LOK MA I POK NGEYE | KIT ME LWENY KI PAR
Par Tye ka Weng!
“Acito ka wilo cam ento anongo biscuit keken—ma ki medo welle ki ciling 10,000 kulu ma pe kit ma myero kicat kwede! Orwone, gin acama onongo dong pe i dukan.”—Paul, Zimbabwe.
“Cwara oketa piny ci owacci ebiwekowa woko. Onongo abiciro ket keny man nining? Gin ango ma onongo bitimme i kom lutinona?”—Janet, bedo i Amerika.
“I kare ma awinyo mac ma i wi mutoka tye ka koko, angweco abuto piny i dye ot pien bom onongo te ka mwoc. I nge cawa mogo, cinga onongo pud tye ka myel.”—Alona, Israel.
Wakwo i kare ma dano gitye ki par pien Baibul wacci “piny bibedo marac.” (2 Temceo 3:1, Baibul pa Katoli) Dano mapol gitye ka kato ki i kwo matek calo can lim, keto keny nyo nyom, lweny, two maraco, ki dong can ma poto atura nyo ma dano aye gikelo. Medo i kom meno, dano gitye ki par mapol mapat pat: ‘Tika gin ma tye ka dongo i koma-ni twero lokke doko kanca?’ ‘Kit lobo ango ma likwaya gibibedo iye?’
Pe par ducu girac. Pol kare wabedo ki par ma peya watimo peny nyo ka kimito penyowa pi dog tic moni. Bedo ki par bene twero gengowa me timo bal. Ento bedo ki par mapol tutwal bene rac. Kwed mapol ma kitimo cokcok-ki i kom jo madito makato 68,000 nyuto ni meno bedo ki par kadi matidi mo twero weko wato con adada. Pi tyen lok matir Yecu openyo ni: “Anga i kinwu ma twero medo mwaka acel i kom kwone pi bedo ki tam [par] mapol?” Ada, bedo ki par pe medo mwaka me kwo pa ngat moni. Pi meno, Yecu omiyo tam ni: “Pe wubed ki tam [par] mapol.” (Matayo 6:25, 27) Ento meno twere nining?
Lagamme cung i kom tic ki ryekowa, dongo niye me ada i kom Lubanga, ki dong bedo ki gen pi kwo me anyim. Kadi bed ni i kareni wape ki pekki maraco ento twero bedo tye i anyim. Kong wanenu kit ma lubo tira man okonyo kwede ki Paul, Janet, ki Alona wek pe gubed ki par mapol.
