1, 2. Ma lubbe ki lok pa lakwena Jon, Lubanga onyuto kit ma waromo marre kwede nining?

 POL kare dano giwaco ni wek wego opwony latinne i yo maber loyo, mitte ni en myero onyut lanen maber. Lakwena Jon ocoyo ni “wabedo ki mar, pien en [Lubanga] okwongo marowa.” (1 Jon 4:19) Pi meno, nen ka maleng ni Jehovah oweko lanen maber macalo wego wek wamarre.

² Lubanga “okwongo marowa” i yo mene? Lakwena Paulo owaco ni: “Kricito yam oto piwa i kare ma pud wan lubalo; meno nyuto kit mar ma Lubanga marowa kwede.” (Rom. 5:8) Pien omiyo Wode me to macalo ginkok pi jo ma gitye ki niye—Jehovah onyuto mar kikome. Mar man nen ka wamiyo jami, ka watimo jami i yo ma nyuto ni watye ki cwiny me jalle ken. Pien Lubanga onyuto cwiny me kica, man oweko wangeyo en dok wanongo adwogi mabeco ki i marre kun bene wanyute mar.—1 Jon 4:10.

3, 4. Omyero wamar Jehovah nining?

³ Mar obedo kit ma pire tek pa Jehovah, pi meno waniang gin mumiyo Yecu owaci cik ma pire tek pa Lubanga en ene: ‘Mar Rwot [Jehovah] Lubangani ki cwinyi ducu, kwoni ducu, ki tammi ducu ki tekki ducu.’ (Mar. 12:30) Lok pa  Yecu-ni pwonyowa ni maro Lubanga obedo cik me acel ma pire tek adada dok myero oa ki i cwinywa. Ka wamaro ngat moni nyo gin moni nucunucu, meno cwero cwiny Lubanga. Ento, wangeyo ni maro Lubanga bene kwako kwowa, tamwa, kacel ki tekowa ducu. Man te lokke ni maro Lubanga ki cwiny me ada pe obedo mere kit ma wawinyo kwede ki i cwinywa. Medo i kom maro Lubanga ki cwinywa ducu, marwa i kome bene gudo kwowa i yo me cwiny ki dong jami ma watimogi. Ma lubbe ki lok pa lanebi Mika, meno aye gin ma Jehovah mito ki botwa.—Kwan Mika 6:8.

⁴ Watwero nyutone nining ni ada wamaro Wonwa me polo? Myero pe wamarre nucunucu. Kit ma Yecu onyuto kwede, omyero wamare i yo me cwiny, tamwa ki dok kwowa ducu. I pwony mukatoni, wanyamo yo angwen mapat pat ma Jehovah nyuto kwede marre madit pi litinone. Kong wanenu kit ma watwero nyuto ki dok dongo marwa i kom Jehovah i yo ma en mito.

5. Gin ango ma watwero timone me nyuto marwa pi jami ma Jehovah otimogi?

⁵ Ngo ma ibitimo ka ngat mo omini mot? Labongo akalakala, olo to ibinyuto pwoci i yo mo. Medo i kom meno, ibitiyo ki mot meno i yo maber adada ento pe i yo marac. Lapwonye Yakobo ocoyo ni: “Kit gin mo ducu maber, ki mot ducu mabeco twatwal ma gimiyowa, a ki malo, a ki bot Lubanga Won bino piny, ma en aye won gin ducu ma ryeny i polo, ma pe tye ki alokaloka mo, dok tipo mo ma nyuto lokkene bene pe.” (Yak. 1:17) Jehovah miniwa jami ducu ma wamito wek wakwo dok wabed ki yomcwiny. Tika meno pe cuko cwinywa me maro en?

6. Ngo ma Luicrael onongo myero gutim wek gumede ki nongo mot pa Jehovah?

⁶ Jehovah ogwoko Luicrael pi mwaki miya mapol dok en okonyogi kun minigi jami me kom ki dong i yo me cwiny. (Nwo. 4:7, 8) Gin gumedde ki nongo mot magi pien gubedo ka lubo Cik pa Lubanga, ma i kine tye cik me miyo kare ki kare mot me “cam mukwongo cek i . . . wi mwaka” bot Jehovah kare ki kare. (Nia 23:19) Man onongo biweko Luicrael ginyuto ni gitye ki pwoc pi mar kacel ki mot mapol ma Jehovah omingi.—Kwan Nwoyo Cik 8:7-11.

