1, 2. I yo macalo mene ma adam wi dano pat adada?

 LEB ma waloko konyowa me kwan, coc, lok, niang lok pa jo mukene, lega, ki dong wero wer me pak bot Jehovah. Jami magi ma watimogi-ni gitye me aura mada dok lucayan peya guniang atir atir kit ma adamwa konyowa kwede me timogi. Pien adam wiwa kicweyo i yo mapat adada, man konyowa me pwonyo leb moni. Laco mo ma okwano i yo matut lok i kom leb ma dano giloko owaco ni, “Kero ma lutino matino gitye kwede me pwonyo leb weko dano gibedo pat ki lee.”

² Kero ma dano tye kwede me loko leb moni obedo mic mua ki bot Lubanga. (Jab. 139:14; Yabo 4:11) Adam wiwa ma Lubanga omiyo-ni bene pat i yo mukene ma pire tek. Ka iporo ki lee, “Lubanga ocweyo dano i kit calle kikome.” Dano gitye agonya me moko tamgi pigi kengi ki dok me tic ki leb ma giloko me keto deyo i kom Lubanga.​—Acak. 1:27.

3. Mic mene maber loyo ma Jehovah omiyo wek wabed ryek?

³ Pi dano weng ma gimito keto deyo i kom Lacwec ma omiyo leb ma waloko-ni, Lubanga bene omiyo Baibul, mic mo ma pud dong ber loyo ducu. Tye kigoyo weng nyo i bute keken i leb makato 2,800 kulu. Ka ilwodo lok i kom coc man  maleng-ngi, ci nongo itye ka pito tammi ki tam pa Lubanga. (Jab. 40:5; 92:5; 139:17) Pi meno, iromo nongo mit pa lwodo lok i kom jami ma “twero pwonyi i yo me larre.”​—Kwan 2 Temceo 3:14-17.

4. Lwodo lok te lokke ngo, dok lapeny mene ma wabinyamogi?

⁴ Lwodo lok te lokke ni iketo cwinyi kacel ki tammi i kom gin moni kadi bed ginne ber nyo rac. (Jab. 77:12; Car. 24:1, 2) Wanongo adwogi maber ka walwodo lok i kom jami ma wapwonyogi madok i kom Lubanga Jehovah gin ki Wode, Yecu Kricito. (Jon 17:3) Ento waromo penye ni, kubbe ango ma tye i kin kwan ki lwodo lok? Kare macalo mene ma watye kwede ma myero walwod iye lok, dok waromo nongo mit pa lwodo lok nining?

5, 6. Ka itye ka kwan, ngo ma romo konyi wek wi opo ki dok iniang gin ma itye ka kwanone?

⁵ Adammi twero timo jami me aura kadi bed pe itamo i komgi matut. Me labolle, tye jami mogo calo yweyo, wot, nyo nyono lela ma gitimme pigi kengi i kwowa ma pe mitte ni myero watam i komgi. Ka itamo mot, man bene rom aroma ki kwan. Pi meno, pire tek ni iket cwinyi wek iniang te lok pa gin ma itye ka kwanone. Ka i cok o i agikki me paragraf moni nyo ibicako kwano wi lok matidi i buk moni, iromo ling manok ci itamo i kom gin ma ikwano wek inen ka ce iniang maber. Tye kono ni, pe iromo nongo adwogi maber ka ce iweko jami mogo dwoyo tammi nyo pe iketo cwinyi i kwanni. Ngo ma watwero timone wek gin ma kit man pe otimme?

⁶ Kwed ma lucayan gutimo nyuto ni wiwa po oyot ka wakwano nyig lok ki dwan malongo i cawa me kwan. Ngat ma Ocweyo adamwa-ni ngeyo man maber adada. Meno aye gin mumiyo en ociko Yocwa ni myero okwan buk me Cik kun ‘lwodo i cwinye.’ (Kwan Yocwa 1:8) Ka pe gin mo, ibinongo ni ka ikwano Baibul ki dwon malongo nyo ilwodo ki i cwinyi, ci ibimako moko i wii. Man bene bikonyi me keto cwinyi iye.

