1. Gin ango ma lakwena Jon ocuko cwiny Lukricitayo me tam iye, ki dok pingo?

 I 1 JON 3:1, lakwena Jon ocuko cwinywa me tamo matut i kom mar madit ma Jehovah onyuto piwa. I kare ma en owaco ni “kong wunen kit mar madit ma Won omiyowa,” Jon onongo tye ka cuko cwiny Lukricitayo me tamo matut i kom mar ma Lubanga tye kwede pigi. Lwodo lok i yo ma kit meno bidongo marwa i kome dok bene jingo wat i kinwa kwede.

2. Pingo jo mogo ginongo tek tutwal me niang ni Lubanga marogi?

² Ki bot jo mukene, lok man ni Lubanga maro dano-ni obedo gin ma welo. Ki botgi, Lubanga obedo ngat ma myero kilwor dok kiwiny doge. Nyo gwok pi pwony goba ma dong orwako lwite-ni, gin gitamo ni Lubanga pe maro dano dok bene ngat mo pe romo marre. Ki tungcel, jo mukene gitamo ni Lubanga maro dano ducu dok en marogi labongo paro pi gin ma gitwero timone nyo pe giromo timone. I kare ma itye ka kwano Baibul, iniang ni mar obedo kit ma pire tek pa Lubanga dok marre omiyo en ocwalo Wode wek oto macalo ginkok piwa. (Jon 3:16; 1 Jon 4:8) Kadi bed kit meno, kit ma iwinyo kwede i kom mar pa Lubanga piri gudo kit me dongoni.

3. Lok ada mene ma pire tek ma konyowa me niang mar ma Jehovah tye kwede piwa?

 ³ I yo macalo mene ma Jehovah nyuto marre piwa? Me konyowa gamo lapeny meno, omyero kong waniang wat ma pire tek ma tye i kinwa ki Lubanga Jehovah. Tye kono ni Jehovah aye Ocweyo dano ducu. (Kwan Jabuli 100:3-5.) Meno aye gin mumiyo Baibul lwongo Adam ni “wod pa Lubanga,” dok Yecu opwonyo lulub kore me lega bot Lubanga ni: “Wonwa ma tye i polo.” (Luka 3:38; Mat. 6:9) Kit macalo Jehovah obedo Lacwecwa-ni, en tye Wonwa; dok wat ma i kinwa ki en rom aroma ki wat ma tye i kin wego ki litinone. Ket i yo macek ni, Jehovah marowa calo wego ma maro lutinone.

4. (a) Jehovah pat ki wegiwa nining? (b) Ngo ma wabinyamo i pwony man ki dong ma lubo?

⁴ Wegiwa ma gunywalowa gitye ki roc. Kadi bed gutute me nyuto mar ento margi pe oo i kom kit ma Jehovah nyuto kwede ki marre macalo lanyodo. Ki lok ada, jo mogo wigi po i kom jami maraco mutimme i komgi i kare ma gitye ka dongo pienni wongi obedo ka unogi. Meno gin malit dok cwero cwiny adada. Jehovah pe obedo wego ma kit meno. (Jab. 27:10) Ka wangeyo kit ma Jehovah marowa dok gwokowa kwede, ci wabinyikke bote. (Yak. 4:8) I pwony man, wabinyamo yo angwen ma ginyuto kit ma Jehovah marowa kwede. I pwony ma lubo man, wabinyamo yo angwen ma waromo nyuto ki marwa pi Jehovah.

5. Gin ango ma Paulo owaco bot jo Atene madok i kom Lubanga?

⁵ I kare ma Paulo tye i Atene i lobo Grik, en oneno gang meno opong cal ki lubange ma dano onongo gitamo ni ominigi kwo ki dong jami ma mitte. Man oweko Paulo owaco ni: “Lubanga ma yam ocweyo lobo ki jami ducu ma tye iye-ni . . . miyo kwo ki dano ducu wa ki yweyo ki jami ducu. . . . Wakwo i en, wawoto i en, wabedo i en.” (Tic 17:24, 25, 28) Ada, pi mar ma Jehovah tye kwede, en ominiwa “jami ducu” ma mitte pi kwowa. Tam kong i kom jami mogo ma en ominiwa pienni marowa.