7. Watwero tic ki ‘lonyowa’ me nyuto marwa bot Jehovah nining?

⁷ Wan kono? Kadi bed ni meno i kareni pe watyero lee macalo gitum, pore ni omyero wanyut marwa bot Lubanga kun wawore ki ‘lonyo’ ma watye kwede. (Car. 3:9) I yo macalo mene ma watwero nyuto kwede marwa? Ngene kene ni, watwero miyo jamiwa me teno kor tic me Ker-ri i wang ticwa ki dong i wi lobo lung. Man obedo yo maber me nyuto marwa bot Jehovah kadi bed ni watye ki jami mapol nyo manok. (2 Kor. 8:12) Ento, pud tye yo mukene ma watwero nyuto kwede ki marwa bot Jehovah.

8, 9. Keto gen i kom cikke pa Jehovah kubbe ki nyuto mar nining? Mi labol.

⁸ Wi pe myero owil pien Yecu opoyo wi lulub kore ni pe myero gubed ka paro pi cam kacel ki ginaruka ento gukwong keto pi Ker-ri obed mukwongo. En owaco ni Wonwa me polo ngeyo gin ma wamito. (Mat. 6:31-33) Kit ma wageno ki cikke meno nyuto mar matut ma watye kwede i kom Jehovah pien  mar ki gen giwoto kacel. Ki lok ada, pe watwero maro ngat moni ka pe wagene. (Jab. 143:8). Pi meno watwero penye ni: ‘Tika yubba kacel ki yo me kwona ginyuto ni meno amaro Jehovah? Tika jami ma atimogi nino ki nino ginyuto ni atye ki gen ni Jehovah twero mina jami ma amito?’

⁹ Lakricitayo mo ma nyinge Mike onyuto mar kacel ki gen ma kit meno. I kare ma en pud tidi, Mike ocako dongo miti madit me tic pi Lubanga i lobo mukene. En onyomme ci onywalo lutino aryo, awobi ki anyaka, ento miti man pe orweny ki i cwinye. I kare ma en okwano lok i kom omege ki lumege ma gitye ka tic i kabedo ma can lutit kwena tye iye, Mike ki luote gumoko tamgi me dwoko rwom me kwogi lapiny. Gucato otgi madit ci gucako bedo i ot mo matidi. I ngeye, Mike oloko biacarane me gwoko lengo odoko matidi ci opwonyo kit me dorone ki i lobo mukene kun tiyo ki Intanet. Mike ki luote gukobo i lobo mukene ento i nge tic pi mwaka aryo ki yomcwiny, en owaco ni: “Waniang ada pa lok pa Yecu ma kicoyo i Matayo 6:33.”

10. Kit ma waneno kwede i kom Kabaka Daudi, lwodo i kom Jehovah konyowa nining?

¹⁰ Mwaki 3,000 mukato angec, jami ma Kabaka Daudi onenogi i dan polo ocuko cwinye adada. Man oweko en ocoyo ni: “Polo ki jami ducu ma tye iye ginyuto deyo pa Lubanga; dan polo bene nyuto tic me cinge.” Lacen, ryeko ma tye i Cik pa Lubanga ogudo cwinye mada ma oweko en owacci: “Cik pa Rwot [Jehovah] ber, dok tye atir; miyo kwo manyen bot dano; gin ma Rwot [Jehovah] ociko tye me ada, miyo ryeko bot luming.” Adwogi maber ango ma lwodo lok ma kit man okelo? Daudi omedde ni: “Mi lok ma a ki i doga ki tam ducu ma tye i cwinya obed ma in ipwoyo, ai Rwot [Jehovah], in gotta dok lakokka.” Ki lok ada, bedo ki pwoc ki wat macok oweko wat maber obedo tye i kin Daudi ki Lubanga.—Jab. 19:1, 7, 14.