7. Cawa mene maber loyo me lwodo lok i kom Lok pa Lubanga? (Nen cal ma tye i pot karatac 27.)

⁷ Kadi bed ni kwan mito kero manok, ento lwodo lok mito keto cwiny muromo. Meno aye gin mumiyo adam wiwa pol kare mito tam i kom jami mayot yot keken ento pe matego. Pi meno, cawa maber me lwodo lok aye ka itye ka yweyo ki dok ka ma jami ma gidwoyo tammi nongo gipe iye. Laco jabuli onongo ni cawa maber me lwodo lok aye i dyewor ma nongo ebuto i wi kitandane dok wange twolo. (Jab. 63:6) Yecu, ma onongo pe ki roc-ci onongo ngeyo ber pa bedo ka ma oling mot wek elwod lok ki dok elegi.​—Luka 6:12.

8. (a) Mapat ki Lok pa Lubanga , ngo mukene ma waromo lwodo iye lok? (b) Jehovah winyo nining ma lubbe ki cawa ma wakwanyo me tito lok madok i kome?

⁸ Tamo i kom jami ma wakwanogi ki i Baibul obedo yo acel ma pire tek me lwodo lok ento bene tye yo mukene mapol. Me labolle, cung dok itam matut ka itye ka neno cwec. Man biweko i pako Jehovah pi jami ma en otimo piwa dok ibitito kit ma iwinyo kwede ka itye wun ki lawoti. (Jab. 104:24; Tic 14:17) Tika Jehovah ada paro dok cwinye bedo yom ka walwodo lok, walego ki dok watito lok i kome bot jo mukene? Lokke miniwa lagamme.  Ma lubbe ki kare man me agikki-ni, en ocikke ni: ‘I kare meno jo ma gilworo Jehovah guloko ki luwotgi; Jehovah otero ite, ci owinyogi. Gicoyo buk me po i kom jo ma yam gilworo Jehovah dok gilwodo lok i kom nyinge.’​—Mal. 3:16.

9. (a) Paulo owaco ni Temceo myero olwod lok i kom gin ango? (b) Wan watwero lubo tira pa Paulo-ni nining ka watye ka yubbe me cito i ticwa me pwony?

⁹ Lakwena Paulo owaco bot Temceo ni ‘olwod lok’ i kom kit ma lokke, kite, ki pwonye gudo kwede jo mukene. (Kwan 1 Temceo 4:12-16.) Calo Temceo, watye ki jami mapol me atima i yo me cwiny ma myero watam i komgi. Me labolle, mitte ni myero walwod lok ka watye ka yubbe me cito ka kwan ki latin kwan me Baibul. Ma lubbe ki latin kwan acel acel, waromo tam i kom lapeny nyo lapor mene ma watwero tic kwede me konyo latin kwan meno wek odong i yo me cwiny. Ka iyubbe kuman me kwan ki lutino kwanni me Baibul, ci niyeni bijing dok ibidoko lapwony maber ma pwonyo dano ki mit kom. Man bene rom aroma ka watye ka yubo cwinywa me cito i ticwa me pwony. (Kwan Ejira 7:10.) Kwano cura mo acel ki i buk me Tic pa Lukwena ‘bibuko’ mitiwa i ticwa me pwony lyel calo mac. Lwodo lok i kom tyeng mogo ma wabikwanogi kacel ki bukke ma wabimiyogi bikonyowa me tiyo ticwa me pwony. (2 Tem. 1:6) Tam i kom dano ma gitye i wang ticwu kacel ki lok ma romo tugo mitigi. Yubbe ma kit man bikonyowa me miyo caden i yo mucwiny kun ‘wanyuto cwiny maleng ki teko’ ma tye i Lok pa Lubanga.​—1 Kor. 2:4.