6. I yo ango ma lobo nyuto ki mar ma Jehovah tye kwede piwa? (Nen cal ma tye i pot karatac 23.)

⁶ Nen kong lobo ma Jehovah aye Ocweyo-ni, en “omiyo lobo bot dano.” (Jab. 115:15, 16) Lucayan gutiyo ki cente madit adada me niang ka ce jami mogo tye i dan polo ma gical ki lobo. Kadi bed kinongo ni jami ma kit magi gitye miya mapol, ento lucayan cwinygi pe yom pien guniang ni jami magi pe giromo gwoko kwo kit ma lobo gwoko kwede-ni. Lobo dok pat adada pien kicweyo me gwoko jami ducu ma Lubanga ocweyogi. Mapat ki miniwa jami ducu ma mitte me kwo, Jehovah bene ocweyo lobo wek obed kabedo mo mamwonya, ka ma wawinyo agonya iye, ki dong ka ma wanongo iye mit pa kwo. (Ic. 45:18) Man nyuto mar madit ma Jehovah tye kwede i komwa.—Kwan Yubu 38:4, 7; Jabuli 8:3-5.

7. Kit ma Jehovah ocweyowa kwede nyuto nining ni en marowa?

⁷ Kadi bed ni Jehovah ocweyo lobo mamwonya piwa, en ngeyo ni pe omyero wabed ki jami me kom keken wek wanong yomcwiny i kwowa. Latin bedo agonya ka ce en winyo ni lunyodone gimarre dok giparo pire. Jehovah ocweyo  dano i calle, kun minigi kero i yo me cwiny wek gujol marre kacel ki gwokke. (Acak. 1:27) Medo i kom meno, Yecu owaco ni: ‘Gitye ki yomcwiny jo ma gingeyo ni gin lucan i yo me cwiny.’ (Mat. 5:3) Macalo wego ma lamar, Jehovah “miyowa jami ducu mabup ma yomo cwinywa,” i yo me kom ki dong me cwiny.—1 Tem. 6:17; Jab. 145:16.

8. Pingo wamito ni Jehovah opwonywa?

⁸ Wego gimaro lutinogi dok gimito ni gigwokgi wek pe kibwolgi. Tye kono ni, lunyodo mapol pe gitwero miyo tira mupore bot lutinogi pien gin kikomgi gukwero lubo tira ma i Lok pa Lubanga. Pol kare man kelo cwercwiny ki lanywen mapol. (Car. 14:12) Ki tungcel, Jehovah obedo “Lubanga me ada.” (Jab. 31:5) En maro litinone dok bene cwinye yom me weko gin ngeyo lok ada ma twero konyogi i yo me kwogi ducu, tutwalle i kit me worogi. (Kwan Jabuli 43:3.) Lok ada ango ma Jehovah opwonyowa kwede, ki dok man nyuto nining ni en marowa?

9, 10. (a) Pingo Jehovah opwonyowa ki lok ada madok i kome? (b) Gin ango ma Jehovah opwonyowa kwede ma lubbe ki yubbe piwa?

⁹ Mukwongo, opwonyowa ki lok ada madok i kome. En otito botwa nyinge ma nonge i Baibul tyen mapol makato nying mo keken. I yo ma kit man, Jehovah nyikke cok botwa wek wange en. (Yak. 4:8) Jehovah bene onyuto kite botwa wek waniang i kome. Ka waneno jami ma Jehovah ocweyogi, wapwonyo ni en tye ki teko kacel ki ryeko dok bene onyuto i Ginacoya ni engolo kop atir ki dong tutwalle onyuto mar. (Rom. 1:20) Dok ka wakwano Baibul, wapwonyo kit ma en terowa kwede i yo mupore ki dok marre piwa. Wanyikke cok bot Jehovah ka wangeyo kit mabeco ma en tye kwede.