11. Wan watwero tic ki ngec ma Jehovah ominiwa me nyuto marwa nining? (Nen cal ma tye i pot karatac 28.)

¹¹ I kareni, watye ki ngec muromo i kom cwec pa Jehovah kacel ki kit ma yubbe tye cobbe kwede. Lobo-ni cuko cwiny dano me kwan i rwom mamalo. Kadi bed kumeno, jami mutimme i kom dano mapol nyuto ni kwan i rwom mamalo kweyo niyewa kacel ki marwa pi Lubanga. Kadi bed ni Baibul cuko cwinywa me maro ngec ento bene wacci omyero wanong ryeko ki dong niang matut. Meno te lokke ni omyero wapwony kit me tic ki ngec ma Lubanga ominiwa wek wanong adwogi maber dok wakony jo mukene. (Car. 4:5-7) Lubanga “mito laro jo ducu, dok mito ni jo ducu gunge lok me ada.” (1 Tem. 2:4) Wanyuto marwa pi Jehovah ka waketo cwinywa me tito kwena maber me Ker-ri bot dano ducu ki dok wakonyo jo mukene me niang yub madit ma Lubanga tye kwede pi dano.—Kwan Jabuli 66:16, 17.

12. Latin acel onyuto pwocce nining pi mic me cwiny ma Jehovah miyo?

¹² Kadi wa lutino bene gitwero nyuto margi bot Jehovah kun ginyuto pwocgi pi jami me cwiny ma en miyo. Shannon owaco ni i kare ma etye mwaka 11, en ki laminne ma mwakane tye 10 gicito kacel  ki lunyodogi i Gure Madit ma wi lokke onongo tye “Lworo Lubanga.” I gure meno, i cawa ma kitye ka miyo pwony mo acel, kilwongo lutino ni gubed ka mo ma kiyubo pigi kengi. En obedo ki lworo ento pud ocito i kabedo meno. I ngeye, cwinye obedo yom mada i kare ma kimiyo bot latin acel acel mic mo maber adada, buk me Questions Young People Ask—Answers That Work. Mic man oweko Shannon oneno Lubanga Jehovah nining? En owaco ni: “Meno aye kare ma aniang ni Jehovah kare tye ada dok bene en mara adada.” Shannon omedde ni: “Pud dong cwinywa yom adada pien Lubangawa madit-ti, Jehovah, miniwa mic mabeco me nono!”

13, 14. Kit ma watero kwede ki tira ma Jehovah miniwa nyuto marwa i kome nining?

¹³ Baibul poyo wiwa ni: “Rwot [Jehovah] pwonyo dok yubo ngat ma en maro, en tye calo wego ma pwodo latin ma cwinye maro mada.” (Car. 3:12) Ento gin ango ma myero watim? Lakwena Paulo oloko ki niango kun wacci: “Kit pwonnye ducu, ka pud watye iye, pe watamo ni obedo me yomcwiny, ento me kumo.” Paulo onongo pe tye ka cayo kit ma pwod pire tek kwede pien omedde ni: “Ento i ngeye lacen kelo kuc keken bot jo ma guyelle iye, pien nongo dong gudoko jo ma kitgi atir.” (Ibru 12:11) Ka wamaro Jehovah, omyero pe wacaa nyo cwinywa ocwer ka pe wamito tira moni. Ki bot jo mogo, man twero bedo atematema madit. Marwa pi Lubanga bikonyowa adada.

¹⁴ I kare pa lanebi Malaki, Lujudaya mapol pe gulubo tira pa Lubanga. Gin onongo gingeyo Cik madok i kom miyo gityer ento pe gubedo ka timone ma omiyo Jehovah ocikogi matek adada. (Kwan Malaki 1:12, 13.) Man onongo pire tek lakwene? Jehovah owaco botgi ni: “Abicwalo can i komwu, dok abiceno gum mewu; adada dong atyeko ceno, pien pe wuketo iye cwinywu [i cikka].” (Mal. 2:1, 2) Ki lok ada, ka waloko odoko kitwa me kwero lubo cik akaka man twero kelo adwogi marac.