10. Kare macalo mene ma watye kwede me lwodo lok i kom jami me cwiny?

¹⁰ In tika i coyo jami mogo piny ka  kitye ka miyo pwony ma kiyubo pi lwak nyo ka watye i gure me nino acel ki dong gure madit? Wot wiye wiye i kom jami magi mini kare me lwodo lok ka nongo itamo i kom jami ma ipwonyogi ki i Lok pa Lubanga medo ki bot dulle. Ki bene, iromo kwano dok ilwodo lok i kom Wi Lubele ki Awake! manyen ma gibino dwe ki dwe medo ki jami mogo ma kicwalogi woko ki i gure madito. Ka itye ka kwano Yearbook, ling kong manok ka ikwano gin mo mutimme, tam iye dok iwek odony i cwinyi. Meno bimini kare me tam i kom gin ma ikwano-ni dok gudo cwinyi. Iromo ngolo te lok ma pire tek nyo itwero coc i nget bukki pien romo konyi ka itye ka yubbe me dok cen ka lim, cito i lim me kwat, nyo pwony mo ma ibimiyo i kare me anyim. Ma dong pire tek loyo aye ni ka i ling manok dok ilwodo lok kare ki kare ka itye ka kwano bukkewa ma gijenge i Baibul, man bimiyo gin ma i kwano-ni gudo cwinyi dok ipwoyo Lubanga i lega pi jami mabeco ma itye ka pwonyogi.

11. Gin ango ma pire tek ma myero walwod iye lok, ki dok pingo? (Nen bene lok ma tye i tere piny.)

¹¹ Tye ni, gin ma pire tek ma myero walwod iye lok aye obedo Lok pa Lubanga. Ento ket kong ni ka i nino mo acel kigengi ni pe ibed ki Baibul mo keken kono? * Pe kiromo gengo kero ni me lwodo lok i kom gin ma imako i wii calo wang Baibul ma imaro kacel ki nyig lok ma tye i buk werwa. (Tic 16:25) Dok bene cwiny maleng pa Lubanga twero poyo wii i kom jami mabeco ma dong ipwonyogi.​—Jon 14:26.

12. I yo acel mene ma iromo goyo kwede pulan me kwano Baibul nino ducu?

¹² Waromo kwanyo nino mogo me wek wakwan dok walwod lok i kom gin ma wakwano ki i Baibul pi cabit moni ma nongo kiketo iyub me Cukul me Tiokraci. Watwero tic ki nino mogo me lwodo lok i kom jami ma Yecu owaco ki dok otimogi. Ki lok ada, in bene iye ni i kin bukke me Baibul ma gingene loyo aye Jiri ma giloko i kom kwo kacel ki tic me pwony pa Yecu. (Rom. 10:17; Ibru 12:2; 1 Pet. 2:21) Lutic pa Lubanga komgi gum adada pien gitye ki buk mo ma tito kore ki kore kwo pa Yecu kacel ki jami mutimme i kome i kare ma en tye i lobo. Buk man twero bedo me kony madit adada tutwalle ka wakwano mot kidiro dok walwodo lok i kom Jiri ma tye iye.​—Jon 14:6.

13, 14. Pingo pire tek adada ni walwod lok i kom jami me cwiny, dok man bicuko cwinywa me timo gin ango?

¹³ Lwodo lok i kom jami me cwiny konyo ngat moni wek odok Lakricitayo muteggi i yo me cwiny. (Ibru 5:14; 6:1) Ngat ma tero cawa manok me lwodo lok i kom Jehovah gin Yecu pe bigwoko niyene bedo matek. Bedo yot bot dano ma kit meno me ngak nyo a woko ki i lok me ada. (Ibru 2:1; 3:12) Yecu ociko ni ka pe wawinyo nyo waye Lok pa Lubanga, ci pe ‘wabimako matek ki cwiny ma genne ki maber.’ Ma ka meno, ‘tam mapol, ki lim, ki yomcwiny me kwo man diyowa, nyigwa pe cek maber.’​—Luka 8:14, 15.

¹⁴ Pi meno, wamedde wunu ki lwodo lok i kom Lok pa Lubanga. Man bicuko cwinywa me nyuto deyo pa Jehovah, ki dong kite mabeco ma kicoyogi i Baibul.  (2 Kor. 3:18) Gin ango mukene ma waromo lega pire? Dongo ngecwa i kom Lubanga kacel ki bedo ki kare me nyuto deyone gubedo mot madit ki dong gin ma pe gik ka nongo wamedde ki pwonyo kit me poro Wonwa me polo.​—Latit. 3:11.

