mwaka ma Yecu obedo kwede i lobo-ni.​—Kwan Jon 5:5-9.

¹⁰ Tika itwero goyo kit ma wang laco man onongo opong kwede ki cwercwiny i kare ma Yecu openye ka en mito ni kome ocang? En ogamo cutcut. Laco ni onongo mito ni kicange ento pe ngeyo kit ma kibicange kwede, pien ngat mo ma myero otere i pii pe. Yecu owacci laco-ni otim gin mo ma timone pe yot​—okwany kabutone ci ociti. Laco-ni otimo kit ma Yecu owaco-ni, okwanyo kabutone ci ocako wot. Tango man nyuto gin ma Yecu bitimone i lobo manyen. Tango man bene nyuto ni Yecu tye ki cwiny me kica. En oyenyo jo ma gitye i peko. Lanen pa Yecu-ni myero ocuk cwinywa me medde ki yenyo jo ma i wang ticwa ma gitye ki par pien jami maraco tye ka timme i lobo.

11. I yo ma nining ma Marako 5:25-34 nyuto cwiny me kica ma Yecu obedo kwede i kom jo ma komgi lit?

¹¹ Kwan Marako 5:25-34. Pi mwaki 12, dako man obedo ka kwo kwo me lewic tutwal. Twone ogudo jami ducu ma en timo i kwone, ma man kwako worone bot Jehovah. Kadi bed ni “en olimo can madwong ki bot ludaktar mapol; [dok] olanyo limme ducu,” twone pud omedde ameda. Ento i nino mo acel, dako-ni ogoyo cura mapat wek twone ocang. Dako-ni owoto ki i kin lwak ci ogudo bongo pa Yecu. (Levi 15:19, 25) I kare ma Yecu oniang ni teko oa woko ki i kome, ci openyo anga ma ogude.  Ki “lworo, kun kome myel” dako-ni “oryebbe i nyime, otitte lok ducu.” Ma dong Yecu oniang ni Wonne Jehovah ocango dako-ni, en otero dako-ni i yo me kica kun wacce ni: “Nyara, niyeni ocangi; wot ki kuc, twoni dong otyeko cang matwal.”

12. (a) Ma lubbe ki gin ma dong wanyamo-ni, itwero wacci Yecu obedo dano ma nining? (b) Lanen ango ma Yecu oweko botwa me aluba?

¹² Yecu onongo pud dong lakica ya! Dong waneno kit ma en onongo maro kwede ki jo ma komgi lit. Catan mito ni wabed ki tam ni meno pe kimarowa dok bene ni konywa pe. Tango ma Yecu otimogi-ni ginyuto ni en paro piwa kacel ki can ma watye ka denone. En pud dong obedo Kabaka kacel ki Lalamdog Madit ma lakica ya! (Ibru 4:15) Pe yot botwa me niang kit ma jo ma gitye ki two ma pe cang giwinyo kwede tutwalle ka pe wakato ki i kodi two meno. Tam kong i kom Yecu, kad bed ni kome pe obedo lit ento en pud onyuto cwiny me kica i kom jo ma komgi lit. Omyero watute wunu me lubo lanen pa Yecu-ni ki kerowa ducu.​—1 Pet. 3:8.

13. Cero Lajaro nyuto ni Yecu obedo dano ma nining?

¹³ Cwercwiny ma jo mukene gitye kwede ogudo Yecu adada. Yecu “iye owang matek” dok ‘ocur ki i cwinye’ pien oneno dano gitye ka kok i kare ma lareme Lajaro oto. En owinyo marac adada kadi bed ni en onongo ngeyo ni ebicero Lajaro i cawa meno. (Kwan Jon 11:33-36.) Lewic pe omako Yecu me nyuto kit ma ewinyo kwede ki i cwinye. Jo ducu ma guneno guniang mar ma  Yecu onongo tye kwede i kom Lajaro kacel ki jo me ode. Yecu onyuto cwiny me kica adada kun tiyo ki teko ma Lubanga omiyo i kare ma ocero lareme.​—Jon 11:43, 44.