¹⁰ Wek wanong adwogi maber, Jehovah bene onyuto botwa yub ma en tye kwede piwa, ma en aye ni watye but jo me ode. Man kelo kuc i kin jo me ode ma tye i polo ki lobo. Wapwonyo ki i Baibul ni kicweyo dano pe me moko tam pigi nyo lone kengi, dok kwero lubo cik man ma pire tek adada-ni kelo adwogi marac. (Jer. 10:23) Jehovah ngeyo gin maber piwa. Ka wajolo twero pa Lubanga, ci wabedo ki kuc kacel ki yengo i kwowa. Jehovah pud dong onyuto marre ya pien opwonyowa ki lok ada man ma pire tekki!

11. Jehovah ocikke me timo gin ango me nyuto marre kacel ki parre piwa?

¹¹ Wego ma lamar tamo pi lutinone dok en mito ni gubed ki kwo maber i anyim. Tye me cwercwiny ni pol pa dano pe gingeyo gin ma tye i anyim, nyo gitiyo ki kwogi ducu me yenyo jami ma pe keligi adwogi marii. (Jab. 90:10) Macalo lutino pa Lubanga, wawinyo ni kimarowa pien Jehovah ocikke me keliwa anyim mamwonya. Meno miyo wabedo ki kwo ma tye ki tyen lok.

12. Tira ma Jehovah omiyo bot Kain gin ki Baruk nyuto marre nining?

¹² “Ikeco pingo? Wangi oballe pingo? Ka itimo maber pe giye? . . . ento myero iloye [bal].” (Acak. 4:6, 7) Meno obedo tira ma Jehovah omiyo i cawa rwatte kikome. Jehovah ociko Kain pien nen calo onongo mitine tye me timo gin  marac. Tye me cwercwiny ni Kain pe owinyo lok meno, ma oweko en onongo adwogi marac. (Acak. 4:11-13) I kare ma Baruk, karan pa Jeremia onongo winyo ni eol dok cwinye otur, Jehovah omiye tira ma okonye me niang ka ma pekone tye iye. Ka iporo ki Kain, Baruk ojolo tira pa Jehovah dok olaro kwone.—Jer. 45:2-5.

13. Pingo Jehovah oweko luticce ma lugen guwok ki i atematema?

¹³ Paulo ocoyo ni, “Rwot [Jehovah] pwonyo jo ma en maro, pwodo latin acel acel ma en gamo.” (Ibru 12:6) Ento, miyo pwony pe kwako pwod keken. Tira kimiyo i yo mapol mapat pat. I Baibul, wakwano lok i kom lutic pa Jehovah ma gubedo lugen ma Jehovah opwonyogi gudoko jo mabeco. Me labolle, Yucepu, Moses, ki dong Daudi ma gukato ki i atematema mapol. I kare ducu ma gitye i atematema, Jehovah onongo tye kwedgi. Kwano kit ma Jehovah okonyogi kwede ki i atematema magi ki dok kit ma otiyo kwedgi i yo me aura weko wawinyo ni meno Jehovah paro dok maro luticce.—Kwan Carolok 3:11, 12.

14. Pwod ma Jehovah miniwa miyo wangeyo nining ni en marowa?

¹⁴ Kadi bed ni watimo bal, Jehovah pud medde ki marowa. Ka jo ma gutimo bal gujolo tira dok gungut pi pwod ma Jehovah ominigi, ci en ‘biweko balgi woko ducu. (Ic. 55:7) Man te lokke ngo? Lok ma Daudi owaco i kom kica pa Jehovah nyuto botwa ada ni en Wego ma weko balwa: “En ma weko balla  ducu, en bene ma cango two ducu ki i koma. En olaro kwona omiyo pe adonyo i bur, oketo mar mere ma pe lokke kacel kicane i koma; . . . Kit macalo tung wokceng tye bor kwede ki tung potoceng-ngi, en kwanyo balwa woko ducu ki i komwa cwalo ka mabor kit meno.” (Jab. 103:3, 4, 12) Wajol wunu tira ma a ki bot Jehovah kacel ki pwod ma en miniwa kun wangeyo ni meno obedo yo ma en nyutiwa kwede ki mar.—Jab. 30:5.