15. I kareni, kodi cwiny mene ma myero wagwokke kwede adada?

¹⁵ I lobo man ma ngat acel acel paro pire kekene-ni, pe yot me miyo tira kacel ki pwod ki dok jolone. Kadi wa jo ma gitemme me jolo tira nyo pwod pe gijolo ki cwinygi ducu. Ento, kiwaco bot Lukricitayo ni myero ‘pe gulub tam me lobo man.’ Myero waye dok watim miti pa Lubanga “ma roc mo pe iye.” (Rom. 12:2) Jehovah tiyo ki dulle me miniwa tira ma gudo jami mapol i kwowa i kare ma mitte—kit ma wabedo kwede ki ngat mo ma pe obedo dako nyo laco calo in, liremwa, ki dong mato yamo. Ka wabedo  atera me jolo ki dok waketo i tic tira ma kit meno, wan wanyuto ni watye ki pwoc dok bene wamaro Jehovah ki cwinywa ducu.—Jon 14:31; Rom. 6:17.

16, 17. (a) Pingo omyero kong waniang miti pa Jehovah ma peya wamoko tam? (b) I yo ango ma Luicrael pe gunyuto mar kacel ki gen i kom Jehovah?

¹⁶ Lutino matino gingweco bot lunyodogi ka guneno gin marac tye ka bino i komgi. Ka lutino giwoto ki dongo, gin gicako pwonnye me keto gen i komgi kekengi dok bene gimoko tam pigi kengi. Meno tye i kin jami ma nyuto ni dito tye ka bino. Ento, lutino ma gibedo cok ki lunyodogi pol kare ka gimito timo gin mo gipenyo tam pa lunyodogi ma peya gumoko tam i kom gin moni. Watwero bene timo kumeno i yo me cwiny. Jehovah ominiwa cwiny mere maleng wek otug ‘mitiwa ki teko me tic.’ Ento bedo me lewic dok nyuto ni pe wageno Jehovah ka wamoko tam labongo kong tamone ka ce rwatte ki mitine.—Pil. 2:13.

¹⁷ I nino mo acel i kare pa lanebi Camuel, Lupiliciti guloyo Luicarel i lweny mo ma otimme i kingi. Jo pa Lubanga onongo gimito kony kacel ki gwok adada. Gin ango ma gutimo? Gin guwaco ni: “Wek wacikel canduk me gicikke pa Rwot [Jehovah] ki i Cilo, wek en Rwot [Jehovah] obin obed i dyewa, olarwa ki i cing lumerokwa-ni.” Adwogine obedo ningo? “Nek obedo dwong twatwal, pien Luicrael guto kunnu ma romo jo alip pyeradek ma woto ki tyengi. Ki canduk pa Lubanga bene giyako woko.” (1 Cam. 4:2-4, 10, 11) I kare ma gutero Canduk pa Lubanga i dog lweny, Luicrael onongo nen calo gitye ka yenyo kony ki bot Jehovah. Ki lok ada, gin pe guyenyo tira pa Jehovah ma peya gucito ka lweny; onongo gitye ka lubo tamgi kengi, dok man okelo adwogi marac adada.—Kwan Carolok 14:12.

18. Gin ango ma Baibul pwonyowa ma lubbe ki keto gen i kom Jehovah?

¹⁸ Laco jabuli onyuto cwiny matir i kare ma en ocoyo ni: “Pud abigeno Lubanga aye, dok abipake bene, Lalar mera ki Lubangana. Cwinya poto, miyo apo piri.” (Jab. 42:5, 6) Man pud dong nyuto mar matut pi Jehovah ya! In tika idongo mar ma kit meno kun i jenge i kom Wonwa me polo? Kadi bed ni iromo gamone ni eyo, ento itwero medde ki jenge i kome ma lubbe ki gin ma Baibul wacciwa ni myero watim: “Gen Rwot [Jehovah] ki cwinyi ducu, pe ibed ka jengnge i kom niang ma itye kwede. I kit kwoni ducu wii myero opo i kom Rwot [Jehovah], ci en bitiro yo ma iwoto iye bedo atir.”—Car. 3:5, 6. 

19. I yo macalo mene ma imito ni itute me nyuto mar pi Jehovah?

¹⁹ Pien Jehovah okwongo marowa, en onyutiwa kit ma myero wamar en kwede. Pi meno, kare ducu omyero watam i kom kit ma en onyuto kwede ki marre piwa. Dok bene, wamedde wunu ki nyuto mar matut i kome ‘ki cwinywa ducu, kwowa ducu, ki tamwa ducu ki tekowa ducu.’—Mar. 12:30.