14, 15. (a) Gin ango ma nyuto ni Jehovah tye ki miti madit me jwayo peko ducu ma dano gitye ka denone? (b) Kubbe ango ma tye i kin nicer ki kit ma Lubanga wiye bipo kwede i kom jo muto?

¹⁴ Baibul waco ni Yecu tye i “cal pa Lubanga kikome.” (Ibru 1:3) Pi meno, ma lubbe ki tango ma en otimogi-ni, Yecu onyuto ni en kacel ki Wonne gitye ki miti me jwayo cwercwiny ma two ki to gikelo. Miti man pe gik i kom nicer mogo manok ma kicoyo pigi i Baibul. Yecu owaco ni: “Kare bibino ma jo ducu ma tye i lyel . . . gibikatti woko.”​—Jon 5:28, 29.

¹⁵ Nicer man kwako kit ma Lubanga wiye bipo kwede pi dano ma guto. Lubanga Won Twer Ducu ma en aye ocweyo dano-ni, bipo i jami ducu ma i kom jowa me amara ma guto, man bene kwako wa kitgi mogo ma kinywalogi kwede kacel ki ma gupwonyo apwonya. (Ic. 40:26) Pe ni Jehovah twero po i komgi keken ento en bene mito po i komgi. Cer pa Lajaro kacel ki mogo ma kicoyo pigi i Baibul ginyuto jami ma bitimme i kabedo lung i lobo manyen.

16. Mot ango ma jo mapol ma gitiyo pi Lubanga gibibedo kwede?

¹⁶ Ka wagwoko gennewa macalo Lukricitayo, ci wabineno tango acel ma pud dong dit loyo tango mo keken​—tango me bwot ki i twon can madit atika-ni. Cutcut i nge lweny me Armagedon, tango mukene ma bitimme aye ni dano ducu gibedo ma komgi yot. (Ic. 33:24; 35:5, 6; Yabo 21:4) Go kong ni itye ka neno dano ka gibolo maraya wang, lamed dwan ma luding it giruko i itgi, odo komo, lela pa lungolo ki dong jami macalo magi. Pi tyen lok matir, Jehovah biweko jo ma bibwot ki i Armagedon gibedo ma komgi yot. Jo magi ma gubwot-ti gibibedo ki tic me atiya. Gin aye gibiloko lobo ducu doko paradic mamwonya adada.​—Jab. 115:16.

17, 18. (a) Pingo Yecu otimo tango? (b) Pingo myero itute me bedo tye i lobo manyen pa Lubanga?

¹⁷ Kit ma Yecu ocango dano mapol i kare mukato angec-ci cukocwiny “lwak dano mapol ata” i kareni dok weko gibedo ki gen madit ni en bicango two ducu. (Yabo 7:9) Tango magi ma Latin kayo pa Lubanga otimogi-ni ginyuto cwiny ma onongo en tye kwede ki dok marre madit pi dano. (Jon 10:11; 15:12, 13) Cwiny me kica ma Yecu tye kwede nyuto ni Jehovah paro pi luticce ki acel acel.​—Jon 5:19.

¹⁸ Dano gitye ka cur acura ki arem malit ki dok gitye ka to woko. (Rom. 8:22) Wamito lobo manyen pa Lubanga ka ma kibicango iye arem ducu kit ma en ociko kwede con. Malaki 4:2 miniwa gen ni meno jo ma kicangogi ‘gibipye macalo lutino dyangi,’ ki yomcwiny pien nongo gibedo labongo roc. Pwoc kacel ki niye ma watye kwede i kom gicikke pa Jehovah myero ocuk cwinywa me timo jami ducu ma watwero me donyo i lobo manyen. Pud dong cwinywa yom ya me ngeyone ni tango ma Yecu otimogi i kare ma en tye i lobo-ni ginyuto ni dano gibibedo ki yomcwiny i te loc pa Meciya pienni nongo jami ducu maraco dong gikwanyo woko!