15. I yo ango ma dok Jehovah nyuto ni emarowa kwede?

¹⁵ Ki lok ada, gin ma pire tek bot wego ma lamar aye obedo gwoko jo me ode ki i kom peko mo keken. Jehovah, Wonwa me polo bene timo kumeno. Laco jabuli oloko i kom Jehovah ni: ‘Rwot maro jo ma dag gin marac; en gwoko jone ma gene; en larogi woko ki i cing jo maraco.’ (Jab. 97:10) Nen kong labol acel. Pi tong wangi tek adada! Meno aye kit ma Jehovah winyo kwede pi jone. (Jek. 2:8, NW.) Lubanga pud dong tero luticce macalo jo ma pigi tek ya!

16, 17. Tit yo mogo ma Jehovah ogwoko kwede ki jone kadi wa i kareni.

¹⁶ Yo acel ma Jehovah gwoko ki jone aye ni en tiyo ki lumalaikane. (Jab. 91:11) Lamalaika acel olaro Jerucalem ki i cing mony me Aciria kun neko gin 185,000 i dyewor acel keken. (2 Luker 19:35) Lakwena Petero gin ki Paulo kacel ki jo mukene lamalaika olarogi ki i mabuc. (Tic 5:18-20; 12:6-11) I karewa ni bene Jehovah pud gwoko jone. Lacungo pi gang kal mo olimo lobo mo acel i Afrika ci owaco ni apokapoka me wibye ki dini opoko kin dano me lobo meno. Lweny, yak, buto ki dano tektek ki dong nek tye ma oweko ayelayela ki turo cik oromo kin piny ducu. Ento inongo ni meno pe tye ominwa nyo laminwa mo ma orwenyo kwone i tim meno, kadi bed ni utmegiwa mapol gurwenyo jamigi ducu. I kare ma kipenyogi kit ma kwo tye kwede, gugamo ki bwonyo madit kun giwaco ni: “Watye maber, wacwalo pwoc bot Jehovah!” Gin guniang ni Jehovah kara ada marogi.

¹⁷ Tye kono ni, lupwonnye mogo calo Citefano kacel ki jo mukene guto pienni gubedo lugen bot Jehovah. Kadi bed kumeno, Lubanga gwoko jone ducu kun poyo wigi i kom diro ma Catan tiyo kwede. (Ep. 6:10-12) En tiyo ki Lokke kacel ki bukke ma gijenge i Baibul wek ekonywa me niang lok ada i kom bwola me yenyo lonyo, galowang ma opong ki tim tarwang nyo gero, tic i yo marac ki Intanet medo ki mukene. Ada, macalo Wego ma lamar, Jehovah gwoko dok mito ni jone gubed ki kwo maber.

18. Iwinyo nining pienni Jehovah marri?

¹⁸ I nge nyamo yo mogo manok ma Jehovah onyuto kwede ki mar piwa, waromo winyo kit ma Moses owinyo kwede ki i cwinye. I kare ma Moses obedo ka tamo i kom mwaki mapol ma ebedo ka tic kwede pi Jehovah, en owaco ni: “Kwe cwinywa odiko ki mar meri ma pe lokke, wek wawer wer wabed ki yomcwiny pi kare me kwo mewa ducu.” (Jab. 90:14) Watye ki mot madit me niang ki dok ngeyo ni Jehovah marowa i kareni. Calo lakwena Jon, wawaco ni: “Kong wunen kit mar ma madit ma Won omiyowa!”—1 Jon 3:1.