15, 16. (a) Adwogi maber ango ma wanongo ka walwodo lok i kom jami me cwiny? (b) Pingo i kine mukene lwodo lok tek, ento pingo omyero wadi cwinywa?

¹⁵ Ka wamedde ki lwodo lok i kom jami me cwiny, ci wabimedde ki nyuto mit komwa pi lok me ada. Pi meno, wabibedo jo ma kweyo cwiny omege ki lumege ki jo ma gitye ki miti ma wanongogi i ticwa me pwony. Lwodo lok i yo matut i kom ginkok pa Yecu, ma obedo mic madit ma Lubanga omiyo-ni, bikonyowa me tero wat macok ma tye i kinwa ki Jehovah calo gin ma pire tek. (Rom. 3:24; Yak. 4:8) Mark, ma a ki i Kupiny me Afrika dok kitweyo i buc pi mwaka adek pi bedo ngat ma pe cwako tung mo-ni, owaco ni: “Lwodo lok kiromo porone ki timo gin mo ma naka yam peya itimo ma keli yomcwiny. Ka walwodo lok i kom jami me cwiny, ci wabiniang jami mapol manyen madok i kom Jehovah Lubangawa. I kine mukene ka cwinya otur nyo aparo pi gin ma anyim, akwano Baibul ci alwodo lok i kom tyeng ma akwano ki i Ginacoya. Awinyo ni man kweyo cwinya adada.”

¹⁶ Ada, kwo i lobo man ma opong ki jami mapol ma dwoyo tamwa-ni weko lwodo lok i kom jami me cwiny tek adada. Ominwa mo acel ma nyinge Patrick ma lagen ma bedo i Afrika owaco ni: “Adam wiya obedo calo ka ma kibolo iye waraga ma opong ki ngec mapat pat, ma mukene gibeco ki mogo giraco ma myero kiyergi nino ducu. Ka angiyo jami ma tye i wiya, pol kare anongo ni “atamo pi jami mapol,” dok alego bot Jehovah pigi ma peya acako lwodo lok. Kadi bed ni man romo tero kare ma peya acako lwodo lok i kom jami me cwiny, anongo ni atye cok ki Jehovah. Man yabo wiya ma miyo aniang lok me ada i yo matir.” (Jab. 94:19) Ada, jo ducu ma ‘gingiyo ginacoya nino ducu’ dok gilwodo lok i kom gin ma gipwonyo ginongo adwogi maber.​—Tic 17:11.

17. In inongo cawa nining me lwodo lok?

¹⁷ Jo mukene gico odiko con me kwan, lwodo lok ki dong lega. Jo mogo gitimo man i cawa me cam me dyeceng. Iromo nongo ni itwero timone bene i otyeno nyo ma peya ibuto. Jo mukene gikwano Baibul odiko ki dong ma nongo peya gubuto. Pi meno, gibedo ‘ka kwanone dyeceng ki dyewor’ nyo kare ki kare. (Yoc. 1:8) Gin ma pire tek aye ni omyero wati ki cawa ma wabalo i timo jami mogo ma pigi pe tego wek walwod lok i kom Lok pa Lubanga.​—Ep. 5:15, 16.

18. Ngo ma Baibul waco ma lubbe ki jo ma gilwodo Lok pa Lubanga nino ducu dok giyelle me keto i tic gin ma gipwonyo?

¹⁸ Baibul ocikke ni Jehovah bigoyo laane i kom jo ma gilwodo lok i kom Lokke dok gitute matek me keto i tic gin ma gipwonyo. (Kwan Jabuli 1:1-3.) Yecu owaco ni, “Makato gitye ki gum [yomcwiny], jo ma giwinyo lok pa Lubanga, dok gigwoko!” (Luka 11:28) Ma dong pire tek loyo aye ni, lwodo lok i kom jami me cwiny nino ducu bikonyowa me keto deyo i kom Lacwecwa Madit ma ocweyo adamwa, dok en biminiwa yomcwiny i kareni ki dong kwo ma pe tum i lobo manyen ka ma kit matir bedo iye.​—Yak. 1:25; Yabo 1